Nkonko ya babadi

Mupostolo Paulo wakamba ne: “Bena Isalele bonso nebasungidibue.” (Lomo 11:26) Uvuaku musue kuamba ne: bena Yuda bonso bavua ne bua kulua bena Kristo anyi?

Tòo, ki ntshivua Paulo musue kuamba to, bualu tshisamba tshia bana ba Abalahama tshiakabenga bua kuitaba ne: Yezu uvua Masiya. Bidimu biakalonda panyima pa lufu lua Yezu, biakamueneka patoke ne: bena Yuda bonso kabakalua bena Kristo to. Kadi tshivua Paulo muambe ne: ‘bena Isalele bonso bavua ne bua kusungidibua’ tshivua tshilelela. Mu mushindu kayi?

Yezu wakambila balombodi ba tshitendelelu bena Yuda ne: ‘Nebanunyenge bukalenge bua Nzambi, nebabupe tshisamba tshidi tshikuama mamuma abu.’ (Mat. 21:43) Bu muvua tshisamba tshia bena Isalele tshibenge Yezu, Yehowa uvua ne bua kusungula tshisamba tshipiatshipia tshienza ne bantu bela manyi a nyuma muimpe. Paulo wakatshibikila ne: “Bena Isalele ba Nzambi.”​—Gal. 6:16.

Mvese mikuabu ya mu Mifundu ya mu tshiena Greke idi ileja ne: “Bena Isalele ba Nzambi” mbena Kristo bela manyi a nyuma muimpe 144 000. (Lomo 8:15-17; Buak. 7:4) Buakabuluibua 5:9, 10 udi uleja ne: bantu bavua kabayi bena Yuda bavua ne bua kuikala pabu mu tshisamba etshi, bualu bena Kristo bela manyi mbafumine mu ‘tshisamba tshionso, mu muakulu wonso, munkatshi mua bantu bonso ne munkatshi mua ditunga dionso.’ Mbasungule bena Isalele ba Nzambi aba bua kuluabu ‘bukalenge ne bakuidi ne bobu badi bakokesha pa buloba.’ Nansha muvua Yehowa mubenge tshisamba tshivuaye musungule tshia bena Isalele, uvua wanyisha bamue ba kudibu bavua bapingane kudiye. Ke tshivua tshienzekele bapostolo ne bena Kristo bakuabu ba bungi ba kumpala. Nunku bena Yuda aba bavua ne bua kubasumba ku mashi a Yezu Kristo anu bu bantu bakuabu bonso.​—1 Tim. 2:5, 6; Eb. 2:9; 1 Pet. 1:17-19.

Nzambi kavua mupangile bua kukumbaja disua diende anu bualu bena Yuda ba bungi ba mu tshikondo tshia Yezu bakapangila diakalenga dia kukokesha nende to. Kabivua mua kuenzeka nansha kakese bualu Yehowa wakamba mukana mua muprofete wende ne: ‘Nunku dîyi didi dipatuka mukana muanyi nedikale muomumue; kadiena dipingana kundi patupu, kadiyi dianji kuenza muanda undi musue dienze, kadiyi dianji kushikija muanda ungakaditumina.’​—Yesh. 55:11.

Bidi nanku bua tshidi Nzambi mulongolole bua kusangisha bantu 144 000 bua kukokeshabu ne Muanende mu diulu. Bible udi uleja patoke ne: Nzambi uvua ne bua kuela bantu bonso 144 000 manyi. Kakuvua nansha umue uvua ne bua kupangila to.​—Buak. 14:1-5.

Nunku pavua Paulo mufunde ne: ‘Bena Isalele bonso bavua ne bua kusungidibua,’ kavua musue kuamba ne: bena Yuda bonso bavua ne bua kulua bena Kristo to. Kadi uvua musue kuamba ne: tshipatshila tshia Nzambi tshia kuikala ne bena Isalele bela manyi 144 000 bakokesha ne Muanende Yezu Kristo mu diulu tshivua ne bua kukumbana. Mu tshikondo tshidi Nzambi musungule, “bena Isalele bonso” nebasungidibue bua kukokesha mu Bukalenge bua Masiya bu bakalenge ne bakuidi.​—Ef. 2:8.

[Bimfuanyi mu dibeji 28]

Bela manyi mbafumine mu ‘tshisamba tshionso, muakulu wonso, bantu bonso ne ditunga dionso’