Udiku mudilongolole bua kumvuija malongesha etu anyi?

UKATUKU mupetangane ne nsombelu udi ukulomba bua kumvuija bantu malongesha etu anyi? Tangila tshivua tshifikile Susana, muanetu wa bakaji wa bidimu 16 wa mu ditunga dia Paraguay. Dituku dikuabu mu kalasa kabu, mulongi mukuabu wakamba ne: Bantemu ba Yehowa kabatu bitaba Dipungila Dikulukulu, Yezu Kristo anyi Mariya to. Wakamba kabidi ne: Bantemu badi mua kuitaba bua kufua pamutu pa kuya ku buanga. Ntshinyi tshiuvua mua kuikala muenze?

Susana wakasambila Yehowa ne kuelaye tshianza kulu. Kalasa kakavua pa kupatuka, ke yeye kulombaye mulongeshi dianyisha bua kuluaye kumvuija malongesha a Bantemu ba Yehowa. Mulongeshi wakitaba. Susana wakadilongolola munkatshi mua mbingu ibidi ku diambuluisha dia broshire wa Bantemu ba Yehowa​—Mbanganyi? Mmalu kayi adibu balongesha?

Pakakumbana dituku dia kumvuijaye malongesha etu, Susana wakaleja tshitudi bangatshile dîna dia Bantemu ba Yehowa. Wakakula kabidi bua ditekemena ditudi nadi bua matuku atshilualua ne bua tshinyi katuena tuitaba bua batuele mashi. Pashishe kuambilaye balongi bua bela nkonko. Balongi ba bungi bakela bianza kulu. Mulongeshi wakakema bikole bua kumvua muvua nsongakaji eu wandamuna nkonko ne Mukanda wa Nzambi.

Mulongi mukuabu wakamba ne: “Dituku dikuabu mvua muya ku Nzubu wa Bukalenge kadi tshiakamonamu tshimfuanyi nansha tshimue to.” Mulongeshi wakajinga kumanya bua tshinyi kamuvua bimfuanyi. Ke Susana kubabadila Musambu wa 115:4-8 ne Ekesode 20:4. Mulongeshi wakakema bikole wamba ne: “Kah! Bua tshinyi mu bietu bitanda mmule ntente ne bimfuanyi eku Bible mubikandike?”

Bakamuela nkonko munkatshi mua minite 40. Pakebeja Susana bua kumanya bikala balongi basue kutangila video wa Pas de sang: la médecine relève le défi, bonso bakitaba. Nunku mulongeshi wakalongolola bua bamone video au dituku divua dilonda. Pakajikijabu kumona video, Susana wakakula bua mishindu ya diondapangana dia kabayi belangana mashi itu bamue Bantemu ba Yehowa bitaba. Pakamona mulongeshi nanku, wakamba ne: “Tshivua mumanye ne: kutu mishindu ya diondapangana kakuyi mashi bungi nunku to; tshivua nansha mumanye buimpe buayi to. Idi anu bua Bantemu ba Yehowa anyi?” Pakumvuaye ne: kayena anu bua Bantemu, wakamba ne: “Kutuadija anu ku lelu, Bantemu ba Yehowa bobu balue kuanyi nenyikile nabu.”

Muyuki uvua Susana mulongolole bua kuenza mu minite 20 wakenza  mêba asatu. Panyima pa lumingu lumue, balongi bakuabu bakapita pabu bua kumvuija malongesha a mu ekeleziya yabu. Ku ndekelu, bakabela nkonko ya bungi, kadi bakapangila bua kuyandamuna. Ke mulongeshi kubakonka ne: “Mmunyi munudi nuenu kanuyi bamanye mua kumvuija malongesha enu bu muvua mulongi nenu Ntemu wa Yehowa mumvuije amu?”

Bakandamuna ne: “Bobu batu balonga Bible, tuetu katutu tumulonga to.”

Mulongeshi kutangilaye Susana ne kumuambila ne: “Nuenu nudi nulonga Bible bulelela ne nudienzeja bua kuenza tshidiye wamba. Nudi ba kuela kalumbandi.”

Susana uvua mua kushala mupuwe. Kadi, pakumvuijaye malongesha etu, wakalonda tshilejilu tshilenga tshia nsongakaji muena Isalele uvuabu bakuate ku bupika kudi bena Sulia. Nsongakaji au wakatuadija kuenza mudimu kua Namana mfumu wa basalayi bena Sulia uvua ne disama dibi dia dikoba. Kuambilaye mukaji wa mfumuende ne: ‘Bu mukalenge wanyi muikale ne muprofete udi mu Samalea, yeye wakadi kumuondopa disama diende dia nsudi.’ Nsongakaji au wakadiumvua ne: uvua anu ne bua kuakula bua Nzambi mulelela. Bualu ebu buakafikisha mfumuende Namana ku dilua mutendeledi wa Yehowa.​—2 Bak. 5:3, 17.

Bia muomumue, Susana kavua mua kudikanda bua kuakula bua Yehowa ne Bantemu bende to. Pakumvuijaye malongesha etu pavuabu batushiminyina malu, Susana uvua mutumikile mukenji wa mu Bible wa ne: ‘Nujidile Kristo mu mitshima yenu bu Mukalenge; nuikale badilongolole misangu yonso bua kukudimuna dîyi kudi muntu yonso udi unukonka bua muanda wa ditekemena didi munda muenu; kadi nuenze nunku ne kalolo ne ditshina.’ (1 Pet. 3:15) Udiku pebe mudilongolole bua kumvuija malongesha etu padi mushindu umueneka anyi?

[Tshimfuanyi mu dibeji 17]

Bintu ebi bidi mua kukuambuluisha bua kumvuija malongesha etu