Malu manene a mu mikanda ya Kolinto
Dîyi dia Yehowa didi ne muoyo
Malu manene a mu mikanda ya Kolinto
MUPOSTOLO Paulo uvua uditatshisha bikole bua tshisumbu tshia bena Kolinto. Uvua mumvue ne: bana betu bavuamu kabavua bapetangana to. Bantu bavua benda masandi kabayi babenza bualu. Bena mu tshisumbu bavua kabidi bafundile Paulo bajinga kumanya amue malu. Ke bualu kayi mu 55 pavua Paulo mu Efeso mu luendu luende luisatu, wakafundila bena Kolinto mukanda wende wa kumpala.
Bidi bimueneka ne: uvua mufunde mukanda wende muibidi panyima pa ngondo mikese bua kukumbaja ku wa kumpala. Malu adi mu mikanda ivua Paulo mufundile bena Kolinto adi ne mushinga wa bungi kutudi, bualu malu avua enzeka mu tshisumbu tshia bena Kolinto ne pambelu patshi mmafuanangane bikole ne adi enzeka lelu eu.—Eb. 4:12.
‘TABALAYI, KOLAYI, IKALAYI BAKOLE’
Paulo wakamba ne: ‘Buonso buenu nuambe dîyi diodimue.’ (1 Kol. 1:10) ‘Kakuena bishimikidi bikuabu’ bidi bena Kristo mua kukoleshila ngikadilu mimpe, anu ‘Yezu Kristo.’ (1 Kol. 3:11-13) Paulo wakamba bua muntu uvua muende masandi mu tshisumbu ne: ‘Umushayi muntu mubi au munkatshi muenu.’ (1 Kol. 5:13) Wakamba ne: ‘Mubidi kawenaku bua masandi kadi udiku bua Mukalenge.’—1 Kol. 6:13.
Paulo wakapesha bena Kolinto mibelu mimpe bua bantu badi mu mabaka ne batshidi bajike bua kuandamuna ku ‘malu akamufundilabu.’ (1 Kol. 7:1) Wakakula bua bumfumu mu tshisumbu tshia bena Kristo, bua mudi bisangilu ne bua kuenzeka mu bulongame ne wakabajadikila ne: bafue nebabike ku lufu. Pashishe kubabelaye ne: “Tabalayi, kolayi mu ditabuja, koleshayi mitshima, ikalayi bakole.”—1 Kol. 16:13, Muanda Mulenga Lelu.
Mandamuna a nkonko ya mu Bible:
1:21—Yehowa udiku usungila bantu badi bamuitabuja ne ‘bupote’ anyi? Tòo. Kadi bu mudi ‘ba pa buloba bapange kumanya Nzambi ku meji abu,’ bidiye wenza bua kusungila bantu bidi bimueneka bu bupote ku mêsu kuabu.—Yone 17:25.
5:5—‘Kufila muntu mubi kudi Satana bua kushipesha malu a mubidi bua nyuma wende asungidibue’ kudi kumvuija tshinyi? Padibu bipata muntu udi muenze mpekatu minene kayi munyingalale mu tshisumbu, udi ulua tshiakabidi muena mu bulongolodi bubi bua Satana. (1 Yone 5:19) Nunku tudi mua kuamba ne: mbamufile mu bianza bia Satana. Padibu bipata muntu, bidi biambuluisha bua kubutula anyi kumbusha malu mabi mu tshisumbu bua kutshilama.—2 Tim. 4:22.
7:33, 34—‘Bintu bia pa buloba’ bidi mulume anyi mukaji udi mu dibaka uditatshishila mbintu kayi? Paulo uvua wakula bua malu a mu nsombelu a ku dituku ne ku dituku adi bena Kristo badi mu dibaka mua kuditatshishila bu mudi: biakudia, bilamba ne nzubu. Kadi ki mmalu mabi a pa buloba ebu adi bena Kristo ne bua kuepuka to.—1 Yone 2:15-17.
11:26—“Mmisangu” bungi kayi itudi ne bua kuvuluka lufu lua Yezu, ne netuluvuluke ‘too’ ne dîba kayi? Paulo kavua musue kuamba ne: tudi ne bua kuvuluka lufu lua Yezu misangu yonso to. Muaku wa tshiena Greke udibu bakudimune ne: “Misangu yonso” udi umvuija “dîba dionso.” Nunku Paulo uvua musue kuamba ne: dîba dionso divua bena Kristo bela manyi badia diampa ne banua mvinyo musangu umue ku tshidimu mu dia 14 ngondo wa Nisana, bavua ne bua ‘kuambila bantu bua lufu lua Mukalenge.’ Bavua ne bua kuenza nunku ‘too ne paluaye,’ mbuena kuamba ne: pavuaye ne bua kubakidila mu diulu diakamue padibu babishibua ku lufu.—1 Tes. 4:14-17.
13:13—Mmunyi mudi dinanga dipite ditabuja ne ditekemena? Padi “malu atudi tutekemena” akumbana, ditabuja ne ditekemena kabiakuikala kabidi ne mudimu wa muomumue bu kumpala to. (Eb. 11:1) Dinanga ndipite ditabuja ne ditekemena bualu diodi didi dishalaku kashidi ne tshiendelele.
15:29—‘Kubatijibua bua bantu bafue’ kudi kumvuija tshinyi? Paulo kavua wakula bua bantu badi ne muoyo kutambula bua bantu bavua bafue kabayi batambule to. Udi wakula bua ditambula dia bena Kristo bela manyi bua kutuadijabu nsombelu mupiamupia udibu ne bua kuleja lulamatu too ne pafuabu ne pabishibuabu bua kuya mu diulu.
Malongesha adi atutangila:
1:26-31; 3:3-9; 4:7. Patudi tuditumbisha ne budipuekeshi mu Yehowa pamutu pa kuditumbisha tuetu bine tudi tupeta buobumue mu tshisumbu.
2:3-5. Pavua Paulo uyisha mu tshimenga tshia Kolinto tshivua ne bena malu a nkindi ne bantu bavua balonge bikole, uvua mua kuikala udiebeja ni uvua mua kufika ku dibatuisha. Kadi kakalekela butekete anyi buôwa bumupangisha bua kukumbaja mudimu uvua Nzambi mumupeshe to. Tuetu petu katulekedi ntatu itupangisha mua kuyisha lumu luimpe lua Bukalenge bua Nzambi to. Tudi mua kueyemena Yehowa ne kumulomba diambuluisha anu muakenza Paulo.
2:16. Kuikala ne ‘meji a Kristo’ nkumanya mushindu uvuaye wela meji ne tshivuaye uelela, kuela meji muvuaye wela, kumanya ngikadilu yende ne kumuidikija. (1 Pet. 2:21; 4:1) Nunku kulonga malu avua Yezu muenze mu nsombelu wende ne mudimu wende kudi ne mushinga wa bungi kutudi.
3:10-15; 4:17. Tudi ne bua kukonkonona mushindu utudi tulongesha ne tuvuija bantu bayidi ne pashishe kuulengeja. (Mat. 28:19, 20) Tuetu katuyi tulongesha bimpe, bantu batudi tulongesha badi mua kupanga mua kutantamena mateta ne bidi mua kutusama ku muoyo bikole ne netusungidibue bienze ‘anu bu muntu musambuke kapia.’
6:18. ‘Kunyema masandi’ kakuena kumvuija anu kunyema bienzedi bionso bia por·neiʹa to, kudi kabidi kumvuija kubenga kuenza malu onso adi mua kutufikisha ku dienda masandi bu mudi: kutangila bindindimbi bia bantu butaka, kunyanga lungenyi luetu ne malu mabi, kuela meji ku malu a masandi ne kusombeshangana bikole ne muntu uudi mumanye ne: kanuakuselangana nende to.—Mat. 5:28; Yak. 3:17.
7:29. Bantu badi baselangane badi ne bua kudimuka bua kabatambi kuditatshisha anu bua malu a mu dibaka diabu ne kulengulula malu a Bukalenge bua Nzambi.
10:8-11. Yehowa wakafika munda bikole pavua bena Isalele bajane Mose ne Alona. Mbimpe tuetu kudilama ku tshilele tshia kujanangana.
16:2. Bua tuetu kuikala ne tshibidilu tshia kufila makuta bua kukuatshisha mudimu wa Bukalenge, mbimpe tuikale tudianjila kualongolola.
“LENGEJIBUAYI TSHISHIKI”
Paulo wakambila bena Kolinto bua muntu uvua muenze bibi ne munyingalale bualu bavua bamubele ne: ‘bamulekelele bubi buende ne bamusambe.’ Nansha muvua mukanda wende wa kumpala mubabungamije, Paulo wakaleja muvuaye ne disanka bualu bavua ‘banyingalajibue too ne ku dikudimuna dia mitshima.’—2 Kol. 2:6, 7; 7:8, 9.
Paulo wakakankamija bena Kolinto bua ‘kuikala babanji mu difila dia bintu’ anu bu muvuabu ‘babanji mu malu onso.’ Panyima pa yeye mumane kuandamuna bantu bavua bamuluisha, wakafila mubelu wa ndekelu kudi bantu bonso ne: “Ikalayi ne bukole! Lengejibuayi tshishiki, koleshanganayi, umvuanganayi, ikalayi ne ditalala.”—2 Kol. 8:7; 13:11, MML.
Mandamuna a nkonko ya mu Bible:
2:15, 16—Mmunyi mutudi ‘dipembu dimpe dia Kristo’? Bualu tudi tutumikila malu adi mu Bible ne tuayisha bakuabu bantu. Nansha mudi malu aa mua kuikala bu adi endesha bantu babi ku muoyo, adi asankisha Yehowa ne bantu badi banange bulelela.
5:16—Mmunyi mudi bena Kristo bela manyi ‘kabayi bamanye bantu ku mibidi yabu’? Kabena batangila bantu bilondeshile mibidi yabu, mbuena kuamba ne: kabena benzela bakuabu bantu bimpe bualu mbabanji, bua dikoba diabu anyi tshisamba tshiabu to. Buabu bobu, malanda adibu nawu ne bena Kristo nabu ke adi ne mushinga wa bungi.
11:1, 16; 12:11—Paulo uvuaku mutshimbakane ku mêsu kua bena Kolinto anyi? Tòo. Kadi uvua mua kuikala umueneka kudi bakuabu bu muena lutambishi ne mutshimbakane bua malu avuaye wamba bua kujadika bupostolo buende.
12:1-4—Nganyi ‘wakabandishibua mu Mparadizu’? Bu mudi Bible kayi wakula bua muntu mukuabu uvua mupete tshikena-kumona tshia nunku ne bu mudi mvese eyi ilua panyima pa malu adi Paulo wamba bua kujadika bupostolo buende, uvua mua kuikala wakula buende yeye muine. Tshivua mupostolo mumone tshivua anu bu mparadizu wa mu nyuma udi bena mu tshisumbu tshia bena Kristo basombe mu ‘tshikondo tshia ku nshikidilu.’—Dan. 12:4.
Malongesha adi atutangila:
3:5. Mu kuamba kuimpe, mvese eu udi utuleja ne: Yehowa udi uvuija bena Kristo bakumbane bua kuyisha ku diambuluisha dia Dîyi diende, nyuma wende ne tshitupa tshia bulongolodi buende tshidi pa buloba. (Yone 16:7; 2 Tim. 3:16, 17) Ke bualu kayi mbimpe kulonga Bible ne mikanda idi imumvuija ne tshisumi, kusambila bikole bua kulomba nyuma wa Nzambi ne kubuela mu bisangilu bionso ne kuandamunamu.—Mus. 1:1-3; Luka 11:10-13; Eb. 10:24, 25.
4:16. Bu mudi Yehowa ‘uvuija mioyo yetu mipiamipia ku dituku ku dituku,’ tudi ne bua kudifila ku malu onso adi Yehowa utulongoluela, mbuena kuamba ne: katuena ne bua kupitshisha dituku katuyi benze bualu budi mua kukolesha malanda etu nende.
4:17, 18. Patudi tuvuluka ne: ‘dikenga dietu ndikese ne ndia tshitupa tshipi’ nebituambuluishe bua kushala balamate Yehowa patudi mu ntatu.
5:1-5. Paulo udi uleja mu mêyi malenga menemene mutu bena Kristo bela manyi bumvua bua ditekemena dia kuya mu diulu.
10:13. Padibu kabayi batutume bua kuambuluisha muaba kampanda udibu dijinga ne bamanyishi ba bukalenge, tudi ne bua kuyisha anu mu teritware wa tshisumbu tshietu.
13:5. Bua ‘kuditeta ni tudi ne ditabuja,’ tudi ne bua kufuanyikija bienzedi bietu ne malu atudi tulonga mu Bible. Bua ‘kudijadika,’ tudi ne bua kukonkonona bukole bua malanda etu ne Nzambi, kumona bikala ‘meji’ etu matue ne kumona bungi bua midimu itudi tuenza bua kuleja ditabuja dietu. (Eb. 5:14; Yak. 1:22-25) Patudi tutumikila mibelu ya Paulo, tudi mua kutungunuka ne kuendela mu njila wa bulelela.
[Tshimfuanyi mu mabeji 26, 27]
Ntshinyi tshidi mêyi a ne: ‘misangu yonso inuadia bidia ebi ne inuanua lupanza elu’ umvuija?—1 Kol. 11:26