Njikijilu wa kalasa ka Gilada ka 124

Bamisionere badi bu mikumbi

PANYIMA pa ngondo isambombo yonso, batu benza ndongamu wa njikijilu wa kalasa ka Gilada mutubu babikila bena mu dîku dia Betele wa mu États-Unis bonso. Mu dia 8 ngondo muisatu 2008, bantu bafuma mu matunga mapite pa 30 bakadisanga ne dîku dia Betele mu ndongamu wa njikijilu wa kalasa ka Gilada ka 124. Bantu 6 411 bavua babuelamu bakasanka pamue ne balongi mu dituku adi dia pa buadi.

Stephen Lett wa mu kasumbu kaludiki ke uvua mulombole ndongamu au, ne wakatuadija ne muyuki uvua wamba ne: “Ndayi kumpala pamue ne bantu ba Yehowa badi bu mikumbi.” Mu Buakabuluibua 9:1-4 badi bafuanyikija kasumbu ka bena Kristo bela manyi kavua katuadijilule mudimu wa Yehowa mu 1919 ne tshisumbu tshia mikumbi tshidi tshienda tshibutula bintu. Wakavuluija balongi ne: bu mudibu bantu ba mu “mikoko mikuabo” mbadisange ku tshisumbu tshia mikumbi.​—Yone 10:16.

Lon Schilling wa mu komite wa filiale wa mu États-Unis wakenza muyuki wakalonda uvua wamba ne: “Nuikale nuambuluishangana.” Uvua muimanyine pa tshilejilu tshia mu Bible tshia bena Kristo ba kale Akula ne mukajende Pisikila. (Lomo 16:3, 4) Mu kalasa aka muvua bana betu ba balume 28 ne bakaji babu. Bakabambila ne: bua kuenza mudimu wabu wa bumisionere bimpe, badi ne bua kulama dibaka diabu bimpe. Kakuena muaba udi Bible wakula bua Akula kayi utela mukajende Pisikila to. Nunku mupostolo Paulo ne bena mu tshisumbu bonso bavua babamona bu mukaba ne tshilamba. Bia muomumue lelu, bamisionere badi baselangane badi ne bua kuenza mudimu pamue, kutendelela pamue ne kutantamena ntatu idibu bapeta mu mudimu wabu pamue ne kuambuluishangana.​—Gen. 2:18.

Guy Pierce wa mu kasumbu kaludiki wakalonda ne muyuki uvua wamba ne: “Bua malu mimpe adi Yehowa munuenzele, enzayi malu mimpe.” Muanetu Pierce wakumvuija ne: kuikala muntu muimpe kakuena kumvuija anu kubenga kuenza malu mabi to. Kadi muntu muimpe udi wenzela bakuabu malu mimpe. Kakutu muntu muimpe kupita Yehowa Nzambi to. (Zek. 9:16, 17) Buimpe bua Nzambi ne dinanga diende bidi bitusaka bua kuenzela bakuabu malu mimpe. Yeye kujikija muyuki wende wela balongi kalumbandi, ubambila ne: “Nudi benze malu mimpe. Tudi bashindike ne: nenutungunuke ne kuenza malu mimpe mu miaba yonso yanutuma Yehowa Nzambi.”

Pashishe Michael Burnett (misionere wa kale udibu bateke mulongeshi mu kalasa ka Gilada matuku adi panshi aa) wakenza muyuki uvua wamba ne: “Nuateke bu tshivulukidi pankatshi pa mêsu enu.” Bena Isalele bavua ne bua kuvuluka bishima bivua Yehowa muenze bua kubapikula mu Ejipitu anu bu ne: bavua babiteke bu “tshivulukidi” pankatshi pa mêsu abu. (Ekes. 13:16) Muanetu Burnett wakabela balongi bua kuvuluka malu onso avuabu balonge  mu kalasa bienza anu bu ne: mbaateke bu tshivulukidi pankatshi pa mêsu abu. Wakabaleja mushinga wa kuikala kudipuekesha ne kutumikila mikenji ya mu Bible padibu bajikija bilumbu bidi mua kujuka pankatshi pa bamisionere nabu anyi ne bantu bakuabu.​—Mat. 5:23, 24.

Muanetu Mark Noumair ukadi mulongeshe mu kalasa aka kukadi bidimu bia bungi wakenza muyuki uvua wamba ne: “Nebakuimbile musambu kayi?” Ku kale bantu bavua bimba misambu pavuabu batshimuna mvita. Tshilejilu, kuvua musambu kampanda uvua uleja muvua bena mu tshisa tshia Lubena, tshia Dana ne tshia Ashê kabayi basue kudifila, kadi utumbisha bena Zebulona bua muvuabu badifila ne muoyo wabu mujima. (Bal. 5:16-18) Bienzedi bia muena Kristo yonso bitu bilua kumanyika kudi bantu bakuabu anu bu musambu. Tshisumi tshidi natshi muntu mu mudimu wa Nzambi ne ditumikila diende dia malu adi  bulongolodi bua Yehowa buamba nebisankishe Yehowa ne nebikale tshilejilu tshimpe kudi bena Kristo bakuabu. Padi bantu bakuabu mu tshisumbu bateleja musambu wa bienzedi bietu bimpe, nebalonde tshilejilu tshietu.

Mu malu avua bena mu kalasa ka 124 ne bua kuenza mu dilonga diabu, bavua kabidi bayishe mêba matue ku 3 000. Mu tshiena-bualu tshivua tshiamba ne: “Nulonde buludiki bua nyuma muimpe,” balongi bakalondela muanetu Sam Roberson (wa mu tshibambalu tshidi tshitangila malu a tulasa tua Nzambi) malu avuabu bapete mu buambi ne kuenzulula amue a kudiwu mu manaya. Pashishe muanetu Patrick LaFranca wa mu komite wa filiale wa mu États-Unis wakela bamisionere badi benza mudimu mu matunga mashilangane nkonko. Balongi bakasanka bikole bua mibelu ivua bana betu abu babapeshe.

Muanetu Anthony Morris wa mu kasumbu kaludiki wakenza muyuki uvua wamba ne: “Nuvuluke ne: bintu bidi bimueneka mbia tshitupa tshîpi.” Bible udi utulomba bua kuteka meji ku masanka adi Yehowa mutulaye pamutu pa kuimanyina pa ntatu ya tshitupa tshîpi itudi mua kupeta mpindieu. (2 Kol. 4:16-18) Bupele bukole, kansungasunga, dikengeshangana, masama ne lufu mmalu atudi tumona lelu. Malu aa adi mua kukuata nansha bamisionere. Kadi patudi tuvuluka ne: nga tshitupa tshîpi, nebituambuluishe bua kutungunuka ne kuteka Yehowa pa muaba wa kumpala mu nsombelu wetu ne kushala anu bamutekemene.

Ku ndekelu balongi bonso bakabanda ku tshiakuidi bua kuteleja mêyi a ndekelu a muanetu Lett. Wakabakankamija bua kabateketshi mu maboko wamba ne: “Bikala Yehowa netu kakuena lutatu ludi mua kutupita dikanda.” Wakabela bamisionere bapiabapia aba bua kuikala bu mikumbi, ne bua kutungunuka ne kuenza mudimu wa Yehowa ne tshisumi ne lulamatu ne kumutumikila kashidi ne tshiendelele.

[Kazubu mu dibeji 30]

MALU ADI ATANGILA BALONGI

Bungi bua matunga adibu bafumine: 7

Bungi bua matunga adibu babatume: 16

Bungi bua balongi: 56

Muayene wa bidimu: 33,8

Muayene wa bidimu mu bulelela: 18,2

Muayene wa bidimu mu mudimu wa bumpanda-njila: 13,8

[Tshimfuanyi mu dibeji 31]

Njikijilu wa kalasa ka Gilada ka 124

Mu liste udi kuinshi eku, mbabale milongo kutuadijila kumpala kuya panyima, ne mbafunde mêna kutuadijila ku dia bakaji kuya ku dia balume mu mulongo wonso.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Tshimfuanyi mu dibeji 32]

Kalasa ka Gilada katu kenzekela mu nzubu itu Bantemu ba Yehowa benzela tulasa tuabu tunene