Udi muvuluke anyi?

Dibala dia bibejibeji bia Tshibumba tshia Nsentedi bishale ebi divua dikusankishe anyi? Anji tangila ni udi mua kuandamuna nkonko idi ilonda eyi:

• Ntatu kayi minene itu bamue bena Kristo bapeta padibu babuela mu dibaka, ne ntshinyi tshidibu ne bua kuenza?

Bamue bena Kristo badi mua kumona ne: kabena bapetangana ne bena dibaka nabu mu malu a bungi to. Kadi bu mudibu bamanye ne: kabena mua kushipa dibaka bua bualu budi Bible kayi wanyisha, badi ne bua kuenza muabu muonso bua kulama dibaka diabu.​—15/4, dibeji 17.

• Ntatu kayi idi muena Kristo udi mu nzubu ya dilamina bakulakaje mua kupeta?

Imue misangu ki mmuibidilangane ne bena mu tshisumbu tshia muaba udi nzubu wa dilamina bakulakaje. Bantu ba bungi badi mu nzubu au badi mu bitendelelu bishilangane ne badi mua kumusaka bua kuenza malu a mu bitendelelu biabu. Balela bende bena Kristo ne bena mu tshisumbu tshia muaba udiye mpindieu badi ne bua kumanya ntatu eyi bua kumuambuluisha ne kumulama.​—15/4, dibeji 25-27.

• Mmalu kayi anayi adi mua kuambuluisha mulume ne mukajende bua kujikija bilumbu biabu?

Badi ne bua kusomba bua kuyukila bua bilumbu ebi. (Muam. 3:1, 7) Yonso wa kudibu udi ne bua kuleja patoke tshidiye wela meji ne kanemu konso. (Ef. 4:25) Badi ne bua kutelejangana bimpe ne kuditeka pa muaba wa mukuabu. (Mat. 7:12) Badi ne bua kupetangana pa tshidibu ne bua kuenza ne kudienzeja pamue bua kutshikumbaja. (Muam. 4:9, 10)​—1/7, dibeji 22-24.

• Mmabanza kayi avua Yezu mutuambile bua kusambila bua batulekele?

Patudi tufuanyikija Matayo 6:12 ne Luka 11:4, tudi tumona ne: Yezu kavua wakula bua mabanza a makuta to. Uvua wakula bua mibi. Tudi ne bua kufuila bakuabu luse anu mudi Nzambi utufuila petu luse.​—15/5, dibeji 9.

• Bena mu Kasumbu Kaludiki badi benza mudimu mu tusumbu kayi?

Kasumbu ka balombodi, kasumbu kadi katangila bena ku Betele, kasumbu kadi katangila dipatula dia mikanda, kasumbu kadi katangila mudimu wa kuyisha, kasumbu kadi katangila dilongesha ne kasumbu kadi katangila difunda.​—15/5, dibeji 29.

• Bavua benza bualu budibu batele mu Lomo 1:24-32 bavua bena Yuda anyi bantu ba bisamba bikuabu?

Diumvuija edi didi mua kukumbanyina bisumbu bionso bibidi, kadi mupostolo Paulo uvua wakula nangananga bua bena Isalele ba kale bavua babenge kulonda mikenji ya Mose munkatshi mua bidimu bia bungi. Bavua bamanye mikenji ya Nzambi, kadi kabavua bayitumikila to.​—15/6, dibeji 29.

• Bua tshinyi kudifundila malu atudi mua kukokesha kudi mua kutupesha disanka?

Bituikala tukeba mu mishindu yonso bua kuenza malu atudi katuyi mua kukokesha, tudi tudikebela ntatu. Kadi katuena ne bua kudiengeleka kutuadija kuenza mudimu mukese tudingidila mateketa etu to.​—15/7, dibeji 29.

• Ntshinyi tshidi mua kupangisha baledi bua kuyukila ne bana babu bakadi bitende?

Mmalu bu mudi: bundu budi nabu bana, dijinga dia kudienzela malu ne dia kusokoka baledi babu malu. Baledi badi mua kukeba mua kuyukila ne bana pa kusomba nabu ne kuteta mua kumanya malu adi munda muabu.​—1/8, dibeji 10-11 (tshia mu Mfwalansa).