Yehowa udi utabalela Bantemu bende bakulakaje

‘Nzambi kena upanga buakane bua kupuaye muoyo mudimu wenu ne dinanga dinuakaleja bua dîna diende.’​—EB. 6:10.

1, 2. (a) Paudi umona muntu udi ne nsuki mitoke, udi uvuluka tshinyi? (b) Mmunyi mudi Yehowa umona bena Kristo bakulakaje?

UTUKU uvuluka tshidi mukanda wa Danyele wamba pautu umona bakulakaje badi ne nsuki mitoke mu tshisumbu anyi? Yehowa Nzambi wakadileja muikale ne nsuki mitoke mu tshikena-kumona kudi Danyele. Danyele wakafunda ne: ‘Pangakadi ntangila, bakateka nkuasa ya bukalenge. Wa Kale wa Matuku a Bungi wakashikamapu. Bivualu biende biakadi bitoke too bu neige, ne nsuki ya ku mutu wende yakadi bu miosa ya mikoko.’​—Dan. 7:9.

² Pa tshibidilu, miosa ya mikoko itu anu mitoke. Nunku padibu bamba ne: Nzambi udi ne nsuki mitoke ne bamubikila ne: “Wa Kale wa Matuku a Bungi,” bidi bileja mudiye ne bidimu kabiyi kubala ne meji mapite bungi. Ke bualu kayi tudi ne bua kumunemeka bikole. Kadi mmunyi mudi Yehowa Wa Kale wa Matuku a Bungi umona bantu badi bamutendelela bimpe bakadi bakulakaje? Dîyi dia Nzambi didi diamba ne: ‘Nsuki mitoke too idi tshifulu tshia butumbi, nebatshipete mu njila wa buakane.’ (Nsu. 16:31) Tshimuenekelu tshia muena Kristo mukulakaje udi ne mvia anyi nsuki mitoke tshidi tshisankisha Nzambi. Utuku pebe umona bana betu bakulakaje bu mutu Yehowa ubamona anyi?

Tshitudi tubangatshila ne mushinga

3. Bua tshinyi bana betu bakulakaje badi ne mushinga?

³ Munkatshi mua bena Kristo bakadi bakulakaje mudi bana betu ba bakaji ne ba balume badi benzela Yehowa mudimu ne lulamatu mu bisumbu bietu bu mudi: bena mu Kasumbu Kaludiki ka Bantemu ba Yehowa, bantangidi bena ngendu ba kale ne ba lelu, bampanda-njila ba tshisumi ne bamanyishi ba bukalenge bashindame. Udi mua kuikala mumanye bamue bena Kristo badi bayisha lumu luimpe ne tshisumi kukadi bidimu bia bungi ne badi bikale tshilejilu tshimpe bua bansonga. Bamue bana betu bakulakaje badi ne majitu a bungi mu tshisumbu ne bakadi bamone mabika ne mala bua lumu luimpe. Yehowa ne bena mu kasumbu ka ‘mupika wa lulamatu ne wa budimu’ badi ne dianyisha dia bungi bua bionso bikadi bana betu aba benze ne bitshidibu benza mu mudimu wa Bukalenge.​—Mat. 24:45.

4. Bua tshinyi tudi ne bua kunemeka bena Kristo bakulakaje ne kubalombela Nzambi?

⁴ Tuetu bonso tudi ne bua kuikala ne dianyisha bua bana betu bakulakaje aba ne kubanemeka bikole. Mikenji ivua Nzambi mupeshe Mose idi ileja mudi ditshina dia Yehowa dipetangana ne dinemeka bakulakaje. (Lew. 19:32) Tudi ne bua kuikala tulombela bana betu aba Nzambi ne tumuela tuasakidila bua mudimu udibu benza ne dinanga. Mupostolo Paulo uvua ulombela benzejanganyi nende ba mudimu, bakulumpe ne bana Nzambi.​—Bala 1 Tesalonike 1:2, 3.

5. Mmunyi mudi kusomba ne batendeledi ba Yehowa bakadi bakulakaje mua kutuambuluisha?

⁵ Bena mu tshisumbu bonso badi kabidi mua kupeta malu mimpe padibu basomba ne bena Kristo bakulakaje. Malu akadi bana betu aba balonge, bamone ne batuilangana nawu mmabapeteshe dimanya dia bungi. Mbalonge mua kuikala ne lutulu ne kuditeka pa muaba wa bakuabu, ne padibu balongesha bakuabu malu adibu balonge aa bidi bibenza disanka. (Mus. 71:18) Nuenu bansonga, ikalayi ne meji  ne petelayi dimanya kudi bakulakaje aba anu bu mutu muntu utunta mâyi mu tshina tshile.​—Nsu. 20:5.

6. Mmunyi muudi mua kuleja bakulakaje ne: udi ubangata ne mushinga?

⁶ Utuku uleja bakulakaje ne: udi mubanange anu mutu Yehowa mubanange anyi? Udi mua kuenza nunku paudi ubambila muudi mubanange bua lulamatu luabu ne mibelu yabu. Udi uleja kabidi muudi ubanemeka paudi utumikila mibelu yabu. Bena Kristo ba bungi bakulakaje batu bavuluka mibelu mimpe ivua bakulakaje bakuabu babapeshe pabu patshivuabu bansonga ne muvuayi mibambuluishe mu nsombelu wabu mujima. *

Benzela malu adi aleja muudi mubanange

7. Mbanganyi badi Yehowa mupeshe bujitu bua kulama bakulakaje?

⁷ Nzambi mmupeshe bena mu mêku a bakulakaje bujitu bua kubalama. (Bala 1 Timote 5:4, 8.) Udi usanka padibu babalama ne baleja mudibu babanange anu bu mudiye pende mubanange. Nzambi udi ukuatshisha bena mu mêku aba ne ubabenesha bua bionso bidibu badipangisha bua kuambuluisha bakulakaje. *

8. Bua tshinyi bena mu tshisumbu badi ne bua kutabalela bena Kristo bakulakaje?

⁸ Yehowa udi kabidi usanka padi bena mu tshisumbu bambuluisha bakulakaje badi mu lutatu kadi kabayi ne balela babu bena Kristo anyi bikale ne balela badi kabayi basue kubambuluisha. (1 Tim. 5:3, 5, 9, 10) Padi bena mu tshisumbu bambuluisha bakulakaje, badi baleja mudibu ‘babasamba, babanange bu bana babu ba mu Kristo ne bikale ne mitshima ya luse’ kudibu. (1 Pet. 3:8) Paulo wakaleja mushindu udi bena mu tshisumbu batabalela bena Kristo nabu bakulakaje pakambaye ne: padi tshitupa tshimue tshia mubidi tshikenga, ‘bitupa bionso bidi bikenga natshi.’ (1 Kol. 12:26) Patudi tuambuluisha bena Kristo netu bakulakaje, tudi tuleja mutudi tutumikila mubelu wa Paulo wa ne: ‘Nuambuishangane majitu enu, nunku nutumikile mikenji ya Kristo.’​—Gal. 6:2.

9. Ntatu kayi idi bakulakaje nayi?

 ⁹ Ntatu kayi idi bakulakaje nayi? Ba bungi batu batshioka lukasa. Badi mua kumona ne: kuenza malu makese bu mudi kuya kua munganga, kubala mikanda idibu babatumina ne kuyandamuna, kulongolola mu nzubu ne kulamba nkubapite makanda. Bu mudi didia ne dinua bikepela padi muntu ukulakaja, badi mua kuela meji ne: kabena dijinga ne kudia anyi kunua mudibi bikengela to. Bidi mua kuikala muomumue bua kudilongela Bible ne kubuela mu bisangilu. Mêsu a bakulakaje ne matshi abu bidi mua kubafikisha ku dibala anyi ku diumvua ne lutatu, ne bidi mua kubakolela bua kudilongolola bua kuya mu bisangilu. Nunku ntshinyi tshidi bakuabu mua kubenzela?

Muudi mua kubambuluisha

10. Ntshinyi tshidi bakulu mua kuenza bua kuambuluisha bakulakaje?

¹⁰ Mu bisumbu bia bungi batu bambuluisha bakulakaje bimpe. Bana betu ba balume ne ba bakaji batu babambuluisha bua kuya mu tshisalu, kulamba ne kulongolola mu nzubu. Batu babambuluisha bua kulonga, kudilongolola bua kuya mu bisangilu ne kutungunuka ne kuyisha. Bansonga batu baya nabu mu bisangilu anyi mu buambi. Padi bakulakaje kabayi ne mushindu wa kupatuka pambelu, batu batelejila bisangilu ku telefone anyi babakuatshilabi mu bande. Padiku mushindu, bakulu badi ne bua kulongolola mishindu mimpe ya kuambuluisha bakulakaje badi mu tshisumbu tshiabu. *

11. Londa muvua bena mu dîku kampanda bambuluishe muanetu mukulakaje.

¹¹ Muena Kristo yonso udi pende mua kubikila bakulakaje kuende ne kubambuluisha. Tshilejilu, pavua muanetu mukuabu mukulakaje mufuishe mukajende, katshivua ukokesha mua kufuta nzubu bualu mbulamatadi wakalekela kufuta makuta a mukajende. Yeye ne mukajende bavua balongeshe tatu mukuabu ne mukajende ne bana babu babidi bavua ne nzubu munene Bible. Bakitaba bua kusombelaye kuabu. Bakasomba nende munkatshi mua bidimu 15, badia nende ne benza nende malu onso. Bana ba mu dîku adi bakapeta diakalenga dia kulongela malu a bungi ku ditabuja diende ne dimanya diende ne yeye pende uvua ne bantu ba kusomba nabu bimpe. Muanetu mukulakaje eu wakasomba nabu too ne muakafuaye ne bidimu 89. Bena mu dîku edi batshidi bela Nzambi tuasakidila bua masanka onso avuabu bapete mu disomba ne muanetu eu. Ki ‘mbapange difutu diabu’ bualu bavua bambuluishe muena Kristo nabu.​—Mat. 10:42. *

12. Ntshinyi tshiudi mua kuenza bua kuleja muudi munange bana betu bakadi bakulakaje?

¹² Kuena mua kuikala ne mushindu wa kuambuluisha bana betu bakulakaje bu muvua bena mu dîku edi benze to, kadi udi mua kubambuluisha bua kuya mu bisangilu ne kuyisha. Udi kabidi mua kubabikila kumbelu kuebe anyi kuya nabu mu luendu. Udi mua kuya kubatangila, nangananga padibu basama anyi kabayi mua kupatuka. Kuikadi ubangata bu bana batekete to. Patshidi bena Kristo bakulakaje bikale ne lungenyi luonso, mbimpe kuyukila nabu bua malu atudi basue kubenzela. Nansha bakulakaje bakadi bajimije lungenyi, batu bamona dîba didi bakuabu babanemeka.

Yehowa kakupua mudimu wenu muoyo

13. Bua tshinyi kunemeka mushindu udi bakulakaje badiumvua kudi ne mushinga?

¹³ Kunemeka mushindu udi bakulakaje badiumvua kudi ne mushinga. Bitu bibatonda bikole padibu bapangila mua kuenza malu onso avuabu benza patshivuabu ne bukole. Tshilejilu, muanetu wa bakaji mukuabu uvua muenzele Yehowa mudimu bidimu bitue ku 50 ne uvua mpanda-njila wa pa tshibidilu wakapeta disama divua ditekesha mubidi ne  ukavua ubuela mu bisangilu ne lutatu. Pavuaye ufuanyikija mudimu uvuaye wenza kale ne wa mpindieu, uvua udila wamba ne: “Tshitshiena ne bua nsongo bundi ngenza.”

14. Ndikankamija kayi didi bena Kristo bakulakaje mua kupetela mu mukanda wa misambu?

¹⁴ Biwikala mukulakaje, utuku unyingalala pebe nunku anyi? Peshi kudiku misangu iutu udiumvua ne: Yehowa mmukulekele anyi? Mufundi wa misambu uvua pende mudiumvue nanku pakakulakajaye, bualu wakalomba Yehowa ne: ‘Kungumushi kuudi mu tshikondo tshia bununu buanyi; kunshiyi patupu papanga bukole buanyi. Nzambi, kundekedi nansha, too ne ku bununu buanyi ne pangikala ne mvia.’ (Mus. 71:9, 18) Yehowa kavua mua kulekela mufundi wa misambu to, ne kakukulekela pebe to. Mu musambu mukuabu, Davidi wakaleja muvuaye mushindike ne: Nzambi neamukuatshishe. (Bala Musambu wa 68:19.) Ikala mushindike ne: wewe utungunuka ne kuenzela Yehowa mudimu ne lulamatu nansha muukadi mukulakaje, Yehowa udi nebe ne neatungunuke ne kukuambuluisha dituku dionso.

15. Ntshinyi tshidi mua kuambuluisha bakulakaje bua kubenga kuteketa ku muoyo?

¹⁵ Nzambi kena mua kupua malu onso anudi nuenu bakulakaje benze ne anutshidi nuenza bua butumbi buende muoyo nansha. Bible udi wamba ne: ‘Nzambi kena upanga buakane bua kupuaye muoyo mudimu wenu ne dinanga dinuakaleja bua dîna diende.’ (Eb. 6:10) Nunku kanuteketshi ku muoyo nuela meji ne: bu munukadi bakulakaje, kanuena ne mushinga ku mêsu kua Yehowa. Nudienzeje bua kumbusha tunyinganyinga tuenu ne nuikale nuela meji ku malu adi mua kunukolesha. Nuikale nusanka bua mabenesha anudi nawu mpindieu ne anudi batekemene. Mufuki wetu udi utujadikila ne: tudi ne ‘ditekemena mu matuku atshidi kumpala,’ ditekemena dimpe menemene. (Yel. 29:11, 12; Bien. 17:31; 1 Tim. 6:19) Elelayi meji pa ditekemena dinudi nadi, nudienzeje bua kushala bansonga mu muoyo wenu ne mu lungenyi, ne kanulenguludi mushinga unudi nawu mu tshisumbu to! *

16. Bua tshinyi muanetu mukuabu mukulakaje wakajinga kuimanyika mudimu wende wa bukulu, kadi mmunyi muvua bakulu nende bamuambuluishe?

¹⁶ Tuangate tshilejilu tshia Johan udi ne bidimu 80 ne udi ulama mukajende Sannie udi mulema mpindieu. * Bana betu ba bakaji badi bashintakana bua kulama Sannie bua bayende aye mu bisangilu ne mu buambi. Kadi matuku adi panshi aa, Johan wakadiumvua mupungile ne kutuadijaye kuela meji ne: katshivua mukumbane bua kuikala mukulu to. Wakebeja bakulu nende ne bisonji kuisu ne: “Ndi mukulu ku tshinyi? Tshitshiena ne mudimu wa nsongo undi ngenza mu tshisumbu.” Bakulu nende bakamujadikila ne: dimanya diende ne mibelu yende bidi ne mushinga wa bungi. Bakamusengelela bua kutungunuka ne kuikala mukulu nansha kayi wenza midimu ya bungi. Johan wakakola ku muoyo ne udi utungunuka ne kuikala mukulu udi wambuluisha tshisumbu.

Yehowa udi ubatabalela bimpe

17. Ntshinyi tshidi Bible ujadikila bena Kristo bakulakaje?

¹⁷ Bible udi uleja patoke ne: bakulakaje badi batungunuka ne kukuama mamuma mu mudimu wa Yehowa nansha mudibu ne ntatu ya bukulakaje. Mufundi wa misambu wakamba  ne: ‘Badi bakunyibua mu nzubu wa Yehowa nebakuame mamuma too ne mu bununu buabu, nebikale mitshi miule tente ne mâyi ne idi mibishi tshiendelele.’ (Mus. 92:13, 14) Mupostolo Paulo uvua mua kuikala pende ne lutatu lua ku mubidi kakateketa ku muoyo anyi ‘kakapanga nansha muvua mubidi wende ufuafua.’​—Bala 2 Kolinto 4:16-18.

18. Bua tshinyi bena Kristo netu bakulakaje ne bantu badi babalama badi dijinga ne diambuluisha?

¹⁸ Kudi bilejilu bia bungi bia matuku etu aa bidi bileja ne: bakulakaje badi batungunuka ne ‘kukuama mamuma.’ Kadi masama ne bukulakaje bidi mua kutekesha nansha aba badi ne mêku adi abambuluisha. Bantu badi balama bakulakaje badi pabu mua kupungila. Bena mu tshisumbu badi ne diakalenga ne bujitu bua kuambuluisha bakulakaje ne bantu badi babalama. (Gal. 6:10) Diambuluisha edi didi dileja ne: katuena tubambila bua baye ‘kuota kapia ne bukute,’ katuyi tubapesha kantu.​—Yak. 2:15-17.

19. Bua tshinyi bena Kristo bakulakaje badi ne lulamatu badi bindila matuku atshilualua ne dishindika dionso?

¹⁹ Bukulakaje budi mua kukepesha mudimu wa muena Kristo, kadi kabuena bufikisha Yehowa ku dikepesha dinanga didiye mumunange to. Kadi bena Kristo bakulakaje bonso badi ne lulamatu badi ne mushinga ku mêsu kuende ne kakubalekela nansha. (Mus. 37:28; Yesh. 46:4) Yehowa neatungunuke ne kubambuluisha ne kubalombola too ne pafuabu.​—Mus. 48:14.

[Mêyi adi kuinshi]

Newandamune munyi?

• Bua tshinyi tudi tuangata bena Kristo bakulakaje ne mushinga?

• Mmunyi mutudi mua kuleja mutudi banange bena Kristo netu bakadi bakulakaje?

• Ntshinyi tshidi mua kuambuluisha batendeledi bakulakaje ba Yehowa bua kubenga kuteketa ku muoyo?

[Nkonko ya dilonga]

[Bimfuanyi mu dibeji 18]

Bena mu tshisumbu badi bangata bakulakaje ne mushinga wa bungi