‘Longolola mutshima’ bua kuvudija dimanya dilelela

BANTEMU ba Yehowa bonso batu basue kumusankisha. Bua tuetu kumusankisha, tudi ne bua kulengeja ditabuja dietu ne kumuenzela mudimu wa tshijila ne tshisumi. Kadi mupostolo Paulo wakakoka ntema yetu ku njiwu kampanda ivua mifikile bena Yuda ba mu tshikondo tshiende. Wakamba ne: ‘Badi ne lukunukunu kudi Nzambi, kadi ki ndua lungenyi lulelela’ anyi dimanya dilelela to. (Lomo 10:2) Nunku ditabuja dietu ne ntendelelu wetu kabiena ne bua kuimanyina pa mushindu utudi tudiumvua to. Tudi ne bua kumanya Mufuki wetu bimpe ne kumanya disua diende.

Mu mvese mikuabu, Paulo wakamba mudi disankisha Nzambi dienda pamue ne dipeta dia dimanya dilelela. Wakasambila bua bena Kristo ‘buujibue tente ne kumanya’ kua disua dia Nzambi bua ‘bende mu bienzedi bidi biakanangane ne Mukalenge ku dimusankisha dionso’ ne bua ‘bakuame mamuma mu mudimu wonso muimpe, ne bua badiundadiunde mu kumanya kuabu kua Nzambi.’ (Kolos. 1:9, 10) Bua tshinyi kupeta ‘dimanya dilelela’ kudi ne mushinga wa bungi? Mmunyi mutudi mua kuvudija dimanya edi?

Nshindamenu wa ditabuja

Dimanya dilelela dia Nzambi ne dia disua diende didi mu Bible ke nshindamenu wa ditabuja dietu. Tuetu katuyi ne dimanya edi, ditabuja dietu nedikale anu bu kazubu ka bituta kadi mua kukuluka nansha ku lupepele lukese patupu. Paulo udi utukankamija bua kuenzela Nzambi mudimu wa tshijila ne ‘meji’ etu ne bua ‘kukudimuna meji etu’ bua alue mapiamapia. (Lomo 12:1, 2) Kuikala ne tshibidilu tshia kulonga Bible nekutuambuluishe bua kuvuija meji etu mapiamapia.

Tshilejilu, Ewa udi mpanda-njila wa pa tshibidilu mu ditunga dia Pologne udi wamba ne: “Bu meme tshiyi ne tshibidilu tshia kudilongela Bible, tshivua mua kumanya Yehowa bimpe menemene to. Buena Kristo buanyi buvua mua kunyanguka lukasa ne ditabuja dianyi divua mua kukepela; malanda anyi ne Yehowa avua mua kunyanguka.” Katuitabi bua bualu bua mushindu eu butuenzekele to. Tuangate tshilejilu tshia muntu uvua muvudije dimanya dia Yehowa ne kufikaye ku dimusankisha.

“Mona mundi munange mikenji yebe!”

Mêyi malenga adi mu Musambu wa 119 mu Bible yetu adi aleja muvua mufundi udiumvua bua mikenji ya Yehowa ne mêyi ende. Wakafunda ne: ‘Nendisankishe mu mikenji yebe mifunda. Mêyi ebe awakammanyisha adi disanka dianyi.’ Wakafunda kabidi ne: ‘Mona mundi munange mikenji yebe! Ndi ngelangana meji bualu buayi.’​—Mus. 119:16, 24, 47, 48, 77, 97.

Miaku ‘disanka’ ne ‘kuelangana meji’ idi yumvuija kuikala ne disanka dia kuelangana meji pa Dîyi dia Nzambi. Idi ileja patoke muvua mufundi wa misambu munange kulonga mikenji ya Nzambi. Dinanga adi kadivua tshintu tshia patupu tshivua mufundi umvua munda muende to. Kadi uvua ne dijinga dikole dia ‘kuelangana meji’ bua mikenji ya Yehowa bua kupeta dijingulula dia mêyi ende. Bidi bimueneka ne: uvua musue kumanya Nzambi ne disua diende bimpe menemene.

Bidi bimueneka patoke ne: mufundi wa misambu uvua munange Dîyi dia Nzambi ne muoyo wende mujima. Tudi mua kudiebeja ne: ‘Ke mundi panyi munange Dîyi dia Nzambi anyi? Dibala ne dikonkonona dia mvese ya mu Bible dituku dionso dituku dinsankisha anyi?  Ntuku ndienzeja bua kubala Dîyi dia Nzambi ne nsambila kumpala kua kudibala anyi?’ Mushindu utudi tuandamuna ku nkonko eyi udi mua kuleja mutudi tuenda ‘tudiundadiunda mu kumanya kua Nzambi.’

Ewa udi wamba ne: “Ntu ndienzeja misangu yonso bua kulengeja mushindu undi ndilongela. Katshia ngapeta broshire wa ‘Voyez le bon pays’, ntu mmutangila misangu yonso indi ndilongela. Ntu kabidi ngenza makebulula mu mukanda wa Étude perspicace des Écritures ne mu mikanda mikuabu padibi bikengela.”

Tuangate kabidi tshilejilu tshia Wojciech ne mukajende Małgorzata badi ne bujitu bua bungi mu dîku diabu. Ntshinyi tshidibu benza bua kupeta dîba dia kudilongela? Badi bamba ne: “Muntu ne muntu udi ukeba dîba didiye mua kudilongela Dîyi dia Nzambi. Pashishe patudi tulonga mu dîku anyi mu miyuki yetu, tudi tuambilangana malu mimpe atuvua bapete mu didilongela dietu.” Didilongela ndibapeteshe disanka ne ndibambuluishe bua ‘kudiunda mu kumanya kuabu kua Nzambi.’

Longolola mutshima webe bua kulonga

Tuetu bena Kristo tudi tuitabuja ne: Nzambi mmusue bua “bantu bonso basungidibue, bafike ku dimanya dia malu malelela.” (1 Tim. 2:3, 4) Bualu ebu budi buleja mushinga udi nawu dibala dia Bible ne didienzeja bua ‘kujingulula’ bitudi tubala. (Mat. 15:10, Muanda Mulenga Lelu) Bua tuetu kufika ku dienza nunku, tudi ne bua kulongolola mutshima wetu bua kuitaba bitudi tulonga. Ke tshivua bena Beloya benza pavua Paulo mubayishe lumu luimpe. Bible udi wamba ne: ‘Bakitabuja dîyi ne mitshima mimane kulongolola; bakadi badikebela mu Mukanda wa Nzambi ku dituku ku dituku ne: Malu aa adi malelela anyi?’​—Bien. 17:11.

Udiku ulonda tshilejilu tshia bena Beloya tshia kulongolola mutshima webe ne udienzeja bua kuepuka malu adi mua kukupangisha bua kudilongela bimpe anyi? Muena Kristo udi mua kudienzeja bua kuidikija bena Beloya nansha bikalaye uvua umona kudilongela kumutonda kale. Bantu bakuabu kabidi batu bakepesha dibala ne didilongolola padibu benda bakulakaja, kadi kabiena nanku bua bena Kristo to. Nansha muntu muikale ne bidimu bungi kayi, udi mua kudienzeja bua kuepuka malu adi mua kumupangisha bua kudilongela bimpe. Paudi wenda ubala, udi mua kukeba malu mimpe audi mua kuambila bakuabu. Tshilejilu, udi mua kudienzeja bua kuambila bayebe anyi mukajebe anyi muena Kristo nebe mukuabu malu auvua mubale anyi mulonge. Kuenza nunku nekukufikishe ku dilama malu au mu lungenyi luebe ne kuambuluisha bakuabu.

Paudi udilongela, londa tshilejilu tshia Ezela mutendeledi wa Nzambi wa kale uvua udianjila kulongolola anyi ‘ujadika mutshima wende bua kukeba mikenji ya Yehowa.’ (Eze. 7:10) Mmunyi muudi pebe mua kuenza nunku? Udi mua kukeba muaba uudi mua kulonga bimpe. Pashishe nsomba ne nsambila Yehowa bua akulombole ne akupeshe meji. (Yak. 1:5) Udiebeje ne: ‘Ntshinyi tshindi nkeba pandi ndilongela apa?’ Paudi wenda ubala, ikala utabalela ngenyi minene. Udi mua kuyifunda anyi kuenza bimanyinu miaba iudi musue kuvuluka. Ela meji pa mushindu udiyi mua  kukuambuluisha paudi uyisha, wangata mapangadika anyi ubela bena Kristo nebe. Paudi ufika ku ndekelu kua dilonga diebe, enza diambulula dia biudi mulonge. Nebikuambuluishe bua kubikuata.

Ewa udi umvuija mutuye ulonga wamba ne: “Pandi mbala Bible, ntu mbala kabidi mvese idibu balayidile munkatshi mua dibeji, ntangila mu Index des publications ne Watchtower Library pa ditadi dia CD-ROM. Ntu mfunda malu adi mua kungambuluisha mu mudimu wa kuyisha.”

Bamue bena Kristo batu bapete disanka dia kudilongela ne muoyo mujima ne mbadifile mu kumanya kua malu a Nzambi. (Nsu. 2:1-5) Kadi badi ne majitu a bungi ne badi ne lutatu lua kupeta dîba dia kudilongela. Bikalabi nanku buebe wewe, ntshinyi tshiudi mua kuenza?

Mmunyi mundi mua kupeta dîba?

Tuetu bonso tutu bamanye ne: mbitekete bua kupeta dîba dia kuenza malu atu atusankisha. Bena Kristo ba bungi mbamone ne: tshidi mua kubambuluisha bua kudilongela bimpe, nkudifundila bipatshila bimpe bu mudi kubala Bible mujima. Bidi mua kumueneka bikole bua kubala mulongolongo wa mêna a bankambua ba muntu kampanda, diumvuija dia kalu ne kalu konso ka ntempelo wa kale anyi milayi mikole idi imueneka bu idi kayiyi yakula bua nsombelu wetu wa dituku dionso. Dienzeje bua kuenza malu adi mua kukufikisha ku dikumbaja tshipatshila tshiebe. Tshilejilu, kumpala kua kubala nshapita kampanda wa mu Bible udi umueka mukole, udi mua kuanji kubala malu adi atangila tshitupa tshiudi ubala atshi anyi mushindu udi bualu abu bukutangila. Udi mua kupeta malu aa mu mukanda wa “Toute Écriture est inspirée de Dieu et utile,” udi mu miakulu mitue ku 50.

Bitu kabidi bimpe bua kufuanyikija malu audi ubala mu Bible mu lungenyi luebe. Nebikuambuluishe bua kumona muvua bantu mua kuikala ne kumona muvua malu menzeke. Wewe mulonde mibelu mikese eyi, dilonga diebe nedikusankishe ne nedikupeteshe malu mimpe. Nunku kuakumvua bikutonda bua kudilongela to. Nebikale bipepele bua kulama tshibidilu tshia kubala Bible dituku dionso.

Nansha mudi mibelu idi kulu eyi mua kuambuluisha muntu pa nkayende, ntshinyi tshidi  bena mu dîku badi ne midimu ya bungi ne bua kuenza? Badi mua kusomba pamue ne kuyukila bua kumona masanka adibu mua kupeta padibu balonga mu dîku. Mu diyukidilangana diabu adi badi mua kupeta ngenyi ya mushinga bu mudi: kubika kumpala kua dîba dituku dionso anyi amue matuku bua kubala Bible. Peshi diyukidilangana adi didi mua kubambuluisha bua kuakaja ndongamu wabu wa mu dîku. Tshilejilu, bena mu mêku makuabu mbamone ne: mbimpe kukonkonona mvese wa ku dituku anyi kubala Bible padibu bajikija kudia. Kumpala kua kumbushabu bintu ku mesa anyi kujuka bua kuenza midimu mikuabu, badi banji kukonkonona mvese wa ku dituku anyi babala Bible mu minite 10 anyi 15. Ku ntuadijilu bidi mua kuikala bikole, kadi padi matuku apita, bidi bilua tshibidilu ne bibenza disanka.

Wojciech ne mukajende Małgorzata badi bumvuija tshivua tshiambuluishe dîku diabu bamba ne: “Ku kale, tuvua tupitshisha dîba dietu ku midimu ya tshianana. Tuakangata dipangadika dia kukepesha dîba dituvua tufundilangana mikanda ku Internet. Tuakakepesha kabidi dîba dituvua tujikija lutetuku ne tuetu kusungula dituku dituvua mua kulonga bimpe mu dîku.” Kakuyi mpata, bena mu dîku edi kabena banyingalala bua mudibu bashintulule ndongamu wabu. Nudi penu mua kupeta disanka dia buena edi mu dîku dienu.

Kuvudija dimanya dilelela kudi ne mushinga

Kulonga Dîyi dia Nzambi ne muoyo mujima kudi mua kuambuluisha muntu bua ‘kukuama mamuma mu mudimu wonso muimpe.’ (Kolos. 1:10) Paudi wenza nunku, bantu bonso nebamone muudi wenda uya kumpala. Newikale muntu udi mumanye malu a mu Bible bimpe. Newikale wangata mapangadika mimpe ne newikale wambuluisha bantu bimpe kuyi unekesha malu bu mutu bantu badi kabayi ne dimanya. Kadi neutambe kulengeja malanda ebe ne Yehowa. Neutambe kumanya ngikadilu yende ne nebimueneke paudi wambila bantu malu ende.​—1 Tim. 4:15; Yak. 4:8.

Nansha wewe muikale ne bidimu bungi kayi, anyi ne dimanya bungi kayi, udienzeje bua kutungunuka ne kuanyisha Dîyi dia Nzambi ne kudifila mu didilongela ne mutshima mumana kulongolola. Ikala mushindike ne: Yehowa kakupua bionso biudi wenza muoyo to. (Eb. 6:10) Neakubeneshe bikole.

[Kazubu mu dibeji 13]

PATUDI ‘TUVUDIJA DIMANYA DILELELA’. . .

Tudi tukolesha ditabuja dietu ne tuenda mu bienzedi bidi biakanangane ne Yehowa.​—Kolos. 1:9, 10

Tudi tupeta bujinguludi ne tuangata mapangadika mimpe.​—Mus. 119:99

Tudi tupeta disanka dia bungi dia kuambuluisha bakuabu bua kudia malanda mimpe ne Yehowa.​—Mat. 28:19, 20

[Bimfuanyi mu dibeji 14]

Bidi mua kuikala bikole bua kupeta kaba kimpe ka kudilongela, kadi bidi ne mushinga

[Tshimfuanyi mu dibeji 15]

Bena mu mêku makuabu batu babala Bible padibu bajikija kudia