Tuidikije Yezu pa kutendelela Nzambi mudiye musue

Nzambi udi ubikila bantu ba ‘mu ditunga dionso, bisamba bionso, bantu bonso ne miakulu yonso’ bua kumutendelela. (Buak. 7:9, 10; 15:3, 4) Bantu badi balua kudiye badi ‘bamona buimpe bua Yehowa.’ (Mus. 27:4; 90:17) Anu bu mufundi wa misambu badi batumbisha Nzambi bamba ne: ‘Tumutendelele ne tumukukuile; tutue binu bietu panshi kumpala kua Yehowa Mufuki wetu.’​—Mus. 95:6.

Ditendelela divua Yehowa muanyishe

Yezu Muana mulela umue wa Nzambi wakalonga mua kumanya meji a Tatuende ne mikenji yende. Nunku yeye ke udi mua kutuleja mushindu muimpe wa kutendelela Nzambi. Wakamba ne: ‘Meme ndi njila ne bulelela ne muoyo; kakuena muntu udi ulua kudi Tatu, kayi muanji kulua kundi diambedi.’​—Yone 1:14; 14:6.

Yezu mmutushile tshilejilu tshimpe tshia ditumikila Tatuende ne didipuekesha dionso. Wakamba ne: ‘Tshitu ngadienzela bualu, kadi ntu ngamba anu malu akunyisha Tatu.’ Wakamba kabidi ne: “Matuku onso ntu ngenza malu adi amusankisha.” (Yone 8:28, 29) Mmu mushindu kayi muvua Yezu musankishe Tatuende?

Yezu uvua munange Tatuende ne muoyo mujima ne ke tshidi kutendelela Nzambi kumvuija. Wakaleja muvuaye munange Tatuende pavuaye umutumikila, wenza disua diende nansha bia kumona lufu. (Filip. 2:7, 8) Bualu bunene  buvua Yezu wenza mu ntendelelu wende buvua bua kudifila mu mudimu wa kuvuija bantu bayidi. Ke bualu kayi bantu bonso bavua bamubikila ne: Mulongeshi anyi Muyishi. (Mat. 22:23, 24; Yone 3:2) Wakadifila kabidi bikole bua kuambuluisha bantu bakuabu. Malu avuaye wenza bua kuambuluisha bakuabu avua amuangata dîba dia bungi, kadi uvua anu ne disanka dia kubambuluisha. (Mat. 14:13, 14; 20:28) Nansha muvuaye ne mudimu wa bungi wa kuenza, uvua anu ne dîba dia kusambila Tatuende wa mu diulu. (Luka 6:12) Kakuyi mpata, Nzambi wakanyisha ntendelelu wende bikole.

Tudi ne bua kudienzeja bua kusankisha Nzambi

Yehowa wakamona ngikadilu milenga ya Muanende ne wakaleja muvuaye umusankisha. (Mat. 17:5) Satana Diabolo uvua pende mumone muvua Yezu munange Nzambi. Ke kumukinaye too ne muabu uvuaye wendela. Bua tshinyi? Bualu muntu nansha umue kavua muanji kutumikila Nzambi mu malu onso ne mumutendelele mu mushindu uvua umusankisha to. Nunku Diabolo wakakeba bua kupangisha Yezu bua kutendelela Yehowa, utudi tuetu bonso ne bua kutendelela.​—Buak. 4:11.

Satana wakaya kudi Yezu bua kumuteta. Wakangata Yezu kuya nende ‘ku mutu kua mukuna wakadi mule be, wakamuleja makalenge onso a pa buloba ne butumbi buawu.’ Pashishe kumuambilaye ne: ‘Nenkupe bintu ebi bionso, biwatua binu biebe panshi, biwankukuila.’ Yezu wakenza tshinyi? Wakamuambila ne: ‘Satana, umuka; bualu bua bakufunda dîyi ne: Kukuila Mukalenge Nzambi webe, umuenzele yeye nkayende mudimu.’ (Mat. 4:8-10) Yezu uvua mumanye ne: nansha bu yeye mua kupeta tshinyi, kutuila Satana binu kuvua nkumutendelela. Kavua musue kuenza tshintu nansha tshimue bua kutendelela muntu mukuabu pa kumbusha Yehowa to.

Satana kena mua kutulaya bua kutupesha makalenge a pa buloba ebu ne butumbi buawu bua tuetu kuitaba bua kumutendelela to. Kadi udi wenza muende muonso bua kupangisha bena Kristo balelela bua kutendelela Nzambi mu mushindu muimpe. Diabolo mmusue bua tutendelele muntu mukuabu anyi tshintu tshikuabu.​—2 Kol. 4:4.

Kristo Yezu wakashala ne lulamatu too ne ku lufu. Nunku wakatumbisha Yehowa mu mushindu uvua muntu nansha umue kayi muanji kumutumbisha to. Lelu tuetu bena Kristo tudi tudienzeja bua kumuidikija patudi tuteka ntendelelu wa Mufuki wetu kumpala kua malu onso. Kakuena tshintu tshidi tshipite kuikala mu malanda mimpe ne Nzambi wetu.

Masanka atudi tupeta patudi tutendelela Nzambi mudiye musue

Kutendelela Nzambi mu mushindu udi kauyi ‘munyanguke ku mêsu kuende’ kudi kutupetesha masanka a bungi. (Yak. 1:27) Tshilejilu, tudi mu tshikondo tshidi bantu  ba bungi “badisui, banangi ba biuma, baditumbishi” ne ‘kabayi basue malu mimpe.’ (2 Tim. 3:1-5) Kadi tuetu badi batendelela Nzambi mulelela, tudi ne diakalenga dia kudisangisha ne bantu bimpe badi badienzeja bua kutumikila mikenji yende bua kumutendelela. Kabienaku bitusankisha anyi?

Patudi katuyi tubuelakana mu malu a pa buloba ebu, tudi tupeta disanka dikuabu dia kuikala ne kondo ka muoyo kimpe. Tudi basue kulama kondo ka muoyo kimpe patudi tutumikila mikenji ya Nzambi ne patudi tutumikila mikenji ya Kaisa idi kayiyi ibengangana ne ya Nzambi.​—Mâko 12:17; Bien. 5:27-29.

Kutendelela Nzambi ne muoyo mujima kudi kabidi kutupetesha masanka makuabu. Patudi tudienzeja bua kuenza disua dia Nzambi pamutu pa dietu, nsombelu wetu udi ulengela. Pamutu pa kuamba ne: “Tudie bietu, tunue bietu, bualu bua makelela tufuafua,” tuetu tudi bindile ne muoyo kulu kulu muoyo wa tshiendelele mu mparadizu pa buloba.​—1 Kol. 15:32.

Mukanda wa Buakabuluibua udi wakula bua tshikondo tshikala bantu badi basankisha Yehowa ne bua ‘kumuka mu dikenga dinene.’ Tudi tubalamu ne: ‘Udi ushikama mu nkuasa wende wa butumbi neashimike nzubu wende wa tshilulu pa mutu pabu.’ (Buak. 7:13-15) Yehowa Nzambi mutambe bunene wa diulu ne buloba ke udi musombe mu nkuasa wa butumbi eu. Anji tshinkabi disanka diwikala nadi pakuakidilaye mu ntenta wende, ukulama bua bualu bubi nansha bumue kabukuenzekedi! Nansha lelu eu udi kabidi utulama mu mushindu kampanda.

Bible udi kabidi utuambila ne: nebalombole bantu bonso badi batendelela Nzambi mu mushindu udiye musue ku ‘mishimi ya mâyi a muoyo.’ Mâyi mimpe aa adi aleja malu onso adi Yehowa mutulongoluele bua tuetu kufika ku dipeta muoyo wa tshiendelele. Bushuwa, ku diambuluisha dia mulambu wa Kristo, ‘Nzambi neakupule tshinsonji tshionso ku mêsu kuetu.’ (Buak. 7:17) Neavuije bantu bapuangane ne bualu ebu budi busankisha bantu badi ne ditekemena dia kusomba kashidi pa buloba. Nansha mpindieu, batendeledi ba Nzambi badi bela mbila ya disanka bua kuleja dianyisha didibu nadi kudi Yehowa ne bua kumutendelela pamue ne bantu badi bimba mu diulu ne: ‘Mukalenge Nzambi wa Bukole Buonso, midimu yebe idi minene ne ya dikema. Wewe, Mukalenge wa bikondo, njila yebe idi miakane ne ya bulelela. Mukalenge, nganyi udi kayi utshina, udi kayi utumbisha dîna diebe? Bualu bua wewe nkayebe udi wa tshijila; bualu bua ba mu bisamba bionso nebalue ne nebakukuile kumpala kuebe; bualu bua bienzedi biebe biakane biakumueneshibua.’​—Buak. 15:3, 4.

[Tshimfuanyi mu dibeji 27]

Ntshinyi tshidi Satana utulaya bua tuitabe bua kumutendelela?