Tuyishayi mu bisalu

PAVUA mupostolo Paulo mu tshimenga tshia Atena, uvua uya dituku dionso mu tshisalu bua kuyisha bantu lumu luimpe lua Yezu Kristo. (Bien. 17:17) Uvua utamba kuyisha mu tshisalu bualu ke muvua bena Atena batamba kupitshisha dîba dia bungi.

Bidimu bitue ku 2 000 bimane kupita, Bantemu ba Yehowa batshidi bayisha lumu luimpe lua Bukalenge bua Nzambi mu bisalu. Bua tshinyi? Bualu ke muaba udibu mua kupeta bantu ba bungi. Lelu, tshisalu tshidi mua kuikala miaba yonso idibu bapanyishila bintu bu mudi miaba idi magazin a bungi. Bamue Bantemu batu balomba kaba anyi katanda kudi mfumu wa tshisalu bua kulonga mikanda idi yakula bua malu a mu Bible.

Tshilejilu, mu tshisalu kampanda tshia mu New Jersey (mu ditunga dia États-Unis) bana betu bakateka mikanda ivua yakula bua mushindu wa kulama nsombelu muimpe mu dîku pa katanda. Ntshinyi tshiakenzeka? Bakabanya mikanda 153 ya mu miakulu isambombo mu dituku dimue patupu.

Mamu mukuabu wakasemena muaba uvua mikanda ne kutelejaye ne ntema tshivua umue wa ku Bantemu umuambila. Mamu au wakitaba ne: mbimpe tuetu bonso tutumikile mibelu ya Nzambi mu mêku etu. Kuangataye mukanda wa Longa malu kudi Mulongeshi Munene, wa Nsapi wa disanka mu dîku ne wa Les jeunes s’interrogent—Réponses pratiques.

Mu mapingaja, tatu mukuabu kupitshila pende muaba au pavuaye ukeba kubuela mu magazin avua kumpenga aku. Kumonaye mukanda wa Les jeunes s’interrogent. Muanetu wa bakaji uvua muaba au kumonaye muvua tatu au katshia anu watangila mikanda. Kumuebejaye ne: “Kudi mukanda udi ukusankisha  muaba eu anyi?” Tatu kushikula mutu, kufunkunaye mukanda wa Les jeunes s’interrogent. Muanetu au kumupeshaye mukanda ukavuaye usua kuambula. Tatu kuambaye mudiye ne bana basatu. Pavuabu benda bayukila, kuambaye mutuye uyukila nabu musangu umue ku lumingu. Bana bende babidi bakadi ne bidimu dikumi ne pamutu. Pakatangilaye mukanda wakamba ne: neumuambuluishe bikole bua kuyukila ne bana bende. Muanetu kumupeshaye kabidi mukanda wa Nsapi wa disanka mu dîku ne kumujadikila ne: yeye ne mukajende nebapete mibelu mimpe idi mua kubambuluisha bua kuangata mapangadika mu dîku diabu. Tatu kumuela tuasakidila bua mubelu wende, kufilaye makuta avuaye mukokeshe ne kuitabaye bua Bantemu balue kubatangila kumbelu.

Mmunyi muvua Bantemu abu badiumvue pakajikijabu kuyisha dituku adi? Umue wa kudibu wakamba ne: “Mushindu wa kuyisha eu mmunsankishe bikole. Mmungambuluishe kabidi bikole.” Mukuabu wakamba ne: “Yehowa mmuambe bua kuyisha lumu luimpe too ne kumfudilu kua buloba. Lelu, bantu ba miakulu mishilangane mbapete lumu luimpe mu Paramus, mu New Jersey. Ndi ne disanka dia bungi bua mundi muyishe panyi mushindu eu. Tuetu bonso badi bayishe nunku tudi ne disanka dia bungi. Katuvua bumvue bua kupingana pambelu to.”

Udiku mua kuyisha lumu luimpe mu mishindu mishilangane anyi? Ntshia bushuwa ne: mushindu wetu munene wa kuyisha ngua ku nzubu ne ku nzubu. (Bien. 20:20) Kadi, tudienzejayi kabidi bua kuyisha mu bisalu.