Muvungu wa “musambu wa ku Mbuu”: Udi utuangaja bikondo bibidi

MU DIA 22 dia ngondo muitanu wa 2007, bakateka tshitupa tshia muvungu wa mu tshiena Ebelu tshia mu bidimu bia 600 anyi 700 panyima pa Yezu mu tshilaminu tshia bintu bia kale tshia mu Yelushalema bua bantu batshitangile. Uvua muvungu wa Ekesode 13:19–16:1. Mudi kabidi musambu utubu babikila ne: “Musambu wa ku Mbuu” uvua bena Isalele bimbe pavua Nzambi mubasungile ku Mbuu Mukunze. Bua tshinyi dipeta dia muvungu eu didi ne mushinga?

Tshikondo tshiakaufundabu tshidi tshituambuluisha bua kuandamuna lukonko elu. Bavua bafunde mivungu ya mu Mbuu Mufue pankatshi pa bidimu bia 200 kumpala kua Yezu ne bia 100 panyima pa Yezu. Kumpala kua kuyipetabu kukadi bidimu bitue ku 60, mivungu ya kale ya mu tshiena Ebelu ivuaku ivua ya Kodekse wa Aleppo ya mu tshidimu tshia 930 panyima pa Yezu. Pa kumusha bitupa bikese, ki mbapete mivungu mikuabu ya mu tshiena Ebelu ivuabu bafunde mu bidimu binunu bivule bidi pankatshi pa bikondo bibidi ebi to.

James Snyder mutangidi wa nzubu wa dilamina bintu bia kale wa mu Isalele udi wamba ne: “Muvungu wa musambu wa ku Mbuu udi utuangaja bikondo bivuabu bafunde mivungu ya Mbuu Mufue . . . ne ya Kodekse wa Aleppo.” Buende yeye, muvungu eu pamue ne mikuabu ya kale idi “tshilejilu tshia pa buatshi tshia mudibu balama malu adibu bafunde mu Bible bimpe kabayi baashintulule.”

Badi bela meji ne: tshitupa tshia muvungu etshi, tshivua munkatshi mua mivungu ivuabu bapete ku ndekelu kua bidimu bia 1800 mu nsunagoga kampanda mu tshimenga tshia Caire mu ditunga dia Ejipitu. Kadi muntu mukuabu uvua musue kusangisha mivungu ya mu tshiena Ebelu kavua mumanye mushinga wa muvungu eu too ne pakayaye kumona muntu uvua mubimanye ku ndekelu kua bidimu bia 1970. Bakatshinka tshikondo tshivuabu baufunde ne kuutekabu mu nzubu wa tshilaminu tshia bintu bia kale wa mu Isalele.

Adolfo Roitman udi utangila tshibambalu tshia mikanda mu nzubu wa tshilaminu eu ne udi ulama kabidi mivungu ya Mbuu Mufue udi wamba bua mushinga wa tshitupa tshia muvungu etshi ne: “Muvungu wa musambu wa ku Mbuu udi uleja muvua Bible ya bena Masorete kayiyi mishintuluke munkatshi mua bidimu bia bungi. Bidi bikemesha bua mudi mfundilu wa Musambu wa ku Mbuu muikale anu muvuawu mu bidimu bia 600 anyi 700 panyima pa Yezu.”

Bible Ndîyi dia Nzambi didiye mufundishe ku nyuma wende ne Nzambi muine ke udi umulama. Bafundi bavua kabidi batentule Bible ne ntema yonso. Nunku Bible itudi nayi lelu nya kueyemena.s

[Mêyi a dianyisha bua tshimfuanyi mu dibeji 32]

Ne dianyisha dia Israel Museum, Jerusalem