‘Tukandamene Diabolo’ anu bu muvua Yezu muenze

‘Nukandamene Diabolo ne yeye neanunyeme.’​—YAK. 4:7.

1. Yezu uvua mumanye ne: nebamuluishe kudi nganyi pa buloba, ne mmunyi muvua mvita ayi ne bua kujika?

YEZU KRISTO uvua mumanye ne: Diabolo neamuluishe. Bualu ebu buvua bumueneke mu tshivua Nzambi muambile nyoka anyi muanjelu wakamutombokela uvua wakuila mu nyoka ne: ‘Nenteke lukuna pankatshi pebe ne mukaji [anyi tshitupa tshia bulongolodi bua Yehowa tshia mu diulu], ne pankatshi pa bana bebe ne bana bende. Muana wa mukaji [anyi Yezu Kristo] neakukume ku mutu kuebe, ne wewe neumusume ku tshikankanyi tshiende.’ (Gen. 3:14, 15; Buak. 12:9) Disuma dia Yezu ku tshikankanyi divua diumvuija ne: uvua ne bua kukenga mutantshi mukese pavuabu ne bua kumushipa pa buloba, bualu Yehowa uvua ne bua kumubisha ne kumupesha butumbi mu diulu. Kadi dikuma dia nyoka ku mutu divua diumvuija ne: Diabolo uvua ne bua kufua bua kashidi.​—Bala Bienzedi 2:31, 32; Ebelu 2:14.

2. Bua tshinyi Yehowa uvua mushindike ne: Yezu uvua ne bua kutshimuna Diabolo?

² Yehowa uvua mushindike ne: Yezu uvua ne bua kukumbaja tshivuaye mumutumine pa buloba ne kukandamena Diabolo. Bua tshinyi Yehowa uvua mushindike bualu ebu? Bualu uvua mufuke Yezu mu diulu bidimu bia bungi kumpala, uvua mutangile bienzedi biende ne uvua mumanye ne: “Muena mudimu” wende udi ‘muanabute wa bifukibua bionso’ uvua umutumikila mu malu onso ne uvua mumulamate. (Nsu. 8:22-31; Kolos. 1:15)  Nunku pakalua Yezu pa buloba ne Diabolo mumutete too ne ku lufu, Nzambi uvua mushindike ne: Muanende mulela umue uvua ne bua kutshimuna.​—Yone 3:16.

Yehowa udi ulama Bantemu bende

3. Ntshinyi tshidi Diabolo wenzela Bantemu ba Yehowa?

³ Yezu wakabikila Diabolo ne: “Mukokeshi wa buloba ebu” ne wakambila bayidi bende ne: nebabakengeshe anu muvuabu bamukengeshe. (Yone 12:31; 15:20) Bena panu badi ku bukokeshi bua Satana Diabolo mbakine bena Kristo bualu badi benzela Yehowa mudimu ne badi bayisha buakane. (Mat. 24:9; 1 Yone 5:19) Diabolo mmutambe kumuenena bela manyi batshidi pa buloba bakokesha ne Kristo mu Bukalenge buende. Satana udi kabidi umuenena Bantemu ba Yehowa ba bungi badi ne ditekemena dia kupiana muoyo wa kashidi mu mparadizu pa buloba. Dîyi dia Nzambi didi ditudimuija ne: ‘Muena lukuna wenu Diabolo udi wendakana bu nyama wa ntambue udi ukungula, ukeba bantu ba kudiaye.’​—1 Pet. 5:8.

4. Ntshinyi tshidi tshileja ne: Bantemu ba Yehowa badi bakandamena Diabolo mu matuku etu aa?

⁴ Yehowa Nzambi udi utuambuluisha tuetu bonso badi benza bulongolodi buende bua kukandamena Diabolo. Tshilejilu, mu bidimu 100 bishale ebi, bamue bamfumu ba tshikisu bavua basue kujimija Bantemu ba Yehowa pa buloba. Kadi Bantemu mbatungunuke anu ne kuvula ne lelu eu mbatue ku 7 000 000 mu bisumbu bipite pa 100 000. Bamfumu bavua babakengesha abu ke bakadi bajimine.

5. Mmunyi mudi mulayi udi mu Yeshaya 54:17 mukumbanyine Bantemu ba Yehowa lelu?

⁵ Nzambi wakalaya bena Isalele ba kale bavua bu mukajende ne: ‘Kakuena tshielelu tshia mvita tshidibu batula bua kukuluisha natshi tshidi mua kuikala ne diakalengele; wewe neutuishe ludimi luonso ludibu babandisha bua kukubanda nalu mu tshilumbu. Ebu mbupianyi bua badi bakuatshila Yehowa mudimu, ne eku nkubingishibua kuabu kudi kufuma kundi.’ (Yesh. 54:11, 17) Mulayi eu mmukumbanyine Bantemu ba Yehowa pa buloba bujima mu ‘matuku a ku nshikidilu’ aa. (2 Tim. 3:1-5, 13) Tudi tutungunuka ne kukandamena Diabolo ne bia mvita bidiye uteta bua kutujimija nabi kabiena bituenzela bualu, bualu Yehowa udi ku luseke luetu.​—Mus. 118:6, 7.

6. Ntshinyi tshidi mulayi wa Danyele utuambila bua tshienzekela bukokeshi bua Diabolo?

⁶ Ku nshikidilu kua tshikondo etshi kukadi pabuipi, malu onso a mu bukokeshi bua Satana neajimine. Muprofete Danyele wakamanyisha ku bukole bua nyuma muimpe ne: ‘Mu matuku a bakalenge aba [badiku lelu] Nzambi wa mu diulu neajadike bukalenge bukuabu [mu diulu] budi kabuyi bubutudibua tshiendelele. Bukokeshi buabu kabuena bupianyibua kudi bantu bakuabu, kadi nebutshibule makalenge aa [adiku lelu] onso bitupa bitupa, nebuabutule, ne buobu nebujalame tshiendelele.’ (Dan. 2:44) Penzeka bualu ebu, bukokeshi bua Satana ne bua bantu nebujimine. Malu onso a mu bukokeshi bua Diabolo neajimine kashidi ne Bukalenge bua Nzambi nebukokeshe pa buloba bujima kakuyi muntu ubuluisha to.​—Bala 2 Petelo 3:7, 13.

7. Mmunyi mutudi bamanye ne: Ntemu wa Yehowa yonso udi mua kukandamena Diabolo?

⁷ Tudi bashindike ne: Yehowa nealame bulongolodi buende ne neatungunuke ne kububenesha. (Bala Musambu wa 125:1, 2.) Netuambe tshinyi buetu tuetu? Bible udi utuambila ne: tudi mua kukandamena Diabolo anu bu muvua Yezu muenze. Bushuwa, mulayi uvua Kristo mufile ku butuangaji bua mupostolo Yone udi uleja ne: nansha mudi Satana utuluisha, “tshisumbu tshinene” tshia bantu badi ne ditekemena dia kusomba pa buloba netshipanduke ku nshikidilu kua tshikondo etshi. Bible udi wamba mudibu bela mbila ne: ‘Lupandu ndua kudi Nzambi wetu udi ushikama mu nkuasa wa butumbi, ne kudi Muana wa Mukoko [Yezu Kristo].’ (Buak. 7:9-14) Udi uleja kabidi ne: bena Kristo bela manyi badi batshimuna  Satana ne “mikoko mikuabo” payi idi imukandamena. (Yone 10:16; Buak. 12:10, 11) Kadi bua tuetu kumukandamena, tudi ne bua kudienzeja bikole ne kusambila ne muoyo umue bua Nzambi ‘atusungile kudi Mubi.’​—Mat. 6:13, MML.

Muntu uvua mukandamene Diabolo bimpe

8. Nditeta kayi dia kumpala divua Diabolo mutete nadi Yezu mu tshipela, ne Yezu wakenza tshinyi?

⁸ Diabolo wakateta bua kufikisha Yezu ku dilekela Nzambi. Wakamuteta misangu ya bungi mu tshipela bua kumusakaye ku ditombokela Yehowa. Kadi Yezu mmutushile tshilejilu tshimpe tshia mua kukandamena Satana. Kakuyi mpata, Yezu uvua ne nzala mikole panyima pa yeye mumane kuenza matuku 40 kayi mudie. Ke Satana kumuambila ne: ‘Biwikala Muana wa Nzambi, amba mabue aa andamuke bidia.’ Kadi Yezu wakabenga bua kuangata bukole buvua Nzambi mumupeshe bua kuenza nabu malu avua amusankisha anu yeye. Wakamuambila ne: ‘Bakafunda dîyi ne: Muntu kikadi biende ne muoyo bualu bua bidia nkayabi, ikale biende nawu bualu bua mêyi onso adi alopoka mukana mua Nzambi.’​—Mat. 4:1-4; Dut. 8:3.

9. Bua tshinyi tudi ne bua kudimukila Diabolo bua kabueledi pa majinga etu a mubidi bua kututeta?

⁹ Lelu eu Diabolo udi ubuelela pa majinga a Bantemu ba Yehowa bua kubateta. Nunku tudi ne bua kudisuika bua kukandamena majinga mabi a tshiendenda adi matampakane mu bena mu buloba ebu. Dîyi dia Nzambi didi diamba ne dishindika dionso ne: ‘Kanuena bamanye ne: Bantu babi kabena bapiana bukalenge bua Nzambi anyi? Kanudingibu: bena tshiendenda, anyi bena mpingu, anyi bena masandi, anyi badileji bu bakaji, anyi balume badi benzelangana malu a bundu kabena bapiana bukelenge bua Nzambi.’ (1 Kol. 6:9, 10) Nunku bena tshiendenda badi kabayi basue kushintuluka kabakubuela mu Bukalenge bua Nzambi to.

10. Bilondeshile Matayo 4:5, 6, nditeta kayi dikuabu divua Satana mutete nadi Yezu?

¹⁰ Bible udi wamba bua diteta dikuabu divua Yezu mupete mu tshipela ne: ‘Diabolo wakaya nende mu musoko wa tshijila; wakamushikika pa musonga wa ntempelo, wakamuambila ne: Biwikala Muana wa Nzambi, udiele panshi, bualu bua bakufunda ne: Yeye neakufile mu bianza bia banjelu bende; nebakutuale mu bianza biabu bua wewe kukumi dikasa diebe ku dibue.’ (Mat. 4:5, 6) Satana uvua musue bua tshienzedi etshi tshileje patoke muvua Yezu muikale Masiya. Kadi mu bulelela, tshivua tshienzedi tshibi tshia lutambishi tshivua katshiyi mua kusankisha Nzambi nansha. Musangu eu kabidi, Yezu wakashala mulamate anu Yehowa ne wakandamuna Satana ne mêyi a mu Bible. Wakamba ne: ‘Bakufunda  kabidi ne: Kuteyi Mukalenge Nzambi webe.’​—Mat. 4:7; Dut. 6:16.

11. Mmunyi mudi Satana mua kututeta, ne ntshinyi tshidi mua kutuenzekela?

¹¹ Satana udi mua kututeta bua kukeba lumu mu mishindu mishilangane. Udi mua kutusaka bua kuidikija mvuadilu ne mishindu ya didilengeja ya pa buloba ebu ne kujikija lutetuku mu mishindu mibi. Tuetu babenge kutumikila mibelu ya mu Bible ne bidikije bena pa buloba apa, katutekemenyi ne: banjelu nebatulame ku malu mabi adi mua kutufikila bua malu au to. Tshilejilu, nansha muvua mukalenge Davidi munyingalale bua bubi buvuaye muenze mu bualu bua Beta-sheba, Nzambi kavua mumuepule ku ntatu ivua bienzedi biende bimukebele to. (2 Sam. 12:9-12) Katutetshi Yehowa mu mishindu mibi to, tshilejilu pa kudia bulunda ne malu a pa buloba.​—Bala Yakobo 4:4; 1 Yone 2:15-17.

12. Matayo 4:8, 9 udi wakula bua diteta kayi, ne ntshinyi tshiakenza Muana wa Nzambi?

¹² Diteta dikuabu divua Diabolo mutete nadi Yezu mu tshipela divua dia kumupesha bukokeshi bua makalenge a pa buloba. Wakamuleja makalenge onso a pa buloba ne butumbi buawu wamba ne: ‘Nenkupe bintu ebi bionso, biwatua binu biebe panshi, biwankukuila.’ (Mat. 4:8, 9) Satana wakenza bualu bubi butambe bualu wakajinga bua bamutendelele yeye pamutu pa kutendelela Yehowa ne wakasaka Yezu bua kutombokela Nzambi. Muanjelu eu uvua muimpe kumpala wakalua muanjelu mubi anyi Satana Diabolo bualu wakajinga bua bantu bamutendelele pamutu kutendelela Nzambi. (Yak. 1:14, 15) Kadi Yezu yeye uvua musue kushala mulamate anu Tatuende wa mu diulu, ke bualu kayi wakamba ne: ‘Satana, umuka; bualu bua bakufunda dîyi ne: Kukuila Mukalenge Nzambi webe, umuenzele yeye nkayende mudimu.’ Musangu eu kabidi, Yezu wakakandamena Diabolo bimpe bitambe. Muana wa Nzambi kavua musue kubuelakana mu bulongolodi bua Satana ne kavua mua kumutendelela nansha bia kumona lufu.​—Mat. 4:10; Dut. 6:13; 10:20.

‘Nukandamene Diabolo ne yeye neanunyeme’

13, 14. (a) Pavua Diabolo muleje Yezu makalenge onso a pa buloba, ntshinyi tshivuaye musue kumupesha? (b) Mmunyi mudi Satana ututeta?

¹³ Pavua Diabolo muleje Yezu makalenge onso a pa buloba, uvua usua kumupesha bukokeshi buvua muntu nansha umue kayi muanji kupeta. Uvua wela meji ne: pavua Yezu ne bua kumona makalenge au, bivua mua kumujula dijinga dia kulua muntu munene. Lelu eu, Diabolo kena utupesha makalenge to, kadi udi uteta mioyo yetu ne bitudi tumona, tumvua ne tuelela meji.

¹⁴ Diabolo ke udi ukokesha malu onso a pa buloba too adibu bamba ku bisanji anyi bafunda mu mikanda. Nunku kabiena bitukemesha bua mudi bintu bitudi tumona, tuteleja ne tubala biuwule tente ne malu a tshiendenda ne a tshikisu to. Bantu badi batumbisha bintu biabu ku bisanji mbasue kutusaka bua kusumba bintu bia bungi bitudi katuyi nabi dijinga. Ke mudi Diabolo utungunuka ne kututeya ne malu atudi tumona, tumvua ne tuelela meji bua tunange biuma bikole. Kadi patudi tubenga kutangila bintu bibi, kubiumvua ne kubibala, tudi anu bu badi bambila Satana ne: “Satana, umuka.” Nunku tudi tuidikija Yezu patudi tubenga malu mabi a mu bulongolodi bua Satana ne muoyo mujima. Tudi tuleja kabidi mutudi katuyi mu bulongolodi bua Satana patudi tuleja patoke ne: tudi Bantemu ba Yehowa ne bayidi ba Kristo ku mudimu, mu kalasa, kudi bena mutumba netu ne kudi balela betu.​—Bala Mâko 8:38.

15. Bua tshinyi tudi ne bua kuikala badimuke misangu yonso bua kukandamena Satana?

¹⁵ Bible udi wamba ne: panyima pa Diabolo mumane kuteta Yezu misangu isatu mijima ne mupangile, ‘Diabolo wakamushiya.’ (Mat. 4:11) Kadi Satana kavua mulekele kuteta Yezu bua kashidi to, bualu Bible udi wamba ne: ‘Pakajikija Diabolo mateyi onso, wakamushiya too ne ku tshikondo tshikuabu.’ (Luka 4:13) Patudi tukandamena Diabolo, tudi ne bua kuela Yehowa tuasakidila. Kadi tudi kabidi ne  bua kutungunuka ne kulomba diambuluisha dia Nzambi bualu Diabolo neapingane kabidi bua kututeta tshikondo tshiamonaye tshimpe, ki nangananga tshitudi tuetu tuindila ne: udi mua kututeta to. Nunku, tudi ne bua kuikala badimuke misangu yonso ne kudilongolola bua kutungunuka ne kuenzela Yehowa mudimu wa tshijila nansha mudi Diabolo ututeya.

16. Mbukole kayi bua dikema budi Yehowa utupesha, ne bua tshinyi tudi ne bua kumulombabu?

¹⁶ Tudi ne bua kulomba Yehowa nyuma wende bua atuambuluishe bua kukandamena Diabolo bashindike ne: Nzambi neatupeshaye. Nyuma eu neatuambuluishe bua kuenza malu atudi katuyi mua kuenza ne bukole buetu to. Yezu wakashindikila bayidi bende ne: Nzambi neabapeshe nyuma wende pakabambilaye ne: ‘Nuenu bantu [bena mapanga ne nunku bikale] babi, binuamanya mua kupa bana benu bintu bimpe, Tatu wenu wa mu diulu kena upa batu bamulomba nyuma muimpe anyi?’ (Luka 11:13) Tutungunukayi ne kulomba Yehowa nyuma wende. Netutshimune bikala nyuma eu utukuatshisha mu dipangadika dietu dia kukandamena Diabolo. Pa kumbusha kusambila misangu yonso ne muoyo mujima, tudi kabidi ne bua kuvuala bia mvita bionso bia Nzambi ‘bua kuimana bakandamana kumpala kua mateyi a Diabolo.’​—Ef. 6:11-18.

17. Ndisanka kayi divua diambuluishe Yezu bua kukandamena Diabolo?

¹⁷ Kudi tshintu tshikuabu tshivua tshiambuluishe Yezu bua kukandamena Diabolo tshidi mua kutuambuluisha petu. Bible udi wamba ne: ‘Bua disanka diakatekibua kumpala kuende, wakakankamana pakakengaye ku mutshi wa makenga, wakalengulula bundu, ne wakushikama ku tshianza tshikole tshia nkuasa wa butumbi wa Nzambi.’ (Eb. 12:2) Tudi mua kupeta disanka dia muomumue tuetu tulamata bumfumu bua Yehowa, tunemeka dîna diende dia tshijila ne katuyi tupua muoyo difutu dia muoyo wa tshiendelele. Netuikale ne disanka dia bungi pikala Nzambi ne bua kubutula Satana ne midimu yende yonso bua kashidi ne pikala bantu ‘badi ne mitshima mipuekele ne bua kupiana buloba, ne mioyo yabu kusanka mu ditalala dikumbane.’ (Mus. 37:11) Ke bualu kayi, tutungunukayi ne kukandamena Diabolo anu bu muvua Yezu muenze.​—Bala Yakobo 4:7, 8.

Newandamune munyi?

• Ntshijadiki kayi tshidi tshileja ne: Yehowa utu ulama Bantemu bende?

• Ntshilejilu kayi tshidi Yezu mutushile tshia mua kukandamena Satana?

• Mmunyi muudi mua kukandamena Diabolo?

[Nkonko ya dilonga]

[Tshimfuanyi mu dibeji 29]

Patudi tudia bulunda ne malu a pa buloba tudi tulua bena lukuna ba Nzambi

[Tshimfuanyi mu dibeji 31]

Yezu wakabenga makalenge onso a pa buloba avua Satana umupesha