Neulame muoyo webe mutoke anyi?

‘Too ne pangafua tshiena ngitabuja bua mutshima wanyi mutoke umuke kundi.’​—YOBO 27:5.

1, 2. Mmudimu kayi udi mufuanangane ne kuibaka nzubu utudi nawu, ne nkonko kayi ituandamuna?

ELA meji ne: udi utangila bimfuanyi bia nzubu kampanda udi ukusankisha bikole. Udi wela meji ne disanka mushindu wikala nzubu eu ne bua kuambuluisha bena mu dîku diebe. Kadi bimfuanyi ebi ne meji onso audi mua kuela kabiena ne mushinga paudi kuyi muanji kuibaka nzubu au ne mubuelamu to.

² Bia muomumue, tudi mua kuela meji ne: muoyo mutoke ngikadilu udi mua kutuambuluisha tuetu ne bantu batudi banange. Kadi kuanyisha muoyo mutoke kakuena ne mushinga patudi katuyi nawu ne tudienzeja bua kuulama to. Lelu eu, ki mbitekete bua kuibaka nzubu to. (Luka 14:28, 29) Bia muomumue, tudi ne bua kudienzeja bikole bua kupeta muoyo mutoke bualu udi ne mushinga wa bungi. Nunku tudiele nkonko isatu eyi: Ntshinyi tshindi ne bua kuenza bua kuikala ne muoyo mutoke? Mmunyi mutudi mua kuulama? Ntshinyi tshidi mua kuenzekela muntu padiye ulekela muoyo wende mutoke?

Tshia kuenza bua kuikala ne muoyo mutoke

3, 4. (a) Mmushindu kayi udi Yehowa utuambuluisha bua kupeta muoyo mutoke? (b) Anu bu Yezu, ntshinyi tshitudi mua kuenza bua kuikala ne muoyo mutoke?

³ Mu tshiena-bualu tshishale tuvua balonge ne: Yehowa mmutupeshe diakalenga dia kusungula bua kuikala ne muoyo mutoke anyi kubenga kuikala nawu. Kadi ki mmutulekele nkayetu to. Udi utulongesha mua kupeta ngikadilu eu ne udi utupesha nyuma wende udi utuambuluisha bua kutumikila malu adiye utulongesha. (Luka 11:13) Udi kabidi wambuluisha bantu badi badienzeja bua kuikala ne muoyo mutoke bua bikale nende mu malanda mimpe.​—Nsu. 2:7.

⁴ Mmunyi mudi Yehowa mutulongeshe bua kuikala bena muoyo mutoke? Tshia kumpala, wakatuma Muanende Yezu pa buloba. Yezu wakatushila tshilejilu tshimpe tshia mushindu wa kutumikila Yehowa. ‘Wakalua mutumikidi too ne ku lufu.’ (Filip. 2:8) Yezu wakatumikila Tatuende wa mu diulu mu malu onso avuaye wenza,  nansha pavuaye mu ntatu mikole. Wakambila Yehowa ne: ‘Bualu buenjibue bu muudi musue, kabuenjibu bu mundi musue.’ (Luka 22:42) Mbimpe tudiebeje ne: ‘Ke muntu panyi ntumikila anyi?’ Bua tuetu kulama muoyo wetu mutoke, tudi ne bua kutumikila Nzambi ne muoyo mujima. Tukonkononayi imue nsombelu idi kutumikila ne mushinga wa bungi.

5, 6. (a) Mmunyi muvua Davidi muleje mudibi ne mushinga bua kuikala ne muoyo mutoke nansha padi bantu bakuabu kabayi batumona? (b) Ndutatu kayi ludi bena Kristo nalu lelu bua kulama muoyo mutoke padibu nkayabu?

⁵ Tudi ne bua kutumikila Yehowa nansha patudi pa nkayetu. Davidi wakamona mudi kuikala ne muoyo mutoke ne mushinga pavuaye nkayende. (Bala Musambu wa 101:2.) Bu muvuaye mukalenge, kavua usomba nkayende to. Kuvua misangu ya bungi ivua bantu binunu ne binunu bamutangila. (Tangila Musambu wa 26:12.) Uvua ne bua kulama muoyo mutoke mu nsombelu ayi bualu bu muvuaye mukalenge, uvua ne bua kufila tshilejilu tshimpe kudi bantu bende. (Dut. 17:18, 19) Kadi uvua mumanye kabidi ne: uvua ne bua kuikala ne muoyo mutoke nansha pavuaye nkayende ‘mu nzubu muende.’ Kadi netuambe tshinyi buetu tuetu?

⁶ Mu Musambu wa 101:3, Davidi udi wamba ne: ‘Tshiena nteka tshintu tshibi ku mêsu kuanyi.’ Lelu eu, kudi mishindu ya bungi itudi mua kuteka tshintu tshibi ku mêsu etu, nangananga patudi nkayetu. Kukeba malu ku Internet kudi mua kutukebela lutatu mu tshilumbu etshi. Mbipepele bua kutangila bindidimbi bibi anyi bia bantu butaka. Kadi kuenza nunku kudiku kuleja mutudi tutumikila Nzambi uvua mupeshe Davidi nyuma wende bua kufunda mêyi adi kulu aa anyi? Kutangila bindidimbi bia bantu butaka nkubi menemene bualu kudi kujula muntu majinga mabi ne a lukuka, kunyanga kondo kende ka muoyo, kunyanga mabaka ne kupepeja muntu.​—Nsu. 4:23; 2 Kol. 7:1; 1 Tes. 4:3-5.

7. Mmêyi kayi a mu Bible adi mua kutuambuluisha bua kulama muoyo mutoke patudi nkayetu?

⁷ Tudi ne bua kumanya ne: Ntemu wa Yehowa katu anu nkayende misangu yonso to. Tatu wetu wa dinanga udi ututangila. (Bala Musambu wa 11:4.) Yehowa utu usanka bikole patuye ukumona utantamena diteta. Paudi wenza nunku, udi utumikila mêyi a Yezu adi mu Matayo 5:28. Nunku udienzeje bua kubenga kutangila bimfuanyi bidi mua kukuteta bua kuenza bualu bubi. Kushintakaji muoyo webe mutoke ku ditangila anyi dibala dia malu a bundu a bantu butaka to.

8, 9. (a) Ndutatu kayi luvua Danyele ne balunda bende bapete? (b) Mmunyi mudi bansonga bena Kristo lelu basankisha Yehowa ne bena Kristo nabu?

⁸ Tudi kabidi mua kuikala bena muoyo mutoke patudi munkatshi mua bantu badi kabayi batendelela Yehowa. Tuvuluke Danyele ne balunda bende basatu. Bakaya nabu mu bupika mu Babulona patshivuabu bana. Bena Ebelu banayi aba bakadimona munkatshi mua bantu bavua kabayi bamanye Yehowa ne bavua babenzeja  bua kudia biakudia bivua mikenji ya Nzambi mikandike. Bansongalume aba bavua mua kuikala badiambile ne: kudia biakudia abi kakuvua kubi menemene to. Pashishe baledi babu, bakulu ne bakuidi kabavua mua kumona bivuabu benza to. Nganyi uvua mua kubamona? Anu Yehowa. Ke bualu kayi bakangata dipangadika dia kumutumikila nansha muvuabu babenzeja ne bafuanyike kupeta njiwu.​—Dan. 1:3-9.

⁹ Bansonga Bantemu ba Yehowa ba pa buloba bujima badi balonda tshilejilu tshiabu padibu balamata mikenji ya Nzambi ne babenga kuenza malu adi balunda babu babenzeja bua kuenza. Nuenu bansonga, numanye ne: nudi nutumikila Yehowa panudi nubenga kunua diamba, kuenza malu a tshikisu, kupendangana, kuenda bundumba ne kuenza malu makuabu mabi. Nunku nudi nulama muoyo wenu mutoke. Bidi binuambuluisha nuenu bine ne bisankisha Yehowa ne bena Kristo nenu.​—Mus. 110:3.

10. (a) Ndungenyi kayi lubi lutu nalu bamue bansonga bua tshiendenda ludi lubafikishe ku dijimija muoyo wabu mutoke? (b) Mmunyi mudi muoyo mutoke utuambuluisha bua kuepuka tshiendenda?

¹⁰ Tudi kabidi ne bua kutumikila Yehowa patudi kumpala kua muntu udi kayi mukajetu anyi bayetu. Tudi bamanye ne: Dîyi dia Nzambi ndikandike tshiendenda. Kadi mbipepele bua kulekela lungenyi lua kutumikila ne kutuadija kubuikila mêsu pa malu mabi. Tshilejilu, bamue bansonga badi bangatshilangana mukana anyi kunyima peshi badijikijila dijinga edi nkayabu bualu badi bela meji ne: padibu benza nunku, kabena bashipa mukenji wa Nzambi to. Bansonga aba badi bapua muoyo ne: masandi adi Bible mukandike adi akongoloja malu onso aa, ne kabidi badi mua kuipata muntu mu tshisumbu bua malu aa. * Kadi bualu bubi butambe mbua ne: badi bapua muoyo mudi muoyo mutoke ne mushinga wa bungi. Bu mutudi tudienzeja bua kulama muoyo mutoke, katuikadi tudibingisha bua malu mabi atudi tuenza to. Katuena tuteta bua kuenza bubi kampanda kadi kushikidila mu njila bua kabatunyoki to. Ki mbimpe kushindamena anu pa dinyoka didibu mua kutupesha bua bubi kampanda to. Kadi tukebe bua kuenza malu adi asankisha Yehowa ne tulekele adi mua kumunyingalaja. Pamutu pa kukeba bua kuenza bubi kampanda kadi kushikidila mu njila, tudilame kule ne bubi abu ne ‘tunyeme masandi.’ (1 Kol. 6:18) Tuetu tuenza nunku, netuleje mutudi ne muoyo mutoke bushuwa.

Tshia kuenza bua kulama muoyo mutoke

11. Bua tshinyi kutumikila nansha mu bualu bumue kudi ne mushinga? Fila tshilejilu.

¹¹ Tudi tupeta muoyo mutoke patudi tutumikila Nzambi, kadi tudi tuulama patudi tutungunuka ne kumutumikila mu malu onso. Kutumikila mu bualu bumue patupu kudi mua kumueneka bu bualu bukese. Kadi kuikala ne tshibidilu tshia kutumikila kudi kuleja mutudi ne muoyo mutoke. Tshilejilu, didioto dimue didi mua kumueneka bu didi kadiyi ne mushinga, kadi patudi tuatentakaja bimpe, adi mua kuenza nzubu muimpe. Nunku patudi tutungunuka ne kutumikila, tudi tulama muoyo wetu mutoke.​—Luka 16:10.

12. Ntshilejilu kayi tshidi Davidi mutushile tshia kulama muoyo mutoke padibu batukengesha kakuyi bualu?

 ¹² Muoyo wetu mutoke udi umueneka nangananga patudi tutantamena ntatu anyi padibu batukengesha katuyi ne bualu. Tuangate tshilejilu tshia Davidi. Pavuaye nsonga, wakatantamena buluishi bua kudi mukalenge Shaula uvua muleji-mpala wa Yehowa. Kadi mukalenge eu katshivua usankisha Yehowa to, ne uvua umvuila Davidi mukawu bualu yeye uvua usankisha Nzambi. Tshidibi, Shaula wakashala mukalenge matuku a bungi ne wakangata tshiluilu tshia bena Isalele bua kukeba bua kushipa Davidi. Yehowa wakalekela bualu bubi ebu buenzeka munkatshi mua bidimu bia bungi. Davidi uvuaku mufikile Nzambi munda anyi? Uvuaku mudiambile ne: kakuvua bualu buvua mua kumusaka bua kutantamena anyi? Tòo. Kadi wakatungunuka anu ne kunemeka Shaula bualu uvua muela manyi wa Nzambi ne wakabenga bua kumushipa pakapetaye mpunga bua kudisombuela.​—1 Sam. 24:2-7.

13. Mmunyi mutudi mua kulama muoyo wetu mutoke padi muanetu mutuenzele bibi?

¹³ Davidi mmutushile tshilejilu tshimpe be! Tudi mu tshisumbu tshia Nzambi tshidi tshienza ne bantu bapange bupuangane, ne muntu yonso udi mua kutuenzela bualu bubi anyi kulekela Yehowa. Bushuwa, tudi ne diakalenga dia kuikala mu tshikondo tshidibu kabayi mua kubutula Bantemu ba Yehowa bonso to. (Yesh. 54:17) Kadi netuenze tshinyi bikala muanetu mutuenzele bibi? Tuetu bamulamine tshiji, tudi mua kujimija muoyo wetu mutoke. Bienzedi bia bantu bakuabu kabitufikishi ku difikila Nzambi munda anyi ku dimulekela to. (Mus. 119:165) Kutantamena ntatu kudi kutuambuluisha bua kulama muoyo wetu mutoke.

14. Ntshinyi tshitu bena muoyo mutoke benza padibu balengeja dilongesha kampanda anyi bashintulula amue malu mu bulongolodi bua Yehowa?

¹⁴ Tudi kabidi mua kulama muoyo mutoke pa kubenga kuikala ne lungenyi lua kukeba tulema tudibu benza mu bulongolodi bua Yehowa. Tuetu tuenza nunku, tudi tuleja mutudi balamate Yehowa, bualu lelu udi ubenesha bantu bende bikole. Ntendelelu mulelela katu muanji kutumba bu lelu to. (Yesh. 2:2-4) Padibu balengeja diumvuija dia mvese kampanda ya mu Bible anyi bakaja mushindu wa kuenza amue malu, tudi ne bua kutumikila. Tudi ne disanka dia kumona mudi butoke bua Dîyi dia Nzambi buenda buvula. (Nsu. 4:18) Tuetu katuyi tumvua bimpe bualu kampanda budibu bashintulule, tulombe Yehowa atuambuluishe bua tufike ku dibumvua. Kadi tudi ne bua kutungunuka anu ne kumutumikila bua kulama muoyo wetu mutoke.

Ntshinyi tshidi mua kuenzekela muntu udi ulekela muoyo mutoke?

15. Nganyi udi mua kunyanga muoyo webe mutoke?

¹⁵ Elu ndukonko ludi lueleshisha meji, ki mmuomu anyi? Anu mutuvua balonge mu tshiena-bualu tshishale, muoyo mutoke udi ne mushinga wa bungi. Tuetu katuyi nawu, katuakuikala mu malanda mimpe ne Yehowa, ne katuakuikala ne ditekemena to. Tumanye ne: kudi  anu muntu umuepele udi mua kunyanga muoyo webe mutoke. Muntu au, nguewe. Yobo uvua mumanye bualu ebu bimpe. Wakamba ne: ‘Too ne pangafua bianyi tshiena ngitabuja bua mutshima wanyi mutoke umuke kundi.’ (Yobo 27:5) Wewe muikale pebe ne dishindika dia muomumue ne mulamate Yehowa, kuakujimija muoyo webe mutoke nansha kakese to.​—Yak. 4:8.

16, 17. (a) Muntu yeye muenze bubi, ntshinyi tshidiye kayi ne bua kuenza? (b) Ntshinyi tshidiye ne bua kuenza?

¹⁶ Nansha nanku, kudi bamue bena Kristo badi bajimije muoyo wabu mutoke. Anu bu mu tshikondo tshia bapostolo, bamue bantu lelu badi ne tshilele tshia kuenza malu mabi menemene. Biobi bikuenzekele nanku, mmumue ne: kuebe kuajiki anyi? Kabiena anu nanku to. Ntshinyi tshiudi mua kuenza? Tuanji kumona tshitudi katuyi ne bua kuenza. Bantu batu ne tshilele tshia kusokoka baledi babu, bena Kristo nabu anyi bakulu bualu bubi budibu benze. Kadi Bible udi wamba ne: ‘Udi usokoka matomboka ende kena wikala ne diakalengele, kadi udi uwatonda, uwalekela, neafuidibue luse.’ (Nsu. 28:13) Bantu badi bajinga kusokoka mibi yabu badi benza tshilema tshibi tshitambe, bualu Nzambi utu umona malu onso. (Bala Ebelu 4:13.) Kudi bamue bantu batu bena mpala ibidi, badingidija mudibu benzela Yehowa mudimu eku benza malu mabi. Muntu udi wenza nunku kena ne muoyo mutoke to. Yehowa kena witaba mudimu udibu bamuenzela kudi muntu udi usokoka mibi yende to. Kadi bena mpala ibidi badi bamufikisha munda.​—Nsu. 21:27; Yesh. 1:11-16.

¹⁷ Bible udi utuleja patoke tshidi muena Kristo udi muenze bualu bubi ne bua kuenza. Udi ne bua kukeba diambuluisha kudi bakulu. Yehowa mmuteke bakulu bua kutangila bilumbu bia bantu badi benza bubi. (Bala Yakobo 5:14.) Kulekedi buôwa bua dinyoka didibu mua kukupesha dikupangisha bua kulengeja malanda ebe ne Yehowa to. Muntu wetu wa meji eu udiku mua kubenga bua kumutuabu lushingi anyi kumupandabu bua disama dinene didiye nadi anu bualu bidi mua kumusama mutantshi anyi?​—Eb. 12:11.

18, 19. (a) Mmunyi mudi tshilejilu tshia Davidi tshileja ne: tudi mua kupetulula muoyo mutoke? (b) Ntshinyi tshiudi mudisuike bua kuenza bua muoyo webe mutoke?

¹⁸ Kudiku mushindu wa muntu kupetululaye kabidi muoyo wende mutoke anyi? Tupinganayi ku tshilejilu tshia Davidi. Wakenza bubi bunene butambe. Wakalakana mukaji wa bende, kuenda nende ne kushipesha bayende uvua kayi ne bualu. Bua malu aa, bivua bikole bua kuitaba ne: Davidi uvua ne muoyo mutoke, ki mmuomu anyi? Kadi kuende kuvua kujike anyi? Uvua mukumbanyine dinyoka dikole, ke bualu kayi Yehowa wakamunyoka. Pashishe bu muvuaye munyingalale ne muoyo mujima, Yehowa wakamufuila luse. Davidi wakitaba dinyoka adi ne kupetulula muoyo wende mutoke pa kutungunuka ne kutumikila Nzambi mu malu onso. Tshilejilu tshiende tshidi tshijadika mêyi adi mu Nsumuinu 24:16 a ne: ‘Muntu muakane udi upona misangu muanda mutekete, udi ubika kabidi.’ Ntshinyi tshiakenzekela Davidi? Tangila tshivua Yehowa muambile Solomo pakavua Davidi mumane kufua. (Bala 1 Bakelenge 9:4.) Nzambi uvua uvuluka Davidi bua muoyo wende mutoke. Yehowa udi mua kufuila muntu udi muenze bubi nansha bunene luse padiye unyingalala.​—Yesh. 1:18.

¹⁹ Neuleje muudi ne muoyo mutoke wewe utungunuka ne kutumikila Nzambi mu malu onso. Ikala utantamena ntatu, ne wewe muenze bubi bunene, unyingalale ne muoyo mujima. Bushuwa, muoyo mutoke ntshintu tshia mushinga mukole. Tudienzejayi bonso bua kuamba anu bu Davidi ne: ‘Kadi meme panyi ndi ngenda mu buakane buanyi.’​—Mus. 26:11.

[Mêyi adi kuinshi]

Newandamune munyi?

• Ntshinyi tshiudi ne bua kuenza bua kuikala muena muoyo mutoke?

• Ntshinyi tshiudi ne bua kuenza bua kulama muoyo mutoke?

• Ntshinyi tshiudi ne bua kuenza bua kupetulula muoyo mutoke?

[Nkonko ya dilonga]

[Kazubu mu dibeji 8]

‘BUVUA BUALU BUIMPE’

Mamu mukuabu uvua ne difu dia ngondo itanu ke uvua muambe mêyi aa bua kutumbisha muoyo muimpe wa nsongakaji kampanda uvuaye kayi mumanye to. Uvua mubuele mu restoran kampanda, kadi kuluaye kumona mêba a bungi pashishe ne: uvua mupue muoyo kabuta kende. Mu kabuta amu muvua dolare 2 000 ne kavua muibidile bua kuenda ne makuta a bungi nunku to. Wakalua kuambila kamona-kamba mukuabu ne: “Lungenyi luvua lunjimine.” Kadi nsongakaji mukuabu wakapeta kabuta kende ne kukebaye diakamue muenaku. Bu muvuaye kayi mumupete, wakaya naku kudi bampulushi ne bobu kupeta mamu muena kabuta. Mamu eu wakamba ne: “Muntu eu mmungenzele bualu buimpe bua dikema!” Ntshinyi tshivua tshisake nsongakaji uvua muangule kabuta kavua ne makuta bua kukapingajila muenaku? Kamona-kamba wakafunda ne: Bu muvuaye Ntemu wa Yehowa, wakaleja “muoyo mutoke bua tshitendelelu tshiabu.”

[Tshimfuanyi mu dibeji 9]

Bansonga badi mua kulama muoyo wabu mutoke mu mateta

[Tshimfuanyi mu dibeji 10]

Davidi wakanji kujimija muoyo wende mutoke kadi wakaupetulula