Tuanyishe mudimu udi nawu Yezu mu malu adi Nzambi mulongolole

‘Meme ndi njila ne bulelela ne muoyo; kakuena muntu udi ulua kudi Tatu, kayi muanji kulua kundi diambedi.’​—YONE 14:6.

1, 2. Bua tshinyi tudi ne bua kukonkonona mudimu wa pa buawu udi nawu Yezu mu malu adi Nzambi mulongolole?

KATSHIA anu ku kale, bantu ba bungi batu baditatshisha bikole bua kuikala bashilangane ne bakuabu, kadi anu bakese menemene ke badi bakokesha. Anu bantu babala ku minu ke badi mua kuamba mudibu bashilangane ne bakuabu mu mushindu wa pa buawu. Kadi Yezu Kristo Muana wa Nzambi yeye, mmuntu wa pa buende mu malu a bungi.

² Bua tshinyi mudimu wa pa buawu udi nawu Yezu udi ne mushinga kutudi? Bualu udi utuambuluisha bua kuikala mu malanda mimpe ne Tatu wetu Yehowa. Yezu wakamba ne: ‘Meme ndi njila ne bulelela ne muoyo; kakuena muntu udi ulua kudi Tatu, kayi muanji kulua kundi diambedi.’ (Yone 14:6; 17:3) Tukonkononayi imue mishindu idi Yezu muleje mudiye muntu wa pa buende. Bualu ebu nebutuambuluishe bua kukolesha dianyisha dietu bua mudimu udiye nawu mu malu adi Nzambi mulongolole.

‘Muana umuepele mulela’

3, 4. (a) Bua tshinyi tudi mua kuamba ne: Muana umuepele mulela mmuntu wa pa buende? (b) Yezu wakenza mudimu kayi wa pa buawu mu difuka dia bintu?

³ Pavua Satana mutete Yezu, wakamba mudi Yezu Muana wa Nzambi, kadi Yezu kena anu “Muana wa Nzambi” patupu to. (Mat. 4:3, 6) Bible udi umubikila ne: ‘Muana umuepele mulela wa Nzambi.’ (Yone 3:16, 18) Muaku wa tshiena Ebelu udibu bakudimune ‘umuepele mulela’ udi umvuija “nkayende mu wende mushindu, umuepele” anyi “muntu udi anu nkayende mu wende mushindu.” Yehowa udi ne bana ba mu nyuma binunu ne binunu. Kadi mmunyi mudi Yezu muikale “nkayende mu wende mushindu”?

⁴ Yezu mmuntu wa pa buende bualu Nzambi nkayende ke uvua mumufuke buludiludi. Yeye ke Muanabute, mbuena kuamba ne: ‘muanabute wa bifukibua bionso.’ (Kolos. 1:15) Yeye udi “tshibangidilu tshia bufuki bua Nzambi.” (Buak. 3:14) Muana umuepele mulela mmuenze mudimu wa pa buawu mu difuka dia bintu. Ki nyeye udi mubifuke to. Kadi Yehowa wakenza nende mudimu bua kufuka bintu bikuabu bionso. (Bala Yone 1:3.) * Mupostolo Paulo wakafunda ne: ‘Kadi ku mêsu kuetu Nzambi umue udiku, Tatu mene; bintu bionso biakafuma kudiye, ne tuetu tudiku bua bualu buende; ne Mukalenge umue, Yezu Kristo, bintu bionso mbua bualu buende ne tuetu tudi bua bualu buende kabidi.’​—1 Kol. 8:6.

5. Mmunyi mudi Bible uleja mudi Yezu muntu wa pa buende?

⁵ Yezu mmuntu wa pa buende mu malu a bungi. Bible udi umupesha mianzu ya bungi idi ileja ne: udi ne mudimu wa pa buawu mu malu adi Nzambi mulongolole. Tukonkonone mianzu itanu ya Yezu idibu bamubikila mu Mifundu ya tshiena Greke.

‘Dîyi’

6. Bua tshinyi Yezu mmukumbane bua bamubikile ne: ‘Dîyi’?

⁶ Bala Yone 1:14. Bua tshinyi Bible udi ubikila Yezu ne: ‘Dîyi’? Muanzu eu udi uleja mudimu udiye wenza katshia Nzambi wafuka banjelu ne  bantu. Yehowa uvua utuma Muanende eu bua kumanyisha banjelu malu ne wakamutuma kabidi pa buloba bua kuambila bantu dîyi diende. Bualu kampanda buvua Yezu muambile bena Yuda budi buleja mudiye Dîyi anyi muleji-mpala wa Nzambi. Wakabambila ne: ‘Diyisha dianyi ki ndianyi, ndia udi muntume. Bitabuja muntu kuenza bu mudi Nzambi musue, yeye neamanye diyisha edi ni ndia Nzambi anyi ndi ndiambila nkayanyi.’ (Yone 7:16, 17) Yezu wakatungunuka anu ne kuikala ‘Dîyi dia Nzambi’ nansha pakapinganaye mu diulu.​—Buak. 19:11, 13, 16.

7. Mmunyi mutudi mua kuidikija mushindu udi Yezu udipuekesha mu muanzu wende wa ‘Dîyi’?

⁷ Tuele meji ku tshidi muanzu eu umvuija. Nansha mudi Yezu muikale ne meji a bungi kupita banjelu bonso ne bantu bonso, katu udieyemena to. Utu wakula anu malu adi Tatuende mumulongeshe. Utu utumbisha Yehowa pamutu pa kuditumbisha. (Yone 12:50) Mmutushile tshilejilu tshimpe tshitambe. Tudi petu ne diakalenga dia kumanyisha ‘lumu luimpe lua malu mimpe.’ (Lomo 10:15) Tuetu banyishe tshilejilu tshia Yezu tshia kudipuekesha, katuakuikala tuyisha bantu malu etu to. Patudi tuambila bantu malu a mu Bible adi mua kubapandisha, katuena ne bua ‘kupita ku mpala kua malu akafundabu.’​—1 Kol. 4:6.

“Amen”

8, 9. (a) Muaku “Amen” udi umvuija tshinyi, ne bua tshinyi Bible udi ubikila Yezu ne: “Amen”? (b) Mmunyi muvua Yezu mukumbaje mudimu wende wa “Amen”?

⁸ Bala Buakabuluibua 3:14. Bua tshinyi Bible udi ubikila Yezu ne: “Amen”? “Amen” mmuaku wa mu tshiena Ebelu udi umvuija “bikale nanku” anyi “Eyowa.” Mmufumine ku muaku udi umvuija “kuikala ne lulamatu” anyi “kuikala wa kueyemena.” Batu kabidi benza mudimu ne muaku eu bua kuleja mudi Yehowa muikale Nzambi wa lulamatu. (Dut. 7:9; Yesh. 49:7) Kadi mmu mushindu kayi udi Yezu muikale wa pa buende padibu bamubikila ne: “Amen”? Mukanda wa 2 Kolinto 1:19, 20 udi wandamuna ne: ‘Muana wa Nzambi Yezu Kristo, wakambibua munkatshi muenu kakadi ne: Ee ne Nansha; kadi munda muende mudi anu Ee. Bualu bua bu mudi bungi bua milayi ya Nzambi, munda muende mudi anu Ee; nunku kabidi bua bualu buende kudi Amen, bua Nzambi atumbishibue bua bualu buetu.’

⁹ Yezu udi “Amen” bua malu onso adi Nzambi mulaye. Mushindu uvuaye mutumikile Nzambi mu malu onso pavuaye pa buloba ne muoyo wende uvuaye mulambule biakambuluisha bua kukumbaja malu onso avua Yehowa Nzambi mulaye. Pavuaye mushale mulamate Nzambi, wakaleja mudi Satana muena dishima, bualu bilondeshile mukanda wa Yobo, Satana wakamba ne: bantu badi mua kuela Nzambi nyima bua nzala, makenga anyi mateta. (Yobo 1:6-12; 2:2-7) Kakuvua muanjelu anyi muntu mukuabu uvua mua kuleja mudi Satana muena dishima bu Muanabute wa Nzambi to. Yezu wakaleja kabidi mudi Tatuende mukumbane bua kukokesha bintu bionso bualu wakashala mumulamate anu yeye.

10. Mmunyi mutudi mua kuidikija Yezu mu mudimu wende wa pa buawu wa “Amen”?

¹⁰ Mmunyi mutudi mua kuidikija Yezu mu mudimu wende wa pa buawu wa “Amen”? Tudi ne bua kushala balamate anu Yehowa ne kuleja ne: yeye ke udi mukumbane bua kuikala mfumuetu. Patudi tuenza nunku, tudi tuleja mutudi tutumikila mêyi adi mu Nsumuinu 27:11 a ne: ‘Muananyi, wikale ne meji, usankishe mutshima wanyi, bua mmanye mua kuitaba kudi muntu udi umpenda.’

‘Mutuangaji wa tshipungidi tshipiatshipia’

11, 12. Mmunyi mudi Yezu Mutuangaji wa pa buende?

¹¹ Bala 1 Timote 2:5, 6. Yezu ke ‘mutuangaji umue udi pankatshi pa Nzambi ne bantu.’ Yeye udi ‘mutuangaji wa tshipungidi tshipiatshipia.’ (Eb. 9:15; 12:24) Bible udi wamba ne: Mose uvua pende mutuangaji wa tshipungidi tshia mikenji. (Gal. 3:19) Kadi mmunyi mudi Yezu muikale Mutuangaji wa pa buende?

¹² Muaku wa mu tshiena Ebelu udibu bakudimune ‘mutuangaji’ mmuaku utubu benza nawu mudimu mu bundumbulula. Udi uleja mudi Yezu mukumbane bua kuikala Mutuangaji (anyi mulumbuluidi wa bantu mu mushindu kampanda) wa tshipungidi tshipiatshipia tshivua tshifikishe ku diledibua dia tshisamba tshipiatshipia tshia “bena Isalele ba Nzambi.” (Gal. 6:16) Tshisamba etshi ntshienza ne bena Kristo bela manyi a nyuma badi benza kasumbu ka ‘bakuidi ba bukalenge’ mu diulu. (1 Pet. 2:9; Ekes. 19:6) Tshipungidi tshia mikenji ne Mose uvua mutuangaji watshi  katshivua mua kufikisha ku diledibua dia tshisamba tshia buena etshi to.

13. Mudimu wa Yezu wa butuangaji udi wambuluisha ku tshinyi?

¹³ Mudimu wa Yezu wa butuangaji udi wambuluisha ku tshinyi? Yehowa mmuenze mudimu ne mashi a mulambu wa Yezu bua bantu badi babuele mu tshipungidi tshipiatshipia ne mmubavuije bakane. (Lomo 3:24; Eb. 9:15) Nunku Nzambi udi ubamona bakumbane bua kubuela mu tshipungidi tshipiatshipia ne kulua bakuidi ne bakalenge mu diulu. Bu mudi Yezu mutuangaji wabu, udi ubambuluisha bua bashale anu bakane ku mêsu kua Nzambi.​—Eb. 2:16.

14. Bua tshinyi bena Kristo bonso badi ne bua kuanyisha mudimu wa Yezu wa Mutuangaji?

¹⁴ Kadi netuambe tshinyi bua bantu badi kabayi mu tshipungidi tshipiatshipia badi ne ditekemena dia kusomba pa buloba kashidi? Nansha mudibu kabayi bena mu tshipungidi tshipiatshipia, tshidi tshibambuluisha. Nzambi udi ubafuila luse bua mibi yabu ne ubavuija bakane ne balunda bende. (Yak. 2:23; 1 Yone 2:1, 2) Nansha tuetu ne ditekemena dia kuya mu diulu anyi dia kushala pa buloba, tuetu bonso tudi ne bua kuanyisha mudimu wa Yezu wa Mutuangaji wa tshipungidi tshipiatshipia.

“Muakuidi Munene”

15. Mmunyi mudi Yezu Muakuidi munene mushilangane ne bakuidi banene bakuabu?

¹⁵ Bantu ba bungi bavua bakuidi banene ku kale, kadi Yezu Mmuakuidi munene wa pa buende. Bua tshinyi? Paulo udi wamba ne: Yezu mmuakuidi munene ‘udi kayi ne bualu bu muakadi nabu bakuidi banene aba, bua kufila milambu ku dituku ne ku dituku, diambedi bua mibi yende yeye, pashishe bua mibi ya bantu; bua yeye wakenza bualu ebu musangu umue tshiendelele pakadifilaye. Bua mikenji idi iteka bantu mu buakuidi bunene, bobu bikale ne butekete; kadi dîyi dia kuditshipa, diakadi kunyima kua mikenji didi diteka Muana, udi muvuijibue muakane mujalame tshiendelele.’​—Eb. 7:27, 28. *

16. Bua tshinyi mulambu wa Yezu ngua pa buawu?

¹⁶ Yezu uvua muntu mupuangane anu bu muvua Adama kumpala kua kuenzaye bubi. (1 Kol. 15:45) Nunku Yezu ke muntu umuepele uvua mukumbane bua kufila mulambu mupuangane ne mukumbane tshishiki uvuabu kabayi ne bua kufila kabidi to. Mu mikenji ya Mose, bavua bafila milambu dituku dionso. Milambu eyi ne midimu ivua bakuidi benza ivua ileja tshivua Yezu ne bua kulua kuenza. (Eb. 8:5; 10:1) Nunku Yezu Mmuakuidi munene wa pa buende bualu udi ne mushindu wa kuenza malu kupita bakuidi banene bakuabu, ne neashale mu mudimu eu bua kashidi.

17. Bua tshinyi tudi ne bua kuanyisha mudimu wa Yezu wa Muakuidi munene, ne mmunyi mutudi mua kuenza nanku?

¹⁷ Mudimu wa Muakuidi munene wa Yezu udi utuambuluisha bua kulua bantu bakane ku mêsu kua Nzambi. Bushuwa, Yezu Mmuakuidi munene wa dikema! Paulo wakamba ne: ‘Bualu bua katuena ne muakuidi munene udi kayi mumanye mua kukenga netu mu mateketa etu, kadi tudi ne umue wakateyibua mu malu onso muomumue atudi tuteyibua nawu kayi ne bubi.’ (Eb. 4:15) Kuanyisha mudimu wa Yezu eu kudi kutusaka bua ‘kubenga kuikala ne muoyo bua bualu buetu nkayetu, kadi tuikale nawu kudi yeye wakafua ne wakabika ku lufu kabidi bua bualu buetu.’​—2 Kol. 5:14, 15; Luka 9:23.

Kankanunuina kavuabu balaye

18. Ntshinyi tshivua Yehowa mulaye pavua Adama muenze bubi, ne ntshinyi tshiakalua Bible kuamba bua mulayi eu?

¹⁸ Yehowa wakalaya diakamue Musungidi pakamonaye ne: Adama ne Eva bavua bamutombokele mu Edene ne bantu bavua bajimije malanda  abu nende, muoyo wa tshiendelele, disanka ne mparadizu. Wakabikila musungidi eu ne: “Muana” anyi kankanunuina. (Gen. 3:15) Milayi ya bungi ya mu Bible idi yakula bua kankanunuina kavua kakayi kamanyike aka. Kavua ne bua kufumina ku ndelanganyi ya Abalahama, Isaka, Yakoba ne mukalenge Davidi.​—Gen. 21:12; 22:16-18; 28:14; 2 Sam. 7:12-16.

19, 20. (a) Nganyi udi kankanunuina kavuabu balaye? (b) Bua tshinyi tudi tuamba ne: bantu bakuabu bavua mua kuikala pabu tshitupa tshia kankanunuina aku?

¹⁹ Nganyi uvua kankanunuina kavuabu balaye? Tudi tupeta diandamuna dia lukonko elu mu Galatia 3:16. (Bala.) Kadi anu mu yeye nshapita eu, Paulo wakamba bua bena Kristo bela manyi ne: ‘Binuikala ba Kristo, nunku nudi tunkanunuina tua Abalahama, nudi bapianyi bende bu mudi mulayi wamba.’ (Gal. 3:29) Mmunyi mudibi mua kuenzeka ne: Yezu ikale kankanunuina kavuabu balaye ne bantu bakuabu bikale pabu anu kankanunuina aku?

²⁰ Bantu ba bungi badi bamba mudibu ndelanganyi ya Abalahama, bakuabu badiamba mene mudibu baprofete. Bena mu bitendelelu bikuabu badi bamba mudi baprofete babu bikale ndelanganyi ya Abalahama ne badi bangata bualu ebu ne mushinga wa bungi. Kadi bobu bonso badi kankanunuina kavuabu balaye anyi? Tòo. Anu bu muvua mupostolo Paulo muleje ku bukole bua nyuma muimpe, ndelanganyi ya Abalahama kayena mua kudiamba mudiyi kankanunuina kavuabu balaye to. Kankanunuina kavua ne bua kupetesha bantu bonso masanka kavua ne bua kufumina anu ku ndelanganyi ya Isaka nkayende, ki nku ndelanganyi ya bana bakuabu ba Abalahama to. (Eb. 11:18) Nunku anu muntu umuepele Yezu Kristo udi Bible ujadika mudiye wa ku ndelanganyi ya Abalahama ke udi tshitupa tshia kumpala tshia kankanunuina aku. * Bantu bakuabu bakalua tshitupa tshibidi tshia kankanunuina ka Abalahama bualu ‘mba Kristo.’ Bushuwa,  muaba udi nawu Yezu mu dikumbana dia mulayi eu ngua pa buawu menemene.

21. Ntshinyi tshidi tshikukemesha bua mushindu udi Yezu ukumbaja mudimu wende wa pa buawu mu malu adi Nzambi mulongolole?

²¹ Dikonkonona dia mudimu wa pa buawu udi nawu Yezu mu malu adi Yehowa mulongolole nditulongeshe tshinyi? Katshia anu ku tshikondo tshivua Nzambi mufuke Muanende umuepele mulela, Muana eu utu anu wa pa buende. Kadi Muana wa Nzambi wa pa buende wakalua Yezu eu, utu utumikila malu onso adi Tatuende umuambila ne utu umutumbisha pamutu pa kuditumbisha. (Yone 5:41; 8:50) Mmutushile tshilejilu tshimpe. Anu bu Yezu, tudisuikayi bua ‘kuenza malu onso bua kutumbisha Nzambi.’​—1 Kol. 10:31.

[Mêyi adi kuinshi]

Udi muvuluke anyi?

• Ntshinyi tshiudi mulongele ku mudimu wa pa buawu udi nawu Yezu bilondeshile mianzu idiye nayi? (Tangila kazubu.)

• Mmunyi muudi mua kuidikija Muana umuepele mulela wa Yehowa?

[Nkonko ya dilonga]

[Kazubu/​Tshimfuanyi mu dibeji 15]

Imue mianzu idi ileja mudimu wa pa buawu udi nawu Yezu mu malu adi Nzambi mulongolole

▪ Muana umuepele mulela. (Yone 1:3) Anu Yezu nkayende ke udi Tatuende mufuke buludiludi.

▪ Dîyi. (Yone 1:14) Yehowa utu utuma Muanende bu muleji-mpala wende bua kuambila banjelu ne bantu malu ende.

▪ Amen. (Buak. 3:14) Mushindu uvua Yezu mutumikile Nzambi mu malu onso pavuaye pa buloba ne muoyo wende uvuaye mulambule biakambuluisha bua kukumbaja malu onso avua Yehowa Nzambi mulaye.

▪ Mutuangaji wa tshipungidi tshipiatshipia. (1 Tim. 2:5, 6) Bu mudi Yezu mutuangaji udi mukumbanyine, wakambuluisha bua tshisamba tshipiatshipia tshia “bena Isalele ba Nzambi” tshiledibue, ne tshisamba etshi ntshienza ne bena Kristo bikala ‘bakuidi ba bukalenge’ mu diulu.​—Gal. 6:16; 1 Pet. 2:9.

▪ Muakuidi munene. (Eb. 7:27, 28) Yezu ke muntu umuepele uvua mukumbane bua kulambula muoyo wende mupuangane musangu umue bua kashidi. Udi mua kutulengeja ku mibi ne lufu ludiyi ikebesha.

▪ Kankanunuina kavuabu balaye. (Gen. 3:15) Anu Yezu nkayende ke udi tshitupa tshia kumpala tshia kankanunuina kavuabu balaye. Bantu bonso bakalua kuenza tshitupa tshibidi tshia kankanunuina ka Abalahama ‘badi ba Kristo.’​—Gal. 3:29.