Tuikale ne disanka mu mudimu wa kuvuija bantu bayidi

‘Ndayi bienu, nuvuije bantu bayidi.’​—MAT. 28:19.

1-3. (a) Ntshinyi tshitu bantu ba bungi bumvua patubu balongesha bantu Bible? (b) Netuandamune nkonko kayi mu dilonga edi?

MUANETU wa bakaji kampanda udi mu tshisumbu tshia muakulu wa Hindi mu États-Unis udi wamba ne: “Ndi mulonge Bible ne dîku dikuabu divua difumine mu Pakistan munkatshi mua mbingu 11 mishale eyi. Tuvua balue balunda ba dikema. Ngakapuekesha binsonji pangakumvua ne: bakadi bapingana kuabu. Tshivua mudile anu bua mutuvua tushiyangana nabu to, kadi bivua kabidi bua disanka dimvua ngumvua pamvua mbalongesha Dîyi dia Yehowa.”

² Ukatuku pebe mumvue disanka bu muanetu wa bakaji eu paudi ulongesha muntu Bible anyi? Yezu ne bayidi bende ba kumpala bavua ne disanka dia bungi mu mudimu wa kuvuija bantu bayidi. Tshilejilu, pavua bayidi bende 70 bamuambile malu mimpe avuabu bapete mu diyisha, Yezu “wakasanka mu nyuma muimpe.” (Luka 10:17-21) Bia muomumue, bantu ba bungi lelu batu ne disanka dia bungi mu mudimu wa kuvuija bantu bayidi. Tshilejilu, mu 2007 bamanyishi ba lumu luimpe bavua benze mudimu mukole ne balombole malonga a Bible miliyo isambombo ne pamutu ngondo yonso.

³ Kadi kudi bambi ba lumu luimpe bakuabu batu kabayi banji kupeta disanka dia kulongesha muntu Bible to. Bakuabu pabu ki  mbalongeshe muntu kukadi bidimu bia bungi. Ntatu kayi itudi mua kupeta patudi tudienzeja bua kulongesha muntu Bible? Mmunyi mutudi mua kuyitantamena? Mmasanka kayi atudi tupeta patudi tudienzeja bua kutumikila mukenji wa Yezu wa ne: ‘Ndayi bienu, nuvuije bantu bayidi’?​—Mat. 28:19.

Ntatu idi mua kutupangisha disanka

4, 5. (a) Ntshinyi tshitu bantu ba bungi ba mu amue matunga benza patubu baya kubayisha? (b) Ntatu kayi itu bamanyishi bapeta mu matunga makuabu?

⁴ Mu amue matunga bantu badi bitaba ne lukasa mikanda yetu ne bitaba bua kulonga netu Bible. Muanetu mukuabu wa balume wa mu Australie ne mukajende bavua bayisha mu Zambie bua matuku makese wakafunda ne: “Bua kuamba bualu pa bualu, Zambie mmuaba muimpe wa kuyisha. Kuyisha mu njila nkuimpe kua lufu! Bantu badi badiluila kutudi ne bamue batulomba too ne bibejibeji kampanda.” Mu tshimue tshia ku bidimu bishale ebi, bana betu ba mu Zambie bavua balombole malonga a Bible mapite pa 200 000, tuamba ne: mumanyishi yonso uvua mulongeshe muntu umue anyi ba bungi Bible.

⁵ Kadi mu matunga makuabu, bana betu badi mua kuikala ne lutatu lua kupesha bantu mikanda ne kubalongesha Bible pa tshibidilu. Bua tshinyi? Bualu misangu ya bungi kabatu bapeta bantu ku mbanza yabu to, ne badibu bapetaku ki mbanange malu a Nzambi to, pamuapa bualu mbakolele mu mêku avua kaayi atendelela Nzambi anyi misangu ya bungi mbamone mudi bamfumu ba bitendelelu bikale bena mpala ibidi. Bamfumu ba bitendelelu mbatatshishe bantu ba bungi anyi mbabenzele bualu bubi. (Mat. 9:36) Ke bualu bakadi batshina bua kuyukila malu a mu Bible.

6. Ngimue ntatu kayi idi nayi bakuabu bamanyishi?

⁶ Bamue bamanyishi ba lulamatu batu bapeta mikuabu ntatu itu ibabungamija. Nansha muvuabu benza mudimu wa kuvuija bantu bayidi bikole kumpala, mpindieu masama anyi bukulakaje bidi bibapangisha bua kuwenza ne tshisumi. Kadi imue misangu tuetu nkayetu ke batu badipangisha bua kuenza mudimu eu. Tshilejilu, utu umona bu ne: kuena mua kulongesha muntu Bible anyi? Udi mua kuikala udiumvua anu bu Mose pavua Yehowa mumutume kudi Palô. Wakamba ne: “Yehowa, meme tshiena mua kuakula bimpe, nansha diambedi, nansha katshia wabanga kuakula ne muntu webe.” (Ekes. 4:10) Tudi mua kuela meji ne: katuakukokesha bua kuvuija muntu muyidi to. Tudi mua kudiambila ne: bu mundi tshiyi mumanye mua kulongesha Bible bimpe menemene, tshiena mua kuvuija muntu muyidi to. Nunku bua kuepuka bualu ebu, bamue kabatu badienzeja kabidi bua kulongesha bantu Bible to. Ntshinyi tshitudi mua kuenza bua kutantamena ntatu itudi batele kulu eku?

Longolola muoyo webe

7. Ntshinyi tshivua tshisaka Yezu bua kuyisha bantu?

⁷ Tshia kumpala, tudi ne bua kuanji kulongolola mutshima wetu. Yezu wakamba ne: ‘Mukana mudi muamba anu malu adi matambe kuvulangana mu mutshima’ wa muntu. (Luka 6:45) Yezu uvua uyisha bualu uvua munange bantu bavuaye uyisha ne muoyo mujima. Tshilejilu, pakamonaye muvua bena Yuda nende kabayi bamanye malu a Nzambi, ‘wakadi nabu luse.’ Wakambila bayidi bende ne: ‘Bintu bia kunowa bidi bia bungi, kadi bena mudimu badi banyabanya. Nulombe Mukalenge wa bintu bia kunowa, atume bena mudimu mu kunowa kuende.’​—Mat. 9:36-38.

8. (a) Mbualu kayi butudi ne bua kuelela meji? (b) Tshidi mamu udi ulonga Bible eu muambe tshidi tshitulongesha tshinyi?

⁸ Patudi tuenza mudimu wa kuvuija bantu bayidi, mbimpe tuele meji bikole bua masanka atudi bapete bualu muntu mukuabu uvua mudienzeje bua kutulongesha Bible. Tuele kabidi meji bua bantu batudi tuya kuyisha ne masanka adibu bapeta padibu bateleja mukenji utudi tubatuadila. Mamu mukuabu wakafundila Betele wa mu ditunga diabu ne: “Ndi musue kunuela tuasakidila wa manza tente bua Bantemu ba Yehowa batu balua kundongesha kuanyi. Ndi mumanye ne: imue misangu bitu bibatonda bua bungi bua nkonko intu mbela ne bua muntu mbalama kuanyi mutantshi mule. Kadi batu anu ne lutulu ne batu basue kundongesha bivuabu  balonge pabu. Ndi ngela Yehowa ne Yezu tuasakidila bua mundi mupetangane nabu.”

9. Yezu uvua wimanyina pa tshinyi, ne mmunyi mutudi mua kumuidikija?

⁹ Bantu bonso bavua Yezu muyishe kabavua balue bayidi bende to. (Mat. 23:37) Bamue bakamulonda ndambu wa matuku ne pashishe kubengabu malongesha ende ne ‘kabakenda nende kabidi’ to. (Yone 6:66) Kadi Yezu kakitaba bua bualu ebu bumufikishe ku diela meji ne: malu avuaye ulongesha kaavua ne mushinga to. Nansha muvua ntete ya bulelela ya bungi ivuaye mukune kayiyi mitoloke, wakimanyina anu pa malu mimpe avuaye wenza. Uvua mumone ne: budimi buvua buule tente ne bintu bia kunowa bikavua bibobe ne uvua ne disanka dia kubinowa pende. (Bala Yone 4:35, 36.) Pamutu pa kutangila anu bungi bua bantu badi kabayi bateleja diyisha dietu, mbimpe tutuishile mêsu etu pa bantu badi batuteleja nansha bobu bakese. Tumonayi mpindieu tshitudi mua kuenza bua kulama lungenyi elu.

Tuyishe ne tshipatshila tshia kulongesha bantu Bible

10, 11. Ntshinyi tshiudi mua kuenza bua kulama disanka diebe?

¹⁰ Tshidima utu ukuna maminu ne tshipatshila tshia kulua kunowa. Bia muomumue, tudi ne bua kuyisha ne tshipatshila tshia kutuadija kulongesha bantu Bible. Kadi ntshinyi tshiwenza biwikala uyisha bikole kadi upeta anu bantu bakese ku nzubu yabu anyi kuyi ubapeta paudi ubapinganyina? Bidi mua kukutonda bikole. Nunku udi ne bua kulekela mudimu wa kuyisha ku nzubu ne ku nzubu anyi? Kuenji nanku to. Kuyisha ku nzubu ne ku nzubu nkutuambuluishe bua kupeta bantu ba bungi.

¹¹ Kadi bua kuikala anu ne disanka, udi mua kuvudija mishindu yebe ya kuyisha, pamuapa kukeba mishindu mikuabu iudi mua kupetangana ne bantu. Tshilejilu, ukatuku mutete bua kuyisha bantu mu njila anyi ku miaba yabu ya mudimu anyi? Ukatuku mutete bua kuyishila bantu ku telefone anyi? Ukatuku mukebe bua  kupeta nimero ya telefone ya bantu bauvua muyukile nabu malu a mu Bible kadi kutshiyi ubapeta ku mbanza yabu anyi? Wewe mutungunuke ne kuyisha ne mushintulule mishindu yebe ya kuyukila ne bantu, neupete bantu badi bitaba lumu luimpe lua Bukalenge.

Padi bantu babenga malu a Nzambi

12. Ntshinyi tshitudi mua kuenza bikala bantu ba bungi ba mu teritware wetu babenga malu a Nzambi?

¹² Ntshinyi tshitudi mua kuenza padi bantu ba bungi ba mu teritware wetu babenga malu a Nzambi? Tudi mua kushintulula malu atudi tubambila ne mushindu wa kubambilawu. Tshilejilu, mupostolo Paulo wakambila bena Kristo nende ba mu Kolinto ne: ‘Kudi Bayuda ngakalua muyuda. Kudi bakadi kabayi ne mikenji ngakalua muntu udi kayi ne mikenji, meme tshiyi muikale muntu udi kayi ne mikenji ya Nzambi.’ Ntshinyi tshivua Paulo ukeba? Udi wamba ne: ‘Kudi bonso ngakulua muena malu onso, bua meme kumanya mua kusungila bakuabu ne ngenyi yonso.’ (1 Kol. 9:20-22) Tudienzejayi petu bua kuyukila ne bantu ba mu teritware wetu malu adi mua kukoka ntema yabu. Bantu ba bungi batu kabayi batendelela batu basue kulengeja nsombelu wa mu dîku diabu. Badi mua kuikala kabidi baditatshisha bua tshikala nsombelu wabu. Katuenaku mua kudienzeja bua kuambila bantu ba mushindu eu lumu luimpe lua Bukalenge mu mushindu udi mua kubalenga ku muoyo anyi?

13, 14. Ntshinyi tshitudi mua kuenza bua kupeta disanka dia bungi mu mudimu wa kuvuija bantu bayidi?

¹³ Bamanyishi ba bungi mbavudije disanka didibu bapeta mu mudimu wa kuvuija bantu bayidi nansha miaba idi bantu bamueneka kabayi basue malu a Nzambi. Mmushindu kayi? Mbalonge muakulu mukuabu. Muanetu mukuabu ne mukajende bakadi ne bidimu 60 bakamona ne: balongi ba mu ditunga dia Chine ba bungi ne mêku abu mbasombele mu teritware wa tshisumbu tshiabu. Mulume udi wamba ne: “Tuakamona ne: mbimpe tulonge tshiena Chine. Nansha muvuabi bitulomba dîba dia bungi dituku dionso bua kutshilonga, biakatuenza disanka dia bungi bualu tuakatuadija kulonga Bible ne bena Chine ba bungi bavua mu teritware wetu.”

¹⁴ Nansha wewe kuyi mukokeshe bua kumanya mukualu mukuabu, udi mua kuenza mudimu ne kakanda ka Une bonne nouvelle pour des gens de toutes nations paudi upetangana ne bantu badi bakula muakulu mukuabu. Udi kabidi mua kukeba mikanda mu muakulu wa bantu baudi mupetangane nabu. Bushuwa, bidi bikengela kudienzeja bikole bua kuyukila ne bantu badi bakula muakulu mukuabu ne bikale ne bibidilu bishilangane ne bietu. Kadi katupu muoyo tshidi Bible wamba etshi to. Udi wamba ne: ‘Udi ukuna maminu a bungi neapuole a bungi.’​—2 Kol. 9:6.

Mmudimu wa tshisumbu tshijima

15, 16. (a) Bua tshinyi kuvuija muntu muyidi mmudimu wa bena mu tshisumbu bonso? (b) Mmudimu kayi udi nawu bakulakaje mu tshisumbu?

¹⁵ Kadi kuvuija muntu muyidi ki mmudimu wa muntu umue to, ngua bena mu tshisumbu bonso. Bua tshinyi? Yezu wakamba ne: ‘Bua bualu ebu bantu bonso nebamanye ne: Nudi bayidi banyi, binuasuangana nunku.’ (Yone 13:35) Nunku padi bantu batudi tulongesha Bible babuela mu bisangilu batu bakema bikole padibu bamona mutudi tuenzelangana malu adi aleja mutudi banangangane. Mamu mukuabu udi ulonga Bible wakafunda ne: “Ntu musue kubuela mu bisangilu bikole. Bantu bonso batu bangakidila bimpe bia dikema!” Yezu uvua muambe ne: balela ba bantu badi balua bayidi bende badi mua kubaluisha. (Bala Matayo 10:35-37.) Kadi wakalaya ne: nebapete ‘bana babu balume ne bana babu bakaji ne bamamu ne bana’ bapite bungi mu tshisumbu.​—Mâko 10:30.

¹⁶ Bana betu bakadi bakulakaje badi pabu bambuluisha bantu batudi tulongesha Bible bua kuya kumpala. Mushindu kayi? Nansha mudi bamue bana betu bakadi bakulakaje kabatshiyi mua kulongesha bantu Bible, mibelu idibu bafila mu bisangilu bia tshisumbu idi ikolesha ditabuja dia bonso badi bayiteleja. Malu adibu benze mu dienda diabu dia mu ‘njila wa buakane’ adi ambuluisha bena mu tshisumbu ne akoka bantu badi basue buakane bua kubuela mu bulongolodi bua Nzambi.​—Nsu. 16:31.

 Katutshinyi to

17. Ntshinyi tshitudi mua kuenza bua katufiki ku diela meji ne: katuena mua kulongesha muntu Bible?

¹⁷ Ntshinyi tshiudi mua kuenza wewe udiumvua ne: kuena mua kukokesha bua kulongesha muntu Bible? Vuluka ne: Yehowa wakambuluisha Mose ne nyuma wende ne kumupeshaye Alona muanabu bua amuambuluishe. (Ekes. 4:10-17) Yezu wakalaya ne: nyuma wa Nzambi neatuambuluishe mu mudimu wa kuyisha. (Bien. 1:8) Pashishe wakatuma bayidi bende anu babidi babidi mu diyisha. (Luka 10:1) Nunku wewe umona bikukolele bua kulongesha muntu Bible, lomba Nzambi nyuma wende bua akupeshe meji ne sungule muntu uudi mumone ne: mmukumbane bua kukuambuluisha bua nuye nende mu buambi. Bidi bitukolesha ku muoyo patudi tuvuluka ne: Yehowa mmusungule ‘bintu bitekete bia pa buloba,’ tuamba ne: bantu bashadile bua kuenzabu mudimu munene eu.​—1 Kol. 1:26-29.

18. Bua tshinyi katuena mua kutshina mudimu wa kuvuija bantu bayidi?

¹⁸ Ntshinyi tshitudi mua kuenza bua tuetu kubenga kudimona ne: katuena bakumbane bua kuvuija muntu muyidi? Mbimpe tuvuluke ne: mudimu wa kuvuija bantu bayidi kawena bu wa kulamba biakudia udibu benza anu kudi muntu udi ulamba to. Kadi tudi tuwenza ne bantu bakuabu. Yehowa ke wa kumpala, bualu yeye ke udi ukoka bantu kudiye. (Yone 6:44) Pashishe tuetu petu ne bena mu tshisumbu bakuabu tudi tuenza muetu muonso bua kulongesha bantu Bible bimpe bua baye kumpala. (Bala 2 Timote 2:15.) Muntu wa ndekelu ke mulongi muine, udi ne bua kutumikila bidiye ulonga. (Mat. 7:24-27) Bidi mua kutunyingalaja patudi tumona muntu ulekela kulonga Bible. Tudi basue bua bantu batudi tulongesha Bible balue Bantemu, kadi tumanye ne: ‘muntu ne muntu neabadile malu ende kudi Nzambi.’​—Lomo 14:12.

Mmasanka kayi atudi tupeta?

19-21. (a) Mmasanka kayi atudi tupeta patudi tulongesha bantu Bible? (b) Mmunyi mudi Yehowa umona bantu bonso badi benza mudimu wa kuyisha?

¹⁹ Kulongesha bantu Bible kudi kutuambuluisha bua kutungunuka ne kuteka Bukalenge bua Nzambi pa muaba wa kumpala. Kudi kutuambuluisha kabidi bua kushala balame malongesha a mu Dîyi dia Nzambi mu lungenyi luetu. Mmushindu kayi? Mpanda-njila mukuabu diende Barak udi wamba ne: “Kulongesha bantu Bible kudi kukuenzeja bua kuikala kulonga Dîyi dia Nzambi bikole. Ndi mumone ne: mbimpe meme muine nganji kuikala mutuishibue bua malu andi ne bua kulongesha bantu bakuabu.”

²⁰ Wewe kuyi ulongesha muntu nansha umue Bible, mudimu webe kawena ne mushinga ku mêsu kua Nzambi anyi? Tòo. Yehowa udi wangata ne mushinga bionso bitudi tuenza bua kumutumbisha. Bantu badi bayisha ‘mbenzejanganyi ba mudimu ne Nzambi.’ Kadi kulongesha muntu Bible kudi kutupetesha disanka patudi tumona mudi Nzambi udiundisha ntete ituvua bakune. (1 Kol. 3:6, 9) Mpanda-njila mukuabu diende Amy udi wamba ne: “Paudi umona muntu uudi ulongesha Bible uya kumpala, udi umvua disanka dia bungi bua mudi Yehowa muenze nebe mudimu bua kupetesha muntu au mushindu wa kumumanya ne kupeta muoyo wa tshiendelele.”

²¹ Patudi tudienzeja bua kulongesha bantu Bible, nebituambuluishe bua kudifila bikole mu mudimu wa Nzambi ne kukolesha ditekemena dietu dia kupeta muoyo mu bulongolodi bupiabupia. Bu mudi Yehowa utuambuluisha, tudi tuambuluisha petu bantu badi batuteleja bua kusungila mioyo yabu. (Bala 1 Timote 4:16.) Kakuena mudimu mukuabu udi upetesha disanka bu eu to.

Newandamune munyi?

• Mmalu kayi adi mua kupangisha bamue ba kutudi bua kulongesha bantu Bible?

• Ntshinyi tshitudi mua kuenza bikala bantu ba bungi ba mu teritware wetu kabayi banange malu a Nzambi?

• Mmasanka kayi atudi tupeta patudi tulongesha bantu Bible?

[Nkonko ya dilonga]

[Bimfuanyi mu dibeji 9]

Utuku ukeba mishindu ya kuyisha bua kupeta bantu badi basue malu makane anyi?