Njikijilu wa Kalasa ka Gilada ka 125

Bavua babele bamisionere bua kuikala bu Yelemiya

MUANETU Geoffrey Jackson wa mu Kasumbu Kaludiki wakamba ne: “Kalasa ka Gilada aka kadi ne mushinga mukole be!” Uvua wambila bantu 6 156 bavua balue kubuela mu njikijilu wa kalasa ka Gilada ka 125 mu dituku dia 13 dia ngondo wa 9, mu 2008. Patudi tuangata balongi aba 56 tusangisha ne bonso bakadi balonge kalasa aka, tudi tumona ne: bakadi batume bamisionere bapite pa 8 000 ‘too ne ku mfudilu kua buloba.’​—Bien. 1:8.

Muanetu Jackson, mulombodi wa tshibilu etshi wakebeja balongi ne: “Bantu nebanueyemene bua mudimu wenu kuenda bimpe anyi?” Wakatela malu anayi adi mua kusaka bantu bua kubeyemena: kuikala ne lungenyi luimpe, kufila tshilejilu tshilenga, kuangatshila malongesha mu Bible ne kuikala ne kipatshila ka kumanyisha dîna dia Yehowa.

Muanetu David Schafer, udi wenza mudimu pamue ne bena mu Komite wa Dilongesha, wakakula pa tshiena-bualu etshi: “Nenumvue malu onso anyi?” Wakambila balongi ne: bobu batungunuke ne kukeba Yehowa ne batumikile ‘mupika wa lulamatu ne wa budimu’ ne kudipuekesha kuonso, “nebumvue malu onso” adi atangila bamisionere.​—Nsu. 28:5; Mat. 24:45.

Muanetu John Barr, wa mu Kasumbu Kaludiki, wakakula pa tshiena-bualu etshi: “Kulekedi tshintu nansha tshimue tshikukosolola ne dinanga dia Nzambi.” Wakafila mibelu anu bu tatu ne bana bende, balongi ne bena mêku abu bonso kumvua disanka, kumusha buôwa buvuabu nabu bua miaba ivua balongi ne bua kuya. Wakamba ne: “Kuikala mu dinanga dia Nzambi nkuikala mu ditalala ne bupole; ke muaba wa kuikala.” Kakuena tshintu tshidi mua kukosolola dinanga dia Nzambi ne bamisionere to. Bobu nkayabu ke badi mua kudikosolola ne Nzambi.

Muanetu Sam Roberson, wa mu Biro bia Tulasa tua Nzambi, wakalomba bantu bua kuvuala “tshilamba tshimpe tshitambe.” Wakambila balongi ne: balonge malu avua Yezu muenze, baatumikile, apu ‘nebadiluatshishe ne Mukalenge Yezu Kristo.’ (Lomo 13:14) Muanetu William Samuelson, mutangidi wa Biro bia Tulasa tua Nzambi, wakaleja tshidi mua kupesha muntu lumu. Ki mmuenenu wa bantu to, kadi mmuenenu wa Nzambi ke udi upesha muntu lumu.

Umue wa ku balongeshi ba balongi aba, muanetu Michael Burnett, wakela bamue balongi nkonko bua balonde malu avuabu bapete mu buambi. Nansha muvuabu bapeshe balongi ba bungi teritware ya mu Patterson (mu New York) ikavua mimana kuyisha bikole, bakapeta bantu bavua bitaba bulelela. Muanetu Gerald Grizzle (wa mu Biro bidi bitangila malu a mpuilu) wakela bana betu ba balume basatu bavua mu Kalasa ka bena Komite ya Filiale nkonko. Malu akambabu akambuluisha balongi bua kudilongolola ku malu avua mabindile miaba ivuabu babatuma.

Muanetu David Splane (wa mu Kasumbu Kaludiki) uvua mubuele mu kalasa ka Gilada ka 42, wakenza muyuki eu: “Ikalayi bu Yelemiya.” Nansha muvua Yelemiya ne buôwa bua mudimu  uvuaye nawu, Yehowa wakamukolesha. (Yel. 1:7, 8) Neakoleshe kabidi bamisionere bapiabapia. Muanetu Splane wakamba ne: “Wewe tshilumbu ne muanenu, anji somba panshi, ufunde ngikadilu yende dikumi itu ikusankisha. Wewe kuyi mufunde ngikadilu mitue ku dikumi, umanye ne: kuena muanji kumanya muanenu au bimpe to.”

Yelemiya uvua witaba bua kupangila amue malu mimpe anu bua kusankisha bakuabu. Wakasambila pakumvuaye muoyo wa kulekela mudimu, Yehowa kumukuatshisha. (Yel. 20:11) Muanetu Splane wakamba ne: “Paudi udiumvua mutekete ku muoyo, ambila Yehowa malu onso adi makutonde. Neukeme pawamona mushindu wakuambuluishaye.”

Ku ndekelu kua ndongamu eu, mulombodi wakavuluija bantu ne: balongi aba mbalonge mishindu ya bungi idibu mua kuenza bua bantu babeyemene. Bobu bikale bantu ba kueyemena, mudimu wabu wa diyisha newende bimpe.​—Yesh. 43:8-12.

[Kazubu mu dibeji 22]

MALU ADI ATANGILA BALONGI

Bungi bua matunga adibu bafumine: 6

Bungi bua matunga adibu babatume: 21

Bungi bua balongi: 56

Muayene wa bidimu: 32,9

Muayene wa bidimu mu bulelela: 17,4

Muayene wa bidimu mu mudimu wa bumpanda-njila: 13

[Tshimfuanyi mu dibeji 23]

Njikijilu wa kalasa ka Gilada ka 125

Mu liste udi kuinshi eku, mbabale milongo kutuadijila kumpala kuya panyima, ne mbafunde mêna kutuadijila ku dia bakaji kuya ku dia balume mu mulongo wonso.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.