Mêyi a Yezu mmashintululeku masambila ebe anyi?

‘Pakajikija Yezu mêyi aa, diyisha diende diakakemesha bantu.’​—MAT. 7:28.

1, 2. Mushindu uvua Yezu mulongeshe uvua ukemesha bantu bua tshinyi?

TUDI ne bua kuitaba mêyi a Yezu Kristo, muana umuepele mulela wa Nzambi, ne kualonda. Kakuena muntu udi mua kuakula bu muvua Yezu wakula to. Ke bualu kayi mu Muyuki wende wa pa Mukuna, bantu bakakema bikole bua mushindu uvuaye mulongeshe.​—Bala Matayo 7:28, 29.

² Muana wa Yehowa kavua ulongesha bu bafundi bavua balongesha ngenyi ya bantu to. Yezu uvua ulongesha anu bu ‘muena mêyi,’ bualu malu avuaye ulongesha avua afumina kudi Nzambi. (Yone 12:50) Nunku tukonkononayi mudi mêyi makuabu a Yezu a mu Muyuki wa pa Mukuna aa mua kushintulula masambila etu anyi ne bua kuashintulula.

Kanuikadi nusambila bu bena lubombo

3. Umvuija mu mêyi ebe tshidi Yezu muambe mu Matayo 6:5.

³ Tudi ne bua kusambila Yehowa misangu yonso, bualu disambila didi ne mushinga wa bungi mu ntendelelu mulelela. Mêyi a Yezu a mu Muyuki wende wa pa Mukuna adi ne bua kushintulula masambila etu. Yezu wakamba ne: ‘Panuatendelela Nzambi, kanuikadi bu bena lubombo; bobu badi basue kutendelela Nzambi bimane mu nsunagoga ne mu masangu a njila bua bantu babamone. Bulelela, ndi nnuambila ne: Bobu bakumana kuangata difutu diabu.’​—Mat. 6:5.

4-6. (a) Bafalese bavua basue kusambila ‘bimane mu nsunagoga ne mu masangu a njila’ bua tshinyi? (b) Bena lubombo aba bavua ‘bangata difutu diabu’ mushindu kayi?

⁴ Pavua bayidi ba Yezu basambila, kabavua ne bua kuidikija Bafalese “bena lubombo” bavua bashima bantu, ne badiamba muvuabu bakane. (Mat. 23:13-32) Bena lubombo aba bavua basue kusambila ‘bimane mu nsunagoga ne mu masangu a njila.’ Bua tshinyi? Bua “bantu babamone.” Bena Yuda bavua ne tshilele tshia kusambila muaba umue dîba divuabu bafila milambu ya kuosha ku ntempelo (pa dîba dia 9 mu dinda ne pa dîba 3 ku dilolo). Bena mu Yelushalema ba bungi bavua baya kusambila pamue nabu ku ntempelo. Bena Yuda bavua banange malu a Nzambi bikole bavua basambila misangu ibidi ku dituku, ‘bimane mu nsunagoga.’​—Tangila Luka 18:11, 13.

⁵ Bu muvua bantu ba bungi kabayi pabuipi ne ntempelo anyi nsunagoga bua kusambila misangu ibidi eyi, bavua basambila muaba wonso uvuabu pavua dîba dia disambila dikumbana. Kadi bakuabu bantu bavua basue bua dîba dia kusambila dibakumbanyine ‘mu masangu a njila.’ Bavua basue bua “babamone” kudi “bantu” bavua bapita mu masangu a  njila au. Bantu aba bavua batendelela Nzambi musangu mule ‘anu bua lubombo luabu,’ ne bua babatumbishe kudi bantu bavua babamona. (Luka 20:47) Katuena mua kubidikija to.

⁶ Yezu wakamba ne: bena lubombo aba ‘bakumana kuangata difutu diabu.’ Bavua bakeba ne muoyo mujima bua bantu babanyishe anyi babatumbishe, ne ke tshivuabu bapeta. Bakavua bapete difutu diabu, bualu Yehowa kavua wandamuna masambila abu to. Anu mudibi bileja mu mêyi a Yezu adi alonda aa, Nzambi udi wandamuna anu masambila a bena Kristo balelela.

7. Mubelu wa kusambila mu ‘kazubu ka tshisokomenu’ udi umvuija tshinyi?

⁷ ‘Kadi wewe, pawatendelela Nzambi, ubuele mu kazubu kebe ka tshisokomenu, winjile tshibi, utendelele Tatu webe, udi biende mu tshisokomenu, ne Tatu webe udi umona mu musokoko neakupe.’ (Mat. 6:6) Pavua Yezu muambe ne: ubuele mu kazubu ka tshisokomenu ne winjile tshibi bua kusambila, kavua musue kuleja ne: muntu kena mua kupita kumpala kua bantu mu bisangilu ne kusambila bua tshisumbu tshijima to. Uvua mufile mubelu eu bua kukandika disambila dienza kumpala kua bantu bua batumone batuambe. Tudi ne bua kuvuluka mubelu eu padibu batulomba bua kusambila kumpala kua bantu ba bungi. Tutumikilayi kabidi mubelu wa Yezu udi utangila disambila udi ulonda eu.

8. Bilondeshile Matayo 6:7, tudi ne bua kulekela masambila kayi?

⁸ ‘Panuatendelela Nzambi, kanuakudi biakulakula bu mutu bantu ba bende benza; bobu batu belangana meji ne: Nebatumvuile bua mêyi etu adi a bungi.’ (Mat. 6:7) Yezu wakaleja ne: katuena ne bua kuikala tuambulula miaku imue imue ayi patudi tusambila to. Kadi kavua musue kuamba ne: katuena mua kuambulula milombu mienza ne muoyo mujima ne miaku ya kuela nayi Nzambi tuasakidila to. Tshilejilu, Yezu ‘wakamba mêyi a momumue’ mu disambila mu budimi bua Getesemane butuku buvuabu ne bua kumushipa.​—Mâko 14:32-39.

9, 10. Kubenga kuambulula malu mu masambila kudi kumvuija tshinyi?

⁹ Tuetu bidikije masambila a kuambulula atu “bantu ba bende” benza, mbibi bitambe. Batu bambulula misangu ne misangu mêyi mamana kukuata ku muoyo adi kaayi ne mushinga nansha. Tshilejilu, dimue dituku batendeledi ba Bâla bakamulomba ‘ku dinda too ne ku munda munya, bamba ne: O, Bâla, utumvuile,’ kadi yeye kakabumvuila. (1 Bak. 18:26) Bantu ba bungi lelu batu bambulula mêyi amue amue kabidi a bungi mu masambila abu, bela meji ne: ‘nebatumvuile,’ kadi kabayi anu babumvuila to. Kadi Yezu yeye udi utuambuluisha bua kumvua ne: ‘kuakula mêyi a bungi’ ne kuambulula masambila kakuena ne mushinga ku mêsu kua Yehowa to. Yezu wakamba kabidi ne:

¹⁰ ‘Kanuikadi bu bobu, bualu bua Tatu wenu udi mumanye binudi nabi bualu diambedi kanuyi banji kumulomba.’ (Mat. 6:8) Bamfumu ba bitendelelu ba bena Yuda ba bungi bavua bakula biakulakula mu masambila, ne masambila abu akalua anu bu a bantu ba bisamba bia bende. Masambila menza ne muoyo umue bua kutumbisha Nzambi, kuela Nzambi tuasakidila ne milombu bidi ne mushinga mukole mu ntendelelu wetu. (Filip. 4:6) Katuena ne bua kuikala tuambulula mêyi amue amue, tuela meji ne: patudi tuambulula mêyi aa, Yehowa udi uvuluka bitudi nabi dijinga. Patudi tusambila, tudi ne bua kuvuluka ne: tudi tuyukila ne Muntu udi ‘mumanye bitudi nabi bualu diambedi katuyi banji kumulomba.’

11. Padibu batupesha disambila dia kuenza kumpala kua bantu, tshitudi mua kuenza ntshinyi?

¹¹ Bualu buvua Yezu muambe bua masambila adi Nzambi kayi witaba, budi mua kutuvuluija ne: Nzambi kena usanka bua kuteleja diakula dinekesha ne mêyi mapitepite bungi patudi tumusambila to. Tumanye kabidi ne: patudi tusambila kumpala kua bantu katuena tujinga bua kubakemesha anyi kuakula mêyi a bungi, bantu bakadi badiebeja ne: netuambe ‘Amen’ dîba kayi. Patudi tutuadija  kuenza mamanyisha anyi tupesha bateleji mibelu mu disambila, bidi bileja ne: katuena batumikile mibelu ya Yezu idi mu Muyuki wende wa pa Mukuna to.

Yezu udi utulongesha mua kusambila

12. Kuamba ne: ‘banemeke dîna diebe’ kudi kumvuija tshinyi?

¹² Yezu wakalongesha bayidi bende mua kusambila, kadi wakabadimuija ne: kabavua mua kunaya ne disambila to, bualu didi tshintu tshia pa buatshi. (Bala Matayo 6:9-13.) Disambila dia Tatu wetu, divua Yezu muenze bua kulongesha bayidi bende, ki ndia kukuata ku muoyo anyi kuambulula to. Kadi didi dituambuluisha bua kumanya mua kusambila. Tshilejilu, Yezu udi utela Nzambi kumpala, wamba ne: ‘Tatu wetu udi mu diulu, banemeke dîna diebe.’ (Mat. 6:9) Tudi tubikila Yehowa ne: “Tatu wetu,” bualu yeye ke udi mutufuke, mmusombele “mu diulu,” udi kule menemene ne buloba. (Dut. 32:6; 2 Kul. 6:21; Bien. 17:24, 28) Patudi tuamba ne: Tatu “wetu,” tudi ne bua kuvuluka ne: bena Kristo netu badi pabu ne malanda mimpe ne Nzambi. Patudi tuamba ne: ‘banemeke dîna diebe,’ tudi tulomba Yehowa bua enze bua kuvuija dîna diende dinsantu, umbushe bipendu ne mashimi onso adibu bele pa dîna edi katshia bantu bamutombokela mu budimi bua Edene. Bua Yehowa kuandamuna disambila edi, neumbushe bubi buonso pa buloba.​—Yeh. 36:23.

13. (a) Patudi tuamba ne: ‘Bukalenge buebe bulue,’ nebulue mushindu kayi? (b) Dikumbana dia disua dia Nzambi pa buloba didi diumvuija tshinyi?

¹³ ‘Bukalenge buebe bulue. Benze pa buloba muudi musue bu mudibu benza mu diulu.’ (Mat. 6:10) “Bukalenge” budiye mutele mu disambila edi mmbulamatadi wa mu diulu mulombola kudi Kristo ne ‘bansantu’ bena diende bajulabu ku lufu. (Dan. 7:13, 14, 18; Yesh. 9:6, 7) Patudi tusambila bua Bukalenge ebu “bulue,” tudi tulomba bua bulue kubutula bantu bonso badi kabayi bitaba bukokeshi bua Nzambi. Mu katupa kîpi emu, Bukalenge ebu nebuvuije buloba mparadizu, muikala buakane ne ditalala ne disanka. (Mus. 72:1-15; Dan. 2:44; 2 Pet. 3:13) Disua dia Yehowa didi dienzeka lelu mu diulu; nunku patudi tumulomba bua dienzeke kabidi pa buloba mmumue ne: tudi tusambila bua Nzambi akumbaje malu adiye mulongolole bua buloba, ne kumusha baluishi bende badipu anu muvuaye muenze ku kale.​—Bala Musambu wa 83:1, 2, 13-18.

14. Bua tshinyi mbimpe kulomba ‘tshitupa tshia bidia bietu bia buatshiabuatshia’?

¹⁴ ‘Utupe tshitupa tshia bidia bietu bia buatshiabuatshia lelu.’ (Mat. 6:11; Luka 11:3) Patudi tusambila nunku, tudi tulomba Nzambi bua atupeshe tshiakudia tshikumbane tshia ‘buatshiabuatshia,’ tshia lelu. Bidi bileja  mutudi bitabuje ne: Yehowa udi ne bukole bua kutukumbajila majinga etu a ku dituku dionso. Katuena tulomba bintu bipitepite bungi to. Bualu ebu budi butuvuluija muvua Nzambi muambile bena Isalele bua kuangula mana “ku dituku bikumbane ku dituku bikumbane.”​—Ekes. 16: 4.

15. Kuamba ne: ‘Utulekelele mabanza a malu mabi etu bu mutuakumana kulekelela kabidi badi netu mabanza a malu mabi’ kudi kumvuija tshinyi?

¹⁵ Bualu bukuabu butudi tulomba mu disambila edi budi butuma ntema yetu ku tshitudi ne bua kuenza. Yezu wakamba kabidi ne: ‘Utulekelele mabanza a malu mabi etu bu mutuakumana kulekelela kabidi badi netu mabanza a malu mabi.’ (Mat. 6:12) Luka udi uleja ne: “mabanza” aa ‘mmibi.’ (Luka 11:4) Yehowa udi utubuikidila anu patudi tubuikidila badi batuenzela bibi. (Bala Matayo 6:14, 15.) Nunku, tudi ne bua kubuikidila bakuabu ne muoyo mujima.​—Ef. 4:32; Kolos. 3:13.

16. Kulomba Nzambi bua katufikishi padi mateyi, kadi atusungile kudi bubi kudi kumvuija tshinyi?

¹⁶ ‘Kutufikishi padi mateyi, kadi utusungile kudi bubi.’ (Mat. 6:13) Malu abidi aa adi umvuija tshinyi? Tudi bamanye ne: Yehowa katu ututeya bua tuetu kuenza bubi to. (Bala Yakobo 1:13.) Satana ke muntu mubi udi “Muteyi” wa bantu. (Mat. 4:3) Kadi Bible udi wakula bua malu adi Nzambi ulekela enzeka bu ne: yeye ke udi muenze malu aa. (Luta 1:20, 21; Muam. 11:5) Nunku, patudi tulomba Yehowa bua ‘katufikishi ku mateyi,’ tudi tumulomba bua katulekedi tukuatshika mu mateyi padibu batusaka bua kuenza malu mabi to. Mpindieu patudi tumulomba bua ‘atusungile kudi bubi,’ tudi tumulomba bua atuambuluishe bua Satana katupitshi bukole to. Tudi ne bua kuikala batuishibue ne: ‘Nzambi kakuitabuja bua tuetu tutetshibue ne diteta didi ditupita bukole.’​—Bala 1 Kolinto 10:13.

‘Nulombe, nukebe, nukokole’

17, 18. ‘Kulomba, kukeba, kukokola’ kudi kumvuija tshinyi?

¹⁷ Mupostolo Paulo wakambila bena Kristo nende ne: “Nunanukile mu kutendelela.” (Lomo 12:12) Yezu wakamba pende ne: ‘Nulombe, nebanupe; nukebe, nenumone; nukokole, nebanunzuluile. Bualu bua muntu yonso udi ulomba, neapete; udi ukeba, neamone; udi ukokola, nebamunzuluile.’ (Mat. 7:7, 8) Mbimpe ‘kutungunuka ne kulomba’ tshintu tshidi tshipetangana ne disua dia Nzambi. Mupostolo Yone wakafunda ne: ‘Edi ndikima ditudi nadi kudiye ne: Bituamulomba tshintu tshionso bu mu disua diende, yeye udi utumvuila.’​—1 Yone 5:14.

¹⁸ Padi Yezu utuambila bua kutungunuka ne ‘kulomba ne kukeba,’ udi usua kuamba ne: tudi ne bua kutungunuka ne kusambila ne muoyo umue, katuyi tulekela. Tudi kabidi ne bua kutungunuka ne ‘kukokola’ bua kubuela mu Bukalenge bua Nzambi ne kupeta malu mimpe onso atutuadilabu. Kadi Nzambi neandamune masambila etu anyi? Eyowa, bualu Yezu wakamba bua bantu badi balamate Yehowa ne: ‘Muntu yonso udi ulomba, neapete; udi ukeba, neamone; udi ukokola, nebamunzuluile.’ Malu a bungi adi menzekele bantu ba Nzambi adi aleja ne: kakuyi mpata, Yehowa ‘utu umvua milombu.’​—Mus. 65:2.

19, 20. Mu diumvuangana ne mêyi adi mu Matayo 7:9-11, mmunyi mudi Yehowa mufuanangane ne tatu muimpe?

¹⁹ Yezu wakafuanyikija Yehowa ne tatu muimpe udi upesha bana bende bintu bilenga. Elabi meji ne: udi pebe munkatshi mua bantu badi Yezu welela Muyuki wa pa Mukuna, mpindieu umvua Yezu wamba ne: ‘Mmuntu kayi  wa munkatshi muenu, biamulomba muanende mutanda wa bidia, neamupe dibue? Biamulombaye munyinyi wa mu mâyi, neamupe nyoka anyi? Nunku nuenu bantu babi, binuamanya mua kupa bana benu bintu bimpe, Tatu wenu udi mu diulu kena utamba kupa badi bamulomba bintu bimpe anyi?’​—Mat. 7:9-11.

²⁰ Nansha mudi tatu wetu eu mua kuikala ‘muntu mubi’ bua mudi Adama mumushile mibi, utu anu munange bana bende. Kena mua kushima muanende to, kadi udi umupesha “bintu bimpe.” Anu mutu tatu upesha bana bende bintu, Yehowa, Tatu wetu udi mutunange, utu utupesha “bintu bimpe,” tshilejilu bu mudi nyuma wende. (Luka 11:13) Nyuma eu udi mua kutuambuluisha bua kuenzela Yehowa mudimu muimpe, bualu udi mufidi wa ‘kupa kuonso kuimpe ne dipa dionso diakane tshishiki bidi bifuma mu diulu.’​—Yak. 1:17.

Mêyi a Yezu atungunuke amu ne kukuambuluisha

21, 22. Muyuki wa pa Mukuna udi ne mushinga kayi? Ntshinyi tshiudi umvua bua mêyi a Yezu?

²¹ Muyuki wa pa Mukuna uvua muyuki wa katshia ne katshia. Udi utulongesha bimpe malu a Nzambi a bungi. Anu mutudi balonge mu biena-bualu bishale, tuetu batumikile mibelu idi mu Muyuki eu, nebituambuluishe bikole. Mêyi a Yezu adi mu Muyuki eu adi mua kuakaja nsombelu wetu mpindieu ne kutupesha ditekemena bua matuku atshilualua.

²² Mu biena-bualu ebi, tudi balonge anu malu mimpe makese a mu Muyuki wa Yezu. Kabiena bitukemesha padibu bamba ne: ‘Diyisha diende diakakemesha bantu.’ (Mat. 7:28) Nebitukemeshe petu patudi tutumikila mêyi mimpe a Mulongeshi Munene, Yezu Kristo.

Newandamune munyi?

• Yezu uvua muambe tshinyi bua masambila a lubombo?

• Bua tshinyi ki mbimpe kuikala kuambulula miaku imue imue mu disambila?

• Leja malu atudi mua kulomba adi mu disambila dia Tatu wetu.

• ‘Kulomba, kukeba ne kukokola’ nkuenza tshinyi?

[Nkonko ya dilonga]

[Tshimfuanyi mu dibeji 15]

Yezu wakapisha bena lubombo bavua basambila anu bua bantu babamone

[Tshimfuanyi mu dibeji 17]

Bua tshinyi mbimpe tuetu kusambila bua tshiakudia tshietu tshia dituku dionso?