Dîyi dia Yehowa didi ne muoyo

Malu manene a mu mukanda wa Buakabuluibua​—Tshitupa 2

TSHIENZEKELA bantu badi batendelela Yehowa Nzambi ne badi kabayi bamutendelela ntshinyi? Tshienzekela Satana ne bademon bende ntshinyi? Mu Bukokeshi bua Kristo bua bidimu tshinunu, mmalu malenga kayi enzekela bantu badi batumikila Yehowa lelu? Tudi tupeta mandamuna a nkonko eyi ne mikuabu mu Buakabuluibua 13:1–22:21. * Mu nshapita eyi ke mudi tshikena-kumona tshia 9 too ne tshia 16, bivua mupostolo Yone mumone ku ndekelu kua bidimu lukama bia kumpala.

Yone wakafunda ne: ‘Muntu udi ubala, ne badi bumvua mêyi a buambi ebu, ne badi balama malu adi mafundamu, badi ne disanka.’ (Buak. 1:3; 22:7) Kubala malu adi mu mukanda wa Buakabuluibua ne kutumikila malu aa kudi kukolesha dijinga dietu dia kuenzela Nzambi mudimu ne muoyo muimpe, kudi kukolesha ditabuja dietu kudi Nzambi ne muanende Yezu Kristo, ne kudi kukolesha ditekemena dietu bua matuku atshilualua. *​—Eb. 4:12.

BADI BITSHIKIJA TUBAKUDI MUANDA MUTEKETE TUA TSHIJI TSHIA NZAMBI

(Buak. 13:1–16:21)

Buakabuluibua 11:18 udi wamba ne: ‘Ba mu bisamba bakadi ne tshiji, ne tshiji tshia Nzambi tshiakalua ne tshikondo tshia kubutula badi babutula buloba.’ Bua kuleja tshivua tshiji tshia Nzambi ne bua kuluila, tshikena-kumona tshia muanda mukulu tshidi tshileja mudimu wa ‘nyama wa luonji udi ne nsengu dikumi ne mitu muanda mutekete.’​—Buak. 13:1.

Yone udi umona mu tshikena-kumona tshia 9 ‘Muana wa Mukoko muimane pa Mukuna wa Siona’ muikale ne ‘bantu tshishikula tshimue ne mbombo inayi ne binunu binayi. Bakasumbibua munkatshi mua bantu.’ (Buak. 14:1, 4) Pashishe banjelu badi bamanyisha malu. Mu tshikena-kumona tshia 10, Yone udi umona ‘banjelu muanda mutekete bikale ne makenga muanda mutekete.’ Bidi bimueneka patoke ne: Yehowa nkayende ke udi mutumine banjelu aba dîyi dia kupongolola tubakudi anyi ‘mpanza muanda mutekete ya tshiji tshia Nzambi’ mu bitupa bia bulongolodi bua Satana. Mpanza eyi idi ne malu a kumanyisha bua manyoka ikala Nzambi mua kufila. (Buak. 15:1; 16:1) Bikena-kumona bibidi ebi bidi kabidi biumvuija manyoka a kudi Bukalenge bua Nzambi adi apetangana ne mulawu muisatu ne diela dia mpungi wa muanda mutekete.​—Buak. 11:14, 15.

Mandamuna a nkonko ya mu Bible:

13:8​—“Mukanda wa muoyo wa Muana wa Mukoko” ntshinyi? Mukanda eu ki mmukanda wetu mulelela eu to; udi amu ne mêna a bantu bakokesha ne Kristo mu Bukalenge buende. Udi kabidi ne mêna a bena Kristo bela manyi batshidi pa buloba.

13:11-13​—Mmunyi mudi nyama wa luonji udi ne nsengu ibidi wenza malu bu dragon, ne wenza bua kapia kapatukile mu diulu? Nyama eu udi umvuija bukalenge bua Angleterre ne États-Unis. Nyama eu udi wakula bu dragon bualu udi wenzeja bantu ku bukole ne tshikisu, bua bitabe anu tshidiye wamba. Udi wenzeja kapia bua kapatuke mu diulu bualu udi udiamba mudiye muprofete mulelela bu muvuaye mutshimune mvita ya kumpala ne  mibidi ya buloba bujima mu bidimu bia 1900, ne bu mudiye mutshimune bena Kominisme.

16:17​—Lupanza lua muanda mutekete badi balupongolola mu ‘lupepele’ kayi? ‘Lupepele’ ludi luleja ngelelu wa meji wa satana, ‘nyuma [anyi ngelelu wa meji] udi wenzeja katataka munkatshi mua bana ba bupidia.’ Muntu yonso udi muena mu bulongolodi bubi bua Satana udi upuyakana kapepa kabi aka.​—Ef. 2:2.

Malongesha adi atutangila:

13:1-4, 18. “Nyama wa luonji” anyi makalenge a bantu adi apatuka ‘mu mâyi manene,’ mbuena kuamba ne: apatukila mu misumba ya bantu bena tshimvundu. (Yesh. 17:12, 13; Dan. 7:2-8, 17) Satana ke udi muenze nyama eu, yeye ke udi kabidi mumupeshe bukole. Nyama eu nomba wende udi 666; nomba eu udi uleja mudiye munyanguke bikole. Tuetu bamanye bimpe tshidi nyama eu, katuakumulonda tuenda tumutumbisha anyi katuakumutendelela bu mudi bantu bakuabu benza to.​—Yone 12:31; 15:19.

13:16, 17. Nansha mutudi mua kuikala tutata mu midimu itudi tuenza matuku onso: bu mudi patudi ‘tusumba anyi tupana,’ katuena mua kulekela nyama wa luonji ututumina dîyi mu malu etu onso nansha. Kuitaba ‘tshimanyinu tshia nyama wa luonji pa tshianza tshietu anyi pa mpala yetu’ nkulekela nyama eu utuambila tshionso tshitudi ne bua kuenza anyi utuleja mua kuela meji.

14:6, 7. Dimanyisha lumu luimpe dia muanjelu didi dituleja ne: tudi ne bua kumanyisha lumu luimpe lua Bukalenge bua Nzambi ne muoyo mujima. Tudi ne bua kuambuluisha balongi betu ba Bible bua kutshina Yehowa Nzambi, kumunemeka ne kumutumbisha.

14:14-20. Pajika disangisha dia bantu bapanduka anyi ‘bintu bia pa buloba bia kunowa,’ muanjelu ‘neapuole tumuma tua mvinyo tua ku muonji wa pa buloba,’ neatuele mu ‘tshikaminu tshinene mene tshia tshiji tshia Nzambi.’ Mvinyo eu nebamubutule bua kashidi. Udi tshimfuanyi tshia mbulamatadi mibi ya bulongolodi bua Satana idi ikokesha bantu ne ‘bisumbu bia tumuma tua mvinyo’ anyi malu mabi ayi onso. Tudisuikayi bua mvinyo wa pa buloba eu katunyangi to.

16:13-16. “Nyuma ya bukoya” idi ileja ngenyi mibi idi bademon batangalaja bua diupumuna dia tubakudi muanda mutekete tua tshiji tshia Nzambi katushintuludi lungenyi lua bakalenge ba pa buloba to; kadi bua bikale anu benza malu adi abengangana ne a Yehowa.​—Mat. 24:42, 44.

16:21. Bu mudi nshikidilu wa ndongoluelu wa malu eu wenda usemena pabuipi, bidi bimueneka ne: nebambe mêyi makole a dikema menze bu mabue a mâyi bua kumanyisha kabutu ka ndongoluelu wa malu mubi wa Satana eu. Nansha nanku, bantu ba bungi nebatungunuke amu ne kupenda Nzambi.

MUKALENGE UDI UTSHIMUNA UDI UKOKESHA

(Buak. 17:1–22:21)

“Babulona Munene” (anyi bitendelelu bionso bia dishima) ke tshitupa tshitambe bubi tshia ndongoluelu wa Satana. Tshikena-kumona tshia 11 tshidi tshimuleja bu ‘mukaji wa masandi munene,’ bu ndumba munene ‘musombe pa nyima pa nyama wa luonji mukunzekunzu.’ “Nsengu dikumi” ya nyama eu neyimubutule butubutu. (Buak. 17:1, 3, 5, 16) Mu tshikena-kumona tshia 12, badi bafuanyikija ndumba eu ne “musoko munene” udibu ne bua kubutula. Ke bualu kayi badi bambila bantu ba Nzambi bua ‘bapatuke munkatshi muende.’ Bantu ba bungi badi badila bua dibutuka dia musoko munene eu. Kadi badi mu diulu badi basanka bua “dibaka dia Muana wa Mukoko.” (Buak. 18:4, 9, 10, 15-19; 19:7) Muntu udi mubande pa “kabalu katoke” mu tshikena-kumona tshia 13 udi uya kuluangana ne bisamba. Udi ubutula bulongolodi bua Satana.​—Buak. 19:11-16.

Kadi ntshinyi tshienzekela ‘nyoka wa kale, udi Diabolo ne Satana’? Ndîba kayi ‘diamuelabu mu dijiba dia kapia’? Ke bumue bua ku malu adi mu tshikena-kumona tshia 14. (Buak. 20:2, 10) Mu tshikena-kumona tshia 15 ne tshia 16 badi baleja muikala malu mu tshikondo tshia bidimu tshinunu. Ku ndekelu kua “buakabuluibua,” Yone udi  umona ‘musulu wa mâyi a muoyo, upatuka munkatshi mua musesu wa musoko,’ ne udi umvua kabidi mudibu babikila muntu yonso “udi ne nyota” bua aye kunua mâyi a muoyo.​—Buak. 1:1; 22:1, 2, 17.

Mandamuna a nkonko ya mu Bible:

17:16; 18:9, 10​—Bua tshinyi ‘bakalenge ba pa buloba’ badi badila ndumba udibu bobu nkayabu bashipe? Badi badila bua malu avuaye ubenzela. Padibu babutula Babulona Munene, bakalenge ba pa buloba badi balua kuvuluka muvuaye ubambuluisha. Bualu uvua uleja ne: malu mabi avuabu benza kaavua mabi to. Uvua ubambuluisha kabidi bua kutuma bansonga mu mvita. Uvua wenza kabidi bua bantu kuitababu tshionso tshivuabu babambila.

19:12​—Bua tshinyi anu Yezu nkayende ke udi mumanye dîna didibu kabayi batele edi? Dîna edi didi dileja muaba ne midimu idi nayi Yezu mu dituku dia Mukalenge (bu idibu batele mu Yeshaya 9:6). Muntu nansha umue kena mumanye dîna edi bualu midimu eyi nyende nkayende; nunku anu yeye nkayende ke udi mumanye bimpe tshidi kuikala ne midimu eyi kumvuija. Kadi Yezu udi wenza imue ya ku midimu eyi ne bena mu kasumbu ka mukaji musela, bualu ‘udi ufunda dîna diende dipiadipia edi pambidi pabu.’​—Buak. 3:12.

19:14​—Badi baya pamue ne Yezu pa tubalu mu mvita ya Armagedone mbanganyi? Munkatshi mua ‘bena mvita ba mu diulu’ badi baya ne Yezu mu mvita ya Nzambi mudi banjelu ne bela manyi bakadi baye mu diulu.​—Mat. 25:31, 32; Buak. 2:26, 27.

20:11-15​—Badi ne mêna abu mafunda mu “mukanda wa muoyo” mbanganyi? Mu mukanda eu mudi mêna a bantu bonso bapeta muoyo wa kashidi: bena Kristo bela manyi, bena mu musumba munene ne batendeledi ba Nzambi bajuka mu ‘dibika dia bakane.’ (Bien. 24:15; Buak. 2:10; 7:9) Nebafunde mêna a bantu babishabu mu ‘dibika dia babi’ mu “mukanda wa muoyo” anu pikalabu benze ‘malu ikala mafunda mu mikanda’ yapatulabu mu Tshikondo tshia bidimu tshinunu. Kadi badi mua kukupula kabidi mêna aa. Mêna a bela manyi adi ashala kashidi mu mukanda au anu padibu bashala balamate Nzambi too ne ku lufu. (Buak. 3:5) Mêna a bantu bapeta muoyo pa buloba adi ashalamu kashidi padibu bashala balamate Nzambi mu diteta dia ndekelu dienzeka ku ndekelu kua bidimu tshinunu.​—Buak. 20:7, 8.

Malongesha adi atutangila:

17:3, 5, 7, 16. ‘Meji adi afuma mu diulu’ adi atuambuluisha bua kumvua ‘bualu busokoka bua mukaji ne bua nyama wa luonji [mukunze kunzuu] udi umutuala.’ (Yak. 3:17) Nyama eu uvua mutuadije ne dîna dia Nsangilu wa bukua-bisamba, pashishe kulua kujukaye ne dîna dia Bulongolodi bua matunga masanga (ONU). Patudi tumvua bualu busokoka ebu, kabienaku bitusaka bua kuyisha lumu luimpe lua Bukalenge bua Nzambi bikole ne kumanyisha dilua dia dituku dia Yehowa ne muoyo umue anyi?

21:1-6. Tuikalayi bashindike ne muoyo mujima ne: malu malenga adibu balaye neenzeke mu Bukalenge bua Nzambi. Bua tshinyi? Bualu badi bamba bua malu malenga aa ne: ‘Malu aa akuenjibua.’

22:1, 17. ‘Musulu wa mâyi a muoyo’ udi uleja malu adi Yehowa mulongolole bua kumbushila bantu bimpe mibi ne lufu. Ndambu wa mâyi aa udiku lelu eu. Nanku, tuitabayi ne disanka dionso bua kuya ‘kunua mâyi a muoyo’ ne bua kuya kupesha bantu bakuabu mâyi aa!

[Mêyi adi kuinshi]

[Tshimfuanyi mu dibeji 5]

Mu Bukalenge bua Nzambi, bantu bimpe nebamone malu malenga a dikema!