Nuenu balume, ikalayi ne dinanga bu dia Kristo!

BUTUKU bua muladilu wa lufu luende, Yezu wakambila bapostolo bende ba lulamatu ne: ‘Ndi nnuelela mukenji mupiamupia ne: Nusuangane; nusuangane bu mungakunusua. Bua bualu ebu bantu bonso nebamanye ne: Nudi bayidi banyi, binuasuangana nunku.’ (Yone 13:34, 35) Nunku, bena Kristo balelela badi ne bua kunangangana.

Mupostolo Paulo wakambila balume bena Kristo ne: ‘Balume, suayi bakaji benu bu muakasua Kristo ekeleziya kabidi, wakadifila bua bualu buende.’ (Ef. 5:25) Ntshinyi tshidi mulume muena Kristo mua kuenza bua kutumikila mubelu eu mu dibaka diende nangananga padi mukajende muikale pende muena Kristo?

Kristo uvua munange tshisumbu

Bible udi wamba ne: ‘Budi balume nabu mbua kusua bakaji babu mene bu mudibu basue mibidi yabu. Muntu udi unanga mukajende udi udinanga; bualu bua kakuena kuanji kuikala muntu udi ne mubidi wende lukuna; kadi udi udisha mubidi wende, udi uulama bu mudi Kristo ulama ekeleziya.’ (Ef. 5:28, 29) Yezu uvua munange bayidi bende bikole ne uvua ubangata ne mushinga. Uvua ubenzela malu mimpe nansha muvuabu bena mapanga. Bu muvuaye musue ‘kuditekela ekeleziya kumpala kuende bu wa butumbi,’ uvua wimanyina anu pa ngikadilu mimpe ivua nayi bayidi bende.​—Ef. 5:27.

Mulume udi ne bua kuleja mudiye munange mukajende ku mêyi ne mu bienzedi biende anu bu muvua Kristo wenzela tshisumbu tshiende. Mukaji udi umvua disanka padi bayende umuambila misangu ya bungi mudiye mumunange. Kadi mukaji udi musombele mu nzubu muimpe muikale ne bintu bionso kakuikala ne disanka bikala bayende umulengulula anyi mumulekelele.

Ntshinyi tshidi mulume ne bua kuenza bua kuleja mudiye munange mukajende? Udi ne bua kumuleja kudi bantu bakuabu mu mushindu muimpe ne kumutemba bua mudiye umukuatshisha. Bikala mukaji mumuambuluishe bua kukumbaja bualu kampanda bunene mu dîku diabu, kena ne bua kuelakana bua kubuleja bantu bakuabu to. Padibu pankayabu, mukaji udi ne bua kumvua ne: bayende mmumunange. Udi mua kumukuata ku tshianza, kumusekesha, kumuela mu tshitupa, kumuela kalumbandi. Malu aa adi mua kumueneka bu malu makese kadi adi ne mushinga wa bungi kudi mukajende.

‘Kavua ufua bundu bua kubabikila ne: Bana betu’

Yezu Kristo kavua ‘ufua bundu bua kubikila bayidi bende ne: Bana betu’ to. (Eb. 2:11, 12, 17) Biwikala mulume muena Kristo, kupu muoyo ne: mukajebe mmuena Kristo nebe to. Didilambula diende kudi Yehowa didi kumpala kua mutshipu wa dibaka dienu nansha yeye mutambule kumpala kua nuenu kuselangana anyi panyima pa nuenu bamane kuselangana. Patu bana betu ba balume balombola bisangilu bia tshisumbu, batu babikila mukajebe padiye usua kuandamuna ne: “Muanetu wa bakaji.” Mukajebe mmuanenu wa bakaji ki nganu ku Nzubu wa Bukalenge to, kadi udi kabidi muanenu wa bakaji too ne kumbelu. Mulume udi ne bua kunemeka mukajende padibu kumbelu anu bu mutuye wenza padibu ku Nzubu wa Bukalenge.

Wewe muikale mukulu anyi musadidi wa mudimu mu tshisumbu, bidi mua kukukolela bua kuenza midimu ya mu tshisumbu bimpe ne kukumbaja kabidi majitu a mu dîku diebe  bimpe. Kadi nuenu nuambuluishangana bimpe ne bakulu bakuabu ne basadidi ba mudimu ne nulongesha bakuabu bua kuenza midimu ya mu tshisumbu, neupete dîba dia kusomba ne mukajebe udi muanenu udi nebe dijinga dikole kupita bena Kristo nebe bakuabu. Umanye ne: kudi bana betu bakuabu badibu mua kupesha midimu iudi mua kuenza mu tshisumbu, kadi anu wewe ke udi mua kukumbaja majinga a mukajebe.

Wewe udi kabidi ku mutu kua mukajebe. Bible udi wamba ne: ‘Mutu wa mulume yonso udi Kristo, ne mutu wa mukaji yonso udi mulume.’ (1 Kol. 11:3) Mmushindu kayi uudi ukokesha mukajebe? Kuena ne bua kuikala umuambuluila misangu yonso mvese eu ne kumuambila bua ikale ukunemeka to, kadi udi ne bua kumulombola ne dinanga dionso. Mushindu muimpe wa kukokesha mukajebe ngua kumuenzela malu muvua Yezu Kristo wenzela bayidi bende.​—1 Pet. 2:21.

‘Nudi balunda banyi’

Yezu uvua ubikila bayidi bende ne: balunda bende. Wakabambila ne: ‘Tshiena nnubikila kabidi bapika; bualu bua mupika kena mumanye budi mukalenge wende wenza; kadi ngakunubikila balunda; bualu bua ngakunumanyisha malu onso angakumvua kudi Tatu wanyi.’ (Yone 15:14, 15) Yezu uvua uyukila ne bayidi bende bikole. Bavua kabidi benza malu pamue. Tshilejilu, bakabikila ‘Yezu ne bayidi bende’ ku difesto dia dibaka dia mu Kana. (Yone 2:2) Bavua ne miaba yabu ivuabu basue kuya bikole, bu mudi mu budimi bua Getesemane. Bible udi wamba ne: ‘Yezu wakadi uyaku misangu ya bungi ne bayidi bende.’​—Yone 18:2.

Mbimpe mukaji amone ne: yeye ke mulunda wa pa muoyo wa bayende. Nunku bidi ne mushinga bua nuenu balume ne bakaji benu nuikale nuenza malu adi anusankisha pamue. Enzelayi Nzambi mudimu pamue. Ikalayi nulonga Bible pamue. Ikalayi nusomba pamue, nuendakana pamue, nuyukila bikole ne nudia pamue. Kanuikadi anu mulume ne mukaji to, kadi ikalayi kabidi balunda ba pa muoyo.

‘Wakabasua too ne ku nshikidilu’

Yezu ‘wakasua bayidi bende too ne ku nshikidilu.’ (Yone 13:1) Balume bakuabu kabena bidikija Kristo mu bualu ebu to. Mbafike too ne ku dilekela ‘bakaji ba ku bunsongalume buabu’ pamuapa bua kusela tuana tua bakaji tua mâyi muisu.​—Mal. 2:14, 15.

Kadi bakuabu bu mudi Willi badi bidikija Kristo. Mukaji wa Willi uvua usama bikole ne bivua bikengela kumulama munkatshi mua bidimu bia bungi. Ntshinyi tshivua Willi mumvue bua bualu ebu? Wakamba ne: “Ntu mmona mukajanyi bu dipa dia kudi Nzambi ne mmuanyisha bikole. Kukadi bidimu 60 bimvua mumulaye bua kumulama mu ntatu ne mu masanka. Tshiakupua dilaya edi muoyo nansha kakese to.”

Nuenu balume bena Kristo, ikalayi ne dinanga bu dia Kristo. Nangayi bakaji benu badi batshina Nzambi badi bikale bana benu ba bakaji ne balunda benu.

[Tshimfuanyi mu dibeji 20]

Mukajebe mmulunda webe wa pa muoyo anyi?

[Tshimfuanyi mu dibeji 20]

Tungunuka ne ‘kunanga mukajebe’