Kupesha bakuabu midimu: Bua tshinyi ne mushindu kayi?

YEHOWA ukavua ne tshibidilu tshia kupesha bantu bakuabu bukokeshi bua kuenza midimu kampanda anu kumpala kua kufukaye buloba. Wakafuka Muanende mulela umue ne pashishe kuitabaye bua ikale ‘muena mudimu’ wende bua kufuka diulu ne buloba. (Nsu. 8:22, 23, 30; Yone 1:3) Pakafuka Nzambi mulume wa kumpala ne mukajende, wakabambila bua ‘kuuja buloba tente ne kubukokesha.’ (Gen. 1:28) Mufuki wakapesha bantu mudimu wa kudiundisha Mparadizu wa mu Edene pa buloba bujima. Bushuwa, kutuadijila anu ku kale Yehowa ne basadidi bende batu bapesha bakuabu bukokeshi bua kuenza midimu kampanda.

Kadi kupesha muntu mukuabu bukokeshi bua kuenza mudimu kampanda kudi kumvuija tshinyi? Bua tshinyi bakulu bena Kristo badi ne bua kulonga mua kuenza nunku? Mmushindu kayi udibu ne bua kuenza bualu ebu?

Kupesha bakuabu bukokeshi kudi kumvuija tshinyi?

Kupesha muntu bukokeshi kudi kumvuija kumupesha mudimu utuvua mua kuenza bua ikale muleji-mpala wetu anyi kumupesha bukenji bua kuwenza mu dîna dietu. Nunku, kupesha bakuabu bukokeshi kudi kumvuija kubitabila bua kukumbaja bipatshila kampanda. Bualu ebu budi  bumvuija ne: tudi tuabanyangana nabu bukokeshi butudi nabu.

Bantu badibu bapesha mudimu wa kuenza mu tshisumbu badi ne bua kuwenza bimpe, kuleja mudiwu wenda, ne misangu ya bungi badi ne bua kuebeja muntu uvua mupeshawu tshia kuenza. Kadi mudimu au ngua muntu uvua mumupeshe bukokeshi bua kuwenza. Udi ne bua kulondesha bua kumona bikalawu wenda bimpe ne kufila mibelu padibi bikengela. Kadi bamue badi mua kuebeja ne: ‘Bua tshinyi kupesha muntu mukuabu mudimu uudi mua kudienzela?’

Bua tshinyi kupesha bakuabu midimu?

Fuanyikijabi ne: Yehowa udi ufuka Muanende mulela umue ne umupesha bukokeshi mu difuka dia bintu bikuabu. Bushuwa, ‘munda muende muakafukibua bintu bionso bia mu diulu ne bia pa buloba, ne bintu bidi bimueneka ne bintu bidi kabiyi bimueneka.’ (Kolos. 1:16) Mufuki uvua mua kudienzela malu onso yeye nkayende, kadi uvua musue bua Muanende apete pende disanka dia kuenza mudimu wa kufuka. (Nsu. 8:31) Bualu ebu buakambuluisha Muana bua kumanya ngikadilu ya Tatuende. Mu mêyi makuabu, Tatu uvua muenze nanku bua kulongesha Muanende.

Pavua Yezu Kristo pa buloba, wakidikija Tatuende bualu uvua upesha bayidi bende midimu ya kuenza. Wakabalongesha tshivuabu ne bua kuenza ku kakese ku kakese. Wakanji kutuma bapostolo 12 ne pashishe kuluaye kutuma bayidi bakuabu 70 kumpala kuende bua kuya kuyisha. (Luka 9:1-6; 10:1-7) Pavua Yezu ufika miaba ikavuaye mutume bayidi bende, uvua usangana bamane kulongolola mitshima ya bantu bua kumuitabujabu. Kumpala kua kubandaye mu diulu, wakapesha bayidi bende bakavuaye mulongeshe bukokeshi bua kuenza midimu mitambe bunene bu mudi wa kuyisha pa buloba bujima.​—Mat. 24:45-47; Bien. 1:8.

Kupesha bakuabu bukokeshi bua kuenza midimu ne kubalongesha mua kuyenza kuakalua tshibidilu tshia bena Kristo. Mupostolo Paulo wakambila Timote ne: ‘Malu aa uafile kudi bantu badi mua kueyemenyibua, balua kukumbana mua kuyisha bakuabu kabidi.’ (2 Tim. 2:2) Bantu bakadi ne dimanya dia bungi badi ne bua kulongesha bakuabu balua pabu kulongesha bakuabu kabidi.

Padi mukulu upesha bantu bakuabu midimu idiye ne bua kuenza, udi ubapesha pabu mushindu wa kupeta disanka dia kulongesha ne kulama mikoko. Mbimpe bakulu bamanye ne: kabena mua kukokesha bua kuenza malu onso to, ke bualu kayi badi ne bua kulomba bakuabu mu tshisumbu bua babambuluishe. Bible udi wamba ne: ‘Meji adi kudi bantu bapuekele.’ (Nsu. 11:2) Muntu mupuekele mmumanye malu adiye mua kukokesha bua kuenza ne adiye kayi mua kukokesha. Wewe ujinga kudienzela midimu yonso nkayebe udi mua kutshioka ne kupangila dîba dia kusomba ne bena mu dîku diebe. Kadi wewe ulomba bakuabu bua bakuambuluishe, udi uleja muudi ne meji. Tuangate tshilejilu tshia muanetu udi mutangidi wa malu a kasumbu ka bakulu. Udi mua kulomba bakulu bakuabu bua bakonkonone konte ya mu tshisumbu. Padi bakulu bakuabu bayikonkonona badi mua kumanya pabu mushindu udi tshibutshilu tshia mu tshisumbu.

Nansha mudi kupesha bakuabu midimu ya kuenza kubambuluisha bua kumanya mudimu, kudi kuambuluisha kabidi udi ubapeshayi bua kumona mushindu udi badiye muyipeshe bayenza. Nunku, padi bakulu bapesha bakuabu midimu mu tshisumbu, badi mua ‘kuteta’ bantu badi mua kulua basadidi ba mudimu.​—1 Tim. 3:10.

Ndekelu wa bionso, padi bakulu bapesha bantu bakuabu midimu badi baleja mudibu babeyemena. Paulo uvua ulongesha Timote pavuabu benza nende mudimu wa kuenza bisumbu ne  kubikumbula. Ke bualu kayi malanda avua pankatshi pa bantu babidi aba akakola bikole. Paulo wakabikila Timote ne: ‘Muananyi wa bushuwa mu ditabuja.’ (1 Tim. 1:2) Bia muomumue, malanda avua pankatshi pa Yehowa ne Yezu akakola bikole pavuabu benza mudimu wa kufuka bintu bionso pamue. Padi bakulu bapesha bantu bakuabu midimu, badi mua kukolesha malanda abu nabu.

Bua tshinyi bakuabu batu belakana?

Nansha mudi bakulu bamanye ne: mbimpe bua bakuabu babambuluishe, bitu bikolela bamue ba kudibu bua kuenza nunku pamuapa bualu badi bamona bu ne: badi bakepesha bukokeshi buabu. Badi bela meji ne: anu bobu ke badi ne bua kutangila malu onso. Kadi mbimpe bamanye ne: kumpala kua Yezu kubanda mu diulu, wakapesha bayidi bende mudimu mutambe bunene nansha muvuaye mumanye ne: bavua ne bua kuenza malu manene kupita avuaye muenze.​—Mat. 28:19, 20; Yone 14:12.

Kudi bakulu bakuabu bavua bapeshangane midimu ku kale, kadi bavuabu bayipeshe kabayi bayenze bimpe to. Badi bamona ne: bobu badienzelayi, nebayenze bimpe ne lukasa. Kadi tuangate tshilejilu tshia Paulo. Uvua mumanye mudi kupesha bakuabu midimu kuimpe, kadi uvua mumanye kabidi ne: bantu bavuaye ulongesha mudimu kabavua mua kuwenza anu muvuaye musue to. Pakenzaye luendu luende lua kumpala, wakalongesha Mâko mudimu. Paulo wakanyingalala bikole pavua Mâko mulekele mudimu uvuaye mumupeshe bua kupingana kuabu. (Bien. 13:13; 15:37, 38) Kadi bualu ebu kabuakapangisha Paulo bua kulongesha bakuabu mudimu to. Anu mutudi bambe kulu eku, wakangata Timote bua aye kumufila mu mudimu. Pakakumbana Timote bua kuambula majitu manene, Paulo wakamushiya mu Efeso ne kumupesha bukokeshi bua kutekamu bakulu ne basadidi ba mudimu.​—1 Tim. 1:3; 3:1-10, 12, 13; 5:22.

Bia muomumue lelu, bakulu kabena ne bua kubenga kulongesha bakuabu mudimu anu bualu muntu umue kena uwenza bimpe to. Badi ne bua kulonga mua kueyemena bakuabu ne kubalongesha. Kadi mmalu kayi adi bakulu kabayi ne bua kupua muoyo padibu bapesha bakuabu midimu?

Mushindu wa kupesha bakuabu midimu

Panudi basue kupesha bana betu midimu, mbimpe nutangile malu adibu bamanye. Tshilejilu, pavuaku dijinga dia bantu bavua mua kutangila mudimu wa kuabanya biakudia mu Yelushalema, bapostolo bakasungula ‘balume muanda mutekete bavua ne lumu luimpe bavua buule tente ne nyuma ne lungenyi.’ (Bien. 6:3) Wewe mupeshe muntu udi kayi wa kueyemena mudimu, udi mua kupanga mua kuwenza. Nunku mbimpe kuanji kupesha muntu tumidimu tukese. Padiye uleja mudiye wa kueyemena, nudi mua kumupesha midimu mikuabu.

Kadi ki nkujike to. Bantu batu bashilangane ne badi ne bipedi bishilangane. Nansha dimanya padi ditu dishilangane. Muanetu wa balume utu ne musangelu wa bungi udi mua kuenza mudimu wa diakidila bantu. Eu udi ne bulongame udi mua kuambuluisha sekretere wa tshisumbu. Bakulu badi mua kupesha muanetu wa bakaji udi ne tshipedi tshia kulengeja bintu mudimu wa kulongolola bilongo dituku dia Tshivulukilu.

Paudi upesha muntu mudimu, mbimpe kumuleja malu onso adiye ne bua kuenza patoke. Tshilejilu, kumpala kua Yone Mubatiji kutuma bayidi bende kudi Yezu, wakabambila tshivuaye musue kumanya ne mushindu uvuabu ne bua kumuela lukonko. (Luka 7:18-20) Kadi pavua  Yezu muambile bayidi bende bua kusangisha biakudia bivua bishale dîba divuaye muenze tshishima, kakabambila kalu ne kalu bua tshivuabu ne bua kuenza nabi to. (Yone 6:12, 13) Misangu ya bungi mudimu udibu bapesha muntu ne ngikadilu ya udibu baupesha ke bitu ne bualu. Muntu udi upeshangana mudimu ne udibu baupesha badi ne bua kumanya bimpe tshidibu bipatshila ne kuikala balejangana mudiwu wenda. Bonso badi ne bua kuikala bamanye malu adi udibu bapeshe mudimu mua kudienzela. Bikala mudimu au ne bua kujika dituku kampanda disunguluke, mbimpe kuyukidilangana bua dituku adi pamutu pa kumukosela dituku dia yeye kuujikija.

Udi ne bua kupesha muntu udi ukuambuluisha au bidiye ukengela bu mudi makuta, biamu bia mudimu ne kumuambuluisha padibi bikengela. Bidi kabidi mua kuikala bimpe bua kumanyisha bakulu bakuabu mudimu uudi mumupeshe. Tshilejilu, pavua Yezu mupeshe Petelo ‘mvungula ya bukalenge bua mu diulu,’ wakamupeshayi kumpala kua bayidi bakuabu. (Mat. 16:13-19) Bia muomumue, bidi mua kuikala bimpe bua bakulu bamanyishe bena mu tshisumbu bantu badi benza midimu kampanda.

Kadi mbimpe kuikala ne budimu. Wewe mumane kupesha muntu mudimu wa kuenza kadi utungunuka anu ne kuwenza, mbienza anu bu udi umuambila ne: “Tshiena nkueyemena to.” Ntshia bushuwa se: imue misangu muntu udi mua kupanga kuenza mudimu au bu muuvua musue. Kadi wewe umushilaku mpunga wa kudienzela amue malu, udi mua kupeta dikima dia kuwenza ne kuumanya bimpe. Tshidibi kabiena biumvuija ne: udi umulekela mudimu au kuyi utangila mudiwu wenda to. Nansha muvua Yehowa mupeshe Muanende bukokeshi mu mudimu wa difuka, kavua mumulekelawu nkayende to. Wakamuambila ne: ‘Tuenze muntu ne tshifuanyikiji tshietu.’ (Gen. 1:26) Nunku, mbimpe wikale uyukila ne muntu uudi mupeshe mudimu, umuambuluisha bua kuwenza ne umuela kalumbandi bua bikadiye muenze. Nuenu nukonkonona nende mu tshikoso bikadiye muenze, bidi mua kumuambuluisha. Yeye kayi uwenza bimpe, kuelakanyi bua kumubela ne kumuambuluisha to. Kupu muoyo ne: mudimu au nguebe wewe udi mumupeshawu to.​—Luka 12:48.

Bana betu ba bungi mbapete dimanya dia kuenza midimu ya mu tshisumbu bualu bakulu bavua babapeshayi ne babatabelela. Nunku bua kuidikija Yehowa, mukulu yonso udi ne bua kumanya bua tshinyi mbimpe kupesha bakuabu midimu ne mushindu wa kubapeshayi.

[Kazubu mu dibeji 29]

KUPESHA BANTU BAKUABU MIDIMU

• mmushindu wa kubapetesha pabu disanka dia kuyenza

• mmushindu wa kuenza malu a bungi

• mmushindu wa kuleja mutudi ne meji ne didipuekesha

• mmushindu wa kubalongesha

• mmushindu wa kuleja mutudi tubeyemena

[Kazubu mu dibeji 30]

MUA KUPESHA BAKUABU MIDIMU

• Sungula bantu badi bakumbane bua kuenza mudimu

• Baleja tshia kuenza patoke ne ikala uyukila nabu

• Baleja tshipatshila tshia mudimu patoke

• Bapesha bintu bidibu nabi dijinga bua kuwenza

• Ikala ulondesha mudi mudimu wenda ne leja muudi weyemena muntu udi uwenza

• Ikala mumanye ne: mudimu au nguebe wewe

[Bimfuanyi mu dibeji 31]

Kupesha bakuabu mudimu kudi kumvuija kubapesha bukokeshi bua kuwenza ne kulondesha mudiwu wenda