Nkonko ya babadi

Yezu uvua muyishe mu ditunga dia Isalele dijima. Kadi bua tshinyi mupostolo Petelo wakamba ne: bena Yuda ne bamfumu babu bavua bashipeshe Yezu “bua dipanga” diabu?​—Bien. 3:17, MMM.

Mupostolo Petelo wakambila bena Yuda bua tshilumbu tshivuabu natshi mu lufu lua Masiya ne: “Ndi mumanye ne: nuenu ne bamfumu benu, nuvua benze bualu ebu amu bua dipanga dienu.” (Bien. 3:14-17, MMM) Bamue bena Yuda bavua mua kuikala kabayi bajingulule ne: Yezu uvua Masiya ne kabavua bumvue malongesha ende. Bakuabu bavua mua kuikala kabayi bajingulule ne: Yezu uvua Masiya bualu kabavua basue kutumikila Nzambi, bavua ne kansungasunga, mukawu ne lukuna.

Tumonayi muvua dijinga dia kubenga kutumikila Yehowa difikishe bantu ba bungi ku diangata malongesha a Yezu mu mushindu mubi. Yezu uvua utamba kulongesha bantu ne bilejilu ne uvua ubijinguluila bantu bonso bavua basue kubiumvua bimpe. Kadi bakuabu bakalekela kumulonda pamutu pa kudienzeja bua kubiumvua. Dituku dikuabu, too ne bamue bayidi bende bakafika munda bua tshilejilu tshivuaye mubapeshe. (Yone 6:52-66) Bantu abu kabakajingulula ne: Yezu uvua ubapesha bilejilu bua kuteta ni bavua basue kushintulula meji abu ne bienzedi biabu. (Yesh. 6:9, 10; 44:18; Mat. 13:10-15) Kabavua kabidi bamanye mulayi uvua uleja ne: Masiya uvua ne bua kulongesha bantu ne nsumuinu anyi ne bilejilu to.​—Mus. 78:2.

Bakuabu pabu bakabenga kuitaba malongesha a Yezu bualu bavua ne kansungasunga. Tshilejilu, pavua Yezu mulongeshe mu nsunagoga wa kuabu ku Nazaleta, bantu ‘bakakema.’ Kadi pamutu pa kuitababu ne: Yezu uvua Masiya, bakatuadija kuela nkonko bua kumanya kuvuaye mufumine bamba ne: ‘Muntu eu wakuangata malu aa kudi kunyi? Yeye kena muena mabaya anyi? Kena muana wa Mariya anyi? Kena muanabu ne Yakobo ne Yose ne Yuda ne Simona anyi? Bana babu ba bakaji kabena munkatshi muetu anyi?’ (Mâko 6:1-3) Bena Nazaleta bavua bapepeja malongesha a Yezu bualu uvua mufumine mu dîku dia bantu bapele.

Kadi netuambe tshinyi bua bamfumu babu ba bitendelelu? Ba bungi ba kudibu bakapepeja malongesha a Yezu anu bua malu a muomumue. (Yone 7:47-52) Bakabenga kabidi malongesha ende bualu bavua bamumvuila mukawu bua muvua bantu bamuteleja. (Mâko 15:10) Bamfumu bavule bavua babenga kumuteleja bualu uvua wela lubombo luabu ne mashimi abu patoke. (Mat. 23:13-36) Ke bualu kayi Yezu wakaleja patoke muvuabu basue kushala mu dipanga diabu pakabambilaye ne: ‘Nuenu bamanyi ba mikenji, mulawu ulualua kunudi, bua nuenu nuakunyenga luvungula lua ku lungenyi; kanuakubuelamu, nuakupumbisha kabidi bakadi babuela!’​—Luka 11:37-52.

Yezu wakayisha lumu luimpe bidimu bisatu ne tshitupa mu Isalele. Wakalongesha kabidi bantu ba bungi bua kuenza mudimu eu. (Luka 9:1, 2; 10:1, 16, 17) Pakamona Bafalese muvua bantu balonda Yezu ne bayidi bende bakafika ku diamba ne: ‘Monayi, ba pa buloba bonso badi bamulonda.’ (Yone 12:19) Nunku katuena mua kuamba ne: bena Yuda ba bungi kabavua bamanye bualu nansha bumue to. Kadi bavua mu “dipanga” bualu kabavua bajingulule ne: Yezu uvua Masiya to. Bavua mua kuikala bavudije dimanya diabu dia Masiya ne kumunanga bikole kadi kabakenza nanku to. Bakuabu bakabuelakana mu tshilumbu tshia lufu lua Yezu. Ke bualu kayi mupostolo Petelo wakambila ba bungi ba kudibu ne: ‘Kudimunayi mitshima yenu, andamukayi kabidi, bua mibi yenu ijimijibue; bua bikondo bia kunukankamija bifume ku mêsu kua Mukalenge ne bua yeye atume Kristo wakunusunguilaye, Yezu mene.’ (Bien. 3:19, 20) Bualu bua dikema, bena Yuda binunu ne binunu bakatuadija kuteleja lumu luimpe, too ne “bakuidi ba bungi.” Kabavua kabidi benza malu mu dipanga to. Kadi bakakudimuna mitshima yabu ne Yehowa wakabanyisha.​—Bien. 2:41; 4:4; 5:14; 6:7.