Bulelela budi bufika miaba ya kule

TOUVA ntshitupa tshia buloba tshidi munda mua ditunga dia Russie ku Sud kua Sibérie ne ditunga dia Mongolie didi ku Sud ne ku Est kuatshi. Bantu ba bungi ba mu Touva mbasombele ku misoko idi kule menemene ne mbikole bua kufikamu bua kubayisha lumu luimpe. Kadi kukadi matuku, tshisumbu tshia bantu tshiakumbuka mu misoko ya bungi ya kule bua kulua mu Kyzyl tshimenga tshikulu tshia mu Touva bua kubuela mu masangisha kampanda bua kubalongeshabu. Pakumvua Maria muanetu wa bakaji udi mpanda-njila mu Kyzyl lumu lua dilua diabu, wakadiambila ne: tshivua tshikondo tshia pa buatshi tshia kubambila lumu luimpe.

Maria udi ulonda tshivua tshienzeke wamba ne: “Tshilongelu tshintu ndongesha tshiakalongolola masangisha bua kulongesha bantu bua kumanya tshia kuenza ne bintu bitu bikuatangana padibu babinua. Bantu batue ku 50 ba ku misoko ya kule ya mu Touva bavua ne bua kubuelamu. Munkatshi muabu muvua balongeshi, bantu badi balonga bikadilu bia bantu, badi batangila maneme a bana ne bakuabu.” Masangisha aa akapetesha Maria mushindu wa kuyisha, kadi kabivua bipepele buende yeye to. Udi wamba ne: “Ntu muntu wa bundu bua bungi ne bitu binkolela bua kuyisha bantu pandi tshiyi mudilongolole. Kadi ngakasambila Yehowa bua ampeshe dikima bua kuyisha bantu abu.” Maria wakakokesha bua kubayisha anyi?

Maria udi utungunuka wamba ne: “Ngakapeta Réveillez-vous! udi wakula bua ditshina dibi dia bintu. Meme kudiambila ne: ‘Tshibejibeji etshi tshidi mua kuambuluisha muntu udi ulonga bikadilu bia bantu,’ ke meme kutshiangata ne kuya natshi mu tulasa. Dituku adi, mulongeshi mukuabu uvua mulue bua masangisha au, wakabuela mu biro bianyi ne ngakamupesha tshibejibeji atshi. Wakatshiangata ne disanka dionso. Ke yeye kungambila ne: utu pende utshina bintu bikuabu. Dituku diakalonda, meme kumutuadila mukanda wa Les jeunes s’interrogent​—Réponses pratiques, tshitupa tshia 1. Kuwangataye kabidi ne disanka. Pangakamona muvuaye muangate mikanda ne disanka, meme kudiambila ne: idi mua kusankisha kabidi balongeshi bakuabu. Ke meme kuangata karton kajima ka mikanda ya Les jeunes s’interrogent ne mikanda mikuabu kuya nayi mu tulasa.” Karton kakashala munda mutupu mu mubunyi wa dîsu. Maria udi umvuija tshivua tshienzeke wamba ne: “Balongeshi bakuabu bavua balue pamue ne mulongeshi umvua mupeshe mukanda wa Les jeunes s’interrogent bakalua mu biro bianyi ne kungebeja ne: ‘Nkuepi kudibu babanya mikanda?’” Bavua balue anu muaba muine uvuabu bayabanya.

Dituku dia ndekelu dia masangisha divua mu Disambombo. Maria katu wenza mudimu dituku adi to, kadi wakateka mikanda pa mêsa a bungi mu biro biende. Wakafunda muaba uvua bantu bonso mua kubala ne: “Balongeshi basuibue, nudi mua kuangata mikanda eyi buenu nuenu ne bua bantu bakuabu. Mikanda eyi milenga neyinuambuluishe mu mudimu wenu ne mu mêku enu.” Ntshinyi tshiakenzeka? “Ngakaya mu tulasa dituku adi ne meme kumona ne: bakavua bangate mikanda ya bungi. Ke meme kuya lubilu bua kuangata mikanda mikuabu ne bibejibeji.” Pakajika masangisha au, Maria ukavua muabanye bibejibeji 380, mikanda 173 ne broshire 34. Pakapingana bantu bavua balue kubuela mu masangisha au kuabu, bakaya ne mikanda. Maria udi wamba ne: “Ndi ne disanka dia bungi bua mudi bulelela bufike too ne ku misoko ya kule ya mu Touva.”​—Muam. 11:6.

[Karte mu dibeji 32]

(Bua kumona malu bimpe, tangila mu mukanda)

RUSSIE

DITUNGA DIA TOUVA