Itaba ne dianyisha, upeshangana ne muoyo mujima

YEHOWA, Tatu wetu wa dinanga mmusue bua yonso kutudi ikale ne disanka. Dîyi diende didi ditujadikila ne: udi utangila malu a basadidi bende bonso ne muoyo mujima. (1 Pet. 5:7) Tshilejilu, udi utuambuluisha mu mishindu ya bungi bua tuetu kumuenzela mudimu ne lulamatu. (Yesh. 48:17) Yehowa mmusue bua malu adiye mulongolole bua kutuambuluisha atukuatshishe nangananga patudi mu ntatu. Ke tshidi Mikenji ya Mose ileja.

Bilondeshile Mikenji ya Mose, Yehowa uvua mulongolole malu bua bambuluishe ‘bapele’ bu mudi bana ba nshiya, bakaji bakamba ne benyi. (Lew. 19:9, 10; Dut. 14:29) Yehowa mmumanye ne: basadidi bende bakuabu badi mua kuikala dijinga ne diambuluisha dia bena Kristo nabu. (Yak. 1:27) Nunku, muena Kristo nansha umue kakuelakana bua kuitaba diambuluisha dia bantu badi Yehowa usaka bua kumuambuluisha to. Kadi patudi tuitaba diambuluisha dia bakuabu, tuditabe ne lungenyi luimpe.

Dîyi dia Nzambi didi diamba kabidi ne: basadidi ba Nzambi batu ne mpunga ya kupeshangana bintu. Tuvuluke tshilejilu tshia ‘mukaji mupele wa mu lufuila’ uvua Yezu mumone ku ntempelo wa mu Yelushalema. (Luka 21:1-4) Kakuyi mpata, mukaji eu uvua mua kuikala upeta diambuluisha divua Yehowa mulongolole bilondeshile Mikenji ya Mose. Nansha muvuaye mupele, katuena tumuvuluka bua diambuluisha divuaye upeta to, kadi tudi tumuvuluka bu muntu uvua upeshangana bintu. Lungenyi luende lua kupeshangana bintu luvua ne bua kuikala lumupeteshe disanka bualu Yezu wakamba ne: ‘Kupa kudi kutamba kuangata kusankisha muntu.’ (Bien. 20:35) Bilondeshile tshilejilu tshia mukaji eu, mmushindu kayi utudi petu mua ‘kupesha bantu bintu’ ne kupeta disanka?​—Luka 6:38.

‘Nempingajile Yehowa tshinyi?’

Mufundi wa musambu kampanda wa mu Bible wakadiebeja ne: ‘Nempingajile Yehowa tshinyi bua malu ende mimpe onso akungenzelaye?’ (Mus. 116:12) Mmalu kayi mimpe avua Yehowa mumuenzele? Uvua mumuambuluishe pavuaye mu ‘ntatu ne tunyinganyinga.’ Yehowa uvua kabidi ‘mupandishe muoyo wende.’ Mpindieu uvua musue ‘kupingajila’ Yehowa tshintu kampanda. Ntshinyi tshivuaye mua kumupesha? Wakamba ne: ‘Nemmane mitshipu yanyi kudi Yehowa.’ (Mus. 116:3, 4, 8, 10-14) Uvua mudisuike bua kukumbaja malu onso avuaye mulaye Yehowa ne kuenza bionso bivua Yehowa umulomba.

Udi pebe mua kuenza nanku. Mushindu kayi? Udi ne bua kuikala ne nsombelu udi umvuangana ne mikenji ya Yehowa misangu yonso. Ke bualu kayi, udi ne bua kuenza muebe muonso bua ntendelelu wa Yehowa ikale misangu yonso pa muaba wa kumpala mu nsombelu webe ne bua nyuma wa Nzambi akulombole mu malu ebe onso. (Muam. 12:13; Gal. 5:16-18) Kadi mu bulelela, kakuena tshintu tshiudi mua kupesha Yehowa tshidi mua kukumbanangana ne bionso bidiye mukuenzele to. Tshidibi, ‘mutshima wa Yehowa udi usanka’  padiye ukumona udifila ne muoyo webe mujima mu mudimu wende. (Nsu. 27:11) Kusankisha Yehowa ndiakalenga dinene be!

Ambuluisha bua tshisumbu tshikale bimpe

Kakuyi mpata, udi mujadike ne: tshisumbu tshia bena Kristo ntshikuambuluishe mu mishindu ya bungi. Tshilejilu, Yehowa udi utulongesha ku diambuluisha dia tshisumbu. Udi mumanye bulelela budi bukupikule ku malongesha a bitendelelu bia dishima, udi mumanye kabidi Nzambi ne malu adiye mulongolole. (Yone 8:32) Bisangilu bia tshisumbu, mpuilu ne mpungilu bidi ‘mupika wa lulamatu ne wa budimu’ ulongolola mbikuambuluishe bua kupeta dimanya diakufikisha ku muoyo wa tshiendelele pa buloba bukudimuna mparadizu buikala kabuyi ne ntatu ne makenga. (Mat. 24:45-47) Udiku mua kubala malu mimpe onso aukadi mupete ne awapeta ku diambuluisha dia tshisumbu tshia Nzambi anyi? Ntshinyi tshiwapingajila tshisumbu bua malu onso aa?

Mupostolo Paulo wakafunda ne: ‘Bitupa bionso bia mubidi bidi biakajangana ne bidi bilamakajangana kudiye bua dikuatshishangana dia manungu onso, bu mudi mudimu wa tshitupa tshionso, bidi bidiundisha mubidi mujima, too ne patentamabi bu nzubu mu dinanga.’ (Ef. 4:15, 16) Nansha mudi mvese eu wakula bua tshisumbu tshia bena Kristo bela manyi, udi kabidi ukumbanyina bena Kristo bonso lelu. Bushuwa, muena mu tshisumbu yonso udi ne tshidiye mua kuenza bua tshisumbu tshikale bimpe ne tshiye kumpala. Mushindu kayi?

Tudi mua kuenza nunku, patudi tudienzeja misangu yonso bua kukankamija bakuabu ne kubakolesha bua batungunuke ne mudimu wa Nzambi. (Lomo 14:19) Tudi kabidi tuambuluisha bua ‘didiunda dia mubidi mujima’ patudi tuleja mamuma a nyuma wa Nzambi mu malu onso atudi tuenzela bena Kristo netu. (Gal. 5:22, 23) Tudi kabidi mua kukeba mushindu wa ‘kuenzela bantu bonso bimpe, kadi tutamba kuenzela bena dîku dia bena kuitabuja bimpe.’ (Gal. 6:10; Eb. 13:16) Muena mu tshisumbu yonso, nansha yeye mulume anyi mukaji, muana peshi mukulumpe udi mua ‘kukoleshangana mu dinanga.’

Tudi kabidi mua kukuata mudimu ne dimanya dietu, bukole buetu ne bintu bietu bua kuenza mudimu udi upandisha bantu udibu bapeshe tshisumbu. Yezu Kristo wakamba ne: “Nuakangata tshianana.” Bu mutudi bangate tshianana, ntshinyi tshitudi ne bua kuenza? Yezu wakamba kabidi ne: ‘Nupeshangane tshianana.’ (Mat. 10:8) Ke bualu kayi, tudi ne bua kudifila bikole mu mudimu wa kuyisha lumu luimpe lua Bukalenge ne kuvuija bantu bayidi. (Mat. 24:14; 28:19, 20) Kudi malu adi akupangisha bua kuenza mudimu eu bikole anyi? Vuluka mukaji mupele wa mu lufuila utuvua batele. Makuta avuaye mufile avua makese menemene. Kadi Yezu wakamba ne: uvua mufile kupita bantu bonso bavua muaba au, bualu yeye uvua mufile bionso bivuaye mukokeshe.​—2 Kol. 8:1-5, 12.

Itaba diambuluisha ne lungenyi luimpe

Kadi kudi imue misangu iwikala dijinga ne diambuluisha dia bena mu tshisumbu. Kuelakanyi nansha kakese bua kuitaba diambuluisha didibu mua kukupesha paudi uluangana ne ntatu ya mu tshikondo etshi. Yehowa mmulongolole bua bana betu ba balume badi bakumbane ‘badishe ekeleziya’ anyi tshisumbu, mbuena kuamba ne: bakuambuluishe paudi mu ntatu ne makenga. (Bien. 20:28) Bakulu ne bena Kristo bakuabu mbasue kukusamba, kukuambuluisha ne kukulama paudi mu ntatu.​—Gal. 6:2; 1 Tes. 5:14.

Kadi paudi upeta diambuluisha kampanda, udienzeje bua kuditaba ne lungenyi luimpe. Ikala ne dianyisha misangu yonso idibu bakuambuluisha. Mona diambuluisha didi bena Kristo nebe bakupesha bu mushindu udi Nzambi ukuleja bulenga buende budi kabuyi bukuakanyine. (1 Pet. 4:10) Bua tshinyi bidi ne mushinga? Bualu katuena basue kufuanangana ne bena pa buloba ebu batu bangata bintu kabayi ne dianyisha nansha dikese to.

 Katutekemenyi bintu bipitshidile

Mu mukanda uvua Paulo mufundile tshisumbu tshia mu Filipoi, wakabambila bua Timote ne: ‘Tshiena ne mukuabu udi ne mutshima bu wende wa diela meji bulelela bua malu enu.’ Paulo wakamba kabidi ne: ‘Bakuabu buonso badi badikebela malu abu, kabena bakeba malu a Yezu Kristo.’ (Filip. 2:20, 21) Mmushindu kayi utudi mua kubenga kuditatshisha bikole anu bua ‘malu etu’ bilondeshile tshidi Paulo muambe etshi?

Katuena ne bua kuikala tuenzeja bakuabu mu tshisumbu bua kupitshisha dîba diabu dionso anu bua kutuambuluisha bua kujikija ntatu yetu to. Bua tshinyi? Tshilejilu, tutu ne dianyisha dia bungi padi muanetu utuambuluisha ne tshintu kampanda patudi mu lutatu. Kadi tudiku mua kumuenzeja bua atuambuluishe anyi? Nansha kakese. Bia muomumue, nansha mudi bana betu batuambuluisha misangu yonso ne disanka, katuena ne bua kutekemena bua batuenzele malu adibu kabayi mua kukokesha bua kuenza to. Bidi nanku, bualu tudi basue bua malu onso adi bena Kristo netu benza bua kutuambuluisha patudi mu ntatu, baenze ku budisuile ne disanka.

Kakuyi mpata bena Kristo netu nebikale misangu yonso pabuipi bua kutuambuluisha patudi mu ntatu. Kadi imue misangu, kabakukokesha bua kutuambuluisha bilondeshile bitudi nabi dijinga to. Biobi bienzeke nanku, ikala mujadike ne: Yehowa neakukuatshishe mu ntatu yebe yonso anu muvuaye mukuatshishe mufundi wa misambu.​—Mus. 116:1, 2; Filip. 4:10-13.

Nunku, kuelakanyi bua kuitaba ne dianyisha dionso malu adi Yehowa mulongolole bua kukuambuluisha nangananga paudi mu ntatu. (Mus. 55:22) Ke tshidiye musue bua wenze. Kadi mmusue kabidi bua wikale muntu “udi ufila ne disanka.” Nunku, ikala mudisuike ‘mu mutshima webe’ bua kufila tshionso tshiudi ukokesha bua kukuatshisha ntendelelu mulelela. (2 Kol. 9:6, 7) Dîba adi, newikale ne mushindu wa kuitaba ne dianyisha ne kupeshangana ne muoyo mujima.

[Kazubu/​Bimfuanyi mu dibeji 31]

‘Nempingajile Yehowa tshinyi bua malu mimpe onso akungenzelaye?’​—Mus. 116:12

▪ Keba mushindu wa ‘kuenzela bantu bonso bimpe’

▪ Ikala ukankamija bakuabu ne ubakolesha bua batungunuke ne mudimu wa Nzambi

▪ Difila bikole mu mudimu wa kuvuija bayidi bilondeshile makanda ebe