Longesha ne dinanga bua kuidikija Yezu

‘Kakuena muntu kale too ne katataka wakuakula bu mudi muntu eu wakula.’​—YONE 7:46.

1. Ntshinyi tshivua bantu benza pavuabu bateleja malongesha a Yezu?

ELA meji muvuabi mua kuikala bimpe bua kuteleja Yezu pavuaye ulongesha. Bible udi utuleja tshivua bantu benza pavuabu bumvua malongesha ende. Tshilejilu, Luka udi wamba mu mukanda wende ne: Bantu ba mu musoko uvua Yezu mukolele ‘bakakema bualu bua mêyi a luse akalopoka mukana muende.’ Matayo udi wamba ne: ‘Diyisha dia Yezu diakakemesha’ bantu bavua bamuteleja pavuaye ulongesha mu muyuki wende wa pa mukuna. Yone pende udi wamba ne: basalayi bavuabu batume bua kukuata Yezu bakapingana bianza bitupu bamba ne: ‘Kakuena muntu kale too ne katataka wakuakula bu mudi muntu eu wakula.’​—Luka 4:22; Mat. 7:28; Yone 7:46.

2. Mmushindu kayi uvua Yezu ulongesha?

² Basalayi abu bavua bambilamu. Kakuyi mpata, Yezu uvua mulongeshi mutambe bunene wa katshia ne katshia. Malu avuaye ulongesha avua umvuika bimpe, mapepele ne malondangane bimpe. Uvua ulongesha ne bilejilu ne wela bantu nkonko. Uvua ulongesha bapele malu avua mabakumbanyine ne bantu banene avua mabakumbanyine pabu. Nansha muvua malu avuaye ulongesha mikale malu male, avua mapepele bua kuumvua. Kadi Yezu kavua mulue mulongeshi munene anu bua malu atudi batele aa to.

Dinanga didi ne mushinga wa bungi

3. Mushindu uvua Yezu ulongesha uvua mushilangane ne uvua bamfumu ba bena Yuda balongesha ku tshinyi?

³ Munkatshi mua bafundi ne bafalese muvua bantu ba meji bavua ne dimanya ne bamanye kulongesha bimpe. Kadi bua tshinyi mushindu uvua Yezu ulongesha uvua mushilangane ne wabu? Bamfumu ba bena Yuda ba mu tshikondo atshi kabavua banange bantu ba tshianana to. Bavua babapetula, babamona bu ‘bedibue mulawu.’ (Yone 7:49) Kadi Yezu yeye, uvua umvuila bantu luse bualu bavua ‘batata ne bamuangalake bu mikoko idi kayiyi ne mulami.’ (Mat. 9:36) Uvua uditeka pa muaba wa bakuabu ne uvua ne muoyo muimpe. Pashishe bamfumu ba bena Yuda kabavua banange Nzambi ne muoyo mujima to. (Yone 5:42) Kadi Yezu yeye, uvua munange Tatuende ne uvua musue kuenza disua diende. Bamfumu ba bena Yuda bavua bakonyangaja dîyi dia Nzambi bua kukumbaja majinga abu. Yezu yeye, uvua munange ‘dîyi dia Nzambi’ bualu uvua  udilongesha bantu, ubumvuijadi, ubajadikila muvuadi diamba bulelela ne wenza malu avuadi diamba. (Luka 11:28) Bushuwa, dinanga diakambuluisha Yezu bua kuyisha bimpe, kuenzela bantu malu mimpe ne kubalongesha bimpe.

4, 5. (a) Bua tshinyi bidi ne mushinga bua kulongesha ne dinanga? (b) Bua tshinyi dimanya ne mushindu wa kulongesha bidi pabi ne mushinga patudi tulongesha?

⁴ Netuambe bishi buetu tuetu bayidi ba Kristo? Tudi basue kuidikija muvuaye uyisha ne nsombelu uvuaye nende. (1 Pet. 2:21) Katuena basue anu kuleja bantu tshidi Bible wamba to, kadi tudi basue kabidi kubaleja ngikadilu ya Yehowa, nangananga dinanga. Nansha tuetu ne dimanya dia bungi anyi dikese, bamanye kulongesha bikole anyi ndambu, dinanga nedituambuluishe bua kulenga mioyo ya bantu batudi tuyisha. Bua tuetu kuenza mudimu wa kuvuija bantu bayidi bimpe, tudi ne bua kuidikija Yezu ne kulongesha ne dinanga.

⁵ Bua tuetu kuikala balongeshi bimpe, tudi ne bua kumanya malu atudi ne bua kulongesha ne kumanya mushindu muimpe wa kualongesha. Yezu wakambuluisha bayidi bende bua kupeta dimanya ne kumanya mua kulongesha. Yehowa pende udi utuambuluisha muomumue lelu ku butuangaji bua bulongolodi buende. (Bala Yeshaya 54:13; Luka 12:42.) Kadi tudi ne bua kudienzeja bua kulongesha bantu ne muoyo mujima pamutu pa kubambila anu malu atudi bamanye. Tuetu bikale ne dimanya, bamanye mua kuyisha ne bikale ne dinanga, tudi mua kuenza mudimu muimpe menemene. Kadi mmushindu kayi utudi mua kuleja mutudi banange bantu patudi tubalongesha? Ntshinyi tshivua Yezu ne bayidi bende benza? Tumonayi tshivuabu benza.

Tudi ne bua kunanga Yehowa

6. Mmushindu kayi ututu tuakula bua muntu utudi banange?

⁶ Tutu basue kuambila bantu malu atudi banange ne patudi tuenza nunku, bantu badi bamona mutudi ne disanka dia kubambilawu. Ke tshitutu tuenza nangananga bua muntu utudi banange. Muoyo utu utusaka bua kuambila bakuabu malu ende. Tudi tumutumbisha, tumunemeka ne tumuakuila. Tudi tuenza nunku bualu tudi basue bua bakuabu banange muntu au, banange kabidi ngikadilu yende anu bu tuetu.

7. Dinanga divua Yezu munange Nzambi diakamusaka bua kuenza tshinyi?

⁷ Kumpala kua tuetu kufikisha bantu bakuabu ku dinanga Yehowa, tudi ne bua kuanji kumumanya tuetu bine ne kumunanga. Bualu bua tuetu kumutendelela mudiye musue, tudi ne bua kumunanga. (Mat. 22:36-38) Yezu mmutushile tshilejilu tshimpe. Uvua munange Yehowa ne muoyo mujima ne meji ende onso ne bukole buende buonso. Bu muvua Yezu musombe ne Tatuende bidimu bipite bungi mu diulu, uvua mumumanye bimpe menemene. Bualu ebu buakamuenzela tshinyi? Wakamba ne: ‘Ndi munange Tatu.’ (Yone 14:31) Wakaleja muvuaye munange Nzambi mu malu onso avuaye wamba ne wenza. Dinanga adi divua dimusaka misangu yonso bua kuenza malu avua asankisha Nzambi. (Yone 8:29) Diakamusaka bua kuela patoke lubombo lua bamfumu ba bena Yuda bavua bamba muvuabu baleji mpala ba Nzambi. Diakamusaka kabidi bua kuakula bua Yehowa ne bua kuambuluisha bantu bua kumumanya ne kumunanga.

8. Dinanga divua bayidi ba Yezu banange Nzambi diakabasaka bua kuenza tshinyi?

⁸ Anu bu Yezu, bayidi bende ba kumpala bavua banange Yehowa, ne dinanga edi diakabasaka bua kuyisha lumu luimpe ne dikima ne tshisumi. Bakuuja Yelushalema mujima ne malongesha abu nansha muvua bamfumu ba bena Yuda babakengesha ne babaluisha. Bayidi kabavua mua kulekela kuakula bua malu avuabu bamone ne bumvue. (Bien. 4:20; 5:28) Bavua bamanye ne: Yehowa uvua nabu ne uvua ne bua kubabenesha. Ke tshiakenza Yehowa. Ke bualu kayi, bidimu bitue ku 30 panyima pa lufu lua Yezu, mupostolo Paulo wakafunda ne: lumu luimpe lukavua luambibue ‘munkatshi mua bifukibua bionso muinshi mua diulu.’​—Kolos. 1:23.

9. Mmushindu kayi utudi mua kukolesha dinanga dietu bua Nzambi?

⁹ Tuetu basue kulua petu balongeshi bimpe, tudi ne bua kutungunuka ne kukolesha dinanga  dietu dia Nzambi. Mmushindu kayi? Tudi ne bua kuyukila ne Nzambi patudi tumusambila misangu yonso. Tudi kabidi tukolesha dinanga ditudi bamunange patudi tulonga Dîyi diende, tubala mikanda idi yumvuija Bible ne tubuela mu bisangilu bia bena Kristo. Patudi tumanya Nzambi bimpe, netumunange ne muoyo mujima. Nunku, patudi tuleja mutudi banange Nzambi mu mêyi etu ne mu bienzedi, bantu bakuabu nebamone bualu ebu ne nebanange pabu Yehowa.​—Bala Musambu wa 104:33, 34.

Tudi ne bua kunanga malu atudi tulongesha

10. Mulongeshi muimpe udi umanyikila ku tshinyi?

¹⁰ Mulongeshi muimpe utu munange malu adiye ulongesha. Udi ne bua kuitaba mudiwu malelela ne mikale ne mushinga. Mulongeshi yeye munange malu adiye ulongesha, balongi nebamone mudiye ne disanka ne neabambuluishe bimpe. Kadi mulongeshi yeye kayi musue malu adiye ulongesha, amanye ne: balongi bende kabakuangata ne mushinga to. Bu muudi mulongeshi wa dîyi dia Nzambi, tshilejilu tshiebe tshidi ne mushinga wa bungi kudi balongi bebe. Yezu wakamba ne: ‘Mulongi yeye mulonge biakane, neafuanangane ne mulongeshi wende.’​—Luka 6:40, MMM.

11. Bua tshinyi Yezu uvua munange malu avuaye ulongesha?

¹¹ Yezu uvua munange malu avuaye ulongesha. Uvua mumanye ne: malu a Tatuende wa mu diulu avuaye ulongesha avua ne mushinga wa bungi bualu avua ‘mêyi a Nzambi’ ne ‘mêyi a muoyo wa tshiendelele.’ (Yone 3:34; 6:68) Malu avua Yezu ulongesha avua anu bu bukenke bukole buvua buleja patoke malu mabi ne malu mimpe. Avua akolesha bantu bena bupuekele bavua batekete ku muoyo bua bienzedi bia bamfumu babu ba bitendelelu bia dishima ne bavua Diabolo ukengesha. Avua kabidi abapetesha ditekemena. (Bien. 10:38) Yezu uvua muleje muvuaye munange bulelela mu malu avuaye ulongesha ne wenza.

12. Mupostolo Paulo uvua umona kumanyisha bulelela bishi?

¹² Anu bu Yezu, bayidi bende bavua banange malu a Yehowa ne a Kristo bikole ne bavua baangata ne mushinga. Ke bualu kayi baluishi babu kabakabapangisha bua kuambila bantu bakuabu. Paulo wakafundila bena Kristo nende ba mu Lomo ne: ‘Ndi mudilongolole bua kuamba lumu luimpe. Bualu bua tshiena mfua bundu bua lumu luimpe bualu ludi bukole bua Nzambi bua lupandu kudi muntu yonso udi witabuja.’ (Lomo 1:15, 16) Paulo uvua umona kumanyisha bantu bulelela bu diakalenga dinene. Wakafunda ne: ‘Kundi meme, bakampa ngasa eu bua meme kuambila ba bisamba bia bende bua bubanji bua Kristo budibu kabayi bamanye mua kuidikija.’ (Ef. 3:8) Ki mbikole bua kufuanyikija muvua Paulo ne disanka pavuaye ulongesha bantu malu a Yehowa ne disua diende to.

13. Bua tshinyi tudi ne bua kunanga lumu luimpe?

¹³ Lumu luimpe ludi mu Dîyi dia Nzambi ludi lutuambuluisha bua kumanya Mufuki ne kumunanga. Lumu luimpe elu ludi lutuambuluisha bua kupeta mandamuna a nkonko minene itu bantu badiela ne ludi lushintulula nsombelu wetu, lutupetesha ditekemena ne lutukolesha patudi mu ntatu. Ludi kabidi lutuleja mutudi mua kupeta muoyo wa kashidi. Kakuena dimanya dikuabu didi dipite lumu luimpe elu to. Ndipa dia mushinga mukole didi Nzambi mutupeshe ne didi ditupetesha disanka dia bungi. Lumu luimpe elu ludi kabidi luvudija disanka ditudi nadi patudi tulumanyisha bantu bakuabu.​—Bien. 20:35.

14. Mmushindu kayi utudi mua kufika ku dinanga malu atudi tulongesha bikole?

¹⁴ Ntshinyi tshiudi mua kuenza bua kunanga lumu luimpe bikole? Paudi ubala Dîyi dia Nzambi, ikala wanji wimana bua kuela meji pa malu audi ubala. Tshilejilu, difuanyikija muikale ku luseke lua Yezu pavuaye wenda uyisha anyi wenza ngendu ne mupostolo Paulo. Udifuanyikije muikale mu mparadizu ne umona muikala nsombelu mushilangane ne utudi nende lelu. Ela meji ku masanka audi mupete bualu udi utumikila lumu luimpe. Wewe mutungunuke ne kunanga lumu luimpe bikole, bantu baudi ulongesha nebamone muudi mulunange. Ke bualu kayi, tudi ne bua kuela meji bimpe pa malu atudi tulonga ne mushindu  utudi tualongesha bakuabu.​—Bala 1 Timote 4:15, 16.

Tudi ne bua kunanga bantu

15. Bua tshinyi mulongeshi udi ne bua kunanga balongi bende?

¹⁵ Mulongeshi muimpe udi ne bua kuenzela balongi bende malu adi abasaka bua badiumvue bimpe bua banange malu adibu balonga ne bikale bakula pabu. Udi ulongesha balongi bende bualu mmubanange ne muoyo mujima. Udi ubalongesha bilondeshile majinga abu ne lumvu luabu. Udi utangila kabidi malu adi balongi bende mua kukokesha bua kuenza, utangila kabidi nsombelu wabu. Mulongeshi yeye ne dimanya dia mushindu eu, balongi bende nebadimone. Dîba adi, udi ulongesha ne disanka ne balongi pabu nebalonge ne disanka.

16. Mmushindu kayi uvua Yezu muleje muvuaye munange bantu?

¹⁶ Ke muvua Yezu munange bantu. Wakaleja muvuaye mubanange bikole pakafilaye muoyo wende mupuangane bua kubasungila. (Yone 15:13) Pavua Yezu uyisha, uvua wambuluisha bantu ne ubalongesha nangananga malu a Tatuende. Kavua windila bua bantu balue kudiye to, kadi uvua wenza ngendu mile ku makasa bua kuya kubayisha lumu luimpe. (Mat. 4:23-25; Luka 8:1) Uvua ne lutulu ne umvuila bantu. Pavuabi bikengela kupingaja bayidi bende mu njila muimpe, uvua ubabela ne dinanga. (Mâko 9:33-37) Uvua ubakolesha ku muoyo pavuaye ubambila ne: nebakokeshe bua kuyisha bimpe lumu luimpe. Kakutu mulongeshi utu muanji kunanga balongi bende bu Yezu to. Dinanga divuaye munange bayidi bende diakabasaka bua kumunanga pabu ne kutumikila mikenji yende.​—Bala Yone 14:15.

17. Mmushindu kayi uvua bayidi ba Yezu baleje muvuabu banange bantu bakuabu?

¹⁷ Anu bu Yezu, bayidi bende bavua banange bantu bavuabu bayisha bikole. Nansha muvuabu babakengesha ne bamba kujimija mioyo yabu, bakatungunuka anu ne kuyisha bantu lumu luimpe. Bavua banange bikole bantu bavua baluitaba. Mêyi a mupostolo Paulo adi alonda aa adi aleja muvuaye munange bantu. Wakamba ne: ‘Tuakikala bu bana batekete munkatshi muenu, bu mudi ndeji ukuongoluela bana bende balela. Nunku muomumue, bualu bua tuakatamba kunusua, tuakadi ne disanka dimpe bua kunupa, ki ndumu luimpe lua Nzambi nkayalu, kadi mioyo yetu kabidi, bualu bua nuakalua banangibue kutudi.’​—1 Tes. 2:7, 8.

18, 19. (a) Bua tshinyi tudi tudifila ne bietu bionso bua kuyisha? (b) Fila tshilejilu tshidi tshileja mudi bantu bakuabu bamona dinanga dietu.

¹⁸ Bia muomumue lelu eu, Bantemu ba Yehowa badi bayisha pa buloba bujima bua kupeta bantu badi basue kumanya Nzambi ne kumuenzela mudimu. Tshilejilu, kukadi bidimu 17 bilondangane bitudi tuenza mêba mapite pa muliyare umue tshidimu tshionso mu mudimu wa kuyisha ne wa kuvuija bantu bayidi,  ne tudi tutungunuka ne mudimu eu. Tudi tuenza mudimu eu ne muoyo mujima nansha mudibi bituangata dîba, makanda etu ne bintu bietu. Anu bu Yezu, tudi bamanye ne: Tatu wetu wa mu diulu mmusue bua bantu bapete dimanya didi difikisha ku muoyo wa tshiendelele. (Yone 17:3; 1 Tim. 2:3, 4) Dinanga didi ditusaka bua kuambuluisha bantu badi basue kumanya Yehowa ne kumunanga bu tuetu.

¹⁹ Bantu bakuabu batu bamona dinanga dietu edi. Tshilejilu, muanetu wa bakaji mukuabu udi mpanda-njila mu ditunga dia États-Unis utu ufundila bantu badi bafuishe mikanda bua kubasamba. Tatu mukuabu wakamuandamuna ne: “Mvua muanji kukema bua kumona muntu udienzeja bua kufundila muntu udiye kayi mumanye mukanda bua kumusamba mu lutatu. Ndi anu mua kuamba ne: udi munange bantu nebe ne munange kabidi Nzambi udi ubalombola mu nsombelu wabu.”

20. Bua tshinyi kuyisha ne dinanga kudi ne mushinga?

²⁰ Muntu mukuabu wakamba ne: padi muntu munange mudimu wende ne mumanye kuwenza, udi mua kuwenza bimpe menemene. Patudi tulongesha bantu, tudi tukeba kubambuluisha bua bamanye Yehowa ne bamunange ne muoyo mujima. Bua kuikala balongeshi bimpe, tudi ne bua kunanga Nzambi, kunanga bulelela ne kunanga bantu. Tuetu bikale ne dinanga dia mushindu eu ne tudileja patudi tuyisha, netupete disanka ditu difumina ku dipesha bakuabu bintu ne netusanke kabidi bualu tudi bamanye ne: tudi tuidikija Yezu ne tusankisha Yehowa.

Newandamune munyi?

• Patudi tuyisha bantu bakuabu lumu luimpe, bua tshinyi bidi ne mushinga bua . . .

kunanga Nzambi?

kunanga malu atudi tulongesha?

kunanga bantu batudi tulongesha?

[Nkonko ya dilonga]

[Tshimfuanyi mu dibeji 15]

Mushindu uvua Yezu ulongesha uvua mushilangane ne uvua bafundi ne bafalese balongesha ku tshinyi?

[Tshimfuanyi mu dibeji 18]

Bua kulongesha bimpe, tudi ne bua kuikala ne dimanya, kumanya kulongesha ne kuikala ne dinanga