“Nudilame mu dinanga dia Nzambi”

‘Nudilame mu dinanga dia Nzambi, nutekemene luse lua Mukalenge wetu Yezu Kristo too ne ku muoyo wa tshiendelele.’​—YUDA 21.

1, 2. Mmunyi mudi Yehowa muleje ne: mmutunange? Bua tshinyi katuena mua kuamba ne: neatulame mu dinanga diende nansha tuetu benze bualu kayi?

YEHOWA NZAMBI mmuleje mudiye mutunange mu mishindu ya bungi. Kadi bualu bunene budi buleja mudiye mutunange mmulambu wa Muanende udiye mufile bua kutupikula. Dinanga didiye mutunange ke divua dimusake bua kutuma Muanende munanga pa buloba bua kuluaye kutufuila. (Yone 3:16) Yehowa uvua muenze nunku bualu mmusue bua tuikale ne muoyo wa tshiendelele ne mmusue kabidi bua tushale mu dinanga diende bua kashidi.

² Kadi tudiku mua kuamba ne: Yehowa neatulame mu dinanga diende nansha tuetu benze bualu kayi anyi? Tòo. Bualu tudi tubala mu Yuda mvese wa 21 ne: ‘Nudilame mu dinanga dia Nzambi, nutekemene luse lua Mukalenge wetu Yezu Kristo too ne ku muoyo wa tshiendelele.’ Padibu bamba ne: “Nudilame mu dinanga dia Nzambi,” bidi biumvuija ne: tudi ne bua kuenza bualu kampanda. Nunku, ntshinyi tshitudi ne bua kuenza bua kushala mu dinanga dia Nzambi?

Tshia kuenza bua kushala mu dinanga dia Nzambi

3. Bilondeshile Yezu, ntshinyi tshivua ne mushinga bua kushalaye mu dinanga dia Tatuende?

³ Mêyi avua Yezu muambe butuku bua muladilu wa lufu luende adi atuambuluisha bua kumanya tshia kuenza. Wakamba ne: ‘Binuatumikila mikenji yanyi, nenushale mu dinanga dianyi, bu mungakatumikila mikenji ya Tatu wanyi, ne mundi nshala mu dinanga diende.’  (Yone 15:10) Bilondeshile mvese eu, Yezu uvua mumanye ne: kutumikila mikenji ya Yehowa kuvua ne mushinga bua kuikalaye mu malanda mimpe ne Tatuende. Bikalabi bivua nanku bua Muana mupuangane wa Nzambi, kabienaku mua kuikala nanku buetu tuetu kabidi anyi?

4, 5. (a) Mmushindu kayi munene utudi tuleja mutudi banange Yehowa? (b) Bua tshinyi kakuena tshintu nansha tshimue tshidi mua kutusaka bua kubenga kutumikila mikenji ya Yehowa?

⁴ Mushindu munene utudi tuleja mutudi banange Yehowa mpatudi tutumikila mikenji yende. Mupostolo Yone wakumvuija bualu ebu pakambaye ne: ‘Bua edi ndinanga dia Nzambi, bua tuetu tutumikile mikenji yende; ne mikenji yende kayena itunemena bujitu.’ (1 Yone 5:3) Lelu eu bantu ba bungi kabatu basue kutumikila bantu bakuabu to. Kadi katupu muoyo ne: ‘Mikenji ya Nzambi kayena itunemena bujitu.’ Yehowa kena utulomba bua kuenza bualu butudi katuyi mua kukokesha bua kuenza.

⁵ Tshilejilu, udiku mua kuambila mulunda webe bua kukuambuisha tshintu tshidi ne bujitu bua bungi tshiudi mumanye ne: ntshimupite makanda anyi? Nansha kakese! Yehowa utu ne muoyo muimpe kutupita kule ne kule ne mmumanye bimpe malu atudi katuyi mua kukokesha bua kuenza. Bible udi utujadikila ne: Yehowa ‘udi uvuluka ne: tudi dimfuenkenya.’ (Mus. 103:14) Kena mua kutulomba bua kuenza malu atudi katuyi mua kukokesha to. Nunku, kakuena tshintu nansha tshimue tshidi mua kutusaka bua kubenga kutumikila mikenji ya Yehowa to. Kadi tudi bamanye ne: kutumikila Yehowa Tatu wetu wa mu diulu kudi kutupetesha mushindu wa kuleja mutudi bamunange ne basue kushala mu dinanga diende.

Dipa dia pa buadi dia kudi Yehowa

6, 7. (a) Kondo ka muoyo ntshinyi? (b) Fila tshilejilu tshidi tshileja mudi kondo ka muoyo mua kutuambuluisha bua kushala mu dinanga dia Nzambi.

⁶ Mu tshikondo tshia malu makole tshitudi etshi, tudi ne mapangadika a bungi atudi ne bua kuangata bua kuleja mutudi tutumikila Nzambi. Ntshinyi tshidi mua kutuleja ne: mapangadika au adi umvuangana ne disua dia Nzambi? Yehowa mmutupeshe tshintu tshidi tshituambuluisha bikole mu tshilumbu tshia dimutumikila. Tshintu atshi ke kondo ka muoyo. Kondo ka muoyo ntshinyi? Mbukokeshi butudi nabu bua kukonkonona tshitudi. Kadi anu bu mulumbuluishi udi munda muetu udi ukonkonona mapangadika atudi tuangata ne malu atudi benze bua kumanya ni mmimpe anyi mabi.​—Bala Lomo 2:14, 15.

⁷ Mmushindu kayi udi kondo ketu ka muoyo mua kutuambuluisha? Tuangate tshilejilu. Muntu kampanda udi wendakana mu tshipela tshinene mudi kamuyi njila anyi bimanyinu bidi bileja kua kuyila to. Kadi kena ujimina to. Bua tshinyi? Bualu udi ne kaleji nord. Kaleji nord nkamu katu misangu ya bungi ne kalonda bu ka dîba kadi kambuluisha bua kuleja muntu luseke lua nord. Muntu udi wendakana mu tshipela udi mua kujimina yeye kayi naku. Bia muomumue, muntu yeye kayi ne kondo ka muoyo udi mua kuangata mapangadika mabi mu nsombelu wende misangu ya bungi.

8, 9. (a) Ntshinyi tshidi mua kuenzekela kondo ketu ka muoyo? (b) Ntshinyi tshitudi mua kuenza bua kondo ketu ka muoyo katuambuluishe?

⁸ Kadi anu bu mutu kaleji nord mua kupambuisha muntu, kondo ka muoyo kadi mua kuambuluisha muntu anyi kumupambuisha. Muntu udi wendakana mu tshipela yeye muteke kaleji nord pamue ne tshiamu tshia nzembu, kalonda kakakuleja kabidi ku nord to. Bia muomumue, tuetu balekele majinga mabi adi munda muetu atupita bukole, ntshinyi tshidi mua kuenzeka? Adi mua kunyanga kondo ketu ka muoyo. Bible udi utudimuija wamba ne: ‘Mutshima udi upita bintu bionso kudinga muntu, ne udi utamba kunyanguka.’ (Yel. 17:9; Nsu. 4:23) Pashishe muntu udi wendakana au yeye kayi ne dibeji didi dimuleja njila bimpe, kaleji nord kende kakakumuambuluisha to. Bia muomumue, tuetu katuyi tueyemena malu adi Dîyi dia Nzambi dituambila, kondo ketu ka muoyo kakena mua kutuambuluisha bimpe to. (Mus. 119:105) Kadi diakabi, bantu ba bungi lelu eu badi batamba kulekela majinga abu abapita bukole, kabayi bateleja  tshidi Dîyi dia Nzambi diamba to. (Bala Efeso 4:17-19.) Ke bualu kayi bantu ba bungi batu benza malu mabi nansha mudibu ne kondo ka muoyo.​—1 Tim. 4:2.

⁹ Katuitabi bua kubafuana nansha kakese to. Kadi tulekele Dîyi dia Nzambi dilongeshe kondo ketu ka muoyo bua katuambuluishe. Tudi ne bua kulonda tshidi kondo ketu ka muoyo kalongesha kudi Bible katuambila pamutu pa kulekela majinga etu atupita bukole. Tudi kabidi ne bua kuenza muetu muonso bua kunemeka kondo ka muoyo ka bena Kristo netu. Tudienzeje bua kubenga kubalenduisha katuyi tupua muoyo ne: kondo kabu ka muoyo kadi mua kuikala kabakandika bua kuenza amue malu adi ketu katuitabila bua kuenza.​—1 Kol. 8:12; 2 Kol. 4:2; 1 Pet. 3:16.

10. Tela malu asatu atudi ne bua kukonkonona mpindieu.

¹⁰ Tukonkononayi mpindieu mishindu isatu itudi mua kutumikila Yehowa bua kuleja mutudi bamunange. Mu malu onso aa kondo ketu ka muoyo nekatuambuluishe, kadi bua kutuambuluishaku bimpe kadi ne bua kuikala kalongesha kudi Dîyi dia Nzambi. Tudi tuleja mutudi banange Yehowa patudi tumutumikila mu malu asatu aa: (1) Kunanga bantu badiye munange, (2) kunemeka bantu badi batulombola ne (3) kushala bakezuke ku mêsu kua Nzambi.

Tunange bantu badi Yehowa munange

11. Bua tshinyi tudi ne bua kunanga bantu badi Yehowa munange?

¹¹ Tshia kumpala, tudi ne bua kunanga bantu badi Yehowa munange. Bantu batu anu bu ndanda bualu batu batentula malu a muaba udibu. Mufuki wetu mmumanye mudi balunda mua kunyanga anyi kuambuluisha bantu bena mapanga. Ke bualu kayi udi utubela wamba ne: ‘Udi wenda ne bena meji udi ulua muena meji, kadi udi ubuelakana ne bapote neakenge bua bualu ebu.’ (Nsu. 13:20; 1 Kol. 15:33) Kakuena muntu utu musue ‘kukenga’ to. Tuetu bonso tutu basue ‘kulua bena  meji.’ Kakuena muntu udi mua kuvuija Yehowa muena meji kupita mudiye anyi udi mua kumunyanga to. Nansha nanku, udi utupesha tshilejilu tshimpe pa bidi bitangila balunda. Tudiebeje ne: mbantu bena mapanga ba mushindu kayi batu Yehowa usungula bua kudia nabu bulunda?

12. Mbalunda ba mushindu kayi batu Yehowa usungula?

¹² Yehowa wakabikila Abalahama ne: “Mulunda wanyi.” (Yesh. 41:8) Abalahama uvua ne ditabuja dikole bualu uvua mulamate Nzambi ne muoyo mujima, umutumikila ne wenza malu makane. (Yak. 2:21-23) Yehowa mmusue balunda ba mushindu eu ne ke badiye ukeba lelu eu. Bikala Yehowa usungula balunda ba nunku, katuenaku petu ne bua kusungula balunda badi ne meji bua tuetu kulua petu bena meji anyi?

13. Ntshinyi tshidi mua kukuambuluisha bua kusungula balunda bimpe?

¹³ Ntshinyi tshidi mua kukuambuluisha bua kusungula balunda bimpe? Kukonkonona bilejilu bia mu Bible kudi mua kukuambuluisha. Tuangate tshilejilu tshia bulunda buvua pankatshi pa Luta ne mamuende muenu Naomi, pankatshi pa Davidi ne Yonatana anyi pankatshi pa Timote ne Paulo. (Luta 1:16, 17; 1 Sam. 23:16-18; Filip. 2:19-22) Bantu aba bavua badie bulunda buimpe bualu bobu bonso bavua banange Yehowa ne muoyo mujima. Udiku mua kupeta balunda badi banange Yehowa bu muudi mumunange anyi? Ikala mushindike ne: udi mua kubapeta ba bungi mu tshisumbu tshia bena Kristo. Balunda ba nunku kabakukusaka bua kuenza bualu budi mua kunyingalaja Yehowa to. Kadi nebakuambuluishe bua kumutumikila, kukolesha malanda ebe nende ne kukunyina nyuma bintu. (Bala Galatia 6:7, 8.) Nebakuambuluishe bua kushala mu dinanga dia Nzambi.

Tunemeke bantu badi batulombola

14. Bua tshinyi bitu bitukolela imue misangu bua kukokela bantu badi batulombola?

¹⁴ Mushindu muibidi utudi tuleja mutudi banange Yehowa udi utangila tshilumbu tshia bukokeshi. Tudi ne bua kunemeka bantu badi batulombola. Bua tshinyi bitu bitukolela imue misangu bua kubakokela? Tshia kumpala bualu bantu badi batulombola mbena mapanga. Pashishe tuetu bine tudi bena mapanga. Tudi ne bua kuluangana ne tshilele tshia buntomboji tshitudi baledibue natshi.

15, 16. (a) Bua tshinyi tudi ne bua kunemeka bantu badi Yehowa muteke bua kulombola basadidi bende? (b) Ntshinyi tshitudi tulongela ku mushindu uvua Yehowa mumone ditombokela divua bena Isalele batombokele Mose?

¹⁵ Nunku tudi mua kudiebeja ne: ‘Bu mudibi bikole bua kutumikila bantu badi batulombola, bua tshinyi tudi ne bua kubatumikila?’ Tudi tupeta diandamuna patudi tukonkonona tshilumbu tshia bumfumu budi ku mutu kua bionso. Nnganyi utuasungula bua kutulombola? Tuetu basungule Yehowa bua ikale mfumuetu tudi ne bua kunemeka bukokeshi buende. Tuetu katuyi tumunemeka tudiku mua kuamba mudiye mfumuetu anyi? Pashishe Yehowa utu misangu ya bungi ulombola basadidi bende ku diambuluisha dia bantu bena mapanga. Bu tuetu mua kutombokela bantu aba, Yehowa neamone bualu ebu mushindu kayi?​—Bala 1 Tesalonike 5:12, 13.

¹⁶ Tshilejilu, pavua bena Isalele bajane Mose ne bamutombokele, Yehowa wakamona ne: uvuabu batombokele nyeye. (Nom. 14:26, 27) Nzambi ki mmushintuluke to. Tuetu batombokele bantu badiye muteke bua kutulombola, yeye ke utudi tutombokela.

17. Mmushindu kayi utudi ne bua kumona bantu badi ne majitu mu tshisumbu?

¹⁷ Mupostolo Paulo udi uleja mutudi ne bua kumona bantu badi ne majitu mu tshisumbu tshia bena Kristo. Wakafunda ne: ‘Nutumikile badi banukokesha, nubakokele; bua bobu badi bikale ne tshitabela bua mioyo yenu, bu bantu balua kubadila Nzambi bintu; bua bobu benze bualu ebu ne disanka, kabayi ne manunganyi, bua bualu ebu kabuena bunukuatshisha.’ (Eb. 13:17) Tshidibi, tudi ne bua kudienzeja bikole bua kuikala bantu badi batumikila ne bakokela bumfumu. Kadi tuvuluke ne: tudi tuenza nunku bua kushala mu dinanga dia  Nzambi. Katuenaku mua kudienzeja bikole bua kushala mu dinanga dia Nzambi anyi?

Tuikale bakezuke ku mêsu kua Yehowa

18. Bua tshinyi Yehowa mmusue bua tuikale ne mankenda?

¹⁸ Mushindu muisatu utudi tuleja mutudi banange Yehowa mpatudi tudienzeja bua kuikala bakezuke ku mêsu kuende. Baledi batu benza muabu muonso bua bana babu bikale ne mankenda. Bua tshinyi? Tshia kumpala, bualu mankenda adi ambuluisha bana bua kuepuka masama. Pashishe, padi bantu bamona muana ne mankenda badi batumbisha baledi bende ne bamona mudibu bamunange ne bamulama bimpe. Bia muomumue, Yehowa mmusue bua tuikale bakezuke. Mmumanye ne: mankenda adi atuambuluisha bua kuikala ne makanda a mubidi. Mmumanye kabidi ne: padi bantu batumona ne mankenda badi bamutumbisha yeye Tatu wetu wa mu diulu. Bualu ebu budi ne mushinga wa bungi, bualu bantu badi mua kujinga bua kutendelela Nzambi wetu padibu batumona bashilangane ne bena mu buloba ebu budi bunyanguke.

19. Mmunyi mutudi bamanye ne: mankenda adi ne mushinga?

¹⁹ Mmu malu kayi mutudi ne bua kushala bakezuke? Mu malu onso a mu nsombelu wetu. Yehowa wakaleja bena mu tshisamba tshia Isalele muvua mankenda ne mushinga. (Lew. 15:31) Mikenji ya Mose ivua yakula bua malu bu mudi: kujika bunyawu, kusukula malongo, kuowa mâyi ku bianza ne ku makasa ne kusukula bilamba. (Ekes. 30:17-21; Lew. 11:32; Nom. 19:17–20; Dut. 23:13, 14) Bavua bavuluija bena Isalele misangu yonso ne: Yehowa Nzambi wabu udi Nzambi wa tshijila mbuena kuamba ne: udi ne mankenda, mmukezuke ne kayi katoba. Basadidi ba Nzambi wa tshijila badi ne bua kuikala pabu ba tshijila.​—Bala Lewitiki 11:44, 45.

20. Mmu malu kayi mutudi ne bua kuikala bakezuke?

²⁰ Nunku, tudi ne bua kuikala bakezuke munda ne pambelu. Tudi ne bua kudienzeja bua kulama lungenyi luetu lukezuke. Tudi tulonda mikenji ya Yehowa nansha mutudi munkatshi mua bantu badi baditue mu tshiendenda tshia masandi. Tudi kabidi tudienzeja bua kulama ntendelelu wetu mukezuke, katuyi tumunyanga ne malongesha a bitendelelu bia dishima. Tudi ne bua kuvuluka misangu yonso mêyi adi mu Yeshaya 52:11 adi amba ne: ‘Umbukayi, umbukayi, nulopoke mu muaba wawa, kanulengi tshintu tshidi tshibipa! Nulopoke munkatshi mua musoko au; nudilengeje, nuenu badi batuala malongo a Yehowa.’ Lelu eu bua kulama ntendelelu wetu mukezuke, katuena tubuelakana ne tshintu nansha tshimue tshidi mu diumvuangana ne bitendelelu bia dishima. Ke bualu kayi, katutu tuenza mafesto adi mamanyike bikole atu bena mu bitendelelu bia dishima benza. Tshidibi ki mbitekete bua kushala bakezuke to. Kadi Bantemu ba Yehowa badi benza muabu muonso bua kushala bakezuke bualu bidi bibambuluisha bua kushala mu dinanga dia Nzambi.

21. Ntshinyi tshidi mua kutuambuluisha bua kushala mu dinanga dia Nzambi?

²¹ Yehowa mmusue bua tushale mu dinanga diende bua kashidi. Kadi yonso wa kutudi udi ne bua kuenza muende muonso bua kushala mu dinanga dia Nzambi. Tudi mua kuenza nunku patudi tulonda tshilejilu tshia Yezu ne tuleja mutudi banange Yehowa patudi tutumikila mikenji yende. Tumanye ne: tuetu tuenza nunku kakuakuikala tshintu nansha tshimue ‘tshiatupandulula ku dinanga dia Nzambi didi mu Kristo Yezu Mukalenge wetu.’​—Lomo 8:38, 39.

Udi muvuluke anyi?

• Mmushindu kayi udi kondo ketu ka muoyo mua kutuambuluisha bua kushala mu dinanga dia Nzambi?

• Bua tshinyi tudi ne bua kunanga bantu badi Yehowa munange?

• Bua tshinyi mbimpe kunemeka bantu badi batulombola?

• Mankenda adi ne mushinga kayi kudi basadidi ba Nzambi?

[Nkonko ya dilonga]

[Kazubu/​Tshimfuanyi mu dibeji 20]

MUKANDA UDI WAKULA BIKOLE BUA NGIKADILU MIMPE

Mu mpungilu wa distrike uvua muenzeke mu tshidimu 2008, bavua bapatule mukanda wa mabeji 224 udi ne tshiena-bualu tshia ne: “Nudilame mu dinanga dia Nzambi.” Mukanda mupiamupia eu udi ne tshipatshila kayi? Udi ne tshipatshila tshia kuambuluisha bena Kristo bua bamanye mikenji ya Yehowa ne bayinange, udi wakula nangananga bua ngikadilu idi bena Kristo ne bua kuikala nayi. Tuetu balonge mukanda wa “Nudilame mu dinanga dia Nzambi” ne muoyo mujima, netufike ku dimona mudi kutumikila mikenji ya Yehowa kutuambuluisha mu nsombelu wetu mpindieu ne kutufikisha ku muoyo wa tshiendelele mu matuku atshilualua.

Bualu bukuabu, mukanda eu mmuenza bua kutuambuluisha bua tumone ne: kutumikila Yehowa kakuena kutunemena bujitu to. Kadi mmushindu wa tuetu kuleja mutudi bamunange bikole. Ke bualu kayi mukanda eu neusake yonso wa kutudi bua kudiebeja ne: ‘Bua tshinyi ndi ntumikila Yehowa?’

Padi bamue bantu benza tshilema tshinene tshia kumbuka mu dinanga dia Yehowa, kabitu nangananga bua malongesha etu to, kadi bintu bua bienzedi biabu bibi. Ke bua tshinyi mbimpe tuetu kuvudija dinanga ne dianyisha dietu bua mikenji ya Yehowa idi ituludika mu nsombelu wetu wa dituku dionso. Tudi bajadike ne: mukanda mupiamupia eu newambuluishe basadidi ba Yehowa badi pa buloba bujima bua bashale balamate malu makane, baleje mudi Satana muena dishima ne nangananga bua bashale mu dinanga dia Nzambi.​—Yuda 21.

[Tshimfuanyi mu dibeji 18]

‘Binuatumikila mikenji yanyi, nenushale mu dinanga dianyi, bu mungakatumikila mikenji ya Tatu wanyi, ne mundi nshala mu dinanga diende’