Uvua mupete biuma bisokoka

UKATUKU mupete biuma bisokoka mu muaba uuvua kuyi muelele meji anyi? Bualu ebu buakenzekela Ivo Laud Ntemu mukuabu wa Yehowa wa mu ditunga dia Estonie (divua kumpala ku bukokeshi bua Russie wa kale) mu dia 27 ngondo muisatu mu 2005. Uvua wambuluisha Alma Vardja, Ntemu nende ukavua mukulakaje bua kupula kazubu ka kale kavuaye ulamina bintu bia mudimu. Pakupulabu tshimanu tshia pambelu, bakamona dibaya dilamika ku luseke lua dikunji dikuabu. Pakumbushabu dibaya adi, bakamona disoso dia bunene bua santimetre 10 mu butshiama, santimetre 120 mu bule ne santimetre 10 mu buondoke. (1) Bavua bapete kaba kavuabu basokoke biuma bia mushinga mukole. Mbiuma kayi bivuamu? Nnganyi uvua mubisokoke?

 Bakapatula mu disoso adi tubuki tua bungi tujingila mu mabeji makolakane. (2) Mu tubuki amu muvua mikanda ya Bantemu ba Yehowa, nangananga biena-bualu bia kulonga bia Tshibumba tshia Nsentedi, bimue bia kudibi bikale bia mu 1947. (3) Bivua bifunda ku bianza mu tshiena Estonie. Tubuki tukuabu tuvua ne mêyi avua aleja muntu uvua mutusokoke. Bavua bafundapu malu avua menzeke pavuabu balumbuluisha Villem Vardja, bayende wa Alma. Bavua bafundapu kabidi bungi bua bidimu bivuaye muenze mu buloko. Bavua bamukuate bua tshinyi?

Villem Vardja uvua ne majitu manene mu tshisumbu tshia Bantemu tshia mu Tartu ne pashishe mu tshia Otepää mu Estonie. Bidi bimueneka ne: uvua mupete bulelela matuku makese kumpala kua mvita mibidi ya buloba bujima. Bidimu bikese pashishe, mu dia 24 ngondo wa 12 mu 1948, mbulamatadi wakakuata muanetu Vardja bua midimu yende ya buena Kristo. Bakamulumbuluisha ne kumukengesha kudi bampulushi batu benza mudimu wabu mu musokoko ne kutetabu bua kumuenzeja bua abambile mêna a Bantemu nende bakuabu. Bakamubengela bua kuya kulumbulula ku tubadi ne kumukosela tshibawu tshia bidimu dikumi bia buloko mu Russie.

Villem Vardja wakashala mulamate Yehowa too ne pakafuaye mu dia 6 ngondo muisatu 1990. Mukajende kavua mumanye ne: uvua musokoke mikanda ayi to. Bidi bimueneka ne: bayende kavua mumuambile muvuaye musokoke mikanda eyi bualu kavua musue imukebele bilumbu bu bobu mua kumukuata ne kumuela nkonko to. Kadi bua tshinyi uvua muyisokoke? Bualu bampulushi ba KGB bavua balua dîba dionso divuabu basue mu nzubu ya Bantemu bua kukeba mikanda yabu ya malu a Nzambi. Bidi bimueneka ne: muanetu Vardja uvua musokoke mikanda ayi bua Bantemu nende kabapangidi malu a kulongabu nansha bena KGB mua kubanyenga mikanda yabu yonso. Bakavua bapete miaba mikuabu ivuabu basokoke mikanda mu 1990 bu mudi mu tshimenga tshia Tartu ku sud kua Estonie. Anu Villem Vardja ke uvua muyisokoke.

Bua tshinyi tudi tuamba ne: mikanda ivuabu bafundulule ku bianza ne basokoke idi biuma bia mushinga? Bualu idi ileja muvua Bantemu banyisha bikole malongesha avuamu tshikondo atshi. (Mat. 24:45) Utuku wanyisha pebe malongesha atudi tupeta mu mikanda yetu lelu anyi? Munkatshi mua mikanda eyi mudi Tshibumba tshia Nsentedi tshia mu tshiena Estonie ne mu miakulu mikuabu mipite pa 170.