Dilongesha dia Nzambi nditambe malongesha makuabu
Dilongesha dia Nzambi nditambe malongesha makuabu
‘Ndi mbala bintu bionso bu tshintu tshijimina bualu bua bulengele butambe bua kumanya kua Kristo Yezu.’—FILIP. 3:8.
1, 2. Ndipangadika kayi didi bamue bena Kristo bangate? Bua tshinyi?
KATSHIA anu ku buana buende Robert uvua ne meji a bungi mu kalasa. Pavuaye ne bidimu muanda mukulu, mulongeshi wabu wakalua kuabu bua kumuambila ne: uvua ne mushindu wa kuenza tshionso tshivuaye musue kuenza. Wakamuambila muvuaye musue bua alue munganga munene. Bu muvuaye mujikije tulasa tuende tua bikadilu ne mpue ya bungi, uvua ne mushindu wa kuya mu iniversite muimpe yonso uvuaye musue mu ditunga diabu. Kadi Robert wakasungula bua kubenga kulonda tshitu bantu bamona bu diakalenga ditu muntu upeta anu musangu umue ne kuangata bumpanda-njila bua pa tshibidilu.
2 Anu bu Robert, bena Kristo ba bungi bakulumpe ne bana batu ne mushindu wa kuenza malu manene pa buloba apa. Bamue mbabenge bua kudifila bikole mu dienza malu aa bua bamone bua kuenzela Nzambi mudimu bikole. (1 Kol. 7:29-31) Ntshinyi tshitu tshisaka bena Kristo bu Robert bua kudifila bikole mu mudimu wa kuyisha? Badi badifila mu diyisha bikole bualu mbanange Yehowa ne badi bangata dilongesha diende ne mushinga wa bungi. Udiku muele meji matuku adi panshi aa tshiuvua mua kuikala bu wewe kuyi mupete bulelela anyi? Tuetu tuela meji pa masanka a pa buawu atudi nawu bualu Yehowa udi utulongesha nebituambuluishe bua kutungunuka ne kuangata lumu luimpe ne mushinga ne kuikala ne tshisumi mu diluyisha bantu bakuabu.
Ndiakalenga dinene dia kulongeshibua kudi Nzambi
3. Bua tshinyi tudi tuamba ne: Yehowa mmusue kulongesha bantu bena mapanga?
3 Bua bulenga buende, Yehowa mmusue kulongesha bantu bena mapanga. Bible ukavua muakule bua bena Kristo bela manyi mu Yeshaya 54:13 wamba ne: “Bana bebe bonso nebikale bayidi ba Yehowa; ditalala dia bana bebe nedikale dinene.” Mêyi aa adi akumbanyina kabidi “mikoko mikuabo” ya Kristo. (Yone 10:16) Bualu ebu budi bumueneka patoke mu mulayi mukuabu udi wenda ukumbana lelu eu. Yeshaya wakamona mu tshikena kumona bantu ba mu bisamba bionso balua kubuela mu ntendelelu mulelela. Udi wamba mudibu bende bambilangana ne: ‘Luayi bienu, tubande ku mukuna wa Yehowa, tubuele mu nzubu wa Nzambi wa Yakoba; bua yeye atuyishe bienzedi biende, ne bua tuetu tuende mu njila yende.’ (Yesh. 2:1-3) Ndiakalenga dinene dia kulongeshibua kudi Nzambi.
4. Ntshinyi tshidi Yehowa ulomba bantu badiye ulongesha?
4 Ntshinyi tshitudi ne bua kuenza bua Nzambi kutulongeshaye? Tudi ne bua kudipuekesha ne kuitaba bua atulongeshe. Davidi wakamba ne: ‘Yehowa udi muimpe ne muakane, udi uyisha badi ne mitshima mipuekele njila wende.’ (Mus. 25:8, 9) Yezu wakamba pende ne: ‘Tatu wanyi, Mukalenge wa diulu ne wa buloba, ndi nkusakidila bua wewe wakusokoka bena meji ne bena budimu malu aa, wakuasokolola kudi bana bakese.’ (Luka 10:21) Kumanya ne: Nzambi ‘udi upa badi badipuekesha ngasa’ wende kakuenaku kutusaka bua kumunanga anyi?—1 Pet. 5:5.
5. Tudi bafike ku dimanya Nzambi ku diambuluisha dia tshinyi?
5 Tuetu Bantemu ba Yehowa, tudiku mua kuamba ne: tudi badimanyine bulelela mu tuetu nkayetu peshi bua meji atudi nawu anyi? Tòo. Mu tuetu nkayetu katuvua mua kufika ku dimanya Nzambi to. Yezu wakamba ne: ‘Kakuena muntu udi mumanye mua kudivuila kundi, bikala Tatu wakuntuma kayi mumukoke.’ (Yone 6:44) Yehowa udi ukoka ‘bintu bilenga bia mu bisamba bionso’ anyi bantu badi bu mikoko kudiye ku diambuluisha dia mudimu wa kuyisha ne dia nyuma wende. (Hag. 2:7, NW) Kuenaku ne disanka bua kuikala munkatshi mua bantu badi Yehowa mukoke kudi Muanende anyi?—Bala Yelemiya 9:23, 24.
Dilongesha dia Yehowa didi dishintulula bantu
6. Ntshinyi tshidi tshienzekela bantu padibu bapeta ‘dimanya dia Yehowa’?
6 Yeshaya udi umvuija mu mulayi wende mukuabu mushindu udi bantu benda bashintuluka mu matuku etu aa. Bantu bavua ne tshikisu kumpala mbalue bena ditalala. (Bala Yeshaya 11:6-9.) Bantu bavua bakinangane bua dishilangana dia makoba abu, matunga, bisamba anyi bua malu makuabu mbalonge mua kusomba mu buobumue. Mbienze anu bu ne: ‘mbafule nkasu ya kudima nayi ku miele yabu ya mvita.’ (Yesh. 2:4) Ntshinyi tshidi tshibafikishe ku dishintuluka nunku? Bualu mbapete ‘dimanya dia Yehowa’ ne badi baditumikila mu nsombelu wabu. Nansha mudi basadidi ba Nzambi bikale bena mapanga, badi benza dîku dilelela dia bena muntu pa buloba bujima. Mushindu udi lumu luimpe lulenga bantu ba pa buloba bujima ne lushintulula nsombelu wabu udi ujadika mudi dilongesha dia Nzambi dipite malongesha makuabu onso.—Mat. 11:19.
7, 8. (a) Dilongesha dia Nzambi didi dipikula bantu ku imue ‘ngumbu ya mvita’ kayi? (b) Ntshinyi tshidi tshileja ne: dilongesha dia Nzambi didi ditumbishisha Yehowa?
7 Mupostolo Paulo wakafuanyikija mudimu wa kuyisha udi basadidi ba Nzambi benza ne diluangana ne malongesha a dishima. Wakafunda ne: ‘Bintu bietu bia mvita kabiena bia mubidi, kadi bidi bikole ku mêsu kua Nzambi bia kushimbula nabi ngumbu ya mvita; bidi bishimbula meji onso ne tshintu tshionso tshidi tshilepa mulu tshidi tshibandishibua bua kupumbisha natshi lungenyi lua Nzambi.’ (2 Kol. 10:4, 5) Dilongesha dia Nzambi didi dipikula bantu ku imue ‘ngumbu ya mvita’ kayi? Tudi mua kutela malu bu mudi: malongesha a dishima, bitabataba bia patupu ne nkindi ya bantu. (Kolos. 2:8) Dilongesha dia Nzambi didi diambuluisha bantu bua kulekela bilele bibi ne kupeta ngikadilu idi isankisha Nzambi. (1 Kol. 6:9-11) Didi diambuluisha bena mu dîku bua kusombabu bimpe. Didi dipesha bantu bavua batekete ku muoyo ditekemena. Edi ke dilongesha didi bantu nadi dijinga lelu eu.
8 Anu bu mudi tshilejilu tshidi tshilonda etshi tshileja, Yehowa udi wambuluisha bantu bua kuikala ne ngikadilu milenga bu mudi kuamba bulelela mu malu onso. (Eb. 13:18) Mamu mukuabu wa mu ditunga dia Inde wakitaba bua kulonga Bible ne kuluaye muambi wa lumu luimpe udi kayi muanji kutambula. Dituku dikuabu pavuaye ufuma ku dienza mudimu wa dibaka dia Nzubu wa Bukalenge, wakangula shene wa or wa mushinga wa dolare mitue ku 800 pabuipi ne muaba utu bantu bangatshila mashinyi. Nansha muvuaye mupele, wakaya kushiya shene eu kudi bampulushi bua bakebe muenayi. Mfumu wa bampulushi wakashala mukana mutubule, mupange tshia kuamba! Pashishe mpulushi mukuabu wakalua kumuebeja ne: “Bua tshinyi kuvua mulame shene eu?” Muanetu wa bakaji wakamuandamuna ne: “Malongesha a mu Bible mmangambuluishe bua kushintuluka, ke bualu kayi mpindieu ndi ngamba bulelela mu malu onso.” Mpulushi au wakakema bikole, e kuambilaye mukulu muena Kristo uvua mulue kufila muanetu wa bakaji au ne: “Tudi bantu bapite pa miliyo 38 mu tshitupa tshietu etshi. Bu nuenu mua kuambuluisha bantu dikumi patupu bua kulua bu mamu eu, nenuenze bualu buimpe be!” Patudi tumona bungi bua bantu badi dilongesha dia Nzambi diambuluishe bua kushintuluka, ki mbutumbi bua Yehowa anyi?
9. Ntshinyi tshidi mua kuambuluisha bantu bua kushintuluka?
9 Bukole bua kushintulula bantu budi nabu Dîyi dia Nzambi ne nyuma wende udiye upesha bantu, bidi bibambuluisha bua kushintuluka bikole. (Lomo 12:2; Gal. 5:22, 23) Kolosai 3:10 udi wamba ne: ‘Nuluate muntu mupiamupia udi uvuijibua mupiamupia mu dimanya dilelela, bu mudi tshifuanyikiji tshia Mumufuki.’ Dîyi dia Nzambi didi ne bukole bua kuleja tshidi muntu munda muende, didi kabidi mua kushintulula mushindu udiye wela meji ne umona malu. (Bala Ebelu 4:12.) Padi muntu umanya Bible bimpe ne utumikila mikenji ya Yehowa mu nsombelu wende, udi ulua mulunda wa Nzambi ne upeta ditekemena dia muoyo wa tshiendelele.
Yehowa udi utulongolola bua matuku atshilualua
10. (a) Bua tshinyi anu Yehowa ke udi mua kutulongolola bua matuku atshilualua? (b) Mmalu kayi manene ikala ne bua kushintuluka pa buloba mu katupa kîpi emu?
10 Anu Yehowa ke udi mukumbane bua kutulongolola bua matuku atshilualua bualu mmumanye tshikala ne bua kuenzeka mu katupa kîpi emu. Yeye ke udi wamba tshikala nsombelu wa bantu mu matuku atshilualua. (Yesh. 46:9, 10) Bible udi uleja ne: ‘Dituku dinene dia Yehowa didi pabuipi.’ (Sef. 1:14) Mêyi adi mu Nsumuinu 11:4 neakumbane dituku adi bualu adi amba ne: ‘Biuma kabiena bikuatshisha muntu mu dituku dia tshiji tshikole, kadi buakane budi bumupandisha ku lufu.’ Pakumbana tshikondo tshia Yehowa kubutulaye bulongolodi bua Satana, anu malanda mimpe ne Yehowa ke tshintu tshikala ne mushinga. Makuta kaakuikala ne diambuluisha nansha dikese to, bualu Yehezekele 7:19 udi wamba ne: ‘Nebimanshe bintu biabu bia argent mu misesu ne tshiamu tshiabu tshia or netshikale kudibu bu tshintu tshidi ne manyanu.’ Kudianjila kumanya bualu ebu kudi kutuambuluisha bua kuangata mapangadika mimpe.
11. Mmushindu kayi musunguluke udi dilongesha dia Nzambi ditulongolola bua matuku atshilualua?
11 Dilongesha dia Nzambi didi ditulongolola bua dituku dia Yehowa bualu didi dituambuluisha bua kuteka malu adi ne mushinga pa muaba wa kumpala. Mupostolo Paulo wakafundila Timote wamba ne: ‘Udimuije bantu badi babanji mu tshikondo tshia mpindieu, bua bobu kabadisu, kabateki ditekemena diabu kudi bubanji budi mua kujimina tshitupa tshîpi; kadi batekemene Nzambi.’ Nansha tuetu katuyi babanji, mubelu eu udi mua kutuambuluisha petu. Bidi bitulomba bua kuenza tshinyi? Pamutu pa kuditatshisha bua kupeta bintu bia bungi, tudi ne bua kudienzeja bua ‘kuenzela bantu bakuabu bimpe’ ne ‘kuikala babanji mu bienzedi bimpe.’ Patudi tuteka mudimu wa Yehowa pa muaba wa kumpala mu nsombelu wetu, tudi ‘tudibutshila bintu bimpe bua matuku atshilualua.’ (1 Tim. 6:17-19) Didifila dia nunku didi dileja mutudi ne meji, bualu Yezu wakamba ne: ‘Biasumba muntu buloba buonso ku muoyo wende, mushinga wende muimpe udi penyi?’ (Mat. 16:26, 27) Bu mukadi dituku dia Yehowa disemene pabuipi, yonso wa kutudi udi ne bua kudiebeja ne: ‘Mmuaba kayi undi ndibutshila bintu bianyi? Ndi mupika wa Nzambi anyi wa biuma?’—Mat. 6:19, 20, 24.
12. Bua tshinyi katuena ne bua kuteketa mu maboko padi bantu bapepeja mudimu wetu wa kuyisha?
12 Mudimu mutambe bunene udi munkatshi mua ‘bienzedi bimpe’ bidi Dîyi dia Nzambi dilomba bena Kristo ngua kuyisha lumu luimpe lua Bukalenge ne kuvuija bantu bayidi. (Mat. 24:14; 28:19, 20) Anu bu muvuabi bua bena Kristo ba kumpala, bamue bantu badi mua kupepeja mudimu wetu lelu. (Bala 1 Kolinto 1:18-21.) Kadi bualu ebu kabuena bukepesha mushinga udi nawu lumu luimpe, ne butufikisha ku dimona ne: kabiena ne mushinga bua kupetesha muntu yonso mushindu wa kuluitaba patshidiku dîba apa to. (Lomo 10:13, 14) Patudi tuambuluisha bantu bakuabu bua kupetabu pabu dilongesha dia Nzambi, netupete masanka a bungi.
Yehowa udi ubenesha basadidi bende bua didifila diabu
13. Mbintu kayi bivua mupostolo Paulo mulekele bua lumu luimpe?
13 Kumpala kua mupostolo Paulo kuluaye muena Kristo uvua ulonga bua kulua muntu munene mu malu a bena Yuda. Pavuaye ne bidimu bitue ku 13, uvua mua kuikala mumbuke mu musoko wabu wa Tâso ne muye ku Yelushalema bua kumulongeshabu kudi Gamaliele mulongeshi wa Mikenji muende lumu. (Bien. 22:3) Pakakolaye, Paulo wakatuadija kumanyika ne bu yeye mutungunuke nanku, uvua mua kuikala mulue muntu munene wa kunemeka kudi bena Yuda. (Gal. 1:13, 14) Pakitabaye lumu luimpe, wakalekela bintu bionso abi bua kutuadija kuyisha. Paulo uvuaku munyingalale bua dipangadika diende adi anyi? Tòo. Wakafunda ne: ‘Ndi mbala bintu bionso bu tshintu tshijimina bualu bua bulengele butambe bua kumanya kua Kristo Yezu, Mukalenge wanyi ungakajimijila bintu bionso bua bualu buende, ne ndi mbibala bu bintu bia kuela ku diala.’—Filip. 3:8.
14, 15. Mmasanka kayi atudi tupeta patudi ‘tuenzejangana mudimu ne Nzambi’?
14 Anu bu Paulo, lelu bena Kristo badi badipangisha amue malu bua kuyisha lumu luimpe. (Mâko 10:29, 30) Tudiku tukenga bua bualu ebu anyi? Robert, utuvua batele ku ntuadijilu udi uleja mutu bantu ba bungi badiumvua padiye wamba ne: “Tshiena nyingalala nansha kakese to. Mudimu wa ku dîba ne ku dîba mmumpeteshe masanka a bungi ne mmungambuluishe bua ‘kuteta, kulabula ne kumvua mudi Yehowa muakane.’ Dîba dionso dindi ndipangisha tshintu kampanda bua kukumbaja tshipatshila kampanda mu mudimu wa Yehowa, Yehowa utu anu umpesha bintu bipite bimvua mudipangishe. Bidi anu bu ne: tshiena mudipangishe tshintu nansha tshimue, bualu ndi mpeta bia bungi.”—Mus. 34:8; Nsu. 10:22.
15 Biwikala wenza mudimu wa diyisha bantu ne dibalongesha kukadi bidimu bia bungi, kakuyi mpata wewe pebe udi mupete mpunga ya bungi ya kuteta, kulabula ne kumona mudi Yehowa muakane. Kudiku misangu iuvua mumone diambuluisha dia nyuma wende pauvua uyisha bantu lumu luimpe anyi? Udiku mumone mudi bantu bapete disanka bualu Yehowa mmubulule mitshima yabu bua kuitababu lumu luimpe anyi? (Bien. 16:14) Yehowa mmukuambuluishaku bua kutantamena ntatu, pamuapa ukuambuluisha bua kuvudija mudimu webe anyi? Uvuaku mukukuatshishe bua kutungunuka ne kumuenzela mudimu pauvua kutshiyi ne bukole bua kumuenzelawu anyi? (Filip. 4:13) Patudi tumona mudi Yehowa utuambuluisha mu mudimu wetu wa kuyisha, tudi tufika ku dimumona bu muntu wetu wa bushuwa eu ne tumunanga bikole. (Yesh. 41:10) Nunku, tudi ne diakalenga dinene dia kuikala ‘benzejanganyi ba mudimu ne Nzambi’ mu mudimu wende munene wa dilongesha bantu.—1 Kol. 3:9.
16. Mmushindu kayi uudi udiumvua bua malu onso audi wenza bua kukumbaja mudimu wa Nzambi wa kulongesha bantu?
16 Bantu ba bungi batu basue kuenza bualu bunene kampanda mu matuku abu a muoyo. Nansha nanku, bantu batu bapua muoyo ne lukasa malu adi enzeka lelu pa buloba nansha wowu manene mushindu kayi. Kadi mudimu udi Bantemu ba Yehowa benza lelu bua kutumbisha dîna diende nebashale bauvuluka kashidi ne tshiendelele. (Nsu. 10:7; Eb. 6:10) Nunku, tuanyishayi bikole diakalenga ditudi nadi dia kulongesha bantu malu a Yehowa ne kuenza mudimu wikalabu bavuluka kashidi ne tshiendelele.
Newandamune munyi?
• Ntshinyi tshidi Yehowa ulomba bantu badiye ulongesha?
• Mmushindu kayi udi dilongesha dia Nzambi dishintulula bantu?
• Mmasanka kayi atudi tupeta patudi tuambuluisha bantu bakuabu bua kupetabu pabu dilongesha dia Nzambi?
[Nkonko ya dilonga]
[Tshimfuanyi mu dibeji 23]
Bantu badi Yehowa ulongesha badi benza dîku dia bena muntu pa buloba bujima
[Tshimfuanyi mu dibeji 24]
Kuikala ‘benzejanganyi ba mudimu ne Nzambi’ ndiakalenga dinene