Dinanga dia Kristo didi ditusaka bua kunangangana

‘Yezu mumane kusua bende mene bakadi pa buloba, wakabasua too ne ku nshikidilu.’​—YONE 13:1.

1, 2. (a) Bua tshinyi dinanga dia Yezu ndia pa buadi? (b) Mmishindu kayi ya kuleja dinanga ituakonkonona mu tshiena-bualu etshi?

YEZU mmutushile tshilejilu tshitambe buimpe tshia kunangangana. Malu onso avuaye wenza bu mudi: malu avuaye wakula, bikadilu biende, malongesha ende too ne lufu luende bivua bileja muvuaye ne dinanga. Too ne muakafua Yezu, wakaleja muvuaye munange bantu bavuaye mupetangane nabu, nangananga bayidi bende.

² Yezu mmushile bayidi bende tshilejilu tshia pa buatshi tshia dinanga. Tshilejilu tshiende tshidi kabidi tshitusaka bua kunanga bena Kristo netu ne bantu bakuabu. Mu tshiena-bualu etshi, netukonkonone tshidi bakulu ba mu tshisumbu mua kulongela kudi Yezu bua mushindu wa kuleja mudibu banange bantu badi benze bubi nansha buobu bunene. Netuakule kabidi mudi dinanga dia Yezu disaka bena Kristo bua kuambuluishangana mu bikondo bia ntatu, bikumina ne masama.

3. Nansha muvua Petelo muenze bubi bunene, Yezu wakamumona bishi?

³ Butuku bua muladilu wa lufu lua Yezu, mupostolo wende Petelo wakamuvila misangu isatu. (Mâko 14:66-72) Kadi diakamue pavua Petelo munyingalale anu mukavua Yezu mumuambile, Yezu wakamufuila luse. Wakamupesha majitu manene mu tshisumbu. (Luka 22:32; Bien. 2:14; 8:14-17; 10:44, 45) Ntshinyi tshitudi tulongela ku mushindu uvua Yezu umona bantu bavua benze bubi bunene?

Ikalayi ne meji a Kristo kudi badi benze bubi

4. Nnsombelu kayi udi utamba kutulomba bua kuikala ne meji a Kristo?

⁴ Mu nsombelu idi itulomba bua kuikala ne meji a Kristo, utu utamba kutunyingalaja bikole ngua padi muena mu dîku dietu anyi muena mu tshisumbu wenza bubi bunene. Diakabi, bu mudi matuku a ku nshikidilu a bulongolodi bua Satana enda asemena ku tshibungubungu, lungenyi lua pa buloba ludi luenda luvulangana palu. Lungenyi lua dienza malu mabi ludi mua kuambulukila bakulumpe ne bana ne kutekesha dipangadika diabu dia kutungunuka ne kuenza malu makane. Mu tshikondo tshia bena Kristo ba kumpala, bavua bipata bamue mu tshisumbu ne babela bakuabu patoke. Ke mudibi kabidi lelu. (1 Kol. 5:11-13; 1 Tim. 5:20) Kadi padi bakulu badi bakosa bilumbu bia mushindu eu baleja dinanga bu dia Kristo, bualu ebu budi mua kuambuluisha bantu badi benze bubi bikole.

5. Mmushindu kayi udi bakulu mua kuleja meji a Kristo kudi bantu badi benze bubi?

⁵ Anu bu Yezu, bakulu badi ne bua kulamata mikenji ya Yehowa misangu yonso. Padibu benza nunku, badi baleja mudi Yehowa muikale ne bupole malu, luse ne dinanga. Padi muntu uleja mudiye ne ‘mutshima utamba kunyingalala’ anyi ‘mutshima wa majiya’ bua bubi budiye muenze, nebikale bitekete bua bakulu ‘kumupingajabu kudi Nzambi ne mutshima wa kalolo.’ (Mus. 34:18; Gal. 6:1) Kadi netuambe tshinyi padibu kumpala kua muntu udi ne mutu mukole ne udi kayi unyingalala nansha kakese bua bubi buende?

6. Ntshinyi tshidi bakulu ne bua kuepuka padibu bayukila ne muntu udi muenze bubi? Bua tshinyi?

⁶ Padi muntu udi muenze bubi ubenga mibelu ya mu Bible idibu bamupesha anyi uteta bua kuela bakuabu tshilema pambidi, bakulu ne bantu bakuabu badi mua kumvua tshiji. Bu mudibu bamanye mudi muntu au muenzele bakuabu  bibi, badi mua kujinga kumuamba mêyi mabi bua malu adi muntu au muenze ne bua meji ende mabi. Kadi tshiji tshitu tshikebesha malu mabi ne katshiena tshileja mudi muntu muikale ne ‘meji a Kristo’ to. (1 Kol. 2:16; bala Yakobo 1:19, 20.) Yezu uvua wambila bamue bantu ba mu tshikondo tshiende malu patoke, kadi musangu nansha umue kavua mubambe mêyi avua aleja lukinu anyi avua mua kubatapa ku muoyo to. (1 Pet. 2:23) Kadi uvua ushila benji ba bubi mpunga wa kunyingalala ne kulengejangana ne Yehowa. Bidi nanku bualu Yezu uvua mulue pa buloba nangananga bua ‘kusungilaye bantu babi.’​—1 Tim. 1:15.

7, 8. Ntshinyi tshidi ne bua kuambuluisha bakulu padibu balumbuluisha benji ba bubi?

⁷ Mmushindu kayi udi tshilejilu tshia Yezu mu bualu ebu mua kutuambuluisha mu mushindu utudi tumona bantu badibu banyoke mu tshisumbu? Katupu muoyo ne: tshidi Bible wamba bua dilumbuluisha bantu mu tshisumbu tshidi tshilama mikoko ne tshidi mua kusaka muntu udibu banyoke bua kunyingalala. (2 Kol. 2:6-8) Bitu bitonda bua kumona bantu bakuabu babenga mua kunyingalala ne babipata mu tshisumbu. Kadi bidi bitukolesha ku muoyo patudi tumanya ne: ba bungi ba kudibu batu balua kulengejangana ne Yehowa ne kupingana mu tshisumbu tshiende. Padi bakulu bikale ne meji a Kristo, badi bapetesha muntu mushindu wa kushintuluka ne pamuapa kupingana mu tshisumbu. Padi matuku apita, bamue bantu bavua benze bubi kabena mua kuvuluka mibelu ya mu Bible yonso ivua bakulu babapeshe to, kadi nebavuluke muvua bakulu babanemeke ne babambuluishe ne dinanga.

⁸ Nunku bakulu badi ne bua kuikala ne “mamuma a nyuma,” nangananga kuikala ne dinanga bu dia Kristo nansha padi muntu udi muenze bubi kayi witaba mibelu ya mu Bible idibu bamupesha. (Gal. 5:22, 23) Kabena ne bua kuzukila bua kuipata muntu mu tshisumbu to. Badi ne bua kuleja ne: mbasue bua muntu udi muenze bubi apingane kudi Yehowa. Nunku, padi muenji wa bubi ulua kushintuluka anu mutu ba bungi benza, udi mua kuikala ne dianyisha dia bungi kudi Yehowa ne kudi bakulu badi ‘mapa mikale bantu’ badi bamuambuluishe bua kupingana mu tshisumbu.​—Ef. 4:8, 11, 12.

 Tuikale ne dinanga bu dia Kristo mu matuku a ku nshikidilu

9. Fila tshilejilu tshia muvua Yezu muleje muvuaye munange bayidi bende.

⁹ Luka udi wakula bua bualu kampanda budi buleja mudi Yezu ne dinanga. Bu muvua Yezu mumanye ne: basalayi ba bena Lomo bavua ne bua kulua kujingila Yelushalema bua kupangisha benamu bua kunyema, wakadimuija bayidi bende ne dinanga dionso ne: ‘Panuatangila bena mvita banyunguluke musoko wa Yelushalema, numanye ne: dibutuka diawu diakulua.’ Ntshinyi tshivuabu ne bua kuenza? Yezu wakabaleja tshia kuenza patoke. Wakabambila ne: ‘Badi mu Yudaya mu tshikondo atshi banyemene ku mikuna; badi mu musoko bapatuke; badi mu ntshiama kabapinganyi mu musoko. Bualu bua aa adi matuku a disombuela, bua kushikija malu onso akafundibua mu Mukanda wa Nzambi.’ (Luka 21:20-22) Pakalua basalayi ba bena Lomo kujingila Yelushalema mu 66 panyima pa Yezu, bantu bena ditumikila bakalonda mêyi a Yezu.

10, 11. Kukonkonona dinyema dia bena Kristo ba kumpala mu Yelushalema kudi kutuambuluisha mushindu kayi bua kudilongolola bua “dikenga dinene”?

¹⁰ Pavua bena Kristo banyema Yelushalema, bavua ne bua kuleja muvuabu banangangane anu bu muvua Kristo mubanange. Bavua ne bua kuambuluishangana ne bivuabu nabi. Kadi mulayi wa Yezu kauvua wakula anu bua dibutuka dia tshimenga tshia kale atshi to. Wakamanyisha ne: ‘Dikenga dinene nedilue; ku tshibangidilu tshia buloba too ne katataka kakuakadi dikenga bu adi nunku, kadiena dilua kabidi tshiendelele.’ (Mat. 24:17, 18, 21) Kumpala kua “dikenga dinene” didi kumpala edi ne munkatshi muadi, tuetu petu tudi mua kupeta ntatu ne kupangila bintu kampanda. Dîba adi, kuikala ne meji a Kristo nekutuambuluishe bua kuyitantamena.

¹¹ Mu tshikondo atshi, netuikale ne bua kuidikija Yezu ne kunangangana bikole. Paulo wakabela bena Kristo bua bualu ebu ne: ‘Muntu ne muntu wa munkatshi muetu asankishe muena mutumba nende bua kuvuija malu mimpe kudiye adi mua kumudiundisha. Bua Kristo kabidi kakadisankisha. Nzambi wa ditantamana ne wa busambi anupe bualu ebu mene, bua kuikalangana ne meji amue bu mudi Kristo Yezu.’​—Lomo 15:2, 3, 5.

12. Ndinanga dia mushindu kayi ditudi ne bua kuikala nadi? Bua tshinyi?

¹² Petelo uvua mumone muvua Yezu mumunange wakambila pende bena Kristo bua kuikala ne ‘dinanga dia bana babu ba mu Kristo didi kadiyi ne lubombo’ ne bua ‘kutumikila malu a bushuwa.’ Badi ne bua ‘kunangangana mu mitshima  yabu bikole.’ (1 Pet. 1:22) Lelu ke utudi ne bua kutamba kuikala ne ngikadilu bu ya Kristo bualu ntatu idi nayi bena Kristo bonso idi yenda ivula. Muntu nansha umue kena ne bua kueyemena tshintu nansha tshimue tshia pa buloba apa anu mudi malu a mpetu adi menzeke matuku adi panshi aa aleja. (Bala 1 Yone 2:15-17.) Kadi bu mudi nshikidilu wa tshikondo etshi wenda usemena bikole, tudi ne bua kukolesha malanda etu ne Yehowa ne kunangangana ne bena mu tshisumbu bikole. Paulo wakamba ne: ‘Mu dinanga dia bana benu ba mu Kristo nunangangane muntu ne muntu; mu buneme muntu ne muntu ateke mukuabu kumpala.’ (Lomo 12:10) Petelo pende wakalua kushindika bualu ebu pakambaye ne: “Ku mutu kua malu onso nuikalangane ne dinanga dikole munkatshi muenu, bualu bua dinanga didi dibuikila malu mabi a bungi.”​—1 Pet. 4:8.

13-15. Ntshinyi tshivua bana betu bakuabu benze bua kuleja dinanga bu dia Kristo pavua dikenga dikuate bana babu?

¹³ Bantemu ba Yehowa mbamanyike pa buloba bujima bua mutubu benzelangana malu adi aleja mudibu ne dinanga bu dia Kristo. Tuangate tshilejilu tshia Bantemu bavua bitabe bua kuya kuambuluisha bana babu bavua bipepele ne mvula mikole minyangile bintu mu tshitupa tshinene tshia kuinshi kua ditunga dia États-Unis mu 2005. Tshilejilu tshia Yezu tshiakasaka Bantemu bapite pa 20 000 bua kushiya nzubu yabu mimpe ne midimu yabu bua kuya kuambuluisha bana babu.

¹⁴ Mu tshimue tshitupa, mâyi akapasalala, kubuela mu bantu too ne mutantshi wa kilometre 80, kubanda mulu ne metre 10. Pakapueka mâyi, akavua manyange nzubu, tshia bisatu tshia nzubu yonso ivua mu tshitupa atshi. Bantemu bavua bafume mu matunga a bungi bakalua kuambuluisha ne dimanya diabu ne bintu biabu bia kuibaka nabi ne bavua bitaba midimu yonso ivuabu babapesha bua kuenza. Muanetu mukuabu wa bakaji ne muakunyende, bakavua bonso bakaji ba mu lufuila bakasuika mabuki abu, kuela mu mashinyi ne kuenza luendu lua kilometre 3 000 bua kuya kuambuluisha. Umue wa kudibu mmushale mu tshitupa atshi bua kuambuluisha kasumbu ka bana betu batu bambuluisha bantu badi bikumina bikuate ne kuikala mpanda-njila wa pa tshibidilu.

¹⁵ Bantemu mbibake ne balongolole nzubu mipite pa 5 600 ya Bantemu nabu ne ya bantu bakuabu mu tshitupa atshi. Ntshinyi tshivua bana betu ba muaba au bumvue bua malu mimpe avuabu babenzele au? Muanetu wa bakaji mukuabu uvua nzubu munyanguke uvua muye kusombela mu kontenere uvua umata mâyi ne ditshuwa dinyanguke. Bana betu bakamuibakila kazubu kimpe. Wakimana kumpala kua kazubu kende kapiakapia, kupuekeshaye binsonji bua kuela Yehowa ne bena Kristo nende tuasakidila. Bana betu bakuabu bakanji kushala tshidimu tshijima anyi kupita apu miaba ivuabu banyemene pavua mâyi mapasalale nansha pakavuabu babibakile nzubu yabu. Bua tshinyi? Bakashila bena Kristo nabu bavua balue kubambuluisha nzubu yabu. Etshi ntshilejilu tshimpe tshidi tshileja mutudi ne meji a Kristo.

 Tuikale ne meji a Kristo kudi badi basama

16, 17. Mmalu kayi atudi mua kuenza bua kuleja mutudi ne meji a Kristo kudi badi basama?

¹⁶ Anu bakese ba kutudi ke bakadi bapete ntatu mikebesha kudi bikumina. Kadi pa kumbusha bantu babala ku minu, tuetu bonso tukadi basame anyi basamishe. Malu avua Yezu wenzela bantu bavua basama adi mua kutuleja petu tshia kuenza. Dinanga diende divua dimusaka bua kubumvuila luse. Pavua bisumbu bia bantu bilua ne babedi kudiye, ‘uvua ukolesha bena mabedi bonso.’​—Mat. 8:16; 14:14.

¹⁷ Lelu, bena Kristo kabena ne bukole bua kuondopangana mu tshishima bu Yezu to, kadi badi bamuidikija padibu bumvuila babedi luse ne baditeka pa muaba wabu. Mmushindu kayi udibu baleja bualu ebu? Tshilejilu, bakulu badi baleja mudibu ne meji a Kristo padibu balongolola malu bua kuambuluisha bantu badi basama mu tshisumbu, benza tshidibu bambe mu Matayo 25:39, 40. * (Bala.)

18. Ntshinyi tshivua bana betu ba bakaji babidi benze bua kuleja muvuabu banange muanetu mukuabu? Ntshinyi tshiakenzeka bua bualu abu?

¹⁸ Kadi ki nganu bakulu nkayabu badi mua kuenzelangana malu mimpe to. Tuangate tshilejilu tshia Charlene muanetu wa bakaji mukuabu wa bidimu 44 uvua ne disama dia kansere ne uvuabu bambile ne: nkumushadile matuku dikumi bua kufuaye. Pakamona bana betu ba bakaji babidi, Sharon ne Nicolette lutatu luvuaye nalu yeye ne bayende, bakadifila bua kubambuluisha dîba dionso mu matuku ende a ndekelu au. Kadi Pamutu pa kuenza anu matuku dikumi, wakashala ne muoyo mbingu isambombo. Nansha nanku Sharon ne Nicolette bakaleja dinanga diabu too ne muakafuaye. Sharon udi wamba ne: “Bidi bienza bibi paudi mumanye ne: muntu kakumvua bimpe to. Kadi Yehowa wakatupesha bukole. Bualu ebu buakakolesha malanda etu nende ne kukolesha kabidi malanda etu nabu.” Bayende wa Charlene udi wamba ne: “Tshiena mua kupua muoyo malu mimpe avua bana betu ba bakaji babidi aba batuenzele to. Diambuluisha diabu divua kadiyi ne meji makuabu masokoka diakambuluisha mukajanyi Charlene bua kutantamena matuku ende a ndekelu ne kunkolesha panyi. Nengikale ne dianyisha kudibu too ne mungafua. Didifila diabu ndingambuluishe bua kueyemena Yehowa bikole ne kunanga bana betu ba pa buloba bujima.”

19, 20. (a) Mmishindu kayi itanu ya kuleja meji a Kristo itudi bakonkonone? (b) Udi mudisuike bua kuenza tshinyi?

¹⁹ Mu biena-bualu bisatu ebi, tudi bakonkonone mishindu itanu itudi mua kuleja meji a Kristo ne mutudi mua kuidikija mushindu wende wa dimona malu ne dienza. Tuikalayi ‘bapole malu ne bena bupuekele mu muoyo’ anu bu Yezu. (Mat. 11:29, MMM) Tudienzeje petu bua kuenzela bakuabu malu mimpe nansha bobu bikale ne bilema bidi bimueneka patoke. Tutumikile mikenji ya Yehowa ne dikima dionso nansha patudi mu ntatu ya mushindu kayi.

²⁰ Ndekelu wa bionso, tunangayi bena Kristo netu bonso ‘too ne ku nshikidilu’ anu bu muvua Kristo muenze. Dinanga dia nunku didi dileja mutudi bayidi balelela ba Yezu. (Yone 13:1, 34, 35) Bushuwa, tutungunuke ne ‘kunanga bana betu ba mu Kristo.’ (Eb. 13:1) Katuelakanyi to. Tudisuikayi bua kutumbisha Yehowa ne kuambuluisha bantu bakuabu. Yehowa neatubeneshe.

[Mêyi adi kuinshi]

Udi muvuluke anyi?

• Ntshinyi tshidi bakulu ne bua kuenza bua kuleja meji a Kristo kudi bantu badi benze bubi?

• Bua tshinyi kuidikija dinanga dia Kristo kudi ne mushinga nangananga mu matuku a ku nshikidilu aa?

• Ntshinyi tshitudi mua kuenza bua kuleja mutudi ne meji a Kristo kudi badi basama?

[Nkonko ya dilonga]

[Tshimfuanyi mu dibeji 17]

Bakulu mbasue bua benji ba bubi bapingane kudi Yehowa

[Tshimfuanyi mu dibeji 18]

Mmushindu kayi uvua bena Kristo baleje meji a Kristo pavuabu banyema Yelushalema?

[Tshimfuanyi mu dibeji 19]

Bantemu ba Yehowa mbamanyike bua mutubu benzelangana malu ne dinanga bu Kristo