Meme ke udi musungule tshitendelelu tshindi anyi mbaledi banyi?

BANTU ba bungi ba mu ditunga dia Pologne batu bambila Bantemu ba Yehowa bua bitendelelu biabu ne: “Mu tshitendelelu etshi ke mudibu bandelele, ne ke mungafuila.” Bualu ebu budi buleja ne: buabu buobu bantu badi ne bua kulonda bitendelelu bia bankambua babu. Ke mutubi muaba unudi anyi? Ntshinyi tshitu bualu ebu bukebesha misangu ya bungi? Tshitendelelu tshidi tshilua tshidingishilu patupu ne tshilele tshia mu dîku. Bualu ebu budiku mua kuenzekela Bantemu ba Yehowa badi bapete diakalenga dia kuledibua mu mêku a bena Kristo anyi?

Kabivua nanku bua Timote, nansha muvuabu bamulongeshe kudi mamuende ne kakuende bua kuitabujaye Nzambi mulelela ne kumunanga. Timote uvua mumanye Mukanda wa Nzambi kutuadijila anu ‘ku buana buende.’ Wakatuishibua yeye ne mamuende ne kakuende ne: bena Kristo ke bavua ne bulelela. ‘Wakeyemena’ malu a Yezu Kristo a mu Bible avuabu bamulongeshe. (2 Tim. 1:5; 3:14, 15) Nunku, nansha mudi baledi bena Kristo benza muabu muonso lelu bua bana babu balue basadidi ba Yehowa, bana pabu badi ne bua kuikala ne dijinga dia kuenzela Yehowa mudimu.​—Mâko 8:34.

Muntu yonso udi musue kuenzela Yehowa mudimu bualu mmumunange ne musue kushala anu mumulamate nansha mu ntatu, udi ne bua kutuishibua padibu benda bamueleshisha meji. Dîba adi, ditabuja diende nedikale dikole ne dishindame.​—Ef. 3:17; Kolos. 2:6, 7.

Tshidi bana ne bua kuenza

Albert * uvua mukolele mu dîku dia Bantemu udi wamba ne: “Mvua mujadike ne: Bantemu ba Yehowa ke badi mu tshitendelelu tshilelela. Kadi bivua binkolela bua kuitaba tshivuabu bamba bua nsombelu umvua ne bua kuikala nende.” Wewe muikale nsonga, udi mua kuikala wela pebe meji nanku. Udi mua kuenza muebe muonso bua kumanya nsombelu udi Nzambi musue bua tuikale nende ne kuitaba bua kuenza disua diende ne disanka. (Mus. 40:8) Albert udi wamba ne: “Ngakatuadija kusambila. Kumpala, bivua binkolele ne mvua ne bua kudienzeja bikole bua kusambila. Kadi matuku makese pashishe, ngakamona ne: mvua mua kusankisha Nzambi bu meme ndienzeja bua kuenza malu makane. Bualu ebu buakangambuluisha bua kushintuluka.” Wewe udienzeja bua kuikala mu malanda mimpe ne Yehowa, neupete dijinga dia kuenza malu adiye utulomba.​—Mus. 25:14; Yak. 4:8.

Elabi meji bua dinaya kampanda diuvua  musue kunaya bikole, bu mudi dia dame anyi dia ndundu. Didi mua kukutonda wewe kuyi mumanye kudinaya bimpe anyi kuyi mumanye mikenji yadi. Kadi pawakamanya mutubu badinaya ne mikenji yadi, kabivua bikutonda bua kudinaya to, kadi wakatuadija kukeba bantu ba kunaya nabu. Ke mudibi kabidi bua midimu ya bena Kristo balelela. Ikala udienzeja bua kulongolola bisangilu ne wandamunamu. Nansha wewe mukulumpe anyi muana, tshilejilu tshiebe tshidi mua kukankamija bakuabu.​—Eb. 10:24, 25.

Ke mudibi kabidi bua mudimu wetu wa kuyisha. Tudi ne bua kuwenza bualu tudi banange bantu, ki mbualu badi batuenzeja to. Diebeja ne: ‘Bua tshinyi ndi musue kuambila bantu bakuabu malu a Yehowa? Mmalu kayi adi ansaka bua kumunanga?’ Udi ne bua kumanya ne: Yehowa udi Tatu wa dinanga. Wakamba ku butuangaji bua Yelemiya ne: ‘Nenunkebe ne nenumpete, panuankeba ne mitshima yenu mijima.’ (Yel. 29:13, 14) Bualu ebu budi mua kutulomba bua kuenza tshinyi? Jakub udi wamba ne: “Mvua ne bua kushintulula lungenyi luanyi. Mvua mbuela mu bisangilu ne nya mu buambi katshia anu ku buana, kadi mvua ngenza malu aa anu bualu bena mu dîku dietu bavua baenza. Kadi ngakalua kunanga bulelela bikole anu pangakamanya Yehowa bimpe ne kukolesha malanda anyi nende.”

Kusomba ne bantu bimpe badi mua kukukankamija kudi mua kukuambuluisha bua kunanga mudimu wa kuyisha. Bible udi wamba ne: “Udi wenda ne bena meji udi ulua muena meji.” (Nsu. 13:20) Nunku, keba balunda badi basue kuenzela Yehowa mudimu ne muoyo wabu mujima. Jola udi wamba ne: “Ngakadia bulunda ne bansonga ba bungi bavua basue kuenzela Yehowa mudimu. Balunda banyi abu bakansaka bua kutuadija kuyisha bikole.”

Tshidi baledi ne bua kuenza

Jola udi wamba ne: “Ndi ngela baledi banyi tuasakidila bua mudibu bandongesha malu a Yehowa.” Bushuwa, baledi badi ne tshidibu mua kuenza bua kuambuluisha bana babu bua kuenza disungula dimpe. Mupostolo Paulo wakafunda ne: ‘Nuenu batatu, nudiundishe bana benu bimpe ne dibela ne didimuija bia Mukalenge.’ (Ef. 6:4) Mubelu mufundisha ku bukole bua Nzambi eu udi uleja patoke ne: baledi badi ne mudimu wa kulongesha bana babu mikenji ya Yehowa, ki nyabu to. Pamutu pa kusaka bana ku dienza malu anudi basue kuenza, mbimpe kubambuluisha bua kudifundila tshipatshila tshia kuenza malu adi apetangana ne disua dia Yehowa.

Nudi mua kulongesha bana benu mikenji ya Yehowa panudi basombe nabu ‘mu nzubu, nuenda mu njila, panudi nulala ne panudi nubika.’ (Dut. 6:6, 7) Ewa ne Ryszard badi ne bana basatu badi bamba ne: “Tuvua tuyukila bikole ne bana betu bua mishindu mishilangane ya mudimu wa ku dîba ne ku dîba.” Ntshinyi tshiakenzeka? “Bana bakadifundisha mu Kalasa ka Mudimu wa Nzambi batshikale bapuekele, kuluabu bamanyishi ba lumu luimpe ne pashishe kudiangatshilabu dipangadika dia kutambula. Pakakolabu, bakalua bampanda-njila ne bakuabu kuyabu ku Betele.”

Tshilejilu tshimpe tshia baledi tshidi ne mushinga wa bungi. Ryszard udi wamba ne: “Tuvua  badisuike bua kubenga kuikala bena mpala ibidi, tuambe ne: kuenza malu mushindu kampanda patudi kumbelu ne kuenza mushindu mukuabu patudi mu tshisumbu.” Nunku, diebeja ne: ‘Ntshinyi tshitu bana banyi bamona padibu bantangila? Batuku bamona ne: ndi munange Yehowa bikole anyi? Badiku bamona dinanga dianyi edi mu mushindu undi nsambila ne ndilongela Bible anyi? Batuku badimona mu mushindu undi nyisha, njikija lutetuku, mmona malu a makuta ne mu malu antu ngamba bua bena mu tshisumbu bakuabu anyi?’ (Luka 6:40) Bana batu bamona malu onso anudi nuenza ne nebamone dishilangana didi pankatshi pa binudi nuamba ne binudi nuenza.

Kunyoka bana kudi ne mushinga bua kukolabu bimpe. Kadi Dîyi dia Nzambi didi dituambila bua ‘kuyisha muana mu njila udiye ne bua kuendela.’ (Nsu. 22:6) Ewa ne Ryszard badi bamba ne: “Tuvua tudienzeja bua kulonga ne muana yonso pa nkayende.” Baledi ke badi ne bua kumona ni bidi bikengela kulonga ne muana yonso pa nkayende. Kadi mu mishindu yonso, baledi badi ne bua kumona muana yonso bu muntu wa pa buende. Badi ne bua kumanya tshidi muana yonso ne kubenga kumulomba malu adiye kayi mua kukokesha bua kuenza. Tshilejilu, pamutu pa kuambila muana ne: mijiki kampanda mmibi, mbimpe kumuleja mudiye mua kuangata mapangadika mimpe ne kulonda mikenji ya Nzambi.

Bana benu badi mua kumanya malu onso anudi nubalomba bua kuenza ne kumueneka bu badi baalonda. Ke bualu kayi nudi ne bua kulenga mitshima yabu. Bible udi wamba ne: ‘Meji adi muntu upangadija mu mutshima adi bu mâyi male, kadi mujinguludi wa mianda neaapatule.’ (Nsu. 20:5) Ikalayi ne bujinguludi bua kumona tshintu tshionso tshidi mua kunuleja lutatu ludi nalu muana ne enzayi diakamue tshidi tshikengela kuenza. Lejayi muana munudi nuditatshisha bua bualu buende ne muelayi nkonko mimpe kanuyi numupisha. Kadi nudimuke bua kanumuedi nkonko mipite bungi bienze bu udi ku tshilumbuluidi. Nuenu nuditatshisha ne muoyo umue nenulenge muoyo wa muana ne nenumuambuluishe bimpe.

Tshidi bena mu tshisumbu ne bua kuenza

Bu muudi Ntemu wa Yehowa, udiku mua kuambuluisha bansonga mu tshisumbu bua  banange bulelela budi baledi babu babalongeshe anyi? Nansha mudibi ne: baledi ke badi ne bua kulongesha bana babu, bena mu tshisumbu bakuabu nangananga bakulu badi mua kubambuluisha. Badi ne bua kuenza nanku nangananga bua bana badi ne umue wa ku baledi babu kayi Ntemu.

Ntshinyi tshidi bakulu mua kuenza bua kuambuluisha bansonga bua kunanga Yehowa ne kudimona ne mushinga mu tshisumbu? Mariusz udi mukulu mu tshisumbu kampanda tshia mu Pologne udi wamba ne: “Bakulu badi ne bua kuikala ne tshibidilu tshia kuyukila bikole ne bansonga. Kabena ne bua kuyukila nabu anu padiku bilumbu to, kadi badi ne bua kuyukila nabu mêba makuabu bu mudi, padibu mu buambi, ku ndekelu kua bisangilu anyi padibu basombe tshianana.” Bakulu badi mua kuebeja bansonga tshidibu bela meji bua tshisumbu? Kuyukila ne bansonga nunku kudi kubasaka bua kunanga tshisumbu bikole ne kudimona pabu benamu.

Biwikala udi mukulu, utuku udienzeja bua kumanya bansonga badi mu tshisumbu tshienu anyi? Nansha mudi Albert utuvua batele kuulu eku muikale mukulu mpindieu, uvua mupete ntatu ya bungi patshivuaye nsonga. Udi wamba ne: “Bu mumvua nsonga, mvua dijinga ne diambuluisha dia bakulu.” Bakulu badi kabidi mua kuleja mudibu baditatshisha bua bansonga padibu babalombela Nzambi bua bikale nende mu malanda mimpe ne batungunuke ne kumuenzela mudimu.​—2 Tim. 1:3.

Mbimpe bansonga bikale ne midimu idibu benza mu tshisumbu, tshianana badi mua kutuadija kulonda malu a pa buloba ebu. Nuenu bantu bakulumpa, nudiku mua kuyisha nabu ne kulua bulunda babu anyi? Ikalayi nusomba nabu ne nuleja munudi nubeyemena. Jola udi uvuluka wamba ne: “Muanetu mukuabu wa bakaji uvua mpanda-njila uvua untabalela bikole. Yeye ke muntu wa kumpala umvua muyishe nende bualu uvua unsankisha.”

Ndisungula diebe

Wewe nsonga, diebeja ne: ‘Mbipatshila kayi bindi nabi? Bingikala tshiyi muanji kutambula, ndiku mudifundile tshipatshila tshia kutambula anyi?’ Udi ne bua kuangata dipangadika dia kutambula bualu udi munange Yehowa ne muoyo mujima, ki mbualu bena mu dîku dienu bonso Mbantemu to.

Tudi tujinga ne: Yehowa ikale mulunda webe wa pa muoyo ne bua wangate bulelela ne mushinga. Yehowa wakamba ku butuangaji bua muprofete Yeshaya ne: ‘Kukenzakanyi bua buôwa nansha, bualu bua ndi Nzambi webe.’ Yehowa neikale nebe matuku onso audi mulunda wende. Neakukoleshe ne ‘neakujadike ne tshianza tshiende tshia balume tshia buakane.’​—Yesh. 41:10.

[Mêyi adi kuinshi]

[Tshimfuanyi mu dibeji 4]

Nudienzeje bua kujingulula malu adi munda mua bana benu

[Tshimfuanyi mu dibeji 6]

Udi ne bua kuangata dipangadika dia kutambula bualu udi munange Yehowa ne muoyo mujima