Nkonko ya babadi

Ndilongesha kayi ditudi tupetela mu Nsumuinu 24:27?

Mufundi wa mukanda wa Nsumuinu udi udimuija nsongalume kampanda umuambila ne: ‘Longolola mudimu webe pambelu, udilongoluelawu mu budimi; pashishe wase nzubu webe.’ Ntshinyi tshidi lusumuinu elu lufundisha ku nyuma muimpe lusue kuamba? Ndusue kuamba ne: Nsongalume udi ne bua kudilongolola bimpe kumpala kua kuselaye ne kuenza dîku bualu mmumanye ne: bualu ebu budi bumukebela majitu a bungi.

Ku kale bavua bumvuija mvese eu ne: mulume anyi tatu wa dîku kena ne bua kulongolola anu mudimu wende wa bianza to, kadi udi kabidi ne bua kukolesha, kukankamija bena mu dîku diende, bu mudi pa kubalongesha malu a Nzambi. Nansha mudi Bible ulomba mulume bua kuenza malu aa, bidi bimueneka ne: ki ntshidi mvese eu musue kuamba to. Bua tshinyi? Bua malu abidi adi alonda aa.

Bua kumpala, mvese eu kena wakula bua kuasa mu ngumvuilu wa kukankamija anyi kukolesha dîku dikadiku to. Kadi udi wakula bua kuasa nzubu wetu wa bushuwa eu. Muaku udibu bakudimune ne: ‘kuasa’ udi kabidi mua kuikala wa mu tshimfuanyi mu ngumvuilu wa kuenza anyi kujadika dîku, tuambe ne: kusela ne kulela bana.

Bualu buibidi, mvese eu udi wakula bua kuenza malu malondangane mbuena kuamba ne: “Anji enza bualu ebu, pashishe wenze buabua.” Nunku, mvese eu mmusue kutuleja ne: midimu yetu ya bianza idi ne bua kupita kumpala kua wa Nzambi anyi? Nansha kakese.

Ku kale, pavua muntu musue ‘kuasa nzubu’ wende anyi musue kuenza diende dîku, kusela ne kulela bana, uvua ne bua kudiebeja ne: ‘Ndiku mukumbane bua kulama mukajanyi pamue ne bana batualela nende bimpe anyi?’ Kumpala kua kusela, uvua ne bua kudima ne kunowa bivuaye mukune. Ke bualu kayi mu Mukanda wa Mvidi Mukulu (wa bena Mishonyi) mbakudimune mvese eu ne: “Bangabanga ne kuasa nzubu, anji kujikija midimu yebe ya pambelu, udime madimi ebe bua unowe biakudia.” Ke tshidi bansonga ne bua kuenza pabu lelu anyi?

Eyowa. Muntu udi musue kusela udi ne bua kudilongolola bimpe bua kuambula bujitu ebu. Bikalaye kayi ne bualu budi mua kumupangisha bua kuenza mudimu, udi ne bua kuwenza. Kadi mudimu mukole udi muntu ne bua kuenza bua kulama bena mu dîku diende kawena anu wa kubadisha to. Dîyi dia Nzambi didi diamba ne: muntu udi kayi udisha ba mu nzubu muende, kayi usomba nabu ne ubalongesha Bible, mmubi kupita muntu udi kayi ne ditabuja. (1 Tim. 5:8) Nunku, nsongalume udi musue kusela udi ne bua kudiebeja ne: ‘Ndiku mudilongolole bimpe bua kudisha mukaji ne bana anyi? Ndiku mukumbane bua kulombola dîku dijima mu malu a ntendelelu anyi? Nenkokeshe bua kuikala ndombola pa tshibidilu dilonga dia Bible ne mukajanyi ne bana anyi?’ Mukanda wa Nzambi udi uleja ne: majitu aa adi ne mushinga wa bungi.​—Dut. 6:6-8; Ef. 6:4.

Nunku, nsongalume udi ukeba kusela udi ne bua kuela meji bikole bua tshidi Nsumuinu 24:27 wamba. Bia muomumue, nsongakaji udi pende ne bua kudiebeja bikalaye mudilongolole bua kuambula majitu adi mukaji anyi mamu wa nzubu ne bua kuambula. Mulume ne mukaji batshidi bafuma ku diselangana badi pabu mua kudiela nkonko ya muomumue bikalabu basue kulela bana. (Luka 14:28) Basadidi ba Nzambi bobu balonde mibelu eyi, nebepuke tunyinganyinga tua bungi ne nebasombe bimpe mu mabaka abu.

[Lungenyi lunene lua mu dibeji 12]

Nkonko kayi idi nsongalume ne bua kudiela kumpala kua kuselaye?