‘Nudi balunda banyi’

‘Nudi balunda banyi binuenza bu mundi nnuambila.’​—YONE 15:14.

1, 2. (a) Balunda ba Yezu bavua bantu ba mushindu kayi? (b) Bua tshinyi bidi ne mushinga bua kuikala balunda ba Yezu?

BANTU bavua basombe ne Yezu mu nzubu wa kulu bavua ba mishindu mishilangane ne bafume miaba mishilangane. Tshilejilu, Petelo ne muanabu Andele bavua balobi. Matayo uvua wenza mudimu wa kulambuisha bitadi uvua bena Yuda kabayi basue. Yakobo ne Yone bavua mua kuikala bamanye Yezu kutuadijila ku buana buabu. Bakuabu pabu bu mudi Natanaele bavua bamanye Yezu kukavua bidimu bikese patupu. (Yone 1:43-50) Kadi bonso muvuabu muaba au mu butuku buvuabu benza tshibilu tshia Kupita kua Yehowa mu Yelushalema bavua batuishibue ne: Yezu uvua Masiya uvuabu balaye, Muana wa Nzambi udi ne muoyo. (Yone 6:68, 69) Kakuyi mpata, bakumvua disanka dia bungi pavua Yezu mubambile ne: ‘Ngakunubikila balunda bualu bua ngakunumanyisha malu onso angakumvua kudi Tatu wanyi.’​—Yone 15:15.

² Mêyi avua Yezu muambile bapostolo bende ba lulamatu aa, adi akumbanyina kabidi bena Kristo bela manyi lelu pamue ne balunda babu ba mu “mikoko mikuabo.” (Yone 10:16) Nansha tuetu ba mu tshisamba kayi, tudi mua kupeta diakalenga dia kuikala balunda ba Yezu. Bulunda buetu nende budi ne mushinga wa bungi bualu kuikala balunda ba Yezu nkulua balunda ba Yehowa. Nunku, katuena mua kudia bulunda ne Yehowa patudi katuyi banji kudia bulunda ne Kristo to. (Bala Yone 14:6, 21.) Kadi ntshinyi tshitudi ne bua kuenza bua kulua balunda ba Yezu ne kushala balunda bende? Kumpala kua tuetu kukonkonona bualu bua mushinga mukole ebu, tuanji kumona tshilejilu tshia Yezu tshia kuikala mulunda muimpe ne tshitudi mua kulongela ku tshivua bayidi bende benze bua bulunda buvuaye mudie nabu.

Tshilejilu tshia Yezu tshia kuikala mulunda muimpe

3. Mbua bualu kayi buvuabu bamanyine Yezu?

³ Mukalenge wa meji Solomo wakamba ne: “Balunda ba muntu mubanji badi ba bungi.” (Nsu. 14:20) Bualu ebu budi buleja mutu bantu bena mapanga basue kudia bulunda ne badi mua kubapesha bintu, kadi ki mbadibu bobu mua kubipesha. Yezu kavua ne meji a mushindu eu to. Kavua udia bulunda ne bantu bua bubanji buabu anyi bua mianzu yabu to. Bushuwa, Yezu uvua munange nsongalume mubanji uvua mfumu ne wakambila nsongalume au bua amulonde. Kadi wakamuambila bua kupanyisha bivuaye nabi ne kubipesha bapele. (Mâko 10:17-22; Luka 18:18, 23) Yezu kavua mumanyike bua bulunda buvuaye mudie ne bantu bavua babanji ne bende lumu, kadi uvua mumanyike bua bulunda buvuaye mudie ne bapele ne bantu bavuabu balengulula.​—Mat. 11:19.

4. Bua tshinyi tudi mua kuamba ne: balunda ba Yezu bavua bena mapanga?

⁴ Balunda ba Yezu bavua bena mapanga. Tshilejilu, dituku dikuabu Petelo wakapangila bua kumona malu bu muvua Nzambi uamona. (Mat. 16:21-23) Yakobo ne Yone bakaleja muvuabu basue kuikala bantu banene pakalombabu Yezu bua abapeshe muaba mubandile mu Bukalenge bua Nzambi. Bualu ebu buakafikisha bapostolo bakuabu munda ne bavua bakokangana misangu ya bungi bua kumanya uvua munene munkatshi muabu. Kadi Yezu wakadienzeja bua kulongolola ngelelu wa meji wa balunda bende ne lutulu ne kavua ubafikila munda lukasa to.​—Mat. 20:20-28.

5, 6. (a) Bua tshinyi Yezu kavua mushipe bulunda ne bapostolo bende ba bungi? (b) Bua tshinyi wakashipa bulunda ne Yudasa?

⁵ Yezu kavua mutungunuke ne kuikala mulunda wa bantu bena mapanga abu bualu uvua ubengeleka anyi ubuikila mêsu pa bilema biabu  to, kadi uvua wimanyina pa meji mimpe ne ngikadilu mimpe ivuabu nayi. Tshilejilu, Petelo, Yakobo ne Yone bakapangila bua kushala batabale bua kukankamija Yezu pavuaye mu lutatu lukole. Bakanyingalaja Yezu bua bualu abu. Nansha nanku wakamona ne: kabavua benze ku bukole to, bualu wakamba ne: “Mutshima udi musue nunku, kadi mubidi udi mutekete.”​—Mat. 26:41.

⁶ Kadi Yezu wakashipa bulunda buende ne Yudasa Isakaliote. Nansha muvua Yudasa mudileje bu mulunda munkatshi mua ndambu wa matuku, Yezu wakajingulula ne: muntu uvua mulunda wende eu uvua mulekele mutshima wende unyanguka. Bu muvua Yudasa mulue mulunda wa malu a pa buloba, wakadivuija muena lukuna wa Nzambi. (Yak. 4:4) Ke bualu kayi Yezu wakanji kupatula Yudasa kumpala kua kulejaye bapostolo bende ba lulamatu 11 muvuabu balunda bende ba pa muoyo.​—Yone 13:21-35.

7, 8. Ntshinyi tshivua Yezu muenze bua kuleja muvuaye munange balunda bende?

⁷ Yezu kavua wimanyina pa bilema bia balunda bende balelela to, kadi uvua ubambuluisha. Tshilejilu, wakalomba Tatuende bua abakube mu makenga. (Bala Yone 17:11.) Yezu uvua utangila majinga a ku mubidi a bayidi bende. (Mâko 6:30-32) Kavua musue kubambila anu tshivuaye yeye wela meji to, kadi uvua kabidi ubebeja bua kumanya meji avuabu bela ne muvuabu badiumvua.​—Mat. 16:13-16; 17:24-26.

⁸ Malu onso avua Yezu muenze pavuaye ne muoyo ne lufu luakafuaye bivua anu bua diakalenga dia balunda bende. Uvua mumanye ne: uvua ne bua kufila muoyo wende bua kukumbaja tshivua mukenji wa buakane wa Tatuende ulomba. (Mat. 26:27, 28; Eb. 9:22, 28) Kadi Yezu wakafila muoyo wende bualu uvua munange bantu. Wakamba ne: ‘Kakuena muntu udi ne dinanga didi ditambe edi, dia muntu udi ufuila balunda bende.’​—Yone 15:13.

Tshivua bayidi benze bua bulunda buvua Yezu mudie nabu

9, 10. Ntshinyi tshiakenza bantu bua bintu bivua Yezu ubapesha?

⁹ Yezu uvua wambuluisha bantu munkatshi mua mêba a bungi, uvua mubanange ne uvua ubambuluisha ne bintu biende. Ke bualu kayi, bantu bavua balua kudiye ne bavua ne disanka dia kumupesha pabu bintu. (Luka 8:1-3) Bualu abu buakasaka Yezu bua kuamba ne: ‘Nupe bantu bintu, nunku nebanupe bintu kabidi; nebafile mu biadi bienu tshipiminu tshiakane, tshishindika, tshisekenkeja, tshipongoloka. Bualu bua nebanupimine bintu ne tshipiminu tshinudi nubapimina natshi kabidi.’​—Luka 6:38.

¹⁰ Bushuwa, kuvua bantu bavua basue kudia bulunda ne Yezu anu bua kupetabu bintu. Balunda ba dishima abu bakalekela kulonda Yezu dituku divuaye mubalongeshe bualu buvuabu kabayi bumvue bimpe. Pamutu pa kueyemena Yezu, bakangata diakamue dipangadika dibi ne kumbuka kudiye. Kadi bapostolo bakashala balamate Yezu. Bulunda buabu ne Kristo buvua butetshibue misangu ya bungi, kadi bakenza muabu muonso bua kushala bamulamate mu  masanka ne mu makenga. (Bala Yone 6:26, 56, 60, 66-68.) Mu butuku bua muladilu wa lufu luende, Yezu wakaleja muvuaye munange balunda bende ne kubambila ne: ‘Nuenu mbakunanukila nanyi mu makenga anyi.’​—Luka 22:28.

11, 12. Ntshinyi tshivua Yezu mujadikile bayidi bende? Ntshinyi tshiakenzabu?

¹¹ Katupa kakese panyima pa Yezu mumane kuanyisha bayidi bende bua muvuabu bashale bamulamate, bakamushiya nkayende. Bua mutantshi mukese, bakalekela ditshina dia bantu dipita dinanga divuabu banange Kristo bukole. Yezu wakabafuila kabidi luse. Panyima pa yeye mumane kufua ne mubishibue, wakabamuenekela ne kubajadikila muvuaye mulunda wabu. Pashishe wakabapesha mudimu wa tshijila wa kuvuija bantu ‘ba mu bisamba bionso bayidi’ ne kuikala bantemu bende too ‘ne ku mfudilu kua buloba.’ (Mat. 28:19; Bien. 1:8) Ntshinyi tshivua bayidi benze?

¹² Bakadifila ne muoyo wabu mujima mu diyisha dia lumu luimpe lua Bukalenge bua Nzambi. Bu muvua nyuma wa Yehowa ubambuluisha, bakuuja Yelushalema tente ne malongesha abu munkatshi mua matuku makese patupu. (Bien. 5:27-29) Nansha pavuabu babakanyina bua kubashipa, kabakitaba bua kubenga kutumikila mukenji wa Yezu wa kuvuija bantu bayidi. Bidimu bikese panyima pa Yezu mumane kubapesha mudimu eu, Paulo wakamba ne: lumu luimpe lukavua ‘luambibue munkatshi mua bifukibua bionso muinshi mua diulu.’ (Kolos. 1:23) Bushuwa, bayidi aba bakaleja muvuabu bangata bulunda buabu ne Yezu ne mushinga wa bungi.

13. Mmushindu kayi uvua bayidi ba Yezu balekele malongeshe ende ashintulula nsombelu wabu?

¹³ Bantu bakalua bayidi ba Yezu pashishe bavua balekela malongesha ende ashintulula nsombelu wabu. Ba bungi ba kudibu bavua ne bua kushintulula bienzedi biabu ne ngikadilu yabu. Bamue ba kudibu bavua balume bavua balala ne balume nabu anyi bakaji bavua balala ne bakaji nabu, bena masandi, bakuatshiki ba maluvu anyi bivi. (1 Kol. 6:9-11) Bakuabu bavua ne bua kushintulula mushindu uvuabu bamona bantu ba bisamba bikuabu. (Bien. 10:25-28) Kadi bakatumikila Yezu, bualu bakumusha bumuntu buabu bua kale ne kuvuala muntu mupiamupia. (Ef. 4:20-24) Bakalua kuibidilangana ne ‘meji a Kristo,’ mbuena kuamba ne: bakumvua ngelelu wende wa meji ne bienzedi biende ne bakamuidikija.​—1 Kol. 2:16.

Bulunda buetu ne Kristo lelu

14. Ntshinyi tshivua Yezu mulaye bua kuenza mu matuku a ‘ku nshikidilu kua tshikondo etshi’?

¹⁴ Bena Kristo ba bungi ba kumpala bavua bamanye Yezu bimpe anyi balue kumumona pakabikaye ku lufu. Kadi tuetu katuena ne diakalenga adi to. Ntshinyi tshitudi ne bua kuenza bua kulua balunda bende? Tudi ne bua kutumikila malu adiye utulomba ku butuangaji bua kasumbu ka mupika wa lulamatu ne wa budimu, kadi kenza ne bana babu ne Yezu bela manyi batshidi ne muoyo pa buloba. Yezu uvua muambe ne: ‘ku nshikidilu kua tshikondo etshi,’ uvua ne bua kuteka mupika eu ‘pa mutu pa bintu biende bionso.’ (Mat. 24:3, 45-47) Lelu eu, bantu ba bungi badi bakeba kulua balunda ba Kristo ki mba mu kasumbu ka mupika aka to. Mmushindu kayi udi kutumikila anyi kubenga kutumikila malu adi kasumbu ka mupika wa lulamatu kabalomba utangila malanda abu ne Kristo?

15. Ntshinyi tshikala ne bua kuleja ne: muntu mmukoko anyi mbuji?

¹⁵ Bala Matayo 25:31-40. Yezu wakabikila bantu badi benza kasumbu ka mupika wa lulamatu ne: bana babu. Mu lusumuinu luende lua ditapulula mikoko ne mbuji, Yezu udi uleja patoke ne: udi wangata malu atudi tuenzela bana babu bu tudi tumuenzelawu yeye. Wakamba ne: bualu bunene buvua ne bua kuambuluisha bantu  bua kumanya ne: muntu eu mmukoko anyi mbuji mmushindu udiye wenzela ‘bana babu [ne Yezu] batambe bupuekele’ malu. Nunku, bantu badi ne ditekemena dia kuikala ne muoyo pa buloba badi baleja mudibu basue kuikala balunda ba Kristo padibu bambuluisha kasumbu ka mupika wa lulamatu.

16, 17. Mmushindu kayi utudi mua kuleja ne: tudi balunda ba bana babu ne Kristo?

¹⁶ Biwikala mutekemene bua kuikala ne muoyo pa buloba mu Bukalenge bua Nzambi, mmalu kayi audi mua kuenza bua kuleja muudi mulunda wa bana babu ne Kristo? Tukonkononayi malu asatu adi alonda aa. Bua kumpala, tudi ne bua kudifila ne muoyo mujima mu mudimu wa kuyisha bualu Kristo wakambila bana babu bua kuyisha lumu luimpe pa buloba bujima. (Mat. 24:14) Kadi mudimu eu udi mua kukolela bana babu ne Kristo batshidi pa buloba bobu kabayi babambuluisha kudi balunda babu ba mu mikoko mikuabu. Misangu yonso idi bena mu tshisumbu tshia mikoko mikuabu benza mudimu wa kuyisha, badi bambuluisha bana babu ne Kristo bua kukumbaja mudimu wa tshijila uvuabu babapeshe. Kristo ne bena mu kasumbu ka mupika wa lulamatu ne wa budimu badi ne dianyisha dia bungi bua tshidi balunda babu aba benza etshi.

¹⁷ Bualu buibidi budi mikoko mikuabu yenza bua kuambuluisha bana babu ne Kristo nkufila makuta abu bua kukuatshisha mudimu wa buambi. Yezu wakakankamija bayidi bende bua kuvuija bantu balunda babu ku diambuluisha dia makuta anyi “mamona a malu mabi.” (Luka 16:9) Bualu ebu kabuena bumvuija ne: tudi mua kusumba bulunda bua Yezu ne Yehowa ku makuta to. Kadi patudi tufila bintu bietu bua kukuatshisha midimu ya Bukalenge bua Nzambi, tudi tuleja mutudi balunda babu ne mutudi babanange ki nganu mu mêyi, kadi “mu bienzedi ne mu bulelela.” (1 Yone 3:16-18) Tudi tukuatshisha mudimu eu patudi tudifila bua kuyisha, patudi tufila makuta etu bua kukuatshisha mudimu wa kuibaka miaba ya kutendelela ne kuyilama bimpe, ne patudi tufila makuta etu bua mudimu wa kuyisha lumu luimpe pa buloba bujima. Nansha bikala tshitudi tufila tshikese anyi tshinene, Yehowa ne Yezu badi batshianyisha bualu tudi batshifile ne disanka.​—2 Kol. 9:7.

18. Bua tshinyi tudi ne bua kutumikila mibelu ya mu Bible idi bakulu ba mu tshisumbu tshietu batupesha?

¹⁸ Bualu buisatu butudi tuetu bonso ne bua kuenza bua kuleja mutudi balunda ba Kristo nkutumikila bidi bakulu ba mu tshisumbu batuambila. Kristo ke udi musungule bakulu aba ku diambuluisha dia nyuma muimpe. (Ef. 5:23) Mupostolo Paulo wakamba ne: “Nutumikile badi banukokesha, nubakokele.” (Eb. 13:17) Imue misangu bidi mua kutukolela bua kutumikila mibelu ya mu Bible idi bakulu ba mu tshisumbu tshietu batupesha. Bu mutudi pamuapa bamanye bilema bitubu benza, tudi mua kupepeja mibelu yabu. Kadi Yezu udi Mfumu wa tshisumbu, mmusue kuenza mudimu ne bantu bena mapanga aba. Nunku, mushindu utudi tukokela bantu badi batulombola, udi ne mushinga mu malanda etu ne Kristo. Patudi katuyi tuimanyina pa bilema bia bakulu ne tuitaba mibelu yabu ne disanka, tudi tuleja mutudi banange Kristo.

 Muaba utudi mua kupeta balunda bimpe

19, 20. Ntshinyi tshitudi mua kupeta mu tshisumbu? Netukonkonone tshinyi mu tshiena-bualu tshidi tshilonda?

¹⁹ Yezu udi utungunuka ne kutulama ku diambuluisha dia balami ba dinanga badi benza mudimu wa kulama mikoko. Udi kabidi utupesha bana betu badi benze bu baledi betu, bu bana betu ba balume ne ba bakaji mu tshisumbu. (Bala Mâko 10:29, 30.) Ntshinyi tshivua balela bebe benze pawakatuadija kudisangisha ne Bantemu ba Yehowa? Bavua mua kuikala bakuambuluishe bua kudia bulunda ne Nzambi ne Kristo. Kadi Yezu wakamba ne: imue misangu ‘badi mu nzubu nebikale ne muena nzubu lukuna.’ (Mat. 10:36) Bidi bitukolesha ku muoyo patudi tumanya ne: tudi mua kupeta mu tshisumbu bantu batudi mua kudia nabu bulunda kupita too ne balela betu.​—Nsu. 18:24.

²⁰ Mioyo idi Paulo wela bantu ku ndekelu kua mukanda wende uvuaye mufundile bena mu tshisumbu tshia mu Lomo idi ileja ne: uvua mupetamu balunda ba bungi. (Lomo 16:8-16) Mupostolo Yone udi ujikija mukanda wende muisatu ne mêyi aa: ‘Wele balunda muoyo, muntu mu dîna diende muntu mu dîna diende.’ (3 Yone 14) Bidi bimueneka ne: yeye pende uvua mupete balunda ba pa muoyo ba bungi. Mmushindu kayi utudi mua kuidikija tshilejilu tshia Yezu ne tshia bayidi ba kumpala pa kudia bulunda buimpe ne bana betu mu tshisumbu ne kushala babalamate? Tshiena-bualu tshidi tshilonda netshiandamune lukonko elu.

Newandamune munyi?

• Ntshilejilu kayi tshidi Yezu mutushile tshia kuikala mulunda muimpe?

• Ntshinyi tshivua bayidi ba Yezu benze bua bulunda buvua Yezu mudie nabu?

• Mmushindu kayi utudi mua kuleja ne: tudi balunda ba Kristo?

[Nkonko ya dilonga]

[Tshimfuanyi mu dibeji 14]

Yezu uvua ukeba kumanya tshivua balunda bende bela meji ne muvuabu badiumvua

[Bimfuanyi mu dibeji 16]

Mmushindu kayi utudi mua kuleja ne: tudi basue kuikala balunda ba Kristo?