Udiku ‘muele miji ne muashibue’ pa tshishimikidi anyi?

UKATUKU mumone tshipepele tshikole tshinyungisha mutshi munene anyi? Mpepele mikole itu ituta mutshi eu kadi kawena upuka to. Bua tshinyi? Bualu miji yawu mmibuele mu buloba bikole. Tudi petu mua kuikala bu mutshi eu. Bua tuetu kutantamena ntatu idi itukuata, tudi ne bua ‘kuela miji ne kuashibua’ pa tshishimikidi. (Ef. 3:14-17) Ntshishimikidi kayi atshi?

Mukanda wa Nzambi udi wamba ne: ‘Kristo Yezu nkayende udi dibue dinene dia mu ditumba’ dia tshisumbu tshia bena Kristo. (Ef. 2:20; 1 Kol. 3:11) Bible udi utukankamija tuetu bena Kristo bua ‘tuikale tuenda mu Kristo; tuikale ne miji yetu miedibue munda muende, tuikale bashibue munda muende ne tuikale bajadikibue mu ditabuja dietu.’ Tuetu benze nunku, netukandamene mateta onso adi mua kutukuata bu mudi ‘mêyi a kutubomba nawu’ adi mashindamene pa ‘lubombo lua patupu’ lua bantu.​—Kolos. 2:4-8.

‘Butshiama, bule, bule bua mulu ne ndondo’

Kadi mmushindu kayi utudi mua ‘kuela miji’ ne ‘kujadikibua mu ditabuja’? Tudi tubueja miji yetu muinshi mua buloba patudi tulonga Dîyi dia Nzambi ne tshisumi. Yehowa mmusue bua ‘tumanye pamue ne bansantu bonso mudi butshiama ne bule ne bule bua mulu ne ndondo’ wa Dîyi diende. (Ef. 3:18) Nunku, muena Kristo nansha umue kena ne bua kuimanyina pa dimanya dia pamutu pamutu, anyi dia ‘malu a kumudilu’ a mu Dîyi dia Nzambi to. (Eb. 5:12; 6:1) Kadi yonso wa kutudi udi ne bua kudienzeja bua kumvua bimpe malongesha a mu Bible.​—Nsu. 2:1-5.

Abi kabiena biumvuija ne: kupeta dimanya dia bungi nkayaku ke kudi kutuambuluisha bua ‘kuela miji ne kuashibua’ anyi kujalama mu bulelela to. Nansha Satana pende mmumanye malongesha a mu Bible. Kadi kudi tshintu tshikuabu tshia mushinga tshitudi ne bua kuenza. Tudi ne bua ‘kumanya mudi dinanga dia Kristo didi ditambe lungenyi lua bantu ku dimanya.’ (Ef. 3:19) Kadi patudi tulonga Bible bualu tudi banange Yehowa ne bulelela, dimanya dilelela ditudi tupeta didi dikolesha ditabuja dietu.​—Kolos. 2:2.

Teta dimanya diebe

Kuenaku mua kuteta dimanya diudi nadi dia malongesha makese  patupu a mushinga adi mu Bible anyi? Wewe muenze nunku, nebikusake bua kuikala ulonga Bible ne tshisumi tshia bungi. Tshilejilu, bala mvese ya ku ntuadijilu kua mukanda uvua mupostolo Paulo mufundile bena Efeso. (Tangila malu adi mu kazubu kadi kamba ne: “ Mukanda wakatumina Paulo bena Efeso.”) Paudi ujikija kubala mvese eyi, diebeja ne: ‘Ndiku mumvue biambilu bia mvese idi mu kazubu bidi ne maleta maladika anyi?’ Tukonkononayi biambilu ebi ku tshimue ku tshimue.

Badianjila kusungula ‘diambedi kayi muanji kufuka buloba’

Paulo wakafundila bena Kristo nende ne: ‘Nzambi wakadianjila kutusungula bua kuikala ne bumpianyi kudiye bu bana bua Yezu Kristo.’ Bushuwa, Yehowa ukavua mupangadije bua kupiana bamue bantu bua kubabueja mu dîku dipuangane dia bana bende ba mu diulu. Bana badi Nzambi upiana aba badi ne bua kukokesha bu bakalenge ne bakuidi pamue ne Kristo. (Lomo 8:19-23; Buak. 5:9, 10) Pavua Satana mutombokele bumfumu bua Yehowa, wakasua kuleja ne: bantu bavua Nzambi mufuke bavua ne butekete. Ke bualu kayi Yehowa mmusungule bamue ba ku bantu bena butekete aba bua kubapesha mudimu wa kulua kumbusha malu mabi onso ne kubutula Satana Diabolo udi muakebeshe. Tshidibi, Yehowa kavua mudianjile kusungula muntu ne muntu yonso uvuaye ne bua kupiana bua kuluaye muanende to. Kadi uvua mudianjile kupangadija bua tshisumbu tshia bantu tshikokeshe ne Kristo mu diulu.​—Buak. 14:3, 4.

“Buloba” buvua Paulo mutele pakafundilaye bena Kristo nende ba mu Efeso ne: bavua babasungule bu kasumbu ‘diambedi kabayi banji kufuka buloba’ budi bumvuija tshinyi?  Kavua wakula bua tshikondo tshia kumpala kua Nzambi kufukaye buloba anyi bantu to. Biobi bikale nanku, kabiena bipetangana ne mukenji wa buakane wa Nzambi to. Mmushindu kayi uvua Adama ne Eva mua kukumbanyina dinyoka dia Nzambi bu yeye mudianjile kulongolola bua kuenzabu bubi kumpala kua kubafukaye? Kadi mpindieu, ndîba kayi divua Nzambi muangate dipangadika dia kuakaja nsombelu uvua Adama ne Eva bakebeshe pavuabu baditue ku tshia Satana bua kutombokela bumfumu bua Nzambi? Yehowa wakalongolola bua kupikula bantu panyima pa baledi betu ba kumpala bamane kumutombokela, kadi bivua kumpala kua kulelabu bana babu bavua ne bua kuikala bena mapanga.

‘Bu mudi bubanji bua ngasa wende’

Bua tshinyi Paulo uvua muambe ne: malu adi mu mvese ya kuntuadijilu kua mukanda wa Efeso avua menzeke ‘bu mudi bubanji bua ngasa wa Nzambi’? Uvua muambe nanku bua kuleja patoke ne: Yehowa kavua muenzejibue bua kupikula bantu bena mapanga to.

Muntu nansha umue kena mukumbane bua bamupikule to. Kadi Yehowa mmuenze bualu bua pa buabu bua kupikula bantu bualu mmubanange bikole. Anu bu muvua Paulo muambe, patudi tutangila mapanga etu ne mibi yetu, Nzambi mmutupikule bua ngasa wende anyi bulenga buende budi kabuyi butuakanyine.

Bualu busokoka bua disua dia Nzambi

Ku ntuadijilu, Nzambi kavua muleje mushindu uvuaye ne bua kuakaja malu avua Satana munyangakaje to. Tshivua ‘bualu busokoka.’ (Ef. 3:4, 5) Pashishe pakenzabu tshisumbu tshia bena Kristo, Yehowa wakaleja patoke mushindu uvuaye ne bua kukumbaja tshivuaye mulongolole ku ntuadijilu bua bantu ne buloba. Paulo wakamba ne: ‘Pakalua tshikondo tshia dikumbana dia bipungu,’ Nzambi wakajadika mushindu kampanda wa dilombola malu uvua ne bua kulua kusangisha batendeledi bende bonso.

Disangisha dia kumpala diakatuadija mu Pentekoste wa mu 33 pavua Yehowa mutuadije kusangisha bantu bikala ne bua kukokesha ne Kristo mu diulu. (Bien. 1:13-15; 2:1-4) Disangisha dibidi divua ne bua kuikala dia bantu bikala ne bua kupeta muoyo mu mparadizu pa buloba mu Bukalenge bua Masiya. (Buak. 7:14-17; 21:1-5) Mushindu wa dilombola malu eu kawena uleja Bukalenge bua Masiya to, bualu Bukalenge ebu buakajadikibua mu 1914. Kadi udi uleja mushindu udi Nzambi ulongolola malu bua kukumbaja tshipatshila tshiende tshia kusangisha batendeledi bende bonso mu buobumue.

Nuikale ‘bantu bakole mu meji’

Kakuyi mpata, wewe muikale ne tshibidilu tshia kudilongela Bible, neufike ku dimanya mudi ‘butshiama, bule ne bule bua mulu ne ndondo’ wa bulelela. Kadi Satana udi mua kubuelela pa malu a bungi audi nawu a kuenza bua kukupangisha mua kudilongela bimpe anyi kulekela kudilongela. Kuitabi bua akuenzele bualu bua mushindu eu to. Enza mudimu ne ‘meji’ adi Nzambi mukupeshe bua kulua muntu ‘mukole mu meji’ anyi bua kuvudija dimanya diebe. (1 Yone 5:20; 1 Kol. 14:20) Dienzeja bua kumanya tshiudi witabila malu audi muitabe ne ikala mudiakaje bua kuandamuna muntu yonso udi ukuebeja bua ‘muanda wa ditekemena didi munda muebe.’​—1 Pet. 3:15.

Fuanyikijabi ne: uvua mu Efeso pavuabu babale mukanda wa Paulo eu bua musangu wa kumpala. Mibelu yende kayivuaku mua kukusaka bua kuvudija ‘dimanya dia Muana wa Nzambi’ anyi? (Ef. 4:13, 14) Ke tshiuvua mua kuikala muenze. Nunku, mibelu ya Paulo eyi ikuambuluishe kabidi muomumue lelu. Kunanga Yehowa ne muoyo mujima ne kuikala ne dimanya dilelela dia Dîyi diende, nekukuambuluishe bua kushala ‘muele miji ne muashibue’ pa tshishimikidi tshia Kristo. Wewe muenze nunku, newikale mukumbane bua kutantamena diteta dionso dia Satana didi bu tshipepele kumpala kua nshikidilu wa bulongolodi bubi bua malu ebu kuluaye.​—Mus. 1:1-3; Yel. 17:7, 8.

[Kazubu/​Tshimfuanyi mu dibeji 27]

 “Mukanda wakatumina Paulo bena Efeso”

‘Nzambi, Tatu wa Mukalenge wetu Yezu Kristo atumbishibue, wakatuvudijila masanka onso a nyuma wa mu miaba ya mu diulu mu Kristo; bu muakatusungulaye munda muende diambedi yeye kayi muanji kufuka buloba, bua tuetu tuikale bantu ba tshijila badi kabayi mua kubandibua ku mêsu kuende mu luse. Wakadianjila kutusungula bua kuikala ne bumpianyi kudiye bu bana bua Yezu Kristo, bu mudi disanka dimpe dia disua diende, ku dianyisha dia butumbi bua ngasa wende wakatupaye patupu mu Muanende munanga. Tudi ne kupikudibua kuetu kudiye bua mashi ende, ne kubuikidibua kua malu mabi etu bu mudi bubanji bua ngasa wende, wakakumbajilaye kutudi mu meji onso ne lungenyi. Wakatumanyisha bualu busokoka bua mu disua diende bu mudi disanka diende dimpe diakasungulaye munda muende, too ne palua tshikondo tshia dikumbana dia bipungu, bua kusangisha bintu bionso mu Kristo, ne bidi mu diulu ne bidi panshi pa buloba.’​—Ef. 1:3-10.