Dipa difila ne disanka ne muoyo mujima

MUPOSTOLO PAULO wakafunda bua bualu bua kufila ne: ‘Nunku muntu ne muntu afile bintu bu muakadisunguilaye mu mutshima wende,’ ne wakasakidila kabidi ne: ‘Kafidi ne kanyinganyinga, anyi bu muenzeja ku bukole; bualu bua Nzambi udi musue muena kupa udi ufila ne disanka.’ (2 Kol. 9:7) Yehowa katu wenzeja muntu bua afile tshiende tshidiye natshi bua kuyisha ntendelelu mukezuke kumpala to. Mmusue bua batendeledi bende baleje lulamatu luabu pa kufila bidibu nabi ku budisuile ne disanka. Kukadi bidimu bipite bungi bidi bantu bende bakumbaja mukenji eu ne disanka. Tukonkononayi bilejilu bisatu ebi.

Yehowa mumane kupatula bena Isalele mu Ejipitu, wakatuma dîyi bua kuibakabu ntenta wende. Bivua bikengela kupeta bintu bia kuibaka nabi, nunku bena Isalele bavua ne bua kufila bintu ebi. Mona tshiakenzeka, ‘muntu yonso wakadi mutshima wende umuenzeja’ wakalua ne or ne argent, bikanu bia kuvuala ne bintu bikuabu. Bantu bakafila bintu bia bungi too ne pakabambilabu ne: kuajiki biakumbanyi.​—Ekes. 35:5, 21; 36:6, 7.

 Kunyima kua bidimu bia bungi, batendeledi ba Nzambi bakapeta kabidi mushindu wa kuyisha ntendelelu mulelela kumpala pakakumbana tshikondo tshia kuibaka ntempelo. Mukalenge Davidi wakafila bintu bia bungi bia kuibaka nabi ntempelo ne kuambilaye bantu bakuabu bua bafile pabu. Bantu bakafila bintu ne muoyo umue. Bavua bafile bintu bipite bungi, tshilejilu or ne argent nkayabi bivua mushinga mupite pa miliyare 100 ya dolare! Bantu bavua ne disanka dia kupesha Yehowa bintu ku budisuile.​—1 Kul. 29:3-9; 2 Kul. 5:1.

Bayidi ba kumpala ba Yezu Kristo bavua pabu ne muoyo wa kufila bintu. Munkatshi mua bantu 3 000 bavua batambule mu Pentekoste wa 33, muvua bantu ba bungi bavua kabayi ba mu Yelushalema to. Bena Kristo bakasangisha makuta bua kuambuluisha bantu bavua kabayi ne mushindu bavua bashale mu tshimenga bua kulongabu malu a bungi a ntendelelu. Bana betu bakapana bintu biabu bivuabu nabi ne kutuadila bapostolo makuta bua kumona mua kuambuluisha nawu bavua bakenga. Bualu bua ditabuja ne dinanga buvuabu benze buvua busankishe Yehowa bikole be!​—Bien. 2:41-47.

Bena Kristo badi batungunuka ne kuyisha ntendelelu mulelela kumpala lelu padibu bafila ne disanka dîba diabu, makanda abu a mubidi ne makuta abu. Mbaleje mishindu iudi pebe mua kufila ebe mapa mu kazubu kadi kuinshi eku.

[Kazubu mu mabeji 18, 19]

MUSHINDU UDI BAMUE BAFILA MAPA

MAPA BUA MUDIMU WA PA BULOBA BUJIMA

Bantu bavule batu balama makuta bungi kampanda bua kuela mu tushete tua mapa a “Mudimu wa pa buloba bujima.”

Ku ngondo yonso, bisumbu bitu bituma makuta aa ku biro bia Bantemu ba Yehowa bidi bitangila mudimu mu ditunga diabu. Bantu badi mua kutuma kabidi makuta aa buludiludi ku Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-2483, anyi ku biro bia Bantemu ba Yehowa bidi bitangila mudimu mu ditunga diabu. (Mapa adi alonda aa nudi nansha mua kuatumina Biro bia Bantemu ba Yehowa bidi bitangila ditunga dienu.) Sheke ya makuta idibu batuma mu adrese udi kulu eu idi ne bua kuikala mu dîna dia “Watchtower.” Nudi mua kufila nansha bilenga bu mudi mpeta ne bikanu bia ngolo peshi bintu bikuabu bia mushinga mukole. Nutume mapa enu aa ne mukanda muipi udi uleja ne: nudi baatume bua kashidi.

DILAMISHA MAKUTA

Muntu udi mua kusombesha Watch Tower Bible and Tract Society of Pennsylvania makuta bua enza nawu mudimu miaba yonso idiye musue. Kadi padi muntu au nawu dijinga badi bamupingajilawu musangu umue. Wewe musue kumanya malu makuabu, udi mua kufundila biro bia Treasurer’s Office mu adrese udi kulu eku anyi kubikila ku numero eyi: (718) 560-7500.

Mapa malongolola

Pa kumbusha mapa a makuta mafila bua kashidi, kudi mishindu mikuabu ya kufila bintu bua mudimu wa Bukalenge udi wenzeka pa buloba bujima. Tudi mua kutela bu mudi:

Makuta a tshieya: Muntu udi mua kushila Watch Tower bukenji bua kuangata makuta ende a tshieya anyi a pansio.

Konte ya ku banke: Muntu udi mua kufundisha konte yende ya ku banke, mikanda ya makuta matekesha ku banke anyi konte yende ya makuta a pansio mu dîna dia Watch Tower anyi kufunda bua kuafutabu Watch Tower padiye ufua, bilondeshile mikenji ya banke ya muaba udiye.

Bukenji bua kupeta bintu ne makuta masombesha: Badi mua kupesha Watch Tower bukenji bua kupeta bintu ne makuta masombesha bu dipa dia kashidi.

Mpangu ne nzubu: Muntu udi mua kufila lupangu anyi nzubu wende bua kashidi, kadi utungunuka ne kusombelamu patshidiye ne muoyo. Manyisha Betele wa ditunga dienu kumpala kua kumupesha lupangu anyi nzubu webe.

Dipa dia kufuta ku tshidimu: Etshi ndipa dia muntu wangata makuta anyi mikanda ubifila kudi biro bia Bantemu ba Yehowa. Pashishe muntu eu (anyi mukuabu udiye musungule) udi utuadija kupeta makuta bungi kampanda tshidimu tshionso patshidiye ne muoyo. Tshidimu tshidi muntu ufila dipa edi badi bamupuekeshila mushinga wa bitadi bituye ufuta.

Testama ne bintu bilamisha: Muntu udi mua kushila Watch Tower bintu anyi makuta ende, peshi kumupa bukenji bua kuangata bintu bidiye mulamisha. Badi mua kukepesha mushinga wa bitadi padi bintu bitekesha mu dîna dia tshitendelelu.

Anu mudi miaku eyi: “mapa malongolola” ileja, mapa a mushindu eu atu alomba bua muntu adianjile kudilongolola. Bua kuambuluisha bantu badi bajinga kukuatshisha mudimu udi Bantemu ba Yehowa benza pa buloba bujima ne mapa malongolola, mbapatule kakanda ka mu Anglais ne mu tshiena Espagne kadi ne tshiena-bualu tshia ne: Charitable Planning to Benefit Kingdom Service Worldwide. (Mapa malongolola bua kukuatshisha mudimu wa Bukalenge wa pa buloba bujima) Mbenze kakanda aka bua kuleja mishindu mishilangane idi bantu mua kufila mapa ne bintu bia bumpianyi. Bantu ba bungi bamane kukabala ne bayukile ne aba batu babapesha mibelu mu malu a mikenji anyi a bitadi, mbafike ku dikuatshisha mudimu wa Nzambi ne wa kuambuluisha bantu udi Bantemu ba Yehowa benza pa buloba bujima, ne mbabakepeshile bungi bua makuta a bitadi avuabu bafuta. Udi mua kulomba kakanda aka ku Charitable Planning Office (Biro bia mapa malongolola).

Bua kumanya malu makuabu, udi mua kufundila Charitable Planning Office (Biro bia mapa malongolola) anyi kuela nshinga mu adrese udi kuinshi eku, peshi kuebeja Betele udi utangila mudimu mu ditunga dienu.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefone: (845) 306-0707