Masambila ebe adi aleja tshinyi buebe wewe?

‘Wewe udi umvua milombu, bukua bantu bonso nebufike kuudi.’​—MUS. 65:2.

1, 2. Bua tshinyi basadidi ba Yehowa badi ne bua kusambila kabayi belakana?

YEHOWA utu umvua masambila a basadidi bende ba lulamatu. Tudi bashindike ne: udi uteleja milombu yetu. Nansha Bantemu ba Yehowa bungi munyi mua kumulomba bonso dîba dimue, Yehowa udi ne bukole bua kuteleja muntu ne muntu.

² Bu muvua Davidi mujadike ne: Nzambi uvua umvua masambila ende, wakamba ne: ‘Wewe udi umvua milombu, bukua bantu bonso nebufike kuudi.’ (Mus. 65:2) Yehowa uvua wandamuna masambila a Davidi bualu uvua umutendelela ne lulamatu. Tudi ne bua kudikonka ne: ‘Masambila anyi atu aleja ne: ndi mueyemene Yehowa ne ntu nteka malu a ntendelelu mukezuke pa muaba wa kumpala anyi? Masambila anyi atu aleja tshinyi buanyi meme?’

Sambila Yehowa ne bupuekele

3, 4. (a) Tudi ne bua kuikala ne ngikadilu kayi patudi tusambila Nzambi? (b) Netuenze tshinyi bikala meji etu ‘atata’ bua bubi bunene butudi benze?

³ Bua Nzambi kuandamuna masambila etu, tudi ne bua kumulomba ne bupuekele. (Mus. 138:6) Tudi ne bua kulomba Yehowa bua atutete anu bu muakenza Davidi pavuaye muambe ne: ‘Nzambi, utangile munda muanyi, umanye mutshima wanyi. Untete, umanye meji anyi. Umone ne malu mabi adi munda muanyi, undombole mu njila wa tshiendelele.’ (Mus. 139:23, 24) Katuikadi tusambila anu bua malu makuabu, kadi tuitabe bua Nzambi atutete ne tutumikile Dîyi diende. Nunku Yehowa udi mua kutulombola ‘mu njila wa tshiendelele,’ padiye utuambuluisha bua kuenza malu adi mua kutufikisha ku muoyo wa kashidi.

⁴ Netuenze tshinyi bikala meji etu ‘atata’ bua bubi bunene butudi benze? (Bala Musambu 32:1-5.) Tuetu tubenga bua kuteleja kondo ka muoyo padiku katulumbuluisha, tudi tuenda tuteketa anu mutu mutshi uma padi mushipu uupita bukole. Davidi wakajimija disanka diende pavuaye muenze mpekatu ne uvua mua kuikala usama. Kadi wakapeta disulakana anu pakatondelaye Nzambi bubi buende. Elabi meji disanka divua Davidi mua kuikala nadi pakumvuaye ne: ‘wakafidibua luse bua bubi buende’ ne Yehowa uvua mumubuikidile! Padi muntu utondela Nzambi bubi buende udi udiumvua mupepele, ne bakulu bena Kristo nebamuambuluishe bua kupingajaye malanda ende ne Nzambi.​—Nsu. 28:13; Yak. 5:13-16.

Sengelela Nzambi ne muele tuasakidila

5. Kusengelela Yehowa kudi kumvuija tshinyi?

⁵ Tuetu ne kanyinganyinga kakole bua bualu kampanda, tudi ne bua kutumikila mubelu wa Paulo eu: ‘Lekelayi kuditatshisha ku bualu bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila.’ (Filip. 4:6) “Kusengelela” kudi kumvuija “kutendekena ne budipuekeshi buonso.” Tudi ne bua kusengelela Yehowa nangananga patudi mu njiwu anyi padibu batukengesha bua atuambuluishe ne bua atulombole.

6, 7. Tudi ne bua kusakidila Yehowa mu masambila etu bua malu kayi?

⁶ Tuetu tusambila Yehowa anu patudi dijinga ne tshintu kampanda, bidi bileja tshinyi bua malanda atudi badie nende? Paulo wakamba ne: tudi ne bua kumanyisha Nzambi milombu yetu “ne kusakidila.” Tudi ne malu adi atusaka bua kuela Nzambi tuasakidila anu bu Davidi wakamba ne: ‘Yehowa, bunene ne bukole ne butumbi ne kutamba ne bulengele butambe mbiebe; bualu bua bintu bionso bia mu diulu ne bia pa buloba mbiebe. Yehowa,  bukalenge mbuebe, ne wewe udi ubandishibua ku mutu kua bionso. Nzambi wetu, tudi tukusakidila, tudi tutumbisha dîna diebe dia butumbi.’​—1 Kul. 29:11-13.

⁷ Yezu wakasakidila Nzambi bua biakudia ne bua diampa ne mvinyo biakenzabu nabi didia dia Mukalenge. (Mat. 15:36; Mâko 14:22, 23) Pa kumbusha dileja dia dianyisha, tudi ne bua ‘kusakidila Yehowa’ bua “bienzedi biende bia kukema bidiye wenzela bana ba bantu,” ne bua ‘mêyi ende makane majalame’ ne bua dîyi diende anyi malu ende adi mu Bible.​—Mus. 107:15; 119:62, 105.

Sambila bua bantu bakuabu

8, 9. Bua tshinyi tudi ne bua kusambila bua bena Kristo netu bakuabu?

⁸ Tutu tutamba kusambila anu bua etu malu, kadi tudi ne bua kusambila bua bantu bakuabu nansha bua bena Kristo netu batudi katuyi bamanye mêna abu. Nansha muvua Paulo kayi mua kuikala mumanye mêna a bena Kristo bonso ba mu Kolosai, wakabafundila ne: ‘Tudi tusakidila Nzambi, Tatu wa Mukalenge wetu Yezu Kristo, tudi tunulombela Nzambi misangu yonso. Tuakumvua lumu lua ditabuja dienu dia mu Kristo Yezu ne bua dinanga dinudi nadi kudi bansantu bonso.’ (Kolos. 1:3, 4) Paulo wakasambila kabidi bua bena Kristo ba ku Tesalonike. (2 Tes. 1:11, 12) Masambila a mushindu eu adi aleja malu a bungi pa bidi bitutangila ne mutudi tumona bena Kristo netu balume ne bakaji.

⁹ Patudi tusambila bua bena Kristo bela manyi ne bua balunda babu bena mu tshisumbu tshia ‘mikoko mikuabu’ tudi tuleja mutudi tuditatshisha bua bulongolodi bua Nzambi. (Yone 10:16) Paulo wakalomba bena Kristo nende bua bamulombele Nzambi bua ‘kupetaye mushindu wa kuakula pabululaye mukana muende ne bua yeye kumanyisha bantu ne dikima bualu bua lumu luimpe busokoka.’ (Ef. 6:17-20) Tutuku petu tusambila bua bena Kristo netu mushindu eu anyi?

10. Patudi tusambila bua bakuabu bidi bituenzela tshinyi?

¹⁰ Patudi tusambila bua bakuabu, meji etu adi mua kushintuluka bua bualu buabu. Tuetu tusambila bua muntu kampanda udi kayi utusankisha, meji etu kaena mua kushintuluka bua muntu eu anyi? (1 Yone 4:20, 21) Masambila a nunku atu atukolesha ne atushiya mu bobumue ne bana betu. Masambila a mushindu eu adi kabidi aleja mutudi ne dinanga dia buena dia Kristo. (Yone 13:34, 35) Dinanga ntshitupa tshia dimuma dia nyuma wa Nzambi. Tutuku tulomba Yehowa nyuma wende, tumulomba bua atuambuluishe bua kuikala ne ngikadilu yende yonso bu mudi dinanga, disanka, ditalala, luse, buimpe, bunanukidi bua lulamatu, ditabuja, budipuekeshi ne didikanda anyi? (Luka 11:13; Gal. 5:22, 23) Tuetu benze nanku, netuleje mu mêyi ne bienzedi bietu ne: tudi tuenda mu nyuma.​—Bala Galatia 5:16, 25.

11. Bua tshinyi ki mbibi bua kulomba bantu bakuabu bua batulombele Nzambi?

¹¹ Bobu batuambile ne: bana betu balela badi batentula anyi bibila mandamuna a mateta mu kalasa, tudi ne bua kusambila bua bualu buabu ne kubambuluisha ne mvese ya mu Bible bua bikale benza malu ne bululame ne kabenji kabidi  bualu bubi to. Paulo wakambila bena Kristo ba mu Kolinto ne: “Tudi tutendekena Nzambi bua nuenu kanuenji bualu bubi.” (2 Kol. 13:7) Masambila a mushindu eu menza ne budipuekeshi, adi asankisha Yehowa ne adi aleja mutudi bantu bimpe. (Bala Nsumuinu 15:8.) Tudi mua kulomba bantu bakuabu bua batulombele Nzambi anu bu muakenza Paulo. Wakafunda ne: ‘Nutulombele Nzambi bua tudi tuitabujibua ne: tudi ne mioyo-mikese mimpe, tudi basue kuenda bimpe mu malu onso.’​—Eb. 13:18.

Malu makuabu adi masambila etu aleja buetu tuetu

12. Mmalu kayi a mushinga atudi ne bua kulomba mu disambila?

¹² Masambila etu adiku aleja ne: tudi Bantemu ba Yehowa badi ne disanka ne tshisumi anyi? Tutuku tutamba kulomba Nzambi bua atuambuluishe bua kuenza disua diende, kuyisha lumu lua Bukalenge ne kubingisha bumfumu bua Yehowa ne kunemeka dîna diende anyi? Ke malu a mushinga atudi mua kuikala tulomba bikole mu disambila, anu muvua Yezu muleje mu disambila dia tshilejilu didi dibanga ne mêyi aa: ‘Tatu wetu udi mu diulu, banemeke dîna diebe. Bukalenge buebe bulue. Benze pa buloba muudi musue bu mudibu benza mu diulu.’​—Mat. 6:9, 10.

13, 14. Masambila atudi tuenza adi aleja tshinyi buetu tuetu?

¹³ Patudi tusambila Nzambi, tudi tuleja meji atudi nawu, malu atudi basue ne bitudi tujinga. Yehowa mmutumanye bimpe. Nsumuinu 17:3 udi wamba ne: ‘Luesu ludiku lua kulengejila tshiamu tshia argent, tshikutu tshidiku tshia kulengejila tshiamu tshia or; kadi Yehowa udi uteta mitshima.’ Nzambi utu umona malu adi mu muoyo wetu. (1 Sam. 16:7) Mmumanye mututu tumvua bua bisangilu bietu, bua mudimu wa buambi ne mu mututu tumona bena Kristo netu balume ne bakaji. Yehowa mmumanye meji atudi tuelela “bana” babu ne Kristo. (Mat. 25:40) Mmumanye bituikale dijinga menemene ne malu atudi tumulomba mu disambila anyi ni tutu tuamba petu mêyi anu bua kuamba. Yezu wakamba ne: ‘Panuatendelela Nzambi, kanuakudi biakulakula bu mutu bantu ba bende benza; bobu batu belangana meji [mu mushindu mubi] ne: Nebatumvuile bua mêyi etu adi a bungi.’​—Mat. 6:7.

¹⁴ Malu atudi tuamba mu disambila adi aleja mutudi beyemene Nzambi bikole anyi bitekete. Davidi wakamba ne: ‘[Yehowa] udi tshinyemenu tshianyi, udi tshibumba tshikole kumpala kua badi nanyi lukuna. Witabuje bua meme nsombe tshiendelele mu nzubu webe wa ntenta, bua meme mpete tshinyemenu mu mundidimbi wa mapuapua ebe.’ (Mus. 61:3, 4) Nzambi udi ubulula ‘nzubu wende wa tshilulu pa mutu petu’ mu ngumvuilu wa mu tshimfuanyi bua kutulama ne kututabalela bimpe. (Buak. 7:15) Patudi tusemena pabuipi ne Yehowa mu disambila tudi bajadike ne: ‘udi netu’ mu tshikondo tshionso tshidi ditabuja dietu mu diteta ne bidi bitukolesha.​—Bala Musambu 118:5-9.

15, 16. Mmunyi mudi disambila mua kutuambuluisha bua kumanya tshia kuenza patudi tukeba majitu mu tshisumbu?

¹⁵ Tuetu tusambila Yehowa ne muoyo umue bua malu atudi tuelela meji, bidi mua kutuambuluisha bua kujingulula bulelela bua malu au. Tshilejilu, utuku ujinga bua kushala mukulu anyi musadidi mu tshisumbu ne meji mimpe a budipuekeshi bua kuambuluisha ne bua kudifila ne muoyo mujima bua kuyisha lumu luimpe ne malu a mu tshisumbu kumpala anyi? Anyi utu musue ‘kuikala ku mpala’ peshi musue ‘kukokesha’ bakuabu? Malu kaena ne bua kuenzeka nunku munkatshi mua basadidi ba Yehowa to. (Bala 3 Yone 9, 10; Luka 22:24-27.) Tuetu bikale ne majinga mabi, kadi balombe Yehowa Nzambi ne muoyo umue, udi mua kuapatula  patoke ne kutuambuluisha bua kushintuluka kumpala kua kaayi manji kuela miji mu mutu muetu.

¹⁶ Bana betu ba bakaji badi mua kuikala bajinga bikole bua babayabu balue pabu basadidi ba mudimu anyi bakulu. Dijinga diabu edi didi mua kukumbana anu bobu badileja Nzambi mu disambila pa nkayabu misangu yonso ne badienzeja bua kuikala ne bikadilu bimpe bia tshitembu. Malu atu muena mu dîku yonso wakula ne wenza adi mua kumupa lumu mu tshisumbu anyi kulunyanga.

Patudi tuleja mpala bua bakuabu mu disambila

17. Bua tshinyi mbimpe kuya muaba wa pa nkayetu bua kusambila bua malu etu?

¹⁷ Yezu uvua ne tshibidilu tshia kuya pa nkayende kule ne bantu bua kusambila Tatuende. (Mat. 14:13; Luka 5:16; 6:12) Tuikale petu tusambila pa nkayetu. Patudi tusambila muaba wa ditalala, tudi mua kuangata mapangadika adi asankisha Yehowa ne adi mua kutuambuluisha bua kumusadila bikole. Nansha Yezu uvua pende usambila kumpala kua bantu. Mbimpe tukonkonone mutudi mua kusambila bimpe kumpala kua bantu.

18. Mmalu kayi adi bana betu ba balume kabayi mua kupua muoyo padibu baleja mpala wa tshisumbu mu disambila?

¹⁸ Patudi mu bisangilu, bana betu ba balume badi ne lulamatu ke batu baleja mpala wa bena mu tshisumbu mu disambila. (1 Tim. 2:8) Bena Kristo nabu bakuabu badi ne bua kuamba ku ndekelu kua disambila edi ne: “amen,” mbuena kuamba ne: “bikale nanku.” Bua bobu kuitaba amen, anu bobu banyishe malu adibu bambe mu disambila. Yezu kavua muambe bualu bubi anyi budi butapa ku muoyo mu disambila diende dia tshilejilu to. (Luka 11:2-4) Kavua kabidi mutele majinga onso anyi ntatu ya muntu ne muntu wa ku bavua bamuteleja to. Mbimpe kusambila bua malu etu nkayetu pankayetu, katuenji nanku patudi tusambila kumpala kua bantu to. Patudi tuleja mpala wa tshisumbu tshia bantu mu disambila, ki ndîba dia kusambila bua malu adi atutangila tuetu nkayetu to.

19. Mmalu kayi atudi ne bua kuenza ne atudi ne bua kuepuka padibu benza disambila kumpala kua bantu?

¹⁹ Padi muntu mukuabu uleja mpala wetu mu disambila, tudi ne bua kuleja ‘ditshina dia Nzambi’ dilelela. (1 Pet. 2:17) Kudi tshikondo tshitudi katuyi mua kuenza amue malu patudi mu bisangilu bia tshisumbu. (Muam. 3:1) Tshilejilu, elabi meji muntu yeye ukeba bua bantu bonso badi mu tshisumbu belangana maboko anyi bakuatangana ku bianza padibu benza disambila kumpala! Bidi mua kulenduisha anyi kushiya bakuabu mu ditanaji nangananga benyi badi kabayi Bantemu. Bamue balume ne bakaji babu badi mua kukuatangana ku tshianza ne budimu, kadi bobu belangane maboko dîba didibu benza disambila kumpala, bantu bakuabu badi mua kulenduka bobu bamone bualu bua mushindu eu. Badi mua kuela meji ne: balume  aba ne bakaji babu kabena batshina Yehowa to, mbateke mananga abu pa muaba wa kumpala. Bua kuleja mutudi ne kanemu kondoke, ‘tuenze malu onso bua kutumbisha Nzambi,’ ne tuepukayi malu adi mua kunyangila bakuabu ntema, kubenza bundu anyi kubalenduisha.​—1 Kol. 10:31, 32; 2 Kol. 6:3.

Malu atudi mua kulomba mu disambila

20. Mmunyi muudi mua kumvuija Lomo 8:26, 27?

²⁰ Imue misangu tudi mua kupanga malu a kulomba mu masambila a pa nkayetu. Paulo wakafunda ne: ‘Bua katuena bamanye mua kulomba Nzambi bu mutudi basue kumulomba, kadi nyuma [muimpe] muine udi utuakuila ne mikemu idi kayiyi mua kuambibua. Nzambi, udi ukeba mu mitshima ya bantu, udi mumanye meji a nyuma.’ (Lomo 8:26, 27) Yehowa uvua muenze bua bafunde masambila a bungi mu Bible. Patudi tuenza masambila mikale ne mêyi a mu masambila aa mafundisha ku nyuma wende, udi uateleja ne uandamuna. Nzambi mmutumanye bimpe ne mmumanye diumvuija dia malu avua nyuma wende musake bafundi ba Bible bua kuakula ne kufunda. Yehowa udi wandamuna masambila etu padi nyuma wende ‘utuakuila’ anyi utulombela. Nunku, tuetu bamanye Dîyi dia Nzambi bimpe menemene, netupete malu a bungi a kubueja mu masambila etu.

21. Mbualu kayi butuakonkonona mu tshiena-bualu tshidi tshilonda?

²¹ Malu atudi bafume ku dilonga aa, adi aleja mudi masambila etu aleja bumuntu buetu. Tshilejilu, adi mua kuleja bukole bua malanda atudi nawu ne Yehowa ne mushindu utudi bamanye Dîyi diende. (Yak. 4:8) Mu tshiena-bualu tshidi tshilonda, netukonkonone amue masambila adi mu Bible ne mêyi awu. Mmunyi mudi dikonkonona dia Bible dia mushindu eu mua kutuambuluisha patudi tulomba Nzambi?

Newandamune munyi?

• Nngikadilu kayi utudi ne bua kuikala nende patudi tusambila Yehowa?

• Bua tshinyi tudi ne bua kusambila bua bena Kristo netu?

• Masambila etu adi aleja tshinyi buetu tuetu ne bua meji atudi tuela?

• Mmalu kayi atudi mua kuenza ne atudi ne bua kuepuka padibu benza disambila kumpala kua bantu?

[Nkonko ya dilonga]

[Tshimfuanyi mu dibeji 4]

Utu ne tshibidilu tshia kutumbisha Yehowa ne kumuela tuasakidila anyi?

[Tshimfuanyi mu dibeji 6]

Tuenze malu adi atumbishisha Yehowa padibu benza disambila mu tshisumbu