Nkonko ya babadi

Mbimpe bua muanetu wa bakaji kubuikilaye mutu wende padiye ukudimuna miyuki mu muakulu wa tumama mu bisangilu, mu mpuilu ne mu mpungilu anyi?

Muanetu wa bakaji udi ne bua kuvuala tshitambala padiye wenza midimu ivua bayende anyi muanetu wa balume mua kuenza mu tshisumbu. Bualu ebu budi bupetangana ne mêyi adi mupostolo Paulo muambe a ne: ‘mukaji yonso udi utendelela anyi udi wambila bakuabu dîyi dia Nzambi ne mutu wende kauyi mubuikila, udi upuekesha butumbi bua mutu wende’ bualu ‘mutu wa mukaji yonso udi mulume.’ (1 Kol. 11:3-10) Padi muanetu wa bakaji ubuikila mutu wende mu mushindu muimpe udi uleja kanemu udi uleja mudiye ukokela bulongolodi bua Nzambi mu tshisumbu tshia bena Kristo.​—1 Tim. 2:11, 12. *

Tudi mua kuamba tshinyi bua muanetu wa bakaji udi ukudimuna mu muakulu wa tumama muyuki udibu benza kudi muanetu wa balume? Mudimu wa muanetu wa bakaji eu ngua kukudimuina bateleji malu adi ngamba-malu wamba. Tudi mua kuamba ne: ki mmuanetu wa bakaji eu udi ulongesha to, kadi mmuanetu wa balume. Kadi dikudimuna malu mu muakulu wa tumama ndishilangane ne dikudimuna malu mu miakulu idi bantu bakula. Mu miakulu itu bantu bakula, batu batangila ngamba-malu eku bikale bateleja eu udi ukudimuna. Kadi bana betu ba bakaji batu bakudimuna mu miakulu ya nunku kabatu bimana kumpala mu mushindu udi ukoka ntema ya bateleji to. Imue misangu badi mua kuikala bakudimuna basombele panshi, kadi bobu bimane kuulu badi ne bua kutangila ngamba-malu pamutu pa kutangila bantu. Dîba adi kabiena ne mushinga bua muanetu wa bakaji udi ukudimuna muakulu udi bantu bakula kuvuala tshitambala to.

 Kadi bu mudi malu a biamu bidibu bienza nabi mudimu bua kukudimuna miyuki mu muakulu wa tumama enda aya kumpala, mukudimunyi udi ne mudimu wa bungi wa kuenza. Batu baleja muntu udi ukudimuina tumama ku televizion munene ne tumama katutu tumona ngamba-malu udi wenza muyuki to. Bua malu aa, mbimpe bua muanetu wa bakaji udi ukudimuina tumama miyuki amanye ne: mudimu wende ngua kukudimuna ne udi ne bua kubuikila mutu wende.

Bualu bupiabupia ebu budiku butangila dikudimuna mu muakulu wa tumama mu Kalasa ka Mudimu wa Nzambi, padibu benza manaya a tshilejilu, bandamuna mu Dilonga dia Bible dia Tshisumbu, mu Tshisangilu tshia Mudimu ne mu Dilonga dia Tshibumba tshia Nsentedi anyi? Muanetu wa bakaji udi ne bua kuvuala tshitambala padiye ukudimuna mu muakulu wa tumama mu bisangilu ebi anyi? Pamuapa kabitu nangananga ne mushinga bua muanetu wa bakaji kubuikila mutu wende padiye wenza amue malu ne ke mudibi kabidi bua bisangilu ebi, bualu ki nyeye udi ulombola to. Tshilejilu kena mua kubuikila mutu wende padiye ukudimuina bateleji miyuki anyi manaya a tshilejilu menza kudi bana batu ba bakaji to. Kadi padiye ukudimuna miyuki mu bisangilu ebi idibu benza kudi bana betu ba balume anyi ukudimuna malu adibu bamba kudi mulombodi wa Tshibumba tshia Nsentedi anyi wa Dilonga dia Bible dia Tshisumbu peshi padiye wimbisha misambu kumpala anyi padiye musombe panshi uludika udi wimba kumpala, udi ne bua kuvuala tshitambala ku mutu. Badi mua kulomba muanetu wa bakaji bua kukudimuina bana betu ba balume, ba bakaji, bana ne bakulu malu mu bisangilu. Biobi bienzeke nanku, mbimpe bua muanetu wa bakaji udi ukudimuna ikale ne tshitambala ku mutu mu bisangilu bionso too ne ku ndekelu.

[Mêyi adi kuinshi]