Tunangayi bena Kristo netu badi tumama

BASADIDI ba Nzambi ba lelu badi mu dîku dinene didi dienza ne bana betu ba balume ne ba bakaji ne badi ne bumpianyi bupite bua bantu ba mu bikondo bia kale. Munkatshi mua bantu ba kale abu mudi Samuele, Davidi, Shimishona, Lahaba, Mose Abalahama, Sala, Noa ne Abele. Munkatshi mua basadidi ba Yehowa ba lelu mudi tumama tua bungi. Tshilejilu, tatu mukuabu ne mukajende bavua balue Bantemu ba Yehowa ba kumpala mu ditunga dia Mongolie bavua tumama. Lulamatu lua bana betu badi tumama ba mu ditunga dia Russie, luakatuambuluisha bua kupeta budikadidi bua ntendelelu wetu kumpala kua tubadi tunene tua maneme a bantu tua ku Mputu.

Mu matuku etu aa, ‘mupika wa lulamatu ne wa budimu’ mmulongolole mikanda ne matadi mu muakulu wa tumama ne mmulongolole bisumbu bia muakulu wa tumama ne mpuilu ne mpungilu mu muakulu eu. (Mat. 24:45, NW) Bintu ebi bidi biambuluisha tumama bikole. * Pamuapa udi mua kudikonka ne: mmunyi muvua tumama mua kumanya Nzambi mulelela ne kuya kumpala mu bulelela bu bintu ebi kabiyiku? Ukadiku muele meji a tshiudi mua kuenza bua kuambuluisha tumama tua muaba uudi musombele anyi?

Pavuabu kabayi banji kupatula bintu ebi

Mmalu kayi adi tumama tukulumpe mua kukulondela bua muvuatu tufike ku dimanya Nzambi? Bantu badi tumama badi mua kukuambila muvuabu bumvue pavuabu bamanye dîna dia Nzambi ne muvua bulelela bushintulule nsombelu wabu ne bubambuluishe bua kushale bashindame munkatshi mua bidimu bia bungi kumpala kua kubapatuilabu matadi a mu muakulu wa tumama bua kumonabu mua kuvudija dimanya diabu dia Bible. Badi mua kukumvuija tshivuabu bumvua pavua bisangilu kabiyi bienzeka mu muakulu wabu wa tumama. Muntu uvua pamuapa usomba ku luseke luabu ne ubafundila malu adibu bamba kumpala mu dibeji bua bumvue pabu malu avuabu balongesha. Muanetu wa balume mukuabu kamama wakalonga Bible bidimu 7 mu mushindu eu kakuyi muntu uvua mua kumukudimuina bisangilu mu muakulu wa tumama to.

Muanetu mukuabu kamama udi uvuluka muvuabi bualu bukole bua kuyishaye bantu badi bumvua. Mu tshianza tshimue bavua bakuata kabeji kafunda mêyi a mua kutuadija kuyukila ne bantu ku nzubu ne ku nzubu. Mu tshianza tshikuabu bavua bakuata Tshibumba tshia Nsentedi ne Réveillez-vous! Tuvua ne lutatu lua bungi bua kulongesha kamama kakuabu Bible, bualu tuvua tuyisha anu ne mikanda ituvua tuetu bine katuyi tumvua bimpe to. Tumama tua kale tudi tuvuluka muvuatu tumvua bibi pavua bantu kabayi bumvua bivuatu tuamba ne tuvua tushala katutshiyi tuyukila malu a Nzambi to. Bana betu badi tumama aba bavua banange Yehowa, kadi kabavua ne mushindu wa kuleja dinanga adi mu tshienzedi to. Bua tshinyi? Bualu kabavua batuishibue ne: mbumvue amue malu kampanda masunguluke bimpe to.

Malu aa onso kaavua mapangishe bana betu badi tumama bua kushala ne lulamatu kudi Nzambi to. (Yobo 2:3) Bavua bindile Yehowa ne muoyo mujima. (Mus. 37:7) Mpindieu Nzambi mmubenzele malu mimpe mapite avua ba bungi ba kudibu kabayi batekemene.

Tuakule bua tshilejilu tshia muanetu wa balume kamama ne muikale tatu wa dîku. Kumpala kua kupatulabu ditadi dia video dia mu muakulu wa tumama, uvua ulombola dilonga dia mu dîku ne muoyo mujima. Muanende wa balume udi wamba ne: “Tatu uvua ne lutatu lua kulombola  dilonga dia mu dîku bualu bionso bivuaye utulongesha uvua ne bua kubiangatshila mu mikanda. Misangu ya bungi kavua umvua bimpe bivuabu bafundamu to. Tuetu mutuvua bana katuvua ne mushindu wa kumuambuluisha to. Tuvua tumulekela too ne pavuaye ufika ku diumvua ne: ki mmutumvuije malu bimpe to. Nansha nanku, uvua ulombola misangu yonso dilonga dia mu dîku. Uvua wela meji ne: tuetu balongaku bualu kampanda budi butangila Yehowa bivua ne mushinga kupita lutatu luvuaye nalu lua kumvua Anglais bimpe.”

Kudi tshilejilu tshikuabu tshia Richard muanetu wa balume wa bidimu 70 udi kamama ne mpofo. Udi musombele ku Brooklyn mu tshimenga tshia New York mu ditunga dia États-Unis. Richard mmumanyike bikole bua dibuela diende pa tshibidilu mu bisangilu bia bena Kristo. Bua kufika mu bisangilu ebi, utu ubuela mu kawulu katu kapitshila mu njila wa muinshi mua buloba ne wenda ubala ngala itu kawulu kimana bua kumanyaye muaba udiye ne bua kutulukila. Dikuabu dituku, bakashintulula dituku dia bisangilu bu muvua mabungi a bungi aloka. Bavua bamanyishe bantu bonso mu tshisumbu, kadi kupuabu Richard muoyo. Kadi pakavuluka bana betu, bobu kutuadija kukeba Richard ne kumusanganabu muimane kumpala kua Nzubu wa Bukalenge muindile bua bakangule tshiibi. Pakebejabu Richard bua tshinyi uvua mupatuke mu mabungi makole a mashika nunku, wakabandamuna ne: “Bualu ndi munange Yehowa.”

Ntshinyi tshiudi mua kuenza?

Tumama tudiku muaba uudi musombele anyi? Kuenaku mua kulonga muakulu wa tumama bua kuyukila natu anyi? Tumama tutu ne disanka ne lutulu patutu tulongesha bantu bakuabu muakulu watu. Wewe mua kutuilangana ne kamama mu mudimu wa buambi anyi muaba mukuabu, newenze tshinyi? Ditatshisha bua kuyukila naku. Enza jeste, funda amue malu, zola bimue bintu anyi enze bionso ebi bua kuyukila naku. Nansha kamama aka kakayi kaleja dianyisha bua bulelela, ambila Ntemu mukuabu udi kamama anyi udi mumanye muakulu wa tumama bua nuye kukatangila. Bulelela budi mua kusankisha muntu udi kamama bikole padibu bamuyisha nabu mu muakulu wende.

Pamuapa udi mua kulonga muakulu wa tumama ne kubuela mu bisangilu bia tshisumbu bia mu muakulu eu. Mmunyi muudi mua kumanya bimpe muakulu wa tumama ne kuumvua bimpe? Udi mene mua kuyukila ne bamanyishi bakuabu badi bumvua mu muakulu wa tumama. Nebikuambuluishe bua kuela meji mu muakulu wa tumama. Imue misangu udi mua kumona bipepele bua kuyukila ne mukana pamutu pa kuakula muakulu wa tumama. Anu mutubi bikole bua kuakula muakulu wonso eu, udi ne bua kudienzeja bua kumanya muakulu wa tumama bimpe.

Paudi uditatshisha bua kumanya muakulu wa tumama, udi uleja muudi munange bana betu badi tumama ne muudi ubanemeka. Elabi meji mushindu utu tumama tumvua bibi dituku dionso edi ku mudimu anyi mu tulasa padi bantu kabayi bafika mua kumvua bimpe biditu tuamba. Muanetu mukuabu kamama wakamba ne: “Dituku dionso edi, bantu bandi mpetangana nabu bonso batu bakula. Ntu ndimona  nkayanyi misangu yonso ne ndimona bu muntu mulekelela ne bitu binyingalaja ne bimpa tshiji. Tshiena ne mêyi andi mua kumvuija nawu muntu ndiumvua dîba adi.” Bisangilu bietu bidi ne bua kuikala bu muaba wa tshitalela udi bana betu badi tumama bapetela malongesha a kudi Nzambi ne basanka bua kuyukila ne bena Kristo nabu.​—Yone 13:34, 35.

Katuena ne bua kulengulula tusumbu tukese tua tumama tudi tudisangisha pamue ne bisumbu bidi bantu badi bakula. Batu babakudimuina malu adibu balongeshamu. Bua kumvua tshidi bualu ebu buleja, bana betu badi tumama batu basomba kumpala mu Nzubu wa Bukalenge. Bidi bibambuluisha bua kumona muntu udi ubakudimuina malu mu muakulu wabu ne ngamba-malu udi wenza muyuki kakuyi lutatu. Malu mamona adi aleja ne: padi bena mu tshisumbu bateka tumama mushindu eu, badi bibidilangana natu ne lukasa luonso ne bualu ebu kabuena bubapangisha bua kuteleja bisangilu to. Tumama tudi ne bua kuikala tusomba mushindu eu nansha mu mpuilu ne mu mpungilu idibu bakudimuna mua muakulu watu. Bena mu tshisumbu badi benza mudimu eu mukole wa dikudimuna bintu bipepele ne biumvuika bimpe mu muakulu wa tumama mbakuela kalumbandi.

Pamuapa udi mua kuikala mu tshisumbu tshidi tshitangila kasumbu ka muakulu wa tumama anyi tshidi ne ndambu wa tumama ne bikale bakudimuna bisangilu mu muakulu watu. Ntshinyi tshiudi mua kuenza bua kuleja ne: utu utabalela bana betu badi tumama? Udi mua kubabikila ku nzubu kuebe. Koku mushindu udi mene mua kulonga muakulu wabu nansha ndambu. Kumvu buôwa bua ntatu iudi mua kupeta paudi uyukila nabu. Paudi upeta mushindu, yukila nabu ne paudi wenza nunku udi ubaleja muudi mubanange bikole ne neupete malu ikala akusankisha. (1 Yone 4:8) Bana betu badi tumama badi ne malu mimpe a bungi. Batu basue kuyukila bikole, badi ne meji a bungi ne batu basue kuela bilele bikole. Muanetu kampanda udi ne baledi bende bonso babidi tumama udi wamba ne: “Ndi mmukolele muaba uvua tumama ne bavua bandongeshe malu a bungi andi tshiyi mua kupingaja. Tudi mua kulongela malu a bungi kudi bana betu badi tumama.”

Yehowa mmunange basadidi bende bonso badi ne lulamatu ne aba badi tumama. Bua ditabuja diabu ne dinanukila, badi dibenesha mu bulongolodi bua Yehowa. Tutungunukayi ne kunanga bana betu ba balume ne ba bakaji badi tumama.

[Mêyi adi kuinshi]

[Tshimfuanyi mu dibeji 31]

Lumu luimpe lua Bukalenge bua Nzambi ludi lusankisha tumama paditu tulumvua mu muakulu watu

[Bimfuanyi mu dibeji 32]

Bisangilu bietu bidi ne bua kuikala bu muaba wa tshitalela udi bana betu badi tumama bapetela malongesha a Nzambi adi akolesha