Tuenzele Nzambi mudimu wa bungi ne disanka

YEHOWA mmusue bua wikale ne disanka. (Mus. 100:2) Muudi musadidi wende, udi mua kuikala ne malu a bungi a kuenza. Pamuapa kumpala kua wewe kutambula kuvua ne malu a bungi a kuenza to, kadi mpindieu mudimu webe wa bianza ne majitu audi nawu mu tshisumbu bidi mua kukufikisha ku didiumvua muzengele. Udi pamuapa mua kudimona bu muenze bubi paudi kuyi mukumbaje malu onso auvua mulongolole bua kuenza. Mmunyi muudi mua kulama nkatshinkatshi webe ne kuikala ne “disanka dia Yehowa”?​—Neh. 8:10.

Udi mu matuku makole adi ne ntatu ya bungi, nunku udi ne bua kudilongolola bimpe. Mubelu uvua mupostolo Paulo mufile bua bualu ebu udi ne mushinga wa pa buawu, udi wamba ne: ‘Nunku nudimuke bienu bu munudi nuenda; kanuendi bu badi kabayi ne meji, kadi nuende bu bena meji; nudisumbile tshikondo patshiditshiku tshia kuenza malu mimpe, bualu bua matuku adi mabi.’​—Ef. 5:15, 16.

Mmunyi mudi mubelu eu wa meji mua kukuambuluisha bua kuipatshila malu audi mua kukokesha ne kuikala ne nkatshinkatshi paudi udilongela Bible, utangila malu a mu dîku, uyisha, wenza mudi wa bianza ne malu makuabu a mushinga?

Utshidiku muvuluke disanka diuvua nadi pauvua mudilambule kudi Nzambi ne mutambule anyi? Uvua musanke pawakamanya Yehowa ne malu adiye mulongolole bua kuenza. Uvua mua kuikala muenze ndambu wa ngondo bua kulonga ne kupeta dimanya edi ne disanka kabidi. Kadi bivua bikulombe bua wewe kudifila bikole. Dilonga adi divua dishintulule nsombelu webe ne mulue muimpe mutambe.

Wewe musue kulama disanka diebe, udi ne bua kutungunuka ne kuyila malu a Nzambi. Wewe kuyi upeta dîba dia kubala Bible ne kumulonga, tangilula programe webe. Nansha wewe udilongela Bible bua minite mikese ku dituku dionso ne welangana meji a malu au, neusemene pabuipi ne Yehowa ne nebikuambuluishe bua kuikala ne disanka.

Basadidi ba Nzambi ba bungi batu bangata dîba ditubu benza malu adi kaayi ne mushinga bua kudifila ku adi ne mushinga wa bungi. Diebeje ne: ‘Mmêba bungi munyi antu mpitshisha ku dibala dia bikandakanda, ditangila dia TV ne diteleja dia mizike anyi ku dijikija mukodi?’ Malu aa adi mua kukusankisha, kadi anu wewe uenza ne  nkatshinkatshi. (1 Tim. 4:8) Wewe mumone ne: kuena ne dîba, wakajilule programe webe.

Tatu Adam udi ne bana basatu eku muikale kabidi mukulu mu tshisumbu, udi uleja tshiakamuambuluisha, wamba ne: “Mvua ndienzeja bua kuikala ne nsombelu udi kayi mukutakaja ne bintu. Mvua ngepuka dijikija mukodi didi mua kundia dîba ne bintu bidi mua kumpesha mudimu wa kuikala kubitangila bikole. Ntshiena musue kuamba ne: mvua mudipangishe malu onso a mu nsombelu to, kadi mvua nsungula dijikija dia lutetuku dimpe.”

Wewe muelangane meji a bipeta bimpe bia mapangadika ebe, bidi mua kukupesha kabidi disanka ne kukuambuluisha bua kuikala ne meji mimpe. Tshilejilu, Mariusz mmukulu mu tshisumbu ne udi ne bana basatu; udi wamba ne: “Pamvua mutuadije kulonga Bible, ngakatuadija kupeta ditekemena bua matuku atshilualua. Misangu yonso ntu anu ntuilangana ne ntatu, ne ya bungi ya kudiyi anu Yehowa nkayende ke udi muyimanye. Ndi ngela Yehowa tuasakidila bua mudiye mungambuluishe ne ndi mutekemene matuku atshilualua ne disanka.”

Tshilejilu tshia Mariusz katshiena tshileja ne: kuikala ne meji mimpe nekujikije tunyinganyinga tuonso nansha. Kadi kudi mua kukuambuluisha bua kupeta disulakana ne kupita bimpe ne ntatu ya mu nsombelu. Bible udi wamba ne: “Matuku onso a mukengi adi mabi, kadi muena mutshima wa disanka utu wikala ne bidia bia disanka matuku onso.” (Nsu. 15:15) Elabi kabidi meji bua mushindu utu Nzambi mukunange. Dielangana meji dia mushindu eu, nedikuambuluishe bua kunanga Nzambi ne kuikala ne disanka bua bualu buende.​—Mat. 22:37.

Bena mu dîku bobu bateka Yehowa ne malu ende kumpala, disanka didi divula mu dîku. Padibu baleja ngikadilu ya buena Kristo, badi bakepesha bilumbu mu dîku ne malanda abu adi akola bikole. Nunku, nzubu webe udi mua kulua muaba wa ditalala ne wa buobumue bua dîku dijima.​—Mus. 133:1.

Panudi nuenza malu a Nzambi pamue mu dîku, nudi nuvudija disanka dienu. Mariusz udi wamba ne: “Mvua ngangata dîba dituvua tupitshisha pamue mu dîku ne mushinga. Mukajanyi utu ungambuluisha bikole. Patuye ne dîba, utu uya kumfila mu buambi anyi bua kulongolola muaba wenzekela mpuilu ne utu uya kumfila kabidi pantu nya kuenza miyuki mu bisumbu bikuabu. Bitu binkolesha bikole!”

Bible udi ulomba bena Kristo bua kukumbaja majinga a bena mu mêku abu. (1 Tim. 5:8) Kadi wewe wenza mudimu udi ukudia dîba dia bungi ne makanda ebe a mubidi, udi mua kujimija disanka dia kuenzela Nzambi mudimu. Kuatshila Yehowa bualu ebu mu disambila. (Mus. 55:22) Bamue bantu mbamone ne: bua kuteka Bukalenge bua Nzambi pa muaba wa kumpala mbimpe kukeba mudimu mukuabu wa kuenza. Muena Kristo kena ne bua kulekela makuta a bungi adiye upeta ku mudimu udi umudia dîba ne makanda a mubidi amupangisha bua kutuishila mêsu ku malu a Nzambi adi ne mushinga to.​—Nsu. 22:3.

Wewe mufunde malu mimpe ne mabi a ku mudimu uudi mupete anyi uudi wenza, bidi mua kukuambuluisha. Mudimu muimpe ne wa makuta a bungi utu usankisha. Kadi, mudimu webe udiku ukushila dîba dia kutangila malu a mu nyuma a bena mu dîku diebe anyi? Konkonona malu onso ne lubatshi ne wangata mapangadika adi ateka malanda ebe ne Yehowa pa muaba wa kumpala.

Mudimu uudi wenza mpindieu wowu ukupangisha bua kuya kumpala mu malu a Nzambi, udi ne bua kushintulula malu. Bena Kristo ba bungi mbashintulule malu a bungi bua kupeta dîba dia kuenza malu a Nzambi. Muanetu wa balume mukuabu wa mu ditunga dia Pologne udi wamba ne: “Bualu bumue buvua bunshadile, nkupatuka mu kumpanyi umvua ngenza mudimu; bualu mvua anu mu ngendu ya malu a mudimu. Tshivua kabidi ne dîba dia kutangila malu a bena mu dîku dianyi bimpe ne luendu luabu lua mu nyuma to.” Udi mpindieu wenza mudimu udi umuangata dîba dikese ne makanda mubidi makese.

Ikala ne disanka bua kuambuluisha bakuabu

Yezu wakamba ne: ‘Kupa kudi kutamba kuangata kusankisha muntu.’ (Bien. 20:35) Bena Kristo badi ne mpunga ya bungi ya kufila. Udi mua kusekesha muntu imue misangu, kumuela muoyo ku tshianza anyi muntu yeye muenze mudimu bimpe mu Kalasa ka Mudimu, udi mua kumuela tuasakidila ne muoyo mujima; nebinusankishe nuenu bonso babidi.

Mupostolo Paulo wakakankamija bena Kristo nende ne: ‘Nukoleshe badi ne mitshima  yamba kupanga, nukuatshishe badi batekete.’ (1 Tes. 5:14) Bantu badi ne tunyinganyinga badi mua kudiumvua kabayi ne bukole bua kutantamena ne ntatu. Kuenaku mua kubambuluisha anyi? Wewe mumone ne: muena Kristo nebe kampanda kayi wenzela Yehowa mudimu ne disanka, udi mua kumukankamija. Wewe wenza nanku, nebikukoleshe pebe. Kudi ntatu idi bantu kabayi mua kujikija to. Kadi udi mua kukolesha muanenu ne muoyo mujima ne kumuambila bua eyemene Yehowa bualu yeye katu upangila. Bantu bonso badi benza nanku, kakubela mâyi ku makasa to.​—Mus. 27:10; Yesh. 59:1.

Bualu bukuabu buudi mua kuenza, nkubikila muntu udi umueneka katshiyi ne disanka bua akufile mu buambi. Pavua Yezu mutume bayidi bende 70 mu buambi, wakabatuma “babidi ku babidi.” (Luka 10:1) Kuenaku mumone ne: uvua muenze nanku bua bikale bakoleshangana anyi? Udiku pebe mua kulonda tshilejilu etshi tshia kuambuluisha bantu bua bapetulule disanka lelu anyi?

Kudi malu a bungi atudi mua kuelela meji. Paulo udi utuambila ne: ‘Nusanke mu Mukalenge misangu yonso, nengambe tshiakabidi ne: Nusanke.’ (Filip. 4:4) Muudi munange Nzambi, tumikila mikenji yende ne tungunuka ne kuyisha ne tshisumi, nsombelu webe nealengele. Bualu ebu budi bukupetesha disanka. Ndekelu wa bionso, Yehowa udi ukuambuluisha bua upite bimpe ne tunyinganyinga ne ntatu idi ikukuata.​—Lomo 2:6, 7.

Mêsu a ditabuja adi atuambuluisha bua kumona ne: tukadi pabuipi ne buloba bupiabupia budi Yehowa mutulaye. Netupete mabenesha a bungi ne malu a bungi atupesha disanka. (Mus. 37:34) Tudi ne bua kuikala ne disanka ne katupu muoyo ne: Yehowa udi utubenesha nansha matuku etu aa. Nanku tudi mua ‘kukuatshila Yehowa mudimu ne disanka.’​—Mus. 100:2.

[Diumvuija dia bidi mu tshimfuanyi tshia mu dibeji 8]

(Bua kumona malu bimpe, tangila mu mukanda)

Udi mua kuakajilula muudi mukosolole mêba ebe a mudimu bua wikale ne disanka

MANAYA ne DIJIKIJA DIA LUTETUKU

TANGILA NZUBU ne BENA MU DÎKU

MUDIMU

BISANGILU BIA BENA KRISTO

DIDILONGELA BIBLE

MUDIMU WA BUAMBI

[Bimfuanyi mu dibeji 10]

Udiku ne mushindu wa kuambuluisha bakuabu bua bikale pabu ne disanka anyi?