Udiku mua kulua mu Makedonia anyi?

MUPOSTOLO Paulo wakamona tshikena-kumona pavuaye mu tshimenga tshia Toa tshia mu Asia mukese. Uvua mumone muntu mukuabu wa ku Makedonia umusengelela ne: “Lua biebe mu Makedonia, utukuatshishe.” Padi Paulo umona tshikena-kumona etshi, yeye ne bavuaye nabu mu luendu ‘bakelangana meji ne: Nzambi wakababikila bua bobu kuambila bena Makedonia lumu luimpe.’ Tshiakenzeka ntshinyi? Ludia ne ba mu nzubu muende bavua basombele mu Filipoi tshimenga tshinene tshia mu Makedonia, bakalua bena kuitabuja. Bakuabu bantu bakalua bena kuitabuja mu tshimenga tshia Makedonia tshia bena Lomo etshi.​—Bien. 16:9-15.

Bantemu ba Yehowa badi pabu ne tshisumi tshia muomumue lelu eu. Ba bungi ba kudibu batu badifutshila njila bua kuya miaba idibu dijinga ne bamanyishi ba Bukalenge ba bungi. Tshilejilu, Lisa uvua musue kuyisha bikole. Wakumbuka mu ditunga dia Canada ne kuya mu ditunga dia Kenya. Trevor ne mukajende Emily, bakumbuka pabu mu Canada batangile mu ditunga dia Malawi bua kuikalabu bayisha bikole. Paul ne mukajende Maggie ba mu ditunga dia Grande-Bretagne, bakamona tshikondo tshivuabu bapete pansio ku mudimu tshikale tshimpe bua kuenzela Yehowa mudimu bikole, ke kuenzabu luendu batangile ku Est wa Afrike. Utuku pebe ne lungenyi lua kudifila anyi? Udiku mua kuenza luendu lua nunku anyi? Bikalabi nanku, mmêyi kayi a mu Bible ne mibelu bidi mua kukuambuluisha bua kukumbaja bualu ebu?

Dikonkonone

Mbimpe wewe kukonkonona meji ebe. Pakatela Yezu mukenji udi mutambe mikuabu, wakamba ne: ‘Sua Yehowa Nzambi webe ne mutshima webe wonso ne muoyo webe wonso ne lungenyi luebe luonso.’ Dinanga dia Nzambi ne  dijinga dia kukumbaja mudimu wa kuvuija bantu bayidi ke bidi bikusaka bua kuya mu ditunga dienyi. Yezu wakamba kabidi ne: Mukenji ‘muibidi udi mufuanangane nawu udi ne: sua mukuenu bu muudi mudisue.’ Tudi tuleja mutudi banange bantu bakuabu patudi tuleja dijinga dia kubambuluisha. (Mat. 22:36-39; 28:19, 20) Bua kuya kuyisha mu ditunga dikuabu, bidi bikengela kudilongolola bikole ne kuikala ne lungenyi lua kudipangisha amue malu. Ki nkuya bua kunaya anyi kuela bilele to. Dinanga ke didi dikusaka bua kuenza luendu lua mushindu eu. Remco ne mukajende Suzanne ba mu ditunga dia Pays-bas badi mpindieu bayisha mu ditunga dia Namibie, badi bamba ne: “Dinanga ke didi ditusombeshe muaba eu.”

Willie udi mutangidi wa tshijengu mu ditunga dia Namibie, udi wamba ne: “Bantu batu basombela mu ditunga dikuabu bua kuyisha, kabatu batekemena ne: bena Kristo ba muaba udibu baya au nebambule bujitu buabu to. Batu balua ne lungenyi lua kuenza mudimu pamue ne bena Kristo nabu ba muaba au bua kubambuluisha mu mudimu wa diyisha.”

Wewe mumane kukonkonona meji ebe, udi mua kudikonka ne: ‘Ndimanya kayi dindi nadi didi mua kuambuluisha muaba eu? Ntu mpatula bipeta bimpe mu buambi anyi? Ntu ngakula miakulu kayi? Ndiku musue kulonga muakulu mukuabu anyi?’ Ke malu anudi ne bua kuyukila ne muoyo mujima mu dîku diebe anyi dienu. Uyukile kabidi ne bakulu ba mu tshisumbu tshienu. Pashishe uakuatshile Yehowa mu disambila. Wewe mudikonkonone bimpe, nebikuambuluishe bua kumona ni udi mukumbane ne mudisuike bua kuya kuyisha mu ditunga dikuabu.​—Bala malu adi mu kazubu kadi ne tshiena-bualu ne: “ Ukadi mudimanye anyi?”

 Muaba wa kuyisha

Bakabikila Paulo ku Makedonia mu tshikena-kumona. Yehowa katu kabidi utulombola lelu ku diambuluisha dia bikena-kumona to. Kadi basadidi ba Nzambi mbamanye matunga adi dijinga ne bamanyishi ba lumu luimpe ku diambuluisha dia mikanda yetu ne bibejibeji bu mudi etshi. Nunku udi mua kutuadija kufunda mêna a miaba ya nunku. Wewe kuyi ne mushindu wa kulonga muakulu mukuabu anyi kuyi musue kushala matuku a bungi mu ditunga diudi musue kuya, udi mua kuya kuyisha muaba udibu bakula muakulu uudi mumanye bimpe. Pashishe udi mua kutuadija kukeba mikanda ya luendu, makuta a njila, dikubibua diebe, nsombelu mujima wa muaba au ne malu a mivu. Udi mua kulomba mibelu kudi bantu bakadi benze ngendu ya nunku. Usambile Nzambi bua malu akulejabu au. Vuluka tshivua tshifikile Paulo ne bena diende: ‘Nyuma muimpe wakabakandika bua kuamba dîyi dia Nzambi mu Asia.’ Nansha pakavuabu bakeba bua kuya mu Bitunia, ‘nyuma wa Yezu kakitabuja’ to. Bia muomumue, bidi mua kukuangata dîba bua wewe kumanya muaba uudi mua kuambuluisha bimpe menemene.​—Bien. 16:6-10.

Udi mua kuikala mpindieu mumone malu majalame audi ne bua kuenza. Wewe wela meji a kuya kuyisha mu ditunga dienyi, fundila Betele wa Bantemu ba Yehowa wa mu ditunga adi. Baleje majitu audi nawu anyi auvua nawu mu bulongolodi ne bele nkonko misunguluke iudi nayi, bu mudi: mushinga wa biakudia ne bia kuvuala, mushinga wa nzubu uudi mua kufutshila, miaba iudi mua kudiondapishila ne muudi mua kupeta mudimu wa bianza. Pashishe upeshe bena mu komite wa mudimu wa tshisumbu tshienu mukanda eu. Nebafunde pabu wabu mukanda wa dikuanyishila nawu bua kuutuma pamue ne webe ku Betele wa mu ditunga diudi musue kuya. Mandamuna akupeshabu neakuambuluishe bua kumanya muaba uudi mua kuambuluisha bimpe.

Muanetu Willie utuvua batele kulu eku udi wamba ne: “Bantu bavua benze bimpe mbavua banji kuya kumona ditunga didibu basue kuya ne bakeba muaba uvuabu mua kusombela ne disanka. Tshilejilu, muanetu wa balume mukuabu ne mukajende bakamona ne: kabavua mua kukokesha bua kusombela mu misoko ya kule to. Nanku bakasombela mu katshimenga kakese muvuabu dijinga ne bamanyishi, kadi muaba uvuabu mua kuikala basombe bimpe uvua mua kubambuluisha bua kuikala ne disanka.”

Mua kupita ne ntatu mipiamipia

Padi muntu umbuka mu ditunga diabu uya muaba muenyi utuye kayi mumanye, utu upeta imue ntatu. Lisa utuvua batele kulu eku udi wamba ne: “Bunkaya budi mua kulua lutatu lukole menemene.” Ntshinyi tshiakamuambuluisha? Uvua mulamate bena mu tshisumbu tshivuaye udisangishila ba mu ditunga adi. Wakangata dipangadika dia kumanya mêna a bantu bonso. Bua kubamanya, uvua uya mu bisangilu kumpala kua dîba ne ushala mutantshi padibi bijika bua kuyukila ne bana betu ba balume ne ba bakaji. Lisa uvua uyisha ne bana betu bakuabu ne  ubikila ba bungi ba kudibu kuende ne kupetaye balunda bapiabapia. Udi wamba kabidi ne: “Tshiena ne kanyinganyinga bua malu andi mudipangishe mu nsombelu wanyi to. Yehowa mmumbeneshe bikole be!”

Paul ne Maggie bakashiya nzubu uvuabu basombele kukadi bidimu 30 pakakola bana babu. Paul udi wamba ne: “Bivua bualu bupepele bua kushiya bintu ne bubanji. Kadi lutatu lunene luvua lua kushiya bana, luvua lupite bukole bishilangane ne mutuvua baluelele meji. Tuakadila bikole mu ndeke. Tukavua tudiambila ne: ‘Katuvua mua kuenza nunku to.’ Kadi tuvua beyemene Yehowa. Paudi upeta balunda bapiabapia, bidi bikukolesha ku muoyo bua kutungunuka.”

Greg ne mukajende Crystal batu bakula Anglais, bakumbuka mu ditunga diabu dia Canada batangile mu Namibie mutubu bakula Anglais. Kunyima kua matuku bobu kumona ne: mbitambe buimpe bua kulonga mukulu wa mu ditunga amu. “Imue misangu tuvua tuteketa mu maboko. Kadi patuakamanya muakulu wabu ke tuetu kushisha kumvua muvua malu enzeka mu ditunga edi. Disombeshangana ne bena Kristo netu ba mu ditunga edi, diakatuambuluisha bua kumanya ditunga bimpe.”

Wewe udipuekesha ne udifila, udi mua kusankisha bena Kristo ba muaba uudi muye. Jenny udi uvuluka dîku dikuabu divua dilua mu ditunga dia Irlande muvuaye mukolele. Udi wamba ne: “Bavua bakidilanga bikole, bavua bushuwa baluile mudimu, kadi ki mbua bikale babenzela mudimu to. Muvuabu bayisha ne tshisumi ne disanka biakansaka bua kubidikija.” Jenny ne bayende badi lelu bamisionere mu ditunga dia Gambie.

Dibenesha dia kudi Yehowa didi ‘divuija bubanji’

Paulo uvua mupete malu mimpe mu Makedonia. Panyima pa bidimu bitue ku dikumi, wakafundila bena Kristo ba ku Filipoi ne: “Ndi nsakidila Nzambi wanyi bua dinuvuluka dianyi dionso.”​—Filip. 1:3.

Trevor ne Emily, bavua pabu baye kuyisha mu Malawi kumpala kua kubabikilabu mu kalasa ka bamisionere ka Gilada bakumvua pabu disanka. Badi bamba ne: “Tuvua imue misangu tudikonka tshituvua tuenza ni tshivua tshimpe, kadi tuvua ne disanka. Tuvua balamatangane ne tuetu kumona dibenesha dia Yehowa.” Greg ne Crystal batuvua batela kulu eku badi bamba ne: “Kakuena bualu bukuabu butuvua mua kuenza budi bupite butudi tuenza ebu.”

Bushuwa, bantu bonso kabena ne mushindu wa kuya kuyisha mu matunga makuabu to. Bakuabu bobu baye miaba idibu dijinga ne bamanyishi mu ditunga diabu badi benza bimpe bitambe. Banga pabu badi mua kuya mu bisumbu bidi pabuipi nabu bidi dijinga ne diambuluisha. Tshidi ne mushinga nkuenza tshionso tshiudi mua kuenza bua kuenzela Yehowa mudimu. (Kolos. 3:23) Wewe muenze nanku, mêyi aa neakukumbanyine: ‘Disankisha didi difuma kudi Yehowa didi divuija bubanji, ne kena utenteka kanyinganyinga pa mutu padi.’​—Nsu. 10:22.

[Kazubu/​Tshimfuanyi mu dibeji 5]

 Ukadi mudimanye anyi?

Wewe musue kumanya ni udi mua kuya kuyisha mu ditunga dienyi, konkonona nkonko idi ilonda eyi ne muoyo mujima ne enze disambila bua kumona ni udi mua kuenza luendu lua nunku. Malu adibu bafunde mu bibejibeji bia Tshibumba tshia Nsentedi adi mua kukuambuluisha bua kukumbaja bualu ebu.

• Ntu ne malanda makole ne Nzambi anyi?​—“Bidia bua kufika ku disanka” (15 Kasuamansense 1997, dibeji 6)

• Ntu mpatula bipeta bimpe mu buambi anyi?​—“Mua kuikala mpanda-njila mukole” (15 Lumungulu 1989 dibeji 21, Mfalansa)

• Ndiku mua kushiya dîku dianyi anyi dietu ne balunda banyi anyi?​—“Ditantamena dijinga dia kupingana ku mbelu mu mudimu wa Nzambi” (15 Lumungulu 1994, dibeji 28)

• Ndiku mua kulonga muakulu mukuabu anyi?​—“Tshiudi mua kuenza paudi mu tshisumbu tshia muakulu muenyi” (15 Luabanya 2006, dibeji 17)

• Ndi ne makuta a luendu anyi?​—“Udiku mua kuambuluisha mu ditunga dia ku ba bende anyi?” (15 Kasuamansense 1999, dibeji 23)

[Tshimfuanyi mu dibeji 6]

Wewe udipuekesha ne udifila udi mua kusankisha bena Kristo ba muaba uudi

[Tshimfuanyi mu dibeji 7]

Bantu badi baya kumpala mbadi balua bua kuenzela Nzambi mudimu