Dituku dionso enza malu adi atumbisha Nzambi

DAVIDI wakalomba Yehowa ne: ‘Ungumvuije luse luebe lujalame ne dinda dionso, bua ndi ngeyemena kuudi. Ummanyishe njila undi ne bualu bua kuendela.’ (Mus. 143:8) Pautu ubika mu dinda dionso ne wela Yehowa tuasakidila bua dituku adi, utuku umulomba anu bu Davidi bua akulombole bua wangate mapangadika mimpe ne wenze malu adi amusankisha anyi? Kakuyi mpata, ke tshiutu wenza.

Bu mutudi badilambule kudi Yehowa, ‘bituadia anyi bituanua, anyi malu onso atudi tuenza, tuenze malu onso bua kutumbisha Nzambi.’ (1 Kol. 10:31) Tudi bamanye ne: malu atudi tuenza dituku dionso atu atumbisha Yehowa peshi amupendesha. Tudi bamanye kabidi ne: Dîyi dia Nzambi didi diamba mudi Satana ubanda bana babu ne Kristo, pamue ne batendeledi ba Nzambi bonso “munya ne butuku.” (Buak. 12:10) Ke bualu kayi tudi badisuike bua kuleja mudi Satana muena mashimi ne kusankisha Yehowa Tatu wetu wa mu diulu patudi tumuenzela mudimu wa tshijila “munya ne butuku.”​—Buak. 7:15; Nsu. 27:11.

Tukonkononayi mishindu ibidi minene itudi mua kutumbisha Nzambi mu malu atudi tuenza dituku dionso edi. Mushindu wa kumpala nkuteka malu adi ne mushinga wa bungi kumpala ne muibidi nkutabalela bantu bakuabu.

Tuenze malu atuvua balaye Nzambi

Tuvua baleje dijinga dikole dia kuenzela Yehowa mudimu patuvua badilambule kudiye. Tuvua kabidi bamulaye bua kuendela mu njila yende “ku dituku ne ku dituku” anyi bua kashidi. (Mus. 61:5, 8) Kadi, mmunyi mutudi tukumbaja bualu ebu? Mmushindu kayi utudi tuleja mutudi banange Yehowa ne muoyo wetu mujima dituku dionso edi?

Mukanda wa Nzambi udi uleja patoke malu adi Yehowa utulomba bua kuenza. (Dut. 10:12, 13) A bungi a kudiwu adi mu kazubu kadi mu dibeji dia 22 kadi kamba ne: “ Malu adi Nzambi utulomba bua kuenza.” Malu aa onso adi ne mushinga wa bungi bualu Nzambi ke udi utulombawu. Mmushindu kayi utudi mua kumanya bualu bua kuenza kumpala padibi bikengela kuenza abidi anyi a bungi musangu umue?

Tudi tuteka mudimu wetu wa tshijila kumpala, bu mudi kudilongela Bible, kusambila, kubuela mu bisangila ne kuyisha. (Mat. 6:33; Yone 4:34; 1 Pet. 2:9) Kadi malu adi atangila ntendelelu wetu kaena mua kutuangata dituku dijima to. Tudi kabidi ne bua kuenza mudimu wa bianza, kuya mu kalasa ne kuenza midimu mikuabu ya ku nzubu. Nansha nanku, tudi tuenza muetu muonso bua mudimu wetu wa bianza ne mikuabu kayitupangishi bua kuenza mudimu wetu wa tshijila bu mudi kubuela mu bisangilu. Tshilejilu, patudi basue kuya mu dikisha, tuenze bua katupangidi dikumbula dia mutangidi wa tshijengu, mpuilu wa pa buende, wa tshijengu anyi mpungilu wa distrike to. Imue misangu tudi mua kuenza midimu yetu mishilashilangane musangu umue. Tshilejilu, tudi mua kudilongolola mu dîku bua kuya kusukula Nzubu wa Bukalenge anyi tudi mua kuyisha bena mudimu netu peshi balongi netu dîba dia dikisha. Nunku, dîba dionso ditudi tuangata dipangadika bu mudi dia kukeba mudimu, kusungula tshilongelu tshia kubuela anyi balunda, tudi ne bua kudiangata bilondeshile ntendelelu wa Yehowa Tatu wetu wa dinanga bualu ntendelelu eu ke udi ne mushinga wa bungi mu nsombelu wetu.​—Muam. 12:13.

 Ikala utabalela bantu

Yehowa mmusue bua tuikale tutabalela bantu ne tubenzela malu mimpe. Kadi Satana yeye udi usaka bantu bua bikale batangila anu malu abu nkayabu. Bulongolodi buende mbuule tente ne bantu badi ‘badisui, banangi ba masanka’ ne bantu badi ‘bakunyina mubidi wabu bintu.’ (2 Tim. 3:1-5; Gal. 6:8) Ba bungi kabatu bela meji bua tshidi malu adibu benza mua kuenzela bakuabu to. Tudi tumona mudi ‘malu mabi a mubidi’ enzeka miaba yonso.​—Gal. 5:19-21.

Kadi bantu badi nyuma muimpe wa Yehowa ulombola badi benzela bakuabu malu ne dinanga, muoyo muimpe ne bulenga. (Gal. 5:22) Dîyi dia Nzambi didi ditulomba bua kutangila majinga a bantu bakuabu kumpala kua etu. Ke bualu kayi, tudi tutabalelangana bikole, kadi katuyi tubuelakana mu malu adi kaayi atutangila. (1 Kol. 10:24, 33; Filip. 2:3, 4; 1 Pet. 4:15) Tudi tutamba kutabalela bena Kristo netu. Nansha nanku, tudi kabidi tudienzeja bua kuambuluisha bantu badi kabayi bena Kristo netu. (Gal. 6:10) Udiku mua kukeba tshintu tshimpe tshiudi mua kuenzela muntu uwapetangana nende lelu anyi?​—Bala malu adi mu kazubu kadi mu dibeji dia 23 kadi kamba ne: “ Ikala utabalela.”

Katuena tutabalela bantu anu misangu ya pa buayi mibadika ku minu anyi padiku nsombelu  wa pa buende to. (Gal. 6:2; Ef. 5:2; 1 Tes. 4:9, 10) Kadi tudienzeje dituku dionso bua kumanya ntatu idi bakuabu nayi ne kubambuluisha ne lukasa nansha biobi mua kutukebela petu ntatu. Tudi ne bua kuitaba bua kuambuluisha bantu ne bionso bitudi nabi bu mudi dîba dietu, bintu bietu, dimanya dietu ne meji etu. Yehowa udi utujadikila ne: patudi tupesha bantu bintu, yeye neatupeshe bia bungi.​—Nsu. 11:25; Luka 6:38.

Mudimu wa tshijila “munya ne butuku”

Kudiku mushindu wa kuenzela Yehowa mudimu wa tshijila “munya ne butuku” anyi? Eyowa, patudi tuenza malu onso a ntendelelu wetu ne tshisumi pa tshibidilu. (Bien. 20:31) Tudi mua kuenza mudimu wa tshijila butuku ne munya patudi tubala Dîyi dia Nzambi ne tudielela meji dituku dionso, tusambila pa tshibidilu, tudienzeja bua kubuela mu bisangilu bionso ne kuyisha dîba dionso ditudi tupeta mpunga.​—Mus. 1:2; Luka 2:37; Bien. 4:20; 1 Tes. 3:10; 5:17.

Tudiku tuenzela Yehowa mudimu wa tshijila mushindu eu anyi? Bikalabi nanku, malu onso atudi tuenza nealeje mutudi basue kumusankisha ne kuleja mudi Satana muena mashimi. Tudi tudienzeja bua kutumbisha Yehowa mu malu onso ne mu nsombelu ya mishindu yonso. Tulekele mikenji yende itulombole mu ngakuilu wetu, mu bienzedi bietu ne mu mapangadika etu. Tudi tuleja mutudi tuanyisha malu mimpe adiye utuenzela patudi tumueyemena mu malu onso ne tudifila bikole mu mudimu wende. Tudi kabidi tuitaba mibelu ne manyoka ende patudi tutupa ku mikenji yende bualu tudi bena mapanga.​—Mus. 32:5; 119:97; Nsu. 3:25, 26; Kolos. 3:17; Eb. 6:11, 12.

Nunku tuenzayi malu adi atumbisha Nzambi dituku dionso edi. Tuetu tuenza nanku, netupete dikisha mu mioyo yetu ne netumone muikala Tatu wetu wa mu diulu mua kutuenzela malu ne dinanga bua kashidi ne tshiendelele.​—Mat. 11:29; Buak. 7:16, 17.

[Kazubu/​Tshimfuanyi mu dibeji 22]

 Malu adi Nzambi utulomba bua kuenza

• Kusambila pa tshibidilu.​—Lomo 12:12.

• Kubala Bible, kumulonga ne kutumikila bitudi tulonga.​—Mus. 1:2; 1 Tim. 4:15.

• Kutendelela Yehowa mu tshisumbu.​—Mus. 35:18; Eb. 10:24, 25.

• Kudisha bena mu dîku dietu, kubalongesha malu a Nzambi ne kubananga.​—1 Tim. 5:8.

• Kuyisha lumu luimpe lua Bukalenge ne kuvuija bantu bayidi.​—Mat. 24:14; 28:19, 20.

• Kulama makanda etu a mubidi, malanda mimpe ne Nzambi ne lungenyi luetu bu mudi kujikija lutetuku mu mushindu muimpe.​—Mâko 6:31; 2 Kol. 7:1; 1 Tim. 4:8, 16.

• Kukumbaja majitu atudi nawu mu tshisumbu.​—Bien. 20:28; 1 Tim. 3:1.

• Kulama nzubu yetu ne Nzubu wa Bukalenge ne mankenda.​—1 Kol. 10:32.

[Kazubu/​Tshimfuanyi mu dibeji 23]

 Ikala utabalela

• Bena Kristo bakadi bakulakaje.​—Lew. 19:32.

• Muntu udi usama anyi udi ne malu mamutonde.​—Nsu. 14:21.

• Muena Kristo udi mu lutatu lukole lua tshintu tshiudi mua kumuambuluisha natshi.​—Lomo 12:13.

• Muena mu dîku dienu.​—1 Tim. 5:4, 8.

• Muena Kristo udi mufuishe bayende anyi mukajende.​—1 Tim. 5:9.

• Mukulu udi wenza mudimu mukole mu tshisumbu tshienu.​—1 Tes. 5:12, 13; 1 Tim. 5:17.