Enza mudimu bimpe ne “muele wa nyuma”
Enza mudimu bimpe ne “muele wa nyuma”
‘Nuangate muele wa nyuma udi dîyi dia Nzambi.’—EF. 6:17.
1, 2. Ntshinyi tshitudi ne bua kuenza bua kupeta bamanyishi ba Bukalenge ba bungi?
PAVUA Yezu mumone muvua bantu ne dijinga dia kumanya Nzambi, wakambila bayidi bende ne: ‘Bintu bia kunowa bidi bia bungi, kadi bena mudimu badi banyabanya. Nunku, nulombe Mukalenge wa bintu bia kunowa, atume bena mudimu mu kunowa kuende.’ Yezu kavua mushikile apu to. Yeye mumane kuakula mêyi au, ‘wakabikila bayidi bende dikumi ne babidi’ ne kubatumaye bua kuyisha anyi “kunowa.” (Mat. 9:35-38; 10:1, 5) Pashishe ‘wakasungula banga bayidi makumi muanda mutekete, kubatumaye kumpala kuende ku babidi ku babidi’ bua kuenza mudimu au.—Luka 10:1, 2.
2 Lelu kudi kabidi dijinga dia bamanyishi ba Bukalenge ba bungi. Bantu 18 168 323 bavua babuele mu Tshivulukilu tshivua tshienzeke pa buloba bujima mu 2009. Bungi ebu mbupite bua Bantemu ba Yehowa bonso ne bantu bapite pa miliyo 10. Bushuwa, bia pa madimi bikadi bikumbane bua kubinowa. (Yone 4:34, 35) Nunku, tudi ne bua kusambila bua kulomba bena mudimu ba bungi. Kadi mmunyi mutudi mua kuenza malu adi umvuangana ne bitudi tulomba? Tudi ne bua kulengeja mushindu wetu wa kuyisha, kuikala ne tshisumi mu mudimu wa kuyisha lumu luimpe lua Bukalenge ne kuvuija bantu bayidi.—Mat. 28:19, 20; Mâko 13:10.
3. Mmunyi mudi nyuma wa Nzambi utuambuluisha bua kulua bamanyishi bimpe?
3 Tuvua balonge mu tshiena-bualu tshishale ne: nyuma wa Nzambi udi utuambuluisha bua ‘kuamba dîyi dia Nzambi ne dikima.’ (Bien. 4:31) Udi utuambuluisha kabidi bua kulua bamanyishi bapiluke. Bua tuetu kulua bamanyishi bapiluke, tudi ne bua kuenza mudimu bimpe ne Bible bualu ke tshiamu tshia mudimu tshidi Yehowa Nzambi mutupeshe. Bible mmufundisha ku bukole bua nyuma muimpe. (2 Tim. 3:16) Malu adimu mmafundisha kudi Nzambi. Nunku, patudi tulongesha bantu bimpe ne Bible, nyuma muimpe ke udi utulombola. Kumpala kua kulonga tshia kuenza, tuanji tumone bukole budi nabu Dîyi dia Nzambi.
‘Dîyi dia Nzambi didi ne bukole’
4. Mmunyi mudi bulelela bua mu Bible mua kushintulula muntu?
4 Dîyi dia Nzambi didi ne bukole bua dikema! (Eb. 4:12) Mu ngumvuilu kampanda, malu adi mu Bible mmatue kupita miele yonso itu bantu benza, bualu atu apandulula mifuba ne buongo buayi mu mushindu kampanda. Bulelela bua mu Bible butu bubuela munda mua muntu, mu lungenyi luende ne buleja patoke tshidiye menemene. Budi ne bukole bua kumukudimuna ne kumushintulula bikole. (Bala Kolosai 3:10.) Bushuwa, Dîyi dia Nzambi didi mua kushintulula bantu.
5. Mmu malu kayi mudi Bible mua kutulombola? Mmasanka kayi atudi tupeta?
5 Mu Bible mudi kabidi malu a meji atudi katuyi mua kupeta muaba mukuabu nansha. Malu aa adi mua kuambuluisha bantu mua kupita ne nsombelu mikole idiku lelu pa buloba. Dîyi dia Nzambi kadiena ditutokeshila anu muaba utudi tuendela to, kadi didi ditutokeshila njila wetu mujima. (Mus. 119:105) Didi dituambuluisha bikole patudi mu ntatu anyi patudi tuangata mapangadika bu mudi dia kusungula balunda, mishindu ya kujikija lutetuku, mudimu ne mvuadilu. (Mus. 37:25; Nsu. 13:20; Yone 15:14; 1 Tim. 2:9) Patudi tutumikila Dîyi dia Nzambi, tudi tumanya mua kusomba bimpe ne bantu. (Mat. 7:12; Filip. 2:3, 4) Bu mudidi dikenkesha njila wetu mujima, tudi tumona kudi mapangadika etu mua kutufikisha. (1 Tim. 6:9) Bible udi uleja kabidi tshidi Nzambi mulongolole bua matuku atshilualua ne bualu ebu budi butuambuluisha bua kuikala ne nsombelu udi upetangana tshidiye mutulongoluele. (Mat. 6:33; 1 Yone 2:17, 18) Padi muntu utumikila mêyi a Nzambi, udi upeta nsombelu muimpe.
6. Mbukole kayi budi nabu Bible mu mvita yetu ya ditabuja?
6 Tumanye kabidi ne: Bible ke tshingoma tshinene tshitudi natshi mu mvita yetu ya ditabuja. Paulo wakabikila Dîyi dia Nzambi ne: ‘Muele wa nyuma.’ (Bala Efeso 6:12, 17.) Tuetu badilongeshe bantu bimpe, bulelela bu mu Bible budi mua kubapikula ku bukokeshi bua Satana. Muele eu kawena ushipa bantu to, kadi udi ubasungila. Katuenaku mua kudienzeja bua kulongesha nawu bantu bimpe anyi?
Udilongeshe bantu bimpe
7. Bua tshinyi tudi ne bua kulonga mua kuenza mudimu bimpe ne “muele wa nyuma”?
7 Bua musalayi kuasa tshingoma bimpe mu mvita, udi ne bua kudibidija ne kulonga bua kutshiasa bimpe. Ke mudibi kabidi bua “muele wa nyuma” mu mvita yetu ya ditabuja. Paulo wakafunda ne: ‘Unanukile bua kudifila mujalame, bu muena mudimu udi kayi ne bua kufua bundu, uludikile bantu njila mululame mu dîyi dia Nzambi dia bushuwa.’—2 Tim. 2:15.
8, 9. Ntshinyi tshidi mua kutuambuluisha bua kumvua tshidi Bible wamba? Fila tshilejilu.
8 Ntshinyi tshidi mua kutuambuluisha bua ‘kuludikila bantu dîyi dia Nzambi dia bushuwa’ bimpe patudi tuyisha? Kumpala kua tuetu kuambila bakuabu malu adi mu Bible, tuetu bine tudi ne bua kuanji kuumvua bimpe. Ebi bidi bitulomba bua kumanya tshidi mvese idi pabuipi ne utudi tubala yamba bua kumumvua bimpe.
9 Bua tuetu kumvua mvese kampanda bimpe, tudi ne bua kubala idi kumpala kuende ne idi panyima pende. Tshidi Paulo muleje mu Galatia 5:13 tshidi tshijadika bualu ebu. Wakamba ne: ‘Bualu bua nuenu bana betu, nuakabikidibua bua budishikaminyi; kadi nudimuke bua budishikaminyi buenu kabulu tshia kusankisha natshi mubidi, kadi bualu bua dinanga dienu nukuatshilangane mudimu.’ Mbudishikaminyi kayi buvua Paulo wakuila muaba eu? Uvua wakula bua budishikaminyi anyi dipikudibua ku bubi ne lufu, ku malongesha a bitendelelu bia dishima peshi bua bualu bukuabu? Mvese idi kumpala kuende idi ileja ne: Paulo uvua wakula bua ‘dipikudibua ku mulawu wa mikenji.’ (Gal. 3:13, 19-24; 4:1-5) Uvua wakula bua budishikaminyi bua bena Kristo. Bantu bavua bitaba budishikaminyi abu bavua bakuatshilangana mudimu bua dinanga. Kadi bavua kabayi babunange bavua bajanangana anyi bakokangana bua malu a patupu.—Gal. 5:15.
10. Mmalu kayi atudi ne bua kukonkonona bua kumvua bimpe diumvuija dia mvese kampanda? Mmunyi mutudi mua kuamanya?
10 Bua tuetu kumvua mvese kampanda bimpe, tudi kabidi ne bua kukonkonona amue malu bu mudi uvua mufunde mukanda udibu bamuangatshile, dîba divuabu bamufunde ne nsombelu uvuaku tshikondo atshi. Bidi bikengela kumanya kabidi tshivuabu baufundile, ne koku mushindu kumanya bilele bivuaku, bikadilu bivua nabi bantu ne malu avuabu benza. *
11. Ntshinyi tshitudi ne bua kudimukila patudi tumvuija mvese ya mu Bible?
11 ‘Kuludikila bantu dîyi dia Nzambi dia bushuwa’ kakuena kulomba anu kumvuija bimpe malu a mu Bible to. Katuena ne bua kupesha bantu mvese ya mu Bible bua kubazakeja to. Nansha mutudi mua kufila mvese bua kuakuila bulelela bu muakenza Yezu pavua Diabolo mumutete, tumanye ne: Bible ki ntshintu tshia kutshingisha natshi bantu anyi kubenzeja bua bitabe bitudi tubambila to. (Dut. 6:16; 8:3; 10:20; Mat. 4:4, 7, 10) Tudi ne bua kutumikila mubelu wa Petelo wa ne: ‘Nujidile Kristo mu mitshima yenu bu Mukalenge; nuikale badilongolole misangu yonso bua kukudimuna dîyi kudi muntu yonso udi unukonka bua muanda wa ditekemena didi munda muenu; kadi nuenze nunku ne kalolo ne ditshina.’—1 Pet. 3:15.
12, 13. ‘Nngumbu ya mvita’ kayi idi bulelela budi mu Dîyi dia Nzambi mua kushimbula? Fila tshilejilu.
12 Patudi tumvuija bantu bulelela bua Dîyi dia Nzambi bimpe, ntshinyi tshidi mua kuenzeka? (Bala 2 Kolinto 10:4, 5.) Bulelela bua mu Dîyi dia Nzambi budi mua kupula ‘ngumbu ya mvita,’ tuambe ne: kuela patoke malongesha a dishima, bikadilu bibi ne nkindi idi ne meji a bantu bena mapanga. Tudi mua kuyisha bantu ne Bible bua kutonkola meji onso adi ajuka ‘bua kupumbisha nawu lungenyi lua Nzambi.’ Tudi mua kuambuluisha bantu ne malongesha a mu Bible bua batuadije kuela meji adi umvuangana ne bulelela.
13 Tuangate tshilejilu tshia mamu mukuabu wa bidimu 93 wa mu ditunga dia Inde. Bavua bamulongeshe katshia ku buana buende ne: padi muntu ufua utu uya kuledibua tshiakabidi. Pakatuadijaye kulonga Bible ku diambuluisha dia mikanda ivuaye ufundilangana ne muanende wa balume uvua mu ditunga dikuabu, wakitaba ne lukasa malu avuaye ulonga bua Yehowa ne bua malu adiye mulaye. Kadi bu muvuaye mulamate bikole ku dilongesha dia ne: padi muntu ufua utu uya kuledibua tshiakabidi, wakela mpata pavua muanende mumufundile bua kumuleja tshitu tshienzekela muntu padiye ufua. Wakamba ne: “Tshiena mua kuitaba tshinudi nulongesha bua bualu ebu to. Bitendelelu bionso bitu bilongesha ne: kudi tshintu kampanda munda muetu tshitu katshiyi tshifua to. Ntu ngitaba ne: mubidi utu ufua, kadi kudi tshintu tshitu katshiyi tshimueneka tshitu tshiya kuledibua mu mibidi mikuabu misangu mitue ku 8 400 000. Mmunyi mudi bualu ebu mua kuikala bua dishima? Bitendelelu bia bungi bidi bishima anyi?” Muele wa nyuma udiku mua kushimbula dilongesha dikadi diele miji mushindu eu anyi? Bobu bamane kuyukila bikole ne Bible bua tshilumbu atshi, mamu wakafunda panyima pa bingu mikese ne: “Ngatuadiji kumvua bulelela pa bidi bitangila bafue. Ndi ne disanka dia bungi dia kumanya ne: pabishabu bantu ku lufu, netumonangane ne bantu batuvua bafuishe. Ndi njinga bua Bukalenge bua Nzambi bulue lukasa.”
Witabijije bantu
14. Kuitabijija bateleji betu kudi kumvuija tshinyi?
14 Kuyisha bimpe ne Bible kakuena kumvuija anu kufila mvese to. Paulo uvua ‘witabijija’ bantu malu, ne ke tshitudi petu ne bua kuenza. (Bala Bienzedi 19:8, 9; 28:23.) ‘Kuitabijija’ kudi kumvuija “kutuisha.” Muntu udibu bitabijija udi “utuishibua bikole ne utuadija kueyemena tshintu kampanda.” Patudi tufikisha muntu ku ditaba dilongesha kampanda dia mu Bible, tudi bamutuishe bua itabe mudidi dilelela. Nunku, tudi ne bua kutuisha bateleji betu mudi malu atudi tubambila malelela. Malu adi alonda aa adi atuleja tshia kuenza.
15. Mmunyi muudi mua kukoka ntema ya muntu mu Bible mu mushindu udiye mua kumunemeka?
15 Koka ntema ya muntu mu Dîyi dia Nzambi mu mushindu udiye mua kudinemeka. Paudi upesha muntu mvese, muambila mudi kumanya tshidi meji a Nzambi pa bualu abu kuikale ne mushinga. Wewe mumane kuela muntu lukonko ne mumvue diandamuna diende, udi mua kuamba ne: ‘Tuanji kumvua mudi Nzambi wela meji bua bualu ebu.’ Peshi udi mua kumukonka ne: ‘Ntshinyi tshidi Nzambi wamba bua bualu ebu?’ Wewe ufila mvese mu mushindu eu, udi uleja ne: Bible mmukanda wa Nzambi ne udi wambuluisha bantu bua kuunemeka. Bitu bimpe kuenza nunku nangananga patudi tuyisha muntu utu witaba Nzambi, kadi kayi mumanye malu atu Bible ulongesha to.—Mus. 19:7-10.
16. Ntshinyi tshiakuambuluisha bua kumvuija mvese bimpe?
16 Bala mvese ne yumvuija. Pavua Paulo uyisha bantu, uvua ne tshibidilu tshia ‘kubajinguluila ne kubaleja’ malu avuaye ubalongesha ‘bilondeshile Mukanda wa Nzambi.’ (Bien. 17:3, Muanda Mulenga Lelu) Mvese umue udi mua kuikala wakula bua malu a bungi, kadi udi mua kuimanyina pa biambilu binene bidi bipetangana ne bualu bunudi nuyukila. Bua kuenza nanku, udi mua kuambulula biambilu bidi ne ngenyi minene anyi kuela nkonko yambuluisha muntu bua kubipeta. Pashishe, umvuija tshitupa tshia mvese atshi. Wewe mumane kuenza nanku, muambuluishe bua umvua mudi mvese umutangila nsungansunga.
17. Mmunyi muudi mua kuelangana meji ne bantu mu Bible mu mushindu wa kubitabijija?
17 Elesha bantu meji ne Bible mu mushindu wa kubatuisha. Paulo uvua welangana meji ne bantu ‘mu malu a mu Mukanda wa Nzambi’ ne kanemu bua kubatuisha. (Bien. 17:2, 4) Anu bu Paulo, dienzeja bua kulenga mioyo ya bantu. ‘Patula’ malu adi munda muabu paudi ubela nkonko mimpe idi ileja muudi ubatabalela. (Nsu. 20:5) Kadi akula ne bukalanga. Amba malu malondangane mu mushindu udi umvuika bimpe. Fila bijadiki bilenga. Ikala wangatshila malu audi wamba mu Dîyi dia Nzambi. Pamutu pa kubala mvese ibidi anyi isatu lukasa lukasa, mbimpe kubala mvese umue bimpe, kumumvuija ne kufila tshilejilu tshidi mua kumumvuija bimpe. Paudi ufila bijadiki bidi bishindika bualu, udi kabidi mua ‘kupeta bukole bua kuitabijija bantu.’ (Nsu. 16:23) Imue misangu udi mua kuya kukebulula malu makuabu audi mua kulua kusakidila. Mamu wa bidimu 93 utudi batele kulu eku uvua dijinga ne kumanya tshidi tshienza bua bitendelelu bia bungi bilongeshe ne: anyima katu ufua. Pakamanyaye kuvua dilongesha edi difumine ne muvuadi dibuele mu bitendelelu bia bungi wakitaba tshidi Bible ulongesha bua bafue. *
Tungunuka ne kuyisha bimpe ne Bible
18, 19. Bua tshinyi tudi ne bua kutungunuka ne kuenza mudimu bimpe ne “muele wa nyuma”?
18 Bible udi wamba ne: ‘Tshimuenekelu tshia malu a pa buloba ebu’ tshidi tshienda tshishintuluka. Bantu babi badi anu benda banyanguka bikole. (1 Kol. 7:31; 2 Tim. 3:13) Nunku, mbimpe tutungunuke ne kushimbula ‘ngumbu ya mvita’ ne ‘muele wa nyuma udi dîyi dia Nzambi.’
19 Tudi ne disanka bua mutudi ne Dîyi dia Nzambi ne tuenza mudimu ne malu adimu bua kuela malongesha a dishima patoke ne kulenga mioyo ya bantu badi banange malu makane. Kakuena tshintu tshidi ne bukole kupita malu adi mu Bible to. Nunku, tudienzejayi bua kuenza mudimu bimpe ne “muele wa nyuma” mu mudimu udi Nzambi mutupeshe wa kumanyisha Bukalenge buende.
[Mêyi adi kuinshi]
^ tshik. 10 Tudi mua kupeta malu adi atangila mikanda ya mu Bible mu mukanda wa “Toute Écriture est inspirée de Dieu et utile,” wa Étude perspicace des Écritures, ne mu biena-bualu bia ne: “Dîyi dia Yehowa didi ne muoyo” bitu bipatuka mu Tshibumba tshia Nsentedi.
^ tshik. 17 Bala broshire wa Ntshinyi tshidi tshitufikila patudi tufua? dibeji 5-16.
Udi muvuluke anyi?
• Dîyi dia Nzambi didi ne bukole kayi?
• Mmushindu kayi utudi mua ‘kuludikila bantu njila mululame mu dîyi dia Nzambi dia bushuwa’?
• Ntshinyi tshidi bulelela budi mu Bible mua kuenza ne ‘ngumbu ya mvita’?
• Mmunyi muudi mua kulengeja mushindu wa kuitabijija bantu malu paudi uyisha?
[Nkonko ya dilonga]
[Kazubu/Tshimfuanyi mu dibeji 12]
Mua kuitabijija bantu ne Dîyi dia Nzambi
▪ Enza bua muntu anemeke Bible
▪ Umvuija mvese
▪ Mueleshisha meji bua kumutuisha ne kulenga muoyo wende
[Tshimfuanyi mu dibeji 11]
Udi ne bua kulonga mua kuenza mudimu bimpe ne “muele wa nyuma”
