“Muana yonso udi ne bukenji bua kumanya Nzambi bimpe”

MU DIA 9/12/2008, tshibambalu tshia manême a bana tshia mu ditunga dia Suède tshiakenza tshisangilu tshinene tshia dishintakaja dia ngenyi tshivua ne tshiena-bualu ne: “Muana yonso udi ne bukenji bua kumanya Nzambi bimpe.” Baleji mpala ba ekeleziya wa mu Suède, ba ekeleziya mikuabu ya buena Kristo, ba bamizilman ne bisumbu bia manême a bantu, bakafila ngenyi ya bungi.

Mulombodi wa tshitendelelu tshikuabu wakamba ne: “Mbikole bua tuetu kumvuija mudi miyuki ya mu Bible mua kushintulula nsombelu wa bana.” Mmunyi mudi miyuki ya mu Bible mua kuambuluisha bana bua kupeta dimanya dia malu a Nzambi?

Mulombodi au wakamba ne: “Mvese ya mu Bible ne miyuki idimu bidi biambuluisha bana bua kuelanganabu meji.” Wakaleja mudi miyuki bu mudi wa “Adama ne Eva, Kayina ne Abele, Davidi ne Goleyata, diledibua dia Yezu, Zakayo mulambuishi wa bitadi, muana mujimine, muena Samalea wa luse.” Bavua batele miyuki eyi bu “bilejilu bidi mua kulombola meji a muana mu malu bu mudi a diibila, difuilangana luse, dibuikidilangana, lukinu, dinyanguka dia bikadilu, dilongolola malu atuvua banyange, dinanga dia bu wetu ne dia bantu bakuabu.” Kuambaye kabidi ne: “Miyuki eyi idi ne malu adi muana mua kuidikija, kuenza mu nsombelu wende anyi kumuambuluisha.”

Nunku, mbimpe kukankamija bana bua kubala Bible. Kadi bana badiku mua kukokesha bua “kuelangana meji” a malu adibu babala mu Bible ne kufika ku dipeta malongesha mimpe anyi?

Nansha bantu bakulumpe, bitu bikengela kubumvuija mvese ya mu Bible. Tshilejilu, Bible udi wakula bua muntu mutungula wa mu Etiopia uvua kayi mumvue bimpe bualu bua mu Bible buvuaye ubala ne “welangana meji.” Uvua ubala mulayi wa muprofete Yeshaya, kadi kayi umvua tshivuawu usua kuamba to. Ke bualu kayi wakitaba bua muyidi Filipo kumumvuijawu. (Bien. 8:26-40) Ki nganu muena Etiopia nkayende uvua dijinga ne diambuluisha to. Tuetu bonso, nangananga bana tudi dijinga ne kupeta diumvuija dijalame dia mvese ya mu Bible.

Bible udi wamba ne: ‘Bupote budi busuikibue mu mutshima wa muana.’ (Nsu. 22:15) Bana badi dijinga ne muntu udi mua kubalombola ne kubaludika. Nunku, baledi babu badi ne bujitu bua kubalongesha bikadilu bimpe ne malu adi Nzambi wamba mu Bible ne atubu balongesha mu tshisumbu tshia bena Kristo. Muana yonso udi ne bukenji bua kupeta dilongesha dia mushindu eu. Baledi badi ne bua kubambuluisha kutuadijila anu ku buana buabu bua bitabe malongesha a mu Bible ne balue ‘bantu bakole badi ne meji abu mibidile a kujingulula nawu tshidi tshimpe ne tshidi tshibi.’​—Eb. 5:14.