Nkonko ya babadi

Ndîba kayi didi muntu mua kutambula tshiakabidi?

Kudi amue malu adi mua kusaka muntu ukadi mutambule bua kukonkonona batismo wende ne kutangila ni udi mua kutambula tshiakabidi. Tshilejilu, kumpala kua muntu kutambulaye, uvua mua kuikala mu nsombelu kampanda anyi muenze bubi bunene mu musokoko buvuabu mua kumuipatshila mu tshisumbu bu yeye ukavua mutambule. Uvuaku mua kudilambula kudi Nzambi mu nsombelu wa nunku anyi? Didilambula diende divua ne bua kuikala ne mushinga anu bu yeye mudianjile kulekela malu adi Bible ukandika. Nunku, muntu uvua mutambule patshivuaye wenza malu mabi a mushindu eu, udi mua kutangila ni udi mua kutambula tshiakabidi.

Kadi netuambe tshinyi bua muntu uvua kayi wenza malu mabi kumpala kua kutambula, kadi mulue kuenza bualu bubi budi bukengela bua bamulumbuluishe? Elabi meji ne: muntu au udi wamba muvuaye kayi mumvue bimpe tshivuaye wenza pakatambulaye ne wamba mudi ditambula diende adi dia mafi. Padi bakulu batuilangana ne muenji wa bubi eu kabena ne bua kuamba mudi ditambula diende kadiyi ne mushinga to. Kabena ne bua kumuebeja bikalaye umona didilambula diende ne batismo wende bu bia mafi to, bualu uvua muteleje muyuki muimanyine mu Bible uvua wakula bua tshidi kutambula kumvuija. Pavuabu bele nkonko ivua itangila kudilambula ne kutambula uvua muandamune ne: Eyowa. Pashishe kuyaye kushintulula bilamba ne kumutuabu mu mâyi. Nunku, tudi mua kuamba ne: uvua mumvue bimpe bunene bua bualu buvuaye wenza. Bakulu badi ne bua kumulumbuluisha anu bu muntu mutambule.

Muntu yeye muambe mudi ditambula diende dikale dia tshianana, bakulu badi mua kumuambila bua kubala malu adibu bakule bua batismo mu Tshibumba tshia Nsentedi tshia 1/2/1961 dibeji dia 47, ne tshia dia 15/9/1964 dibeji dia 567-570 (bionso mu Mfualanse). Tshilumbu tshia kutambula tshiakabidi mu imue nsombelu (bu mudi: muntu uvua mutambule kayi ne dimanya dikumbane dia Bible) mbualu budi butangila muntu nkayende.

Mmalu kayi adi bena Kristo ne bua kukonkonona padibu bakeba kusombela mu nzubu umue?

Muntu yonso udi ne bua kuikala ne muaba wende wa kulala. Kadi lelu bantu ba bungi kabena ne nzubu yabu nkayabu to. Bua dipangila dia makuta, masama anyi malu makuabu, bidi mua kuenza bua ne: bena mu dîku dia muntu ne balela babu kusombelabu mu nzubu umue. Miaba mikuabu, balela badi mua kulala mu nzubu umue kayi mukosolola to.

Bulongolodi bua Yehowa kabuena ne bujitu bua kuela mulongolongo wa mikenji ya mushindu muimpe udi bena Kristo bonso ne bua kusomba ku mabu to. Badi babalomba bua kulonda tshidi Dîyi dia Nzambi diamba bua kumanya bikala mushindu udibu basombe mu nzubu yabu muimpe anyi mubi ku mêsu kua Nzambi.  Ngamue malu kayi adidi diamba bua bualu ebu?

Bualu bua kumpala butudi ne bua kukonkonona mbua tshikala kusomba ne bantu bakuabu mu nzubu umue mua kutuenzela tuetu anyi ntendelelu wetu. Tudiebeje ne: Bantu abu mbantu ba mushindu kayi? Mbatendeledi ba Yehowa anyi? Batu batumikila mikenji yende anyi? Mupostolo Paulo wakamba ne: “Kanudingibu; malunda mabi adi anyanga malu makane a bantu.”​—1 Kol. 15:33.

Bible udi wamba ne: Yehowa udi ukandika kuenda kua masandi. (Eb. 13:4) Nzambi kena mua kuanyisha bua muntu mulume ne muntu mukaji badi kabayi baselangane kulalabu mu nzubu umue wa bulalu benze bu mulume ne mukajende to. Muena Kristo kena mua kuitaba bua kusomba muaba udibu banyisha tshiendenda to.

Bible udi wambila bantu bonso badi basue bua Nzambi abanyishe bua ‘kunyema masandi.’ (1 Kol. 6:18) Nunku, mbimpe bena Kristo bepuke kusombela mu nzubu mudi malu adi mua kubasaka ku dienda masandi. Tuangate tshilejilu tshia bena Kristo badi balala mu nzubu umuepele ba bungi. Nsombelu wa nunku udiku mua kubabuejija mu diteta divuabu kabayi belela meji anyi? Netuambe tshinyi bua bantu babidi badi kabayi baselangane badi badimona mu nzubu nkayabu bualu bantu bakuabu batubu nabu kabenaku? Bia muomumue, ki mbimpe bua bajike badi badiumvua banangangane kusombela mu nzubu umue to. Kuepuka nsombelu ya nunku kudi kuleja mutudi ne meji.

Ki mbimpe kabidi bua bantu badi bashipe dibaka batungunuke ne kusombela mu nzubu umue to. Bu mukavuabu bibidilangane bikole, mbipepele bua bobu kukuluka mu tshiendenda.​—Nsu. 22:3.

Bualu bua ndekelu butudi katuyi mua kupepeja mmushindu udi bantu ba muaba utudi basombele bamona bitudi tuenza abi. Bena Kristo badi ne bua kuela meji bikalabu bamona ne: badi mua kusombela mu nzubu umue, kadi disomba diabu dikale dijula manunganyi kudi bantu. Katuena basue bua bienzedi bietu bipendeshe dîna dia Yehowa to. Paulo wakamba ne: ‘Kanuikadi balenduishi kudi bena Yuda anyi kudi bena Gelika anyi kudi ekeleziya wa Nzambi; bu mundi nsankisha bantu bonso mu malu onso, tshiyi ndikebela dikuatshisha dianyi, kadi ndi nkeba dia bantu ba bungi, bua bobu basungidibue.’​—1 Kol. 10:32, 33.

Bitu pamuapa bitatshisha bikole bantu badi basue kutumikila mikenji ya Yehowa bua kupeta nzubu muimpe wa kusombela. Kadi bena Kristo badi ne bua kutungunuka ne ‘kuteta budi Mukalenge muanyishe.’ Badi ne bua kuikala bajadike ne: kakuena tshintu tshibi tshidi tshienzeka mu nzubu yabu. (Ef. 5:5, 10) Nunku, bidi bikengela bua bena Kristo kulomba Nzambi bua abalombole ne kuenza muabu muonso bua yonso wa kudibu ikale ne makanda a mubidi ne kulama bikadilu bimpe ne kubenga kupendeshisha dîna dia Yehowa.