Utu umona Yehowa bu Tatuebe anyi?

MUYIDI mukuabu wa Yezu wakamulomba ne: ‘Mukalenge, utuyishe mua kutendelela.’ Yezu wakamba ne: ‘Panuatendelela Nzambi, nuambe ne: Tatu, banemeke dîna diebe.’ (Luka 11:1, 2) Pavua Yezu wakula bua Yehowa, kavua umutela mu mianzu yende minene bu mudi: “Wa Bukole Buonso,” ‘Muyishi munene,’ “Mufuki,” “Wa kale wa Matuku a Bungi” anyi ‘Mukalenge wa kashidi’ to. (Gen. 49:25; Yesh. 30:20; 40:28; Dan. 7:9; 1 Tim. 1:17) Kadi uvua umubikila anu ne: “Tatu.” Bua tshinyi? Uvua mua kuikala musue bua tuikale tulomba Mutambe bunene udi ku mutu kua bionso ne didipuekesha anu bu mutu muana uyukila ne tatuende udiye munange.

Kadi bitu bikolele bamue bantu bua kumona Nzambi bu Tatuabu. Muanetu wa bakaji Atsuko * udi wamba ne: “Bivua binkolele munkatshi mua bidimu bia bungi panyima pa meme mumane kutambula bua kubikila Yehowa ne: Tatu pamvua nsambila.” Udi uleja tshivua tshimufikishe ku dienza nanku wamba ne: “Bivua binkolele bua kuenza nanku bualu tatu mundedi katu muanji kundeja mudiye mmunange to.”

Mu matuku a ku nshikidilu a malu makole aa, batatu ba bungi kabena kabidi ne ‘dinanga dia bana babu’ to. (2 Tim. 3:1, 3) Ke tshitu tshifikisha bantu ba bungi ku dikala ne meji a buena a Atsuko. Kadi tukoleshayi muoyo bualu kudi malu a bungi adi atusaka bua kumona Yehowa bu Tatu wetu udi mutunange.

Yehowa udi utupesha bintu ne dinanga

Bua tuetu kumona Yehowa bu Tatu wetu, tudi ne bua kumumanya bimpe. Yezu wakamba ne: ‘Kakuena muntu udi mumanye Muana, anu Tatu; kakuena muntu udi mumanye Tatu, anu Muana ne udi Muana musue kuleja Tatu.’ (Mat. 11:27) Mushindu mutambe buimpe wa kumanya mudi Yehowa muikale bu Tatu wetu ngua kuelela meji ku malu avua Yezu muambe bua Nzambi mulelela. Kadi ntshinyi tshivua Yezu muambe bua Tatuende?

Yezu wakitaba ne: Yehowa ke Mufuki wende bualu wakamba ne: ‘Ndi ne muoyo bualu bua Tatu.’ (Yone 6:57) Tuetu petu tudi ne muoyo bua Tatu. (Mus. 36:9; Bien. 17:28) Tshivua tshisake Yehowa bua kupesha bantu muoyo ntshinyi? Nndinanga. Nanku, tudi ne bua kunanga Tatu wetu wa mu diulu bualu mmutupeshe muoyo.

Mushindu munene udi Nzambi muleje mudiye munange bantu mpakafilaye mulambu wa Yezu bua kubapikula. Mulambu au udi wambuluisha bantu bena mibi bua kudia bulunda ne Yehowa ku butuangaji bua Muanende munanga. (Lomo 5:12; 1 Yone 4:9, 10) Bu mutu Tatu wetu wa mu diulu ukumbaja malu atuye ulaya, tuikalayi bajadike ne: bantu bonso badi bamunange ne bamutumikila nebapete “budishikaminyi bua butumbi bua bana ba Nzambi.”​—Lomo 8:21.

Tatu wetu wa mu diulu udi kabidi ‘utubandishila dîba’ dituku dionso. (Mat. 5:45) Katutu pamuapa tumona mushinga wa kusambila bua dîba dibande to. Kadi, tutu dijinga ne nsese yadi ne basue luya luayi. Tatu wetu udi kabidi mupeshanganyi wa bintu munene bualu mmumanye majinga etu kumpala kua tuetu kumuambilawu. Nanku, tukebayi dîba dia kumona mudi Tatu wetu wa mu diulu ulama bifukibua biende ne tuelelapu meji ne dianyisha dionso.​—Mat. 6:8, 26.

 Tatu wetu udi ‘utulama bimpe’

Nzambi wakajadikila bena Isalele ku butuangaji bua muprofete Yeshaya ne: ‘Mikuna mile idi mua kumuka, ne mikuna mipuekele idi mua kuzakajibua, kadi dinanga dianyi kadiena diumuka kuudi, ne tshipungidi tshianyi tshia ditalala katshiena tshiumushibua, mudi Yehowa udi ukulama bimpe wamba.’ (Yesh. 54:10, The Bible in Living English) Yezu wakajadika mudi Yehowa ‘ulama’ bantu bende bimpe mu disambila diakenzaye butuku bua muladilu wa lufu luende. Wakasambila bua bayidi bende wamba ne: ‘Badi pa buloba, meme ndi ndua kuudi. Tatu wanyi wa tshijila, ubalame mu dîna diebe.’ (Yone 17:11, 14) Yehowa udi utangila bayidi ba Yezu ne ubalama.

Nzambi udi utulama ku mateyi a Satana lelu ku diambuluisha dia malongesha a mu Bible adi ‘mupika wa lulamatu ne wa budimu’ utupesha pa dîba diawu. (Mat. 24:45, NW) Tuetu basue ‘kuvuala bintu bionso bia mvita bia Nzambi’ tudi ne bua kumvua bimpe malongesha adi akolesha aa. Tuangate tshilejilu tshia ‘ngabu wa ditabuja’ udi utuambuluisha bua ‘kuepela miketa yonso ya Satana idi ne kapia kasuikaku.’ (Ef. 6:11, 16) Ditabuja didi ditulama ku malu adi mua kunyanga ntendelelu wetu ne didi dileja mutudi bitabe ne: Tatu wetu udi ne bukole bua kutulama.

Tudi mua kumanya malu a bungi pa mushindu udi Tatu wetu wa mu diulu mutunange patudi tukonkonona muvua Muana wa Nzambi muenze malu pavuaye pa buloba. Tshilejilu, tuangate muyuki udi mu Mâko 10:13-16. Badi baleja muvua Yezu muambile bayidi bende ne: ‘Nuitabuje bua bana bakese kulua kundi.’ Pakalua bana abu, Yezu wakabambula pa mbidi ne kubabenesha. Bana abu bavua mua kuikala basanke bikole. Nunku, bu muvua Yezu muambe ne: “Wakuntangila meme wakutangila Tatu,” tudi bamanye ne: Nzambi mmusue bua tuye kudiye.​—Yone 14:9.

Dinanga ndifume kudi Yehowa Nzambi. Udi upeshangana bintu mu mushindu wa dikema ne ulama bantu bende bimpe. Mmusue bua tusemene kudiye. (Yak. 4:8) Nunku, kakuena tatu udi mutambe Yehowa to.

Tudi tupeta masanka a bungi

Patudi tueyemena Yehowa Tatu wetu wa mu diulu, tudi tupeta masanka a bungi. (Nsu. 3:5, 6) Yezu Kristo wakapeta masanka a bungi bualu uvua weyemena Tatuende ne muoyo mujima. Wakambila bayidi bende ne: “Tshiena nkayanyi, meme ndi ne Tatu wakuntuma.” (Yone 8:16) Uvua mujadike ne: Yehowa uvua umuambuluisha misangu yonso. Tshilejilu, dîba divuaye mutambule Tatuende wakamujadikila ne dinanga dionso ne: ‘Eu udi Muananyi munanga, yeye udi unsankisha bimpe.’ (Mat. 3:15-17) Pakavuaye pa kukula muoyo wakela lubila wamba ne: “Tatu, ndi nteka muoyo wanyi mu bianza biebe.” (Luka 23:46) Yezu uvua mueyemene Tatuende bikole menemene.

Ke tshitudi petu mua kuenza. Yehowa yeye muikale netu, katuena ne tshitudi mua kutshina to. (Mus. 118:6) Atsuko utudi batele kulu eku uvua ne tshibidilu tshia kudieyemena pavua ntatu imukuata. Kadi wakatuadija kulonga nsombelu wa Yezu pavuaye pa buloba, wimanyina nangananga pa malanda makole avuaye mudie ne Tatuende wa mu diulu. Atsuko wakapeta tshinyi? Udi wamba ne: “Ngakamanya tshidi kuikala ne Tatu ne kumueyemena tshiumvuija.” Wakamba kabidi ne: “Ngakapeta ditalala dia bushuwa ne disanka. Bulelela, kakuena bualu butudi mua kutshina to.”

Mmasanka kayi makuabu atudi tupeta patudi tumona Yehowa bu Tatu wetu? Bana batu banange baledi babu ne basue kubasankisha. Muana wa Nzambi uvua ‘wenza malu avua asankisha Tatuende matuku onso’ bualu uvua mumunange. (Yone 8:29) Bia muomumue, dinanga ditudi nadi bua Tatu wetu wa mu diulu didi mua kutusaka bua kuenza malu ne meji ne ‘kumusakidila’ anyi kumutumbisha.​—Mat. 11:25; Yone 5:19.

 Tatu wetu ‘udi utukuata ku tshianza tshia balume’

Tatu wetu wa mu diulu mmutupe kabidi nyuma muimpe bu “musambi” wetu. Yezu wakamba bua nyuma eu ne: “neanulombole mu malu malelela onso.” (Yone 14:15-17; 16:12, 13) Nyuma muimpe udi mua kutuambuluisha bua kumanya Tatu wetu bimpe. Udi mua kutuambuluisha kabidi bua kushimbula ‘ngumbu ya mvita’ bu mudi ngenyi mifuikakaja, meji mabi anyi ngumvuilu mubi wa malu ne ‘kuvuija meji onso mu bupika bua kutumikilawu Kristo.’ (2 Kol. 10:4, 5) Nunku tulombayi bua Yehowa atupeshe “musambi” uvua Yezu mutulaye bashindike ne: ‘Tatu wetu wa mu diulu neapeshe badi bamulomba nyuma muimpe.’ (Luka 11:13) Mbimpe tusambile kabidi bua nyuma muimpe atuambuluishe bua kukolesha malanda etu ne Yehowa.

Padi muana wenda ne tatuende mumukuate ku tshianza, katu umvua buôwa to. Wewe umona Yehowa bu Tatuebe, mêyi aa adi mua kukukolesha ku muoyo: ‘Meme, Yehowa Nzambi webe, nenkukuate ku tshianza tshiebe tshia balume, nkuambila ne: Kutshinyi, nenkukuatshishe.’ (Yesh. 41:13) Udi mua kupeta diakalenga dinene dia “kuenda” ne Nzambi bua kashidi. (Mika 6:8) Tungunuka ne kuenza disua dia Yehowa ne umuangate bu Tatuebe bua umone mudiye mukunange, mudiye ukulama bua wikale ne disanka.

[Mêyi adi kuinshi]