Nuende mu nyuma bua nukumbaje tshinuvua badilambuile

‘Endayi mu nyuma muimpe, nunku kanuena nulonda lukuka lua mubidi.’​—GAL. 5:16.

1. Dituku dia Pentekoste, ntambu kayi ivua bantu batambule?

BAYIDI ba Yezu bakakula mu miakulu dituku dia Pentekoste wa mu 33 pavuabu batambule mu nyuma muimpe. Bakaleja muvuabu ne tshipedi tshia kudi nyuma tshia kuenza bishima. (1 Kol. 12:4-10) Tshipedi atshi ne muyuki wakenza Petelo bivua bipatule bipeta kayi? ‘Mitshima ya ba bungi yakanyingalala.’ Pakabambila Petelo tshia kuenza, bakanyingalala e kukudimuna mitshima yabu, kutambulabu. Mbafunde bua bualu abu ne: ‘Bakitabuja dîyi diende bakabatijibua. Dituku adi bantu bu binunu bisatu bakadikunguija nabu.’ (Bien. 2:22, 36-41) Anu mukavua Yezu mulongeshe, bavua ne bua kutambula mu mâyi mu dîna dia Tatu, dia Muana, ne dia nyuma muimpe.​—Mat. 28:19.

2, 3. (a) Leja dishilangana didi pankatshi pa kutambula mu nyuma muimpe ne mu dîna dia nyuma muimpe. (b) Bua tshinyi bonso badi basue kulua bena Kristo balelela lelu badi ne bua kutambula mu mâyi?

 ² Kadi kudiku dishilangana pankatshi pa kutambula mu nyuma muimpe ne kutambula mu dîna dia nyuma muimpe anyi? Eyowa. Bantu badi batambula mu nyuma muimpe badi baledibua tshiakabidi bu bana ba Nzambi ba mu nyuma. (Yone 3:3) Mbedibue manyi bua kuikalabu bakalenge ne bakuidi badi bindondi bia Kristo mu Bukalenge bua Nzambi bua mu diulu, ne badi benza mubidi wa Kristo wa mu nyuma. (1 Kol. 12:13; Gal. 3:27; Buak. 20:6) Nanku, ntambu eyi (ya kutambula mu nyuma muimpe) nyivua Yehowa utambuisha bantu bavuaye musungule dituku dia Pentekoste ne matuku avua alua pashishe bua kuluabu bakokeshi pamue ne Kristo wende. (Lomo 8:15-17) Kadi netuambe bishi bua ntambu ya mu mâyi ya mu dîna dia nyuma muimpe itubu batamba kutambuishangana mu mpuilu ne mpungilu ya Bantemu ba Yehowa matuku etu aa?

³ Bena Krito balelela badi bangata batismo wa mu mâyi bua kuleja mudibu badilambule kudi Yehowa Nzambi ne muoyo mujima. Bidi nanku bua bantu badi ne ditekemena dia kuya mu diulu. Batismo wa mu mayi udi kabidi bualu bua mushinga kudi miliyo ya balume ne bakaji ba matuku etu aa badi ne ditekemena dia kuikala ne muoyo kashidi pa buloba. Nansha muntu yeye ne ditekemena dia mushindu kayi, kutambula kua mu mâyi mu dîna dia Tatu ne dia Muana ne dia nyuma muimpe mbualu bua mushinga bua kushisha kuanyishibua kudi Nzambi. Muena Kristo yonso udi mutambule mushindu eu udi ne bua kutungunuka ne ‘kuenda mu nyuma muimpe.’ (Bala Galatia 5:16.) Udiku wenda mu nyuma bua kuleja muudi ne nsombelu udi umvuangana ne kudilambula kuebe kudi Yehowa anyi?

Tshidi ‘kuenda mu nyuma’ kumvuija

4. ‘Kuenda mu nyuma’ kudi kumvuija tshinyi menemene?

⁴ ‘Kuenda mu nyuma’ kudi kumvuija kuitaba bua nyuma muimpe kukuataye mudimu munda muebe ne kuikalaye ukuenzeja malu. Mu mêyi makuabu, nkuikala mulombola kudi nyuma muimpe mu malu ebe onso a ku dituku dionso. Galatia nshapita 5 udi uleja dishilangana didi pankatshi pa muntu udi nyuma ulombola ne muntu udi mubidi ulombola.​—Bala Galatia 5:17, 18.

5. Kuikala mulombola kudi nyuma kudi kumvuija kudikanda ku malu kayi?

⁵ Nyuma yeye ukulombola, newikale udikanda bua kuenza malu a mubidi. Mu malu a mubidi aa mudi ‘tshiendenda, meji mabi, masandi, ditendelela dia mpingu, kupaka kua manga, lukuna, kutandangana, mukawu, tshiji, kutapuluka, mpata, diyoyo, mutshiawudi, bukuatshiki bua maluvu, manaya a bundu.’ (Gal. 5:19-21) Mu mêyi makuabu, udi ‘ufuisha bienzedi bia mubidi kudi nyuma.’ (Lomo 8:5, 13) Kuenza nunku nekukuambuluishe bua kuteka lungenyi luebe ku malu a nyuma ne bua kuitaba buludiki buende pamutu pa kulekela majinga a mubidi akulombola.

6. Fila tshilejilu tshidi tshileja malu adi akengedibua bua kuikala ne dimuma dia nyuma muimpe.

⁶ Padi nyuma wenza nebe mudimu, udi ulua muena ngikadilu milenga, upeta ‘dimuma dia nyuma.’ (Gal. 5:22, 23) Kadi bua kuikala nayi, bidi bikengela wewe kudifila ne muoyo mujima. Tuangate tshilejilu tshia tshidime. Kuoku kakuyi miunya ne mvula, kena mua kupatula tshintu tshia nsongo mu budimi to. Nyuma muimpe udi anu bu munya. Tudi nende dijinga bua kukuama dimuma dia nyuma. Kadi tshidima udi mua kupola tshinyi pikalaye kayi mutshikuatshile  mudimu mukole? (Nsu. 10:4) Bia muomumue, mushindu uudi udima budimi bua mu muoyo webe ngudi mua kukukuamisha dimuma dia nyuma muimpe dia nsongo ku bungi buadi anyi dimuma dikese didi kadiyi ne nsongo. Nanku anji dikonkabi ne: ‘Ntuku ngitabila nyuma muimpe bua kunkuamishaye dimuma diende pa kuitaba bulombodi buende anyi?’

7. Bua tshinyi kulonga ne kuelangana meji kudi ne mushinga wa bungi patudi basue kukuama dimuma dia nyuma muimpe?

⁷ Bua bia pa madimi kukuatshika bimpe, bitu bikengela kuikalabi bipeta mâyi. Nanku bua wewe kukuama dimuma dia nyuma, udi dijinga ne mâyi a bulelela budi mu Bible bututu tupetela kabidi mu bisangilu bia bena Kristo lelu. (Yesh. 55:1) Wewe muine si ukadi pamuapa muambilaku bantu ba bungi ne: Mukanda wa Nzambi mmufundisha ku nyuma muimpe. (2 Tim. 3:16) Kabidi, mupika wa lulamatu ne wa budimu udi utupetesha lumvu lutudi nalu dijinga lua bulelela bua mu Bible budi bu mâyi a kazeze. (Mat. 24:45-47) Tshia tuetu kuenza ntshiumvuike bimpe. Bua nyuma muimpe kutulombola mu nsombelu wetu, tudi ne bua kubala Dîyi dia Nzambi ne kudielela meji. Wewe wenza nanku, udi widikija tshilejilu tshilenga tshia baprofete ba kale bavua ‘bakeba ne bakeja bikole’ malu avuabu nawu tshikondo atshi. Bualu budi mua kutuelesha meji mbua muvua too ne banjelu basue kutangilatangila mu malongesha malelela adi atangila Kankanunuina kalaya ne tshisumbu tshia bena Kristo bela manyi.​—Bala 1 Petelo 1:10-12.

Mudi nyuma mua kukulombola

8. Bua tshinyi mbimpe bua wewe kulomba Yehowa nyuma wende?

⁸ Bualu budi muaba eu kabuena anu bua kulonga Dîyi dia Nzambi patupu ne kudielela meji to. Udi ne bua kuikala ulomba Yehowa diambuluisha ne bulombodi. Yeye udi ne bukole bua ‘kuenza malu matambe atudi katuyi bamanye mua kumulomba ne mua kuelangena meji.’ (Ef. 3:20; Luka 11:13) Kadi newandamune bishi bobu bakukonke ne: “Bua tshinyi ndi ne bua kutungunuka ne kulomba Nzambi pende yeye mudianjile kumanya ‘bindi nabi dijinga diambedi tshiyi muanji kumulomba’?” (Mat. 6:8) Tshia kumanya ntshia ne: patudi tulomba Yehowa nyuma muimpe nanku, tudi tuleja mutudi tumueyemena. Tshilejilu, muntu yeye mulue kukulomba dikuatshisha, se newenze tshionso tshiudi mua kuenza bua kumuambuluisha, bionso abi anu bualu mmukulombe dikuatshisha, mukumone muntu wa kueyemena. (Tangila Nsumuinu 3:27.) Ke mudibi kabidi bua Yehowa, udi umvua disanka paudi umulomba nyuma wende, nunku udi ukupeshaye.​—Nsu. 15:8.

9. Mmushindu kayi udi kubuela kua mu bisangilu mua kukuambuluisha bua kulombodibua kudi nyuma wa Nzambi?

⁹ Mushindu mukuabu mulenga udi nyuma wa Nzambi mua kufika ku dikulombola ngua paudi ubuela mu bisangilu, mu mpuilu, ne mu mpungilu. Kudienzeja bua kuikala mu bisangilu bionso ne kuteleja bimpe padibu balongesha kudi ne mushinga be. Kuenza nanku nekukuambuluishe bua kumvua “malu male a Nzambi.” (1 Kol. 2:10) Kuikala kabidi kuandamuna mu bisangilu kudi kuambuluisha. Tetabi kuvuluka bisangilu bionso biuvua mubuele mu mbingu 4 mishale. Mmisangu bungi kayi iuvua muele tshianza mulu, muandamune bua kuleja ditabuja diebe? Udiku mumonaku paudi ne bua kudilengejila mu bualu ebu anyi? Wewe mumone nanku, wangate dipangadika dia tshia kuenza mu mbingu idi kumpala. Yehowa neamone muoyo webe wa kuandamuna mu bisangilu, nunku neakupeshe nyuma wende muimpe wakuambuluisha bua bisangilu biudi mubuele kukukuatshishabi kabidi bimpe menemene.

10. Kuenda mu nyuma kudi kumvuija kabidi kuela bakuabu dîyi kayi?

 ¹⁰ Kuenda mu nyuma kudi kumvuija kabidi kutumikila dîyi didibu batuela mu Buakabuluibua 22:17 dia ne: ‘Nyuma ne mukaji musela badi bamba ne: Lua. Udi umvua ambe biende ne: Lua. Ne udi ne nyota alue biende; udi musue angate mâyi a muoyo tshianana.’ Nyuma udi wakuila mukana mua mukaji musela anyi kasumbu ka bena Kristo bela manyi wela dîyi edi ubikila bantu ku mâyi a muoyo. Biwikala muitabe lubila elu lua ne: “Lua,” udiku musue kubikalangana pebe ne: “Lua” anyi? Bituikala petu munkatshi mua bantu badi benza mudimu wa disungilangana eu, ndiakalenga dinene be!

11, 12. Nku tshinyi kudi nyuma muimpe wambuluisha mu mudimu wa diyisha?

¹¹ Mudimu wa mushinga eu udi wenzeka lelu ku bulombodi bua nyuma muimpe. Tutu tubala mu Bible muvua nyuma muimpe muambuluishe bua kutuadija mudimu wa bumisionere mu teritware mikuabu mu bidimu lukama bia kumpala. ‘Nyuma muimpe wakakanda’ mupostolo Paulo ne bena diende ‘bua kuamba dîyi dia Nzambi mu Asia’; kakabitabila bua kudiamba nansha mu Bitunia to. Tshidibi katuena bamanye muvua nyuma mubapangishe bua kuya miaba ayi to, tshikole nyuma wakalombola Paulo bua kuyisha mu teritware munene wa ku Mputu. Paulo kupeta tshikena kumona tshia muntu wa ku Makedonia uvua ukeba dikuatshisha.​—Bien. 16:6-10.

¹² Lelu eu, nyuma muimpe wa Yehowa udi utulombola kabidi mu mudimu wa kuyisha pa buloba bujima muomumue. Kakuena tshikena kumona tshidi tshituleja tshia kuenza to, kadi Yehowa udi ulombola bela manyi ne nyuma wende. Mpindieu nyuma pende udi usaka bana betu bonso bua kuenza tshionso tshidibu mua kuenza bua kuyisha ne kulongesha. Tudi batuishibue ne: ukadi pebe wenza mudimu wa mushinga eu. Kuenaku mua kuvudija disanka diebe dia kuenza mudimu mulengele eu anyi?

13. Mmushindu kayi uudi mua kulonda buludiki bua nyuma muimpe? Fila tshilejilu.

¹³ Wewe pebe udi mua kukokela bulombodi bua nyuma muimpe paudi utumikila malu adibu balongesha bantu ba Nzambi. Tuangate tshilejilu tshia nsongakaji mukuabu wa mu Japon, diende Mihoko. Bu muvuaye mpanda-njila mupiamupia, kavua udimona mukumbane bua kupinganyina bavuabu bayishe to; uvua udimona ne: kavua mumanye mua kuambila bantu malu avua mua kukoka ntema yabu to. Kadi anu tshikondo atshi ntshiakapatulabu ngenyi milenga mu Mudimu wetu wa Bukalenge ya mua kuakula ne bantu mu tshikoso patudi tubapinganyina. Matuku makese pashishe, kupatukaku broshire wa Une vie pleinement satisfaisante: Comment? Uvua broshire wa mushinga mukole bua mudimu wa diyisha wa mu Japon. Mihoko wakalonda mibelu yonso ivuabu bafile ya mua kuyisha ne broshire au, nangananga ngenyi ya mua kuakula mu tshikoso patudi tupinganyina bantu. Matuku makese kutuadijaye kulongesha bantu bavua mua kubenga kumpala bua kulonga Bible. Udi wamba ne: “Ngakapeta bantu bapite bungi bamvua ndongesha Bible, nansha 12 musangu umue; meme kubanga kulomba ne bakuabu bua kuikalabu banji bindila!” Bushuwa, paudi wenda mu nyuma, utumikila mibelu yonso idibu bapesha bantu ba Yehowa, udi upeta masanka mapite bungi.

Eyemena nyuma wa Nzambi

14, 15. (a) Bantu bena mibi badi mua kufika ku dikumbaja tshivuabu badilambuile mushindu kayi? (b) Mmushindu kayi uudi mua kupeta balunda batambe buimpe?

¹⁴ Bu muudi muena mudimu wa Nzambi musungula, udi ne mudimu wa wewe kuenza.  (Lomo 10:14) Pamuapa udi mua kudimona kuyi mukumbane bua kuwenza to. Kadi anu mudibi bua bena Kristo bela manyi, Nzambi ke udi ukuambuluisha bua wewe kukumbana. (Bala 2 Kolinto 3:5.) Bua wewe kukumbaja tshiuvua mudilambuile, mbimpe wewe kueyemena nyuma wa Nzambi ne kudifila ne muebe muonso.

¹⁵ Tshidibi, bu mutudi bantu bena mibi, kabiena anu bipepele bua tuetu kukumbaja tshituvua badilambuile kudi Yehowa udi Nzambi mupuangane nansha. Lutatu lumue ndua ne: bantu bauvua usomba nabu kumpala badi mua kukumvuila bibi bua nsombelu mupiamupia uudi nende mpindieu e kubanga ‘kukupenda.’ (1 Pet. 4:4) Kadi kupu muoyo ne: mpindieu ukadi mudie bulunda bukuabu ne Yezu ne Yehowa udi muntu wa mushinga mukole nansha. (Bala Yakobo 2:21-23.) Mbimpe kabidi bua wewe kumanyangana ne bana betu banudi nabu mu tshisumbu tshienu, badi tshitupa tshia ‘bana benu ba mu Kristo’ badi pa buloba bujima. (1 Pet. 2:17; Nsu. 17:17) Yehowa neakuambuluishe ne nyuma wende bua wewe upete balunda bimpe badi mua kukusaka ku dienza malu malenga.

16. Bua tshinyi udi mua ‘kusanka mu matekete’ anu bu Paulo?

¹⁶ Nansha wewe ne balunda badi mua kukuambuluisha mu tshisumbu, bidi anu pamuapa mua kukukolela bua kutshimuna ntatu ya ku dituku dionso. Malu audi uluangana nawu adi imue misangu mua kukuelesha meji a ne: makenga mmakumuenene anu wewe. Dîba adi ke diudi nangananga ne bua kunyemena kudi Yehowa bua kumulomba nyuma wende. Mupostolo Paulo wakafunda ne: ‘Pandi mutekete, mpandi ne bukole.’ (Bala 2 Kolinto 4:7-10; 12:10.) Paulo uvua mumanye ne: nyuma wa Nzambi udi mua kukolesha muntu miaba idiye ne butekete nansha buobu bua mushindu kayi. Nanku, bukole bua Nzambi budiye wenza nabu malu budi mua kukukolesha paudi udiumvua mutekete ne paudi dijinga ne diambuluisha. Paulo wakafunda muvuaye muikale “ne disanka mu matekete.” Pavuaye mu matekete ke pavuaye umvua bukole bua nyuma muimpe bumulombola. Wewe pebe se udi mua kumvua bia muomumue!​—Lomo 15:13.

17. Mmushindu kayi udi nyuma muimpe mua kukuambuluisha bua kufika kuudi uya?

¹⁷ Tudi dijinga ne nyuma wa Nzambi bua kuikala ne nsombelu wa bantu badi badilambule kudiye. Tuteke ne: udi kapitene ka mazuwa a mâyi. Dijinga diebe ndia kuenzela Yehowa mudimu bua kashidi. Nyuma muimpe udi anu bu lupepele luudi ukeba bua luendeshe mazuwa ebe bua kuafikisha luseke luudi musue kuya bimpe. Kuena musue bua nyuma wa bena panu badi Satana ulombola akukokakaje eku ne eku to. (1 Kol. 2:12) Udi ne bua kukeba tshidi bu lupepele luimpe e kululama bua lukufikishe kuudi uya bilenga. Lupepele alu nnyuma muimpe. Nyuma muimpe neakulombole mu njila muakane ku diambuluisha dia Dîyi dia Nzambi ne bulongolodi budi Nzambi uludika ne nyuma wende.

18. Mpindieu udi mudisuike bua kuenza tshinyi? Kadi mbua tshinyi?

¹⁸ Biwikala ulonga Bible ne Bantemu ba Yehowa, ubuela mu bisangilu biabu, kadi kuyi muanji kuenza bualu bua mushinga bua kudilambula kudi Nzambi ne kutambula, diebeja ne: ‘Ndi ngelakana bua kudilambula ne kutambula bua tshinyi?’ Wewe mujingulule mudimu udi nawu nyuma muimpe mu bualu bua dikumbana dia disua dia Yehowa lelu eu ne mumvue mudiye wenza mudimu, wenze malu audi mulonge mumone ne: mmakane. Yehowa neakubeneshe bikole. Neakupeshe nyuma wende muimpe wa bungi. Biwikala mutambule kukadi bidimu ndambu anyi makumi, ukadi anu mudimuene bushuwa diambuluisha didi nadi nyuma muimpe. Ukadi mudimuene ne mumvue mudi Nzambi mua kukukolesha ne nyuma wende. Udi anu mua kutungunuka ne kukuenzela nanku, nansha bua kashidi too ne tshiendelele. Nanku, disuika bua kutungunuka ne kuenda anu mu nyuma muimpe.

Udi muvuluke anyi?

• ‘Kuenda mu nyuma’ kudi kumvuija tshinyi?

• Ntshinyi tshidi mua kukuambuluisha bua kutungunuka ne ‘kuenda mu nyuma’?

• Tshiakuambuluisha bua kukumbaja tshiuvua mudilambuile ntshinyi?

[Nkonko ya dilonga]

[Tshimfuanyi mu dibeji 15]

Bua kudima budimi bua mu muoyo webe, anu wewe mudienzeje

[Bimfuanyi mu mabeji 16, 17]

Nyuma wa Nzambi udi ukulombola anyi?