Bansonga wetu, koleshayi dijinga dienu dia kuenzela Yehowa mudimu

“Uvuluke Mufuki webe mu matuku a bunsongalume buebe.”​—MUAM. 12:1.

1. Ntshinyi tshivuabu balomba bana mu Isalele?

KUKADI bidimu bitue ku 3 500, Mose muprofete wa Yehowa wakambila bakuidi ne bakulu ba mu Isalele ne: ‘Nusangishe bantu bonso, ne balume ne bakaji ne bana bakese bua buonso buabu bumvue, bayile lungenyi, batshine Yehowa Nzambi wenu, batumikile mêyi onso a mikenji eyi.’ (Dut. 31:12) Tudi tumona ne: bavua bambile balume, bakaji ne bana bua kudisangisha bua kutendelela Nzambi. Bana bavua pabu munkatshi mua bantu bavuabu bambile bua kumvua, kuyila ne kutumikila mikenji ya Yehowa.

2. Mmushindu kayi uvua Yehowa muleje muvuaye utabalela bansonga mu tshisumbu tshia bena Kristo ba kumpala?

² Mu tshikondo tshia bena Kristo ba kumpala, Yehowa wakatungunuka ne kuleja muvuaye utabalela bansonga bavua bamutendelela. Tshilejilu, wakasaka mupostolo Paulo bua kufunda mu imue ya ku mikanda ivuaye mutumine bisumbu malu avua atangila anu bansonga. (Bala Efeso 6:1; Kolosai 3:20.) Bansonga bena Kristo bavua batumikila mibelu eyi bavua baya kumpala, bananga Tatu wabu wa mu diulu ne bapeta mabenesha a bungi.

3. Mmunyi mudi bansonga baleja mudibu basue kuenzela Nzambi mudimu lelu?

³ Yehowa udiku wambila bansonga lelu bua kudisangisha bua kumutendelela anyi? Eyowa. Ke bualu kayi batendeledi bende bonso badi ne disanka dia kumona bansonga badi bamutendelela pa buloba bujima balonda mubelu wa Paulo wa ne: ‘Tudielelangane meji muntu ne muntu bua kuenzejangana ku dinanga ne ku dienza dia bienzedi bimpe, katuyi tulekela disangisha dietu pamue bu mudi tshilele tshia bakuabu, kadi tukoleshangana mitshima, tutamba kuenza nunku bualu bua nudi numona dituku dia Mukalenge disemena pabuipi.’ (Eb. 10:24, 25) Pashishe bana ba bungi badi bayisha ne baledi babu lumu luimpe lua Bukalenge bua Nzambi. (Mat. 24:14) Tshidimu tshionso etshi, bansonga binunu ne binunu badi batambula bua kuleja mudibu banange Yehowa ne bapeta masanka a kuikala bayidi ba Kristo.​—Mat. 16:24; Mâko 10:29, 30.

Itaba dilomba mpindieu

4. Bansonga badi ne bua kuikala ne bidimu bungi kayi bua kuitaba dilomba dia kuenzela Nzambi mudimu?

⁴ Muambi 12:1 udi wamba ne: “Uvuluke Mufuki webe mu matuku a bunsongalume buebe.” Nuenu bansonga, nudi ne bua kuikala ne bidimu bungi kayi bua kuitaba dilomba dia kutendelela Yehowa ne kumuenzela mudimu edi? Bible kena uleja bungi bua bidimu busunguluke to. Nunku, kubengi bua kuteleja Yehowa ne kumuenzela mudimu wela meji ne: utshidi muana to. Nansha wewe ne bidimu bungi kayi, badi bakulomba bua kuitaba dilomba edi kakuyi dijingakana.

5. Mmushindu kayi udi baledi bambuluisha bana babu bua kuya kumpala mu mudimu wa Nzambi?

⁵ Ba bungi ba kunudi badi ne baledi badi babambuluisha bua kuya kumpala mu mudimu wa Nzambi. Biobi bikale nanku buebe wewe, udi anu bu Timote udibu batele mu Bible. Patshivuaye muana, mamuende Eunike ne kakuende Loi bakamulongesha Mukanda wa Nzambi. (2 Tim. 3:14, 15) Pamuapa ke tshidi  baledi bebe benza padibu bakulongesha Bible, basambila nebe, baya nebe mu bisangilu bia mu tshisumbu, mu mpuilu ne mpungilu ne baya nebe mu buambi. Mu kuamba kuimpe, Yehowa mmupeshe baledi bebe bujitu bunene bua kukulongesha njila yende. Utuku ne dianyisha bua mudibu bakunange ne baleja mudibu bakutabalela anyi?​—Nsu. 23:22.

6. (a) Bilondeshile Musambu wa 110:3, nntendelelu wa mushindu kayi udi usankisha Yehowa? (b) Netukonkonone tshinyi mpindieu?

⁶ Yehowa mmusue bua ‘nujingulule mudi disua diende dimpe, dimusankisha ne diakane tshishiki’ panudi nuenda nukola anu bu muvua Timote muenze. (Lomo 12:2) Wewe muenze nunku, newikale ubuela mu bisangilu ne wandamunamu, wenza midimu ya mu tshisumbu ne uyisha kabiyi bua kusangisha baledi bebe, kadi bualu udi musue kuenza disua dia Nzambi. Yehowa neasanke wewe udifila mu mudimu wende ne disanka. (Mus. 110:3) Kadi ntshinyi tshiudi mua kuenza bua kuleja ne: udi musue kukolesha dijinga diebe dia kuteleja Yehowa ne kutumikila mikenji yende? Netukonkonone mishindu minene isatu iudi mua kuenza nunku. Idi itangila didilongela, disambila ne bienzedi biebe. Tuyikonkononayi umue ku umue.

Manya Yehowa

7. Ntshilejilu kayi tshia kulonga Dîyi dia Nzambi tshidi Yezu mushiye? Ntshinyi tshivua tshimuambuluishe bua kuenza nanku?

⁷ Mushindu wa kumpala uudi mua kuleja ne: udi musue kukolesha dijinga diebe dia kuenzela Yehowa mudimu nkudibadila Bible dituku dionso. Paudi wenza nunku, udi ukumbaja dijinga diebe dia kumanya Nzambi ne kupeta dimanya dia Bible didi ne mushinga wa bungi. (Mat. 5:3) Yezu mmukushile tshilejilu mu bualu ebu. Dituku dikuabu pavuaye ne bidimu 12, baledi bende bakamusangana ku ntempelo ‘mushikame munkatshi mua bayishi, umvua mêyi abu, ubakonka malu.’ (Luka 2:44-46) Ukavua munange Dîyi dia Nzambi ne ujinga kudiumvua katshia anu ku buana buende. Ntshinyi tshivua tshimuambuluishe bua kuenza nunku? Kakuyi mpata, mamuende Mariya ne tatuende mudishi Yosefe bakamuambuluisha bikole. Bu muvuabu batendelela Nzambi, bavua balongeshe Yezu malu ende kutuadija anu patshivuaye muana.​—Mat. 1:18-20; Luka 2:41, 51.

8. (a) Ndîba kayi didi baledi ne bua kutuadija kulongesha bana babu bua kunanga Dîyi dia Nzambi? (b) Londa bualu budi buleja ne: kulongesha bana kutuadijila ku buana kudi ne mushinga.

⁸ Bia muomumue, baledi badi batendelela Nzambi lelu mbamanye mudibi ne mushinga bua kubueja mu mioyo ya bana babu dijinga dia kumanya malu a mu Bible anu patshidibu bapuekele. (Dut. 6:6-9) Ke tshiakenza muanetu Rubi diakamue pakalelaye muanende wa kumpala Joseph. Uvua umubadila dituku dionso malu adi mu mukanda wa Miyuki ya mu Mukanda wa Nzambi. Pavuaye wenda ukola, wakamuambuluisha bua kukuata mvese ya bungi mu mutu. Dilongesha edi diakambuluishaku Joseph anyi? Eyowa, bualu pakatuadijaye kuakula, uvua ulonda miyuki ya bungi ya mu Bible mu mêyi ende nkayende. Pakakumbajaye bidimu bitanu, wakenza mudimu wende wa kumpala mu Kalasa ka Mudimu wa Nzambi.

9. Bua tshinyi kubala Bible ne kuela meji pa malu audi ubala kudi ne mushinga?

⁹ Bua wewe kutungunuka ne kuya kumpala, udi ne bua kuikala ne tshibidilu tshia kudibadila Bible dituku dionso ne kutshilama too ne pawakola. (Mus. 71:17) Bua tshinyi kubala Bible nekukuambuluishe bua kuya kumpala? Yezu wakambila Tatuende mu disambila dituku dikuabu ne: ‘Eu udi muoyo wa tshiendelele, bua bobu bakumanye wewe Nzambi umuepele mulelela.’ (Yone 17:3) Nunku, paudi wenda umanya Yehowa bikole, neumumone bu muntu wetu wa bushuwa eu ne neumunange bikole. (Eb. 11:27) Ke bualu kayi, dîba dionso diudi ubala tshitupa kampanda tshia mu Bible, keba mushindu wa kumanya malu makuabu adi atangila Yehowa. Diebeja ne: ‘Tshitupa tshindi mubale etshi tshidi tshindongesha tshinyi bua Yehowa? Mmunyi muditshi tshileja mudi Nzambi munnange ne  untabalela?’ Paudi wangata dîba dia kuela meji pa nkonko eyi, nebikuambuluishe bua kumanya mutu Yehowa wela meji ne umona malu ne tshidiye ukulomba. (Bala Nsumuinu 2:1-5.) Anu bu Timote, ‘neweyemene’ malu audi ulonga mu Bible ne neumvue muoyo ukusaka bua kutendelela Yehowa ne disanka.​—2 Tim. 3:14.

Mudi disambila dikolesha dinanga diebe bua Yehowa

10, 11. Mmushindu kayi udi masambila akuambuluisha bua kukolesha dijinga diebe dia kuenzela Nzambi mudimu?

¹⁰ Mushindu muibidi uudi mua kukolesha dijinga diebe dia kuenzela Yehowa mudimu ne muoyo umue nkumusambila. Mu Musambu wa 65:2 badi bamba ne: ‘Wewe udi umvua milombu, bukua bantu bonso nebufike kuudi.’ Nansha patshivua Isalele tshisamba tshisungula tshia Nzambi, benyi bavua balua ku ntempelo wa Yehowa bavua mua kumusambila kakuyi bualu. (1 Bak. 8:41, 42) Nzambi katu ne kansungasunga to. Bantu badi batumikila mikenji yende mbashindike ne: neateleje masambila abu. (Nsu. 15:8) Kakuyi mpata, nuenu bansonga nudi penu munkatshi mua “bukua bantu bonso.”

¹¹ Udi mumanye ne: bua bantu kushemakajabu bulunda buabu, badi ne bua kuikala bayukila. Pamuapa utu pebe musue kuambila mulunda webe malu adi akutonda, muudi udiumvua ne muudi umona malu. Bia muomumue, paudi usambila ne muoyo umue, udi uyukila ne Mufuki webe munene. (Filip. 4:6, 7) Kuatshila Yehowa malu ebe anu muudi mua kuakuatshila muledi anyi mulunda udi mukunange. Mu kuamba kuimpe, kudi dipetangana dikole pankatshi pa mushindu uudi usambila ne tshiudi umvua bua Yehowa. Neumone ne: padi bulunda buebe ne Yehowa bukola, masambila ebe nealengele.

12. (a) Bua tshinyi disambila dimpe kadiena diumvuija anu kuamba mêyi mimpe patupu? (b) Ntshinyi tshiakuambuluisha bua kufika ku dimona ne: Yehowa udi pabuipi nebe?

¹² Umanye ne: disambila dimpe kadiena diumvuija anu kuamba mêyi mimpe patupu to. Kadi didi ne bua kuleja muudi udiumvua menemene. Paudi usambila, leja muudi munange Yehowa, muudi umunemeka ne muudi umueyemena ne muoyo webe mujima. Paudi ujingulula mushindu udiye wandamuna masambila ebe, neufike ku dimona ne: ‘Yehowa udi pabuipi ne bonso badi bamubikila.’ (Mus. 145:18) Eyowa, Yehowa neikale pabuipi nebe, neakuambuluishe bua kutantamena Diabolo ne bua kuangata mapangadika mimpe mu nsombelu webe.​—Bala Yakobo 4:7, 8.

13. (a) Mmushindu kayi uvua malanda mimpe ne Nzambi mambuluishe muanetu mukuabu wa bakaji? (b) Mmunyi mudi bulunda ne Nzambi bukuambuluishe bua kubenga kuenza malu adibu bakusaka bua kuenza?

¹³ Tangila mushindu uvua kuikala mu malanda mimpe ne Yehowa kukoleshe muanetu Cherie. Pavuaye mu tulasa tua bikadilu, bakamupesha bintu bimpe bia bungi bualu uvua ulonga bimpe ne mumanye manaya bikole. Pakajikijaye, bakamupesha mukanda uvua mua kumuambuluisha bua kulonga tulasa tua iniversite tshianana. Cherie udi wamba ne: “Divua diteta dikole bualu balongeshi  ba manaya ne balongi nanyi bavua bangela mutoyi bua meme kuitaba bua kuya ku iniversite.” Kadi wakamona ne: kutungunuka ne tulasa kuvua ne bua kumulomba bua kupitshisha mêba a bungi mu didilongela pambelu, dilongolola malu a manaya ne kuvua mua kumushila anu mêba makese a kuenzela Yehowa mudimu. Wakenza tshinyi? Udi wamba ne: “Meme mumane kusambila Yehowa, ngakabenga bua kuya ku iniversite ne meme kulua mpanda-njila wa pa tshibidilu.” Ukadi muenze bidimu bitanu mu mudimu wa bumpanda-njila. Udi wamba ne: “Tshiena nyingalala nansha kakese to. Ndi ne disanka bualu ndi mumanye ne: mvua muangate dipangadika didi disankisha Yehowa. Bushuwa, wewe muteke malu a Bukalenge bua Nzambi kumpala, neupete bintu bikuabu bionso.”​—Mat. 6:33.

Bienzedi bimpe bidi bileja muudi ne “mutshima mutoke”

14. Bua tshinyi bikadilu bimpe bidi ne mushinga ku mêsu kua Yehowa?

¹⁴ Mushindu muisatu uudi mua kuleja ne: udi wenzela Yehowa mudimu ne disanka mpaudi ne bienzedi bimpe. Yehowa udi ubenesha bansonga badi ne bikadilu bimpe. (Bala Musambu wa 24:3-5.) Tshilejilu, patshivua Samuele muana, wakabenga kulonda bikadilu bibi bia bana ba muakuidi munene Eli. Nzambi ne bantu bakuabu bakamona bikadilu bimpe bia Samuele bualu Bible udi wamba ne: ‘Muana eu Samuele wakadiunda, wakalepa mu diakalengele kudi Yehowa ne kudi bantu kabidi.’​—1 Sam. 2:26.

15. Tela amue malu adi akusaka bua kuikala ne bikadilu bimpe.

¹⁵ Tudi mu tshikondo tshidi bantu ba bungi ne ngikadilu ya buena ivua Paulo muambe bu mudi: badinangi, bena lutambishi, kabayi batumikila baledi babu, kabayi ne kusakidila, bashipi ba bipungidi, bena lonji, bena diambu, banangi ba masanka, kabayi banange Nzambi. (2 Tim. 3:1-5) Nunku bidi mua kuikala bikole bua wewe nsonga kulama bikadilu biebe bimpe munkatshi mua bantu babi. Kadi dîba dionso diudi wenza bualu buimpe ne ubenga kuenza bualu bubi, udi uleja ne: udi muitabe mudi Yehowa mukumbane bua kuikala mfumu wa diulu ne buloba. (Yobo 2:3, 4) Udi kabidi umvua disanka bualu udi witaba padi Yehowa ukusengelela ne: ‘Muananyi, wikale ne meji, usankishe mutshima wanyi, bua mmanye mua kuitaba kudi muntu udi umpenda.’ (Nsu. 27:11) Paudi umanya kabidi ne: Yehowa udi ukuanyisha, bidi bikolesha dijinga diebe dia kumuenzela mudimu.

16. Mmushindu kayi uvua muanetu wa bakaji mukuabu musankishe mutshima wa Yehowa?

¹⁶ Muanetu wa bakaji Carol uvua mulamate mikenji ya mu Bible patshivuaye ulonga, ne bienzedi biende bimpe bivua bilenge bamue bantu. Ntshinyi tshivua tshienzeke? Balongi nende bavua bamuseka bualu kondo kende ka muoyo kalongesha kudi Bible kavua kamukandika bua kuenza mafesto ne bilele kampanda bia ditunga. Pavua malu aa amuenzekela, uvua upeta mushindu wa kuyisha bakuabu. Bidimu bia bungi pashishe, Carol wakapeta mukanda wa kudi mulongi wabu wa kale wamba ne: “Mvua anu njinga bua kupetangana nebe ne kukuela tuasakidila. Bikadilu biebe bimpe ne tshilejilu tshiebe tshimpe tshia nsonga muena Kristo ne muuvua ubenga kuenza mafesto ne dikima dionso biakandenga bikole. Uvua Ntemu wa Yehowa wa kumpala ungakamanya.” Bua mushindu uvua tshilejilu tshia Carol tshilenge mulongi wabu au bikole, wakalua  kutuadija kulonga Bible. Wakamba mu mukanda uvuaye mufundile Carol ne: uvua mutambule kukavua bidimu bipite pa 40. Anu bu Carol, nuenu bansonga badi balamate mikenji ya Nzambi ne dikima dionso lelu nudi mua kusaka bantu badi banange buakane bua kumanya Yehowa.

Bansonga badi batumbisha Yehowa

17, 18. (a) Ntshinyi tshiudi umvua bua bansonga badi mu tshisumbu tshienu? (b) Ntshinyi tshidi tshindile bansonga badi batshina Nzambi?

¹⁷ Tuetu bonso badi mu bulongolodi bua Yehowa tudi ne disanka dia kumona bansonga binunu ne binunu bamutendelela ne tshisumi pa buloba bujima. Bansonga ba tshitembu aba badi bakolesha dijinga diabu dia kutendelela Yehowa padibu badibadila Bible dituku dionso, basambila ne benza malu adi apetangana ne disua diende. Badi basankisha baledi babu ne Bantemu ba Yehowa bonso.​—Nsu. 23:24, 25.

¹⁸ Mu matuku atshilualua, bansonga ba lulamatu nebikale munkatshi mua bantu bapanduka bua kubuela mu bulongolodi bupiabupia budi Nzambi mutulaye. (Buak. 7:9, 14) Nebapetamu masanka kaayi kubala bualu nebatungunuke ne kunanga Yehowa ne kumutumbisha bua kashidi ne tshiendelele.​—Mus. 148:12, 13.

Newandamune munyi?

• Ntshinyi tshidi bansonga mua kuenza bua kutendelela Nzambi mulelela lelu?

• Bua dibala dia Bible kukuambuluishadi, bua tshinyi udi ne bua kuela meji pa biudi ubala?

• Mmushindu kayi udi disambila dikuambuluisha bua kushemakaja malanda ebe ne Yehowa?

• Bikadilu bimpe bia buena Kristo bidi biambuluisha ku tshinyi?

[Nkonko ya dilonga]

[Tshimfuanyi mu dibeji 5]

Udiku ne tshibidilu tshia kubala Bible dituku dionso anyi?