Udi muvuluke anyi?

Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

• Bua tshinyi Masiya uvua ne bua kufua?

Lufu lua Yezu luakaleja ne: muntu mupuangane udi mua kushala mulamate Nzambi nansha mu makenga a mushindu kayi. Wakafuta kabidi tshibawu tshia bubi budi bana ba Adama bapiane ne kubapesha mushindu wa kupeta muoyo wa tshiendelele.​—15/12, dibeji dia 22-23.

• Ntshinyi tshidi mua kuambuluisha muntu bua kuteka maluvu makole pa muaba wawu?

Disambila ne didilongela Bible bidi mua kumuambuluisha. Mbimpe ikale kabidi udikanda, ulamata ku dipangadika didiye muangate ne usungula balunda bimpe. Muntu udi musue kunua maluvu makole udi ne bua kumanya muaba udiye ne bua kushikila ne kubenga padibi bikengela kubenga.​—1/1, dibeji dia 7-9.

• Kuyukila bimpe ne bana kudi kumvuija tshinyi?

Kakuena kumvuija anu kuyukila nabu patupu to, kadi baledi badi ne bua kubela nkonko ne kuteleja mandamuna abu ne lutulu luonso. Baledi ba bungi mbafike ku dimona ne: tshikondo tshia kudia ntshimpe bua kuyukila ne bana.​—15/1, dibeji dia 18-19.

• Ndîba kayi didi muntu mua kutambula tshiakabidi?

Bidi mua kuenzeka nanku bikala tshikondo tshivua muntu mutambule uvua ne nsombelu kampanda anyi wenza bualu kansanga bubi mu musokoko buvuabu mua kumuipatshila mu tshisumbu bu yeye muikale ukavua mutambule.​—15/2, dibeji dia 22.

• Mu mufuanu wa Yezu wa mponda ne lupela, kukuna maminu mimpe kudi kuleja tshinyi?

Yezu Muana wa muntu, wakalongolola budimi pavuaye uyisha pa buloba. Kutuadijila mu Pentekoste wa mu 33, wakatuadija kukuma maminu mimpe pavua nyuma muimpe mutulukile bena Kristo ne kuluabu bana ba Nzambi anyi bana ba Bukalenge.​—15/3, dibeji dia 20.

• Mu mufuanu wa Yezu, mmushindu kayi uvuabu basangishe mponda mu diyeba dia Yehowa? (Mat. 13:30)

Bualu ebu budi butungunuka ne kuenzeka too ne mu matuku a ku nshikidilu kua tshikondo etshi. Badi basangisha mponda wa mu tshimfuanyi anyi bana ba Bukalenge bela manyi mu diyeba dia Yehowa padibu babuela mu tshisumbu tshiakajilula tshia bena Kristo anyi padibu bapeta difutu diabu mu diulu.​—15/3, dibeji dia 22.

• Nnganyi uvua ujadika mikanda ya mu Dipungila Dipiadipia ivua mifundisha ku nyuma wa Nzambi?

Ki nkasumbu ka tshitendelelu kampanda anyi mfumu wa tshitendelelu kansanga to. Kadi nyuma wa Nzambi ke uvua mulombole bena Kristo balelela bua kujingulula mikanda ivua Nzambi mufundishe ku nyuma wende. Bualu ebu budi bupetangana ne tshipedi tshia ‘kujingulula malu a nyuma’ tshivuabu bapeshe bena Kristo ba kumpala. (1 Kol. 12:4, 10)​—1/4, dibeji dia 28.