Utu ulekela Yehowa ukuela nkonko anyi?

MU BIBLE mudi nkonko ya bungi idi yelesha bantu meji. Mu kuamba kuimpe, Yehowa muine utu wela bantu nkonko bua kubalongesha malu a mushinga. Tshilejilu, wakela Kayina nkonko ya bungi pavuaye umudimuija bua kulekela meji ende mabi. (Gen. 4:6, 7) Misangu mikuabu Yehowa uvua wela muntu lukonko anu lumue bua kumufikisha ku dienza bualu kampanda buimpe. Tshilejilu, muprofete Yeshaya wakumvua Yehowa webeja ne: ‘Nentume nganyi, nganyi watuyila?’ Wakandamuna diakamue ne: ‘Mmeme eu, untume meme!’​—Yesh. 6:8.

Yezu mulongeshi munene uvua pende wela bantu nkonko bua kubeleshisha meji. Mu mukanda wa Matayo, wa Mâko, wa Luka ne wa Yone mudi nkonko mipite pa 280 ivuaye muele bantu. Nansha muvuaye imue misangu wela nkonko bua kupuwisha baluishi bende, misangu ya bungi uvua uyela bua kulenga mitshima ya bantu bavua bamuteleja ne kubasaka ku diela meji ku malanda abu ne Nzambi. (Mat. 22:41-46; Yone 14:9, 10) Bia muomumue, mupostolo Paulo uvua mufunde mikanda 14 ya mu Bible, wakela nkonko ivua ifikisha bantu ku ditaba malu avuaye ulongesha. (Lomo 10:13-15) Tshilejilu, mu mukanda uvuaye mufundile bena Lomo mudi nkonko mipite bungi. Nkonko ya Paulo ivua isaka bantu bavua bayibala bua kumanya ne kuanyisha ‘ndondo wa bubanji bua meji ne lungenyi bia Nzambi.’​—Lomo 11:33.

Kutu nkonko itu ilomba bantu bua kuandamuna, kadi kudi mikuabu idi ibasaka bua kuela meji bikole. Mu mukanda wa Matayo, wa Mâko, wa Luka ne wa Yone, Yezu mmutambe kuela bantu nkonko ivua ibelesha meji. Dituku dikuabu wakadimuija bayidi bende ne: ‘Tangilayi bimpe, nudimukile luevene lua Bafalese ne lua Helode.’ (Mâko 8:15; Mat. 16:12) Bayidi bende kabavua bumvue tshivuaye musue kuamba to, ke kutuadijabu kukokangana bua muvuabu bapue muoyo bua kuambula mampa. Tangila muvua Yezu mubele nkonko mu muyuki muipi wakalonda. ‘Wakabakonka ne: Nudi nuambidilangana ne: Mbua tuetu katuakangata mampa tshinyi? Kanuena bumvue bimpe too ne katataka anyi? Kanuena bamanye anyi? Mitshima yenu idi mikole anyi? Nudi ne mêsu, kanuena numona anyi? Nudi ne matshi, kanuena numvua anyi? Kanuena nujingulula bimpe too ne katataka anyi?’ Yezu uvua muele bayidi bende nkonko eyi bua kubeleshisha meji ne kubasaka bua kumvua bimpe tshivuaye musue kuamba.​—Mâko 8:16-21.

“Nenkukonke malu”

Yehowa Nzambi wakela mutendeledi wende Yobo nkonko bua kulongolola meji ende. Ku diambuluisha dia nkonko milondangane, wakamufikisha ku dimona muvuaye mukese pa kudifuanyikija ne Mufuki wende. (Yobo, nshap. 38-41) Yehowa uvuaku ukeba bua Yobo andamune ku lukonko luonso luvuaye umuela anyi? Bidi bimueneka ne: kabivua nanku to. Nkonko bu mudi lua ne: ‘Wewe wakadi kudi kunyi pangakajadika bishimikidi bia buloba?’ ivua ne bua kusaka Yobo ku diela meji ne ku dimona tshivuaye. Yehowa mumane kumuela ndambu wa nkonko mikole milondangane, Yobo wakapanga tshia kuamba. Wakamba anu ne: ‘Nenkukudimune wewe dîyi kayi? Ndi nteka tshianza tshianyi ku mishiku yanyi.’ (Yobo 38:4; 40:4) Yobo wakumvua tshivua Yehowa musue kumuambila ne wakadipuekesha. Kadi Yehowa kavua ukeba anu bua kulongesha Yobo bua kudipuekesha to. Wakamuambuluisha kabidi bua kuakaja meji ende. Mushindu kayi?

Nansha muvua Yobo “muntu wa mutshima mutoke ne wa malu makane,” kuvua misangu ivua mêyi ende aleja muvuaye ne mmuenenu mubi wa malu. Elihu wakamona bualu abu, ke  bualu kayi wakamubela patoke bualu “yeye wakadibingisha, kakabingisha Nzambi.” (Yobo 1:8; 32:2; 33:8-12) Nunku, nkonko ya Yehowa yakambuluisha kabidi Yobo bua kushintulula mushindu wende wa dimona malu. Wakakula ne Yobo mu mvunde ne kumuambila ne: ‘Eu nganyi udi usokoka meji mu mîdima ku mêyi adi kaayi ne lungenyi? Suika mukaba webe mu tshimono bu muntu mulume; bualu bua nenkukonke malu makuabu, ne wewe ummanyishewu.’ (Yobo 38:1-3) Ku diambuluisha dia nkonko, Yehowa wakakoka ntema ya Yobo ku meji ende adi kaayi ndekelu ne ku bukole buende budi bumuenekela mu bintu bidiye mufuke. Bualu ebu buakambuluisha Yobo bua kueyemena mushindu udi Yehowa ulumbuluisha ne wenza malu kupita kumpala. Bitu bienza buôwa bua kuedibua nkonko kudi Nzambi, kadi ke tshivua tshienzekele Yobo.

Mutudi mua kulekela Yehowa utuela nkonko

Netuambe tshinyi buetu tuetu? Nkonko idi mu Bible idiku mua kutuambuluisha petu anyi? Eyowa. Tuetu belelapu meji, neyituambuluishe bikole ne kutupetesha mabenesha a bungi a kudi Nzambi. Nkonko idi yeleshisha meji idi mu Dîyi dia Nzambi idi yambuluisha payi bua kuikaladi ne bukole bua bungi, bualu ‘bua dîyi dia Nzambi didi ne bukole, didi dijingulula lukasa meji ne malu adi mutshima musue kuenza.’ (Eb. 4:12) Kadi bua diodi kutuambuluisha bikole, tudi ne bua kudiela nkonko idimu anu bu ne: Yehowa nkayende ke udi utuelayi. (Lomo 15:4) Tuangatayi bilejilu bikese.

“Mulumbuluishi wa buloba buonso katu wenza bimpe anyi?” (Gen. 18:25) Abalahama wakela Yehowa lukonko elu pavua Nzambi musue kubutula Sodoma ne Amola. Bua Abalahama, Yehowa kavua mua kuenza bualu bubi bua kushipa bantu bimpe pamue ne bantu babi to. Lukonko luende elu luakaleja muvuaye ne ditabuja dikole mu buakane bua Yehowa.

Lelu kudi bantu badi mua kuikala ne tshibidilu tshia kukokangana pa mushindu wikala Yehowa ne bua kulumbuluisha bantu, bu mudi tshilumbu tshia kumanya bantu bapanduka ku Armagedone anyi babishibua. Pamutu pa kulekela nkonko ya mushindu eu itusamisha mutu, tuvulukayi lukonko lua Abalahama. Tuetu bamanye ne: Yehowa udi Tatu muimpe ne tueyemena ne muoyo mujima buakane ne luse luende anu bu Abalahama, nebituambuluishe bua kubenga kujimija dîba ne bukole ku miyuki idi ikebesha dielakana ne idi kayiyi ne dikuatshisha nansha dikese.

‘Mmuntu kayi wa munkatshi muenu, bikalaye utamba kuelangana meji, udi mumanye mua kulunga ku bule bua muoyo wende nkubita umue?’ (Mat. 6:27) Yezu wakela tshisumbu tshia bantu ne bayidi bende lukonko elu bua kubaleja ne: mbimpe baditeke mu bianza bia Yehowa udi mutunange. Ntatu ya mu matuku  a ku ndekelu kua tshikondo etshi idi ikebela bantu tunyinganyinga tua bungi, kadi kutamba kusamisha mutu bua ntatu eyi kakuena kulepesha matuku etu a muoyo anyi kualengeja to.

Dîba dionso ditudi tutuadija kusamisha mutu bua bualu buetu anyi bua bantu batudi banange, kuvuluka lukonko lua Yezu elu kudi mua kutuambuluisha bua kubenga kuditatshisha bikole. Kudi mua kutuambuluisha bua kubenga kuikala ne buôwa ne kuela meji ku malu adi mua kututekesha mu lungenyi anyi kutukebela masama. Anu bu muvua Yezu mutujadikile, Tatu wetu wa mu diulu utu udisha nyunyi ya mulu ne uvuadika bilongo bia mu mpata mmumanye bimpe bitudi tukengela.​—Mat. 6:26-34.

‘Muntu udi mua kuteka kapia mu tshiadi tshiende, bivualu biende kabiyi bipia anyi?’ (Nsu. 6:27) Nshapita tshitema ya kumpala ya mukanda wa Nsumuinu idi ne miyuki mîpi idi tatu ubela nayi muanende bua ikale ne meji. Lukonko ludi kulu elu ludi luleja ntatu idi kuenda masandi kukebela muntu. (Nsu. 6:29) Wewe mumone ne: ukadi mutuadije mananga ne muntu mukuabu anyi udi ne dijinga dibi dia kusangila ne muntu udi kayi bayebe anyi mukajebe, lukonko elu ludi ne bua kukudimuija. Muntu yonso udi ne bua kudiela lukonko elu dîba dionso didi muoyo wende umusaka bua kuenza bualu bubi. Ludi luleja patoke mudi Bible wambilamu padiye wamba ne: muntu ‘udi upola tshidiye ukuna.’​—Gal. 6:7.

‘Wewe udi nganyi udi ulumbuluisha muena mudimu wa mu nzubu wa mukuabu?’ (Lomo 14:4) Mu mukanda uvua Paulo mufundile bena Lomo, udi wakula bua bilumbu bivua bijuke mu tshisumbu tshia bena Kristo ba kumpala. Bu muvua bena Kristo bafumine mu bisamba bishilangane, kuvua bakuabu bavua ne tshibidilu tshia kulumbuluisha mapangadika ne bienzedi bia bena Kristo nabu. Lukonko lua Paulo luvua lubavuluija bua kusomba bimpe ne kulekela dilumbuluisha mu bianza bia Yehowa.

Bia muomumue lelu, Bantemu ba Yehowa mbafumine mu miaba mishilangane. Kadi Yehowa mmutusangishe mu buobumue bua dikema. Udiku udienzeja bua kubulama anyi? Tuetu ne tshibidilu tshia kupisha ne lukasa malu adi bana betu benza, mbimpe tudiele lukonko lua Paulo ludi kulu elu.

Nkonko idi ikolesha malanda etu ne Yehowa

Bilejilu bikese ebi bidi bileja bukole budi nabu nkonko idi mu Dîyi dia Nzambi. Kumanya tshivua tshisake bantu bua kuyela kudi mua kutuambuluisha bua kudielayi padi malu atutulukila. Patudi tubala Bible, netupete kabidi nkonko mikuabu idi mua kutuambuluisha.​—Tangila kazubu kadi mu dibeji dia 14.

Patudi tulekela nkonko idi yelesha meji idi mu Dîyi dia Nzambi ilenga mioyo etu, nebituambuluishe bua kuela meji ne kuenza malu bilondeshile njila miakane ya Yehowa. Panyima pa Yehowa mumane kumuela nkonko, Yobo wakamba ne: ‘Ngakumvua lumu luebe diambedi anu ku matshi, kadi mpindieu mêsu anyi akukumona.’ (Yobo 42:5) Yehowa wakalua muntu mulelela ku mêsu kua Yobo anu bu ne: uvua muimane kumpala kuende. Muyidi Yakobo wakalua kuamba bualu ebu mu mushindu eu ne: ‘Semenayi pabuipi ne Nzambi ne yeye neasemene pabuipi nenu.’ (Yak. 4:8) Nunku tulekelayi tshitupa tshionso tshia Dîyi dia Nzambi too ne nkonko idimu, tshituambuluishe bua kukolesha malanda etu ne Yehowa ne ‘kumumona’ bimpe menemene.

[Kazubu mu dibeji 14]

Mmunyi mudi kudiela nkonko eyi mua kukuambuluisha bua kumona malu bu Yehowa?

▪ ‘Yehowa udi utamba kusanka bua milambu ya kuosha ne nyama mishipa bu mudiye usanka bua kutumikila kua dîyi dia Yehowa anyi?’​—1 Sam. 15:22.

▪ ‘Yeye wakafuka dîsu, kena umona anyi?’​—Mus. 94:9.

▪ ‘Udi umona muntu udi wela meji ne: Ndi muena meji anyi?’​—Nsu. 26:12.

▪ ‘Udi wenza bimpe paudi ukuata tshiji nunku anyi?’​—Yona 4:4.

▪ ‘Biasumba muntu buloba buonso ku muoyo wende, mushinga wende muimpe udi penyi?’​—Mat. 16:26.

▪ ‘Udi mua kutupandulula ku dinanga dia Kristo nganyi?’​—Lomo 8:35.

▪ ‘Udi ne tshintu kayi tshiudi kuyi muangate kudi mukuabu?’​—1 Kol. 4:7.

▪ ‘Munya udi ne buobumue kayi ne mîdima?’​—2 Kol. 6:14.

[Tshimfuanyi mu dibeji 15]

Nkonko ivua Yehowa muele Yobo yakamulongesha tshinyi?