Kunyingalaji nyuma muimpe wa Yehowa nansha
Kunyingalaji nyuma muimpe wa Yehowa nansha
‘Kanunyingalaji nyuma muimpe wa Nzambi, nuakapebua tshimanyishilu kudiye munda muenu.’—EF. 4:30.
1. Mbualu kayi budi Yehowa muenzele bantu miliyo ne miliyo? Kadi ndibanza kayi didibu pabu nadi?
YEHOWA mmuenzele bantu miliyo ne miliyo badi pa buloba budi ne ntatu ebu bualu buimpe bua dikema. Mmubapeteshe mushindu wa kusemenabu pabuipi nende ku diambuluisha dia Muanende umuepele mulela Yezu Kristo. (Yone 6:44) Biwikala mumane kudilambula kudi Nzambi ne muikale ne nsombelu udi umvuangana ne kudilambula kuebe, ukadi pebe umue wabu. Muudi mutambule mu dîna dia nyuma muimpe, udi ne dibanza dia kuikala ne bikadilu bidi biumvuangana ne nyuma eu.—Mat. 28:19.
2. Nkonko kayi ituandamuna mu tshiena-bualu etshi?
2 Tuetu badi ‘bakunyina nyuma bintu’ tudi tuvuala bumuntu bupiabupia. (Gal. 6:8; Ef. 4:17-24) Kadi mupostolo Paulo udi utubela ne utudimuija bua katunyingalaji nyuma muimpe wa Nzambi. (Bala Efeso 4:25-32.) Mpindieu netuanji kukonkonona bimpe mubelu wa mupostolo Paulo eu. Ntshinyi tshivuaye usua kuamba pakakulaye bua kunyingalaja kua nyuma wa Nzambi? Mmushindu kayi udi muntu udi mudilambule kudi Yehowa mua kufika ku dinyingalaja nyuma wende? Ntshinyi tshitudi mua kuenza bua kubenga kumunyingalaja?
Tshivua Paulo musue kuamba
3. Mmushindu kayi uudi mua kumvuija mêyi adi mu Efeso 4:30?
3 Tshia kumpala, tuanji tumvue mêyi a Paulo akafundaye mu Efeso 4:30. Adi amba ne: ‘Kanunyingalaji nyuma muimpe wa Nzambi, nuakapebua tshimanyishilu kudiye munda muenu tshidiku too ne palua dituku dia bupikudi.’ Paulo kavua musue bua bena Kristo nende bavuaye munange banyangishishe malanda abu ne Yehowa to. Nyuma wa Yehowa nguvuabu babatue anyi ‘babapeshe nende tshimanyishilu munda muabu tshidiku too ne palua dituku dia bupikudi.’ Nyuma muimpe wa Nzambi nguvua ne ngutshidi tshimanyishilu anyi “tshieya” tshia malu atshilualua, tshidianjila kufila bua bela manyi badi bashala ne lulamatu. (2 Kol. 1:22) Tshimanyishilu etshi tshidi tshileja ne: bobu aba badi bintu bia Nzambi ne badi mu mulongo wa bantu bapeta muoyo mu diulu. Bonso badibu batua tshimanyinu etshi badi bantu 144 000.—Buak. 7:2-4.
4. Bua tshinyi mbimpe kuepuka bua kunyingalaja nyuma wa Nzambi?
4 Kunyingalaja nyuma mbualu bua kumpala budi mua kufikisha muntu ku dipangisha nyuma wa Nzambi kashidi bua kumulombola mu nsombelu wende wa buena Kristo. Bua kuleja ne: bualu ebu budi mua kuenzeka, budi bumuenekela ku tshivua Davidi muambe pakenzaye mpekatu ne Beta-sheba. Davidi wakalomba Yehowa unyingalala bua bubi buende ne: ‘Kungipatshi bua tshikadi kumpala kuebe, kungumushi nyuma webe muimpe.’ (Mus. 51:11) Anu bela manyi badi bashala ne lulamatu anyi ‘dieyemena too ne ku lufu’ ke bapeta “tshifulu tshia butumbi” tshia muoyo udi kawuyi mua kufua mu diulu. (Buak. 2:10; 1 Kol. 15:53) Bua bena Kristo badi ne ditekemena dia muoyo wa pa buloba kushalabu ne lulamatu kudi Nzambi ne kupeta dipa dia muoyo bua ditabuja diabu dia mulambu wa Yezu wa kupikula nawu bantu, badi pabu dijinga ne nyuma muimpe. (Yone 3:36; Lomo 5:8; 6:23) Nanku, tuetu bonso tudi ne bua kuepuka bua kunyingalaja nyuma muimpe wa Yehowa.
Mmushindu kayi udi muena Kristo mua kunyingalaja nyuma?
5, 6. Mmushindu kayi udi muena Kristo mua kunyingalaja nyuma wa Nzambi?
5 Mutudi bena Kristo badilambule, mbimpe tuepuke bua kunyingalaja nyuma. Tudi mua kufika ku diepuka bualu ebu anu patuikala ‘tuenda mu nyuma ne patuikala ne muoyo bua nyuma,’ bualu dîba adi nkuka ya mubidi ne bikadilu bikuabu bibi kabiakutupita bukole nansha. (Gal. 5:16, 25, 26) Kadi malu adi mua kushintuluka kabidi. Tudi mua kufika ku dinyingalaja nyuma wa Nzambi nansha kakese patudi tudilekelela tuenda tupambuka ku kakese ku kakese batangile ku bikadilu bidi Dîyi didi Nzambi mufundishe ku nyuma dikandika katuyi nansha pamuapa bamanye.
6 Tuetu tutungunuka ne kubenga kuya mudi nyuma utulombola, tudi mua kumunyingalaja, kunyingalaja mene ne Yehowa Muenayi. Tuetu bakonkonone Efeso 4:25-32, netumone mushindu utudi ne bua kudituala mu bikadilu bietu, kabidi bidi mua kutuambuluisha bua kubenga kunyingalaja nyuma wa Nzambi.
Mua kubenga kunyingalaja nyuma
7, 8. Umvuija tshitudi ne bua kuikadila bena bulelela.
7 Tudi ne bua kuikala bena bulelela. Bilondeshile Efeso 4:25, Paulo wakafunda ne: ‘Nulekele mashimi, muntu ne muntu nuambilangane ne muena mutumba nenu mêyi malelela; bualu bua tuetu tudi bitupa bia mubidi umue ne bakuabu.’ Mutudi badisange bu ‘bitupa bia mubidi umue ne bakuabu,’ katuena ne bua kushimakaja anyi kukeba mua kudingakaja bena Kristo netu ne muoyo umue nansha kakese, bualu aku kudi anu muomumue ne kubashima mene. Muntu yeye mutungunuke ne kushimakajangana nunku, neafike ndekelu wa bionso ku dishipa malanda ende ne Nzambi.—Bala Nsumuinu 3:32.
8 Mêyi ne bienzedi bidi bidinga bantu bidi mua kunyanga buobumue bua tshisumbu. Ke bualu kayi tudi ne bua kuikala bu muprofete Danyele uvua muntu wa kueyemena uvuabu kabayi mua kukuata ne bualu bubi. (Dan. 6:4) Tudi kabidi ne bua kuvuluka mubelu uvua Paulo mupeshe bena Kristo badi ne ditekemena dia kuya mu diulu wa ne: tshitupa tshionso tshia ‘mubidi wa Kristo’ tshidi mubidi umue ne bikuabu bionso ne tshidi ne bua kushala mu buobumue ne balongi ba Yezu bela manyi badi bena bulelela. (Ef. 4:11, 12) Tuetu bikale tutekemena muoyo wa kashidi pa buloba bukudimuna Mparadizu, tudi petu ne bua kuamba malu malelela bua kuambuluisha bua buobumue kuikalabu munkatshi mua bana betu ba buloba bujima.
9. Bua tshinyi mbimpe tutumikile mubelu udi mu Efeso 4:26, 27?
9 Tudi ne bua kukandamena Diabolo, katuyi tumushila mpunga wa kutuenzelaye bibi mu ditabuja. (Yak. 4:7) Nyuma muimpe udi utuambuluisha bua kukandamena Satana. Tshilejilu, tudi mua kuenza nanku patudi tudikanda ku tshiji tshia lukasa. Paulo wakafunda ne: ‘Nuikale ne tshiji kadi kanuenji bualu bubi; dîba kadibueledi tshiji tshienu; kanushidi Diabolo muaba.’ (Ef. 4:26, 27) Bualu kampanda bubi buobu butufikishe munda, patudi tuenza diakamue disambila mundamunda didi mua kutuambuluisha bua ‘kupolesha muoyo,’ kudikanda pamutu pa kuenza bualu budi mua kunyingalaja nyuma wa Nzambi. (Nsu. 17:27) Nunku, katushadi balame tshiji bua kushila Satana mpunga wa kutusaka bua kuenza bualu bubi to. (Mus. 37:8, 9) Mushindu umue wa kumukandamena ngua kujikija bilumbu pa lukasa, biumvuangane ne mubelu uvua Yezu mufile.—Mat. 5:23, 24; 18:15-17.
10, 11. Bua tshinyi katuena ne bua kuiba anyi kuenza malu adi kaayi malulame?
10 Katukuatshiki mu buteyi bua kuiba anyi dipanga bululame nansha. Paulo wakafunda bua buivi ne: ‘Muntu wakuiba, alekele kuiba; kadi akuate mudimu, enze budi buimpe ne bianza biende, bua yeye ikale ne tshia kupaye udi utshikengela.’ (Ef. 4:28) Muena Kristo ukadi mudilambule yeye muibe, udi bushuwa ‘unyangisha dîna dia Nzambi’ bualu udi udipendeshisha. (Nsu. 30:7-9) Muntu kena ne bua kuiba wamba ne: mbua dikenga to. Bantu badi banange Nzambi ne bena mutumba nabu mbamanye ne: kuiba nkubi.—Mâko 12:28-31.
11 Paulo kena anu utela bitudi katuyi ne bua kuenza, kadi udi uleja kabidi tshitudi ne bua kuenza. Tuetu bikale tuenda mu nyuma ne bikale ne muoyo bua nyuma, netuenze mudimu mukole bua kuambuluisha ba mu mêku etu ne kuikala kabidi ne ‘tshia kupa udi utshikengela.’ (1 Tim. 5:8) Yezu ne bapostolo bende bavua balama dikuta dia kuambuluisha nadi bapele, kadi Yudasa Isakaliote uvua mutungidianganyi wakibamu ndambu. (Yone 12:4-6) Nanku Yudasa kavua mulombola kudi nyuma muimpe to. Tuetu badi nyuma wa Nzambi ulombola tudi ‘tuenda bimpe mu malu onso’ anu muakenda Paulo. (Eb. 13:18) Mushindu au ke utudi tuepuka bua katunyingalaji nyuma muimpe wa Yehowa.
Mishindu mikuabu ya kubenga kunyingalaja nyuma muimpe
12, 13. (a) Nngakuilu kayi utudi ne bua kuepuka udi muleja mu Efeso 4:29? (b) Tudi ne bua kuikala ne ngakuilu wa mushindu kayi?
12 Tudi ne bua kulama ludimi luetu. Paulo wakamba ne: ‘Dîyi dibi kadipatuki mukana muenu; kadi ambayi anu mêyi mimpe adi mua kudiundisha bantu bua kuvuidijila bantu badi baumvua disanka.’ (Ef. 4:29) Apa kabidi Paulo kena anu utuambila patupu tshitudi katuyi ne bua kuenza, kadi udi utuambila ne tshitudi ne bua kuikala tuenza kabidi. Nyuma wa Nzambi neatusake bua ‘kuamba mêyi mimpe adi mua kudiundisha bantu badi baumvua bua kubavuidijila disanka.’ Kabidi, katuena ne bua kupatula ‘dîyi dibi’ mukana muetu nansha. Muaku wa mu tshiena Greke udibu bakudimune ne: ‘dibi’ bavua bawangata bua kumvuija tshimuma, tshikela, anyi munyinyi bikadi bibole binunka. Anu mutu biakudia bia mushindu eu bituenza miengu ke mutudi tukina ngakuilu udi Yehowa ubipisha.
13 Mêyi etu adi ne bua kuikala ne bukalanga, malenga, ‘matue bu luepu.’ (Kolos. 3:8-10; 4:6) Mbimpe bantu badijinguluile mutudi bashilangane ne bakuabu padibu bumvua ngakuilu wetu. Nanku tuikale tuakula mêyi “mimpe adi mua kudiundisha bantu” bua kubambuluisha. Tudimone muakadimona mufundi wa Misambu wakimba ne: ‘Mêyi a mukana muanyi ne meji andi ngela mu mutshima wanyi ikale mitabujibue ku mêsu kuebe, Yehowa, Dibue dianyi ne Mupikudi wanyi.’—Mus. 19:14.
14. Mbinganyi bidibu batele mu Efeso 4:30, 31 bitudi ne bua kulekela?
14 Tudi ne bua kulekela tshiji, luonji, dipendangana ne malu mabi makuabu onso. Paulo mumane kutudimuija bua kubenga kunyingalaja nyuma wa Nzambi, wakafunda ne: ‘Difika dia munda ne tshiji ne lukuna ne diyoyo ne dipendangana ne lukinu luonso biumushibue kunudi.’ (Ef. 4:30, 31) Bu mutudi bantu bena mibi, tuetu bonso tudi ne bua kudienzeja bikole bua kukanda meji etu ne bienzedi bietu. Tuetu bikale anu bena ‘bumfika munda, bena biji, bena lukuna,’ tudi bafuane kunyingalaja nyuma wa Nzambi. Bidi muomumue kabidi patudi tubalulula malu mabi adi bakuabu batuenzele, patudi tushala balaminangane munda, anyi patudi tubenga kulengejangana ne udi mutuenzele bibi. Nansha patudi tubanga kulengulula mibelu ya mu Bible, tudi mua kubanga kupeta bibidilu kampanda bidi mua kutufikisha ku dienzela nyuma bibi, bafuane tualua kupeta diakabi dibi menemene.
15. Bobu batuenzele bibi kudi muntu, ntshinyi tshitudi ne bua kuenza?
15 Tudi ne bua kuikala bena kalolo, ne mitshima ya luse, tulekelelangana bilema. Paulo wakafunda ne: ‘Nulejangane kalolo, nuikalangane ne mitshima ya luse, nulekelelangane malu mabi enu bu muakanulekelela Nzambi malu mabi enu mu Kristo.’ (Ef. 4:32) Nansha muntu mutuenzele bualu bubi budi bututape ku muoyo mushindu kayi, mbimpe tumubuikidilabu anu mutu Nzambi wenza. (Luka 11:4) Fuanyikijabi ne: muena Kristo nebe mmukuambe bualu kampanda bubi, mpindieu bua kubujikija, wewe kujinga bua kuyikila nende. Kadi mu diyikila nende, muanetu au udi unyingalala ne muoyo mujima, ukulomba luse. Paudi umufuila luse, udi kabidi ne tshikuabu tshiudi ne bua kuenza. Lewitiki 19:18 udi wamba ne: “Kudisombuedi, kuikadi ne lukuna kudi bana ba bana benu; kadi sua mukuenu bu mûdi mudisue: meme ndi Yehowa.”
Bidi bikengela kushala badimuke
16. Fila tshilejilu tshidi tshileja ne: tudi pamuapa ne bua kushintulula bibidilu bietu bua kubenga kunyingalaja nyuma wa Yehowa.
16 Nansha patudi pa nkayetu, tudi mua kumvua muoyo wa kuenza bualu kampanda budi bunyingalaja Nzambi. Tshilejilu, fuanyikija ne: muanetu kampanda mmufike pamuapa ku diteleja mijiki mibi idi bena Kristo kabayi ne bua kuteleja. Mpindieu kondo ka muoyo kadi kabanga ndekelu wa bionso kumulubakaja bua muvuaye kayi muteleje mibelu ya mu Bible idi mu mikanda ya ‘mupika wa lulamatu ne wa budimu.’ (Mat. 24:45, NW) Yeye kusambila pamuapa bua bualu abu, kuvulukaye ne mêyi a Paulo adi mu Efeso 4:30. Mpindieu ke kuangataye dipangadika dikole dia kubenga kuenza kabidi bualu budi mua kunyingalaja nyuma wa Nzambi ne upangadija bua kubenga kuteleja kabidi mijiki mibi. Yehowa neabeneshe muanetu eu bua lungenyi luende luimpe. Nanku, tutungunukayi ne kudilama bua kubenga kunyingalaja nyuma wa Nzambi.
17. Tuetu katuyi badimuke anyi badifile mu masambila ntshinyi tshidi mua kutuenzekela?
17 Tuetu katuyi badimuke ne badifile mu masambila, tudi bafuane kuditua mu bikadilu bia bukoya anyi bibi bidi mua kunyingalaja nyuma. Bu mudi nyuma muimpe upeteshangana ngikadilu idi ileja tshidi Tatu wetu wa mu diulu ne mushindu udiye umona malu, patudi tunyingalaja nyuma tudi tumunyingalaja pende anyi tumubungamija: bualu butudi katuyi basue bua butufikile. (Ef. 4:30) Bafundi ba bena Yuda ba mu bidimu lukama bia kumpala bavua bamba bishima bivua Yezu wenza ne: mbia kudi Satana. (Bala Mâko 3:22-30.) Baluishi ba Kristo abu bakenza bubi buvuabu kabayi mua kubabuikidila bualu bavua ‘bapende nyuma muimpe.’ Tudienzejayi bua katufikidi petu ku bualu bua mushindu au to!
18. Mmushindu kayi utudi mua kumanya ni katuena benze mpekatu udi Nzambi kayi mua kutubuikidila?
18 Bu mutudi katuyi nansha basue mene kufika pabuipi ne bubi budibu kabayi mua kutubuikidila, mbimpe tuikale tuvuluka tshiakamba Paulo bua dibenga kunyingalaja nyuma. Kadi tuetu benze bualu bubi menemene? Tuetu babutonde banyingalale, bakulu batuambuluishe, tudi mua kuamba ne: Nzambi mmutufuile luse, ne katuena benzele nyuma muimpe bibi to. Padi Nzambi utuambuluisha, tudi mua kuepuka kabidi bua kunyingalaja nyuma mu mishindu mikuabu yonso.
19, 20. (a) Ngamue malu kayi atudi ne bua kuepuka? (b) Tudi ne bua kudisuika bua kuenza tshinyi?
19 Nzambi udi usaka bantu bende ku dinanga, ku disanka, ne ku dikala mu buobumue ku diambuluisha dia nyuma wende muimpe. (Mus. 133:1-3) Nunku, tudi ne bua kudikanda bua kubenga kunyingalaja nyuma bua patudi tudibueja mu malu a bijanu bibi anyi tuamba malu adi akepeshisha kanemu kadibu ne bua kupesha badibu bateke bu balami ba mikoko kudi nyuma. (Bien. 20:28; Yuda 8) Pamutu pa nanku, tuetu tusakangane ku buobumue ne kanemu munkatshi muetu mu tshisumbu. Bushuwa, katuena ne bua kusakangana ku lungenyi lua tusumbusumbu pa kuenza mangomba munkatshi mua bantu ba Nzambi nansha. Paulo wakafunda ne: ‘Bana betu, ndi nusengelela bua dîna dia Mukalenge Yezu Kristo, bua buonso buenu nuambe dîyi diodimue, ne bua kakuikadi matapuluka munkatshi muenu; kadi bua nuenu nuikale bakajibue tshishiki mu meji amue ne mu lungenyi lumue.’—1 Kol. 1:10.
20 Yehowa mmusue kutuambuluisha bua kubenga kunyingalaja nyuma wende, ne udi ne bukole bua kutuenzela nanku. Tutungunukayi ne kumulomba nyuma wende muimpe ne tudisuike bua kubenga kumunyingalaja! Eyowa, tutungunukayi ne ‘kukunyina nyuma bintu’ pa kukeba bulombodi buende ne muoyo mujima kashidi too ne tshiendelele!
Newandamune munyi?
• Kunyingalaja nyuma wa Nzambi kudi kumvuija tshinyi?
• Mmushindu kayi udi muntu udi mudilambule kudi Yehowa mua kunyingalaja nyuma wende?
• Nngamue malu kayi atudi ne bua kuepuka bua kubenga kunyingalaja nyuma muimpe?
[Nkonko ya dilonga]
[Tshimfuanyi mu dibeji 30]
Nujikije bilumbu bienu ne lukasa
[Tshimfuanyi mu dibeji 31]
Ngakuilu webe utu mufuanangane ne tshimuma tshia mushindu kayi?
