Nkonko ya babadi

Bu mudi Yehowa mukandike kutendelela kua mpingu, bua tshinyi kavua mupeshe Alona dinyoka pavuaye muenze kana ka ngombe ka or?

Pavua Alona muenze kana ka ngombe ka or anu mudibi bilonda mu Ekesode nshapita wa 32, uvua mushipe mukenji wa Nzambi uvua ukandika ditendelela dia mpingu. (Ekes. 20:3-5) Bua bualu abu, ‘Yehowa wakadi ne Alona tshiji tshikole bua kumushipa; [Mose] wakalombela Alona musangu eu kabidi.’ (Dut. 9:19, 20) Dilomba dia Mose muntu muakane divuaku “ne bukole bua bungi” mu tshilumbu tshia Alona anyi? (Yak. 5:16) Eyowa, bidi bimueneka ne: bua dilomba adi ne bua malu makuabu abidi kabidi, Yehowa wakitaba disambila dia Mose, kubengaye kunyoka Alona.

Bua kumpala pamuapa mbua mukavua Alona mushale ne lulamatu kudi Yehowa bidimu bia bungi. Pavua Yehowa mutume Mose bua kumueneka kumpala kua Palô ne bua kupatula bena Isalele mu Ejipitu, Yehowa wakasungula Alona bua kuikalaye wenda ne Mose ne bua kuakula pa muaba wende. (Ekes. 4:10-16) Mose ne Alona bakaya kumpala kua mukalenge wa Ejipitu misangu ya bungi anu muvua Nzambi muambe, kutantamenabu mutu mukole uvua nawu Palô. Mushindu au ke uvua Alona mubange kuleja lulamatu luende kudi Yehowa ne kumuenzela mudimu wa lulamatu kubangila patshivuaye anu mu Ejipitu.​—Ekes. 4:21.

Buibidi, tangila tshivua tshifikishe Alona ku dienza kana ka ngombe ka or. Mose ukavua muenze matuku 40 ku mukuna wa Sinayi. ‘Pakamanya bantu ne: Mose wakashala ku mukuna musangu mule,’ bakasaka Alona bua kubenzelaye lupingu. Alona wakitaba, kubenzelaye lupingu lua or lua kana ka ngombe. (Ekes. 32:1-6) Kadi malu avua Alona muenze pashishe adi atuleja ne: kavua musue tshienzedi tshia ditendelela mpingu atshi to. Bidi bimueneka ne: uvua mutshienze ku tshimfula muoyo. Tshilejilu, pavua Mose mujule bualu bua dinyoka bavua mu tshilumbu atshi, bana ba Lewi bonso, too ne Alona, bakalamata ku luseke lua Yehowa. Bakashipa bantu binunu bisatu bijima bavua bajudije ditendelela dia mpingu adi.​—Ekes. 32:25-29.

Pashishe, Mose wakambila bantu bonso ne: “Nuenu nuakuenza bualu bubi bunene.” (Ekes. 32:30) Nanku, Alona kavua muambule bujitu bua bubi abu nkayende to. Yehowa wakaleja Alona ne bantu bonso luse luende lunene.

Panyima pa bualu bua kana ka ngombe ka or ebu, Yehowa wakamba bua bateke Alona muakuidi munene. Nzambi wakambila Mose ne: ‘Uluatshishe Alona bilulu bijidila, umuele manyi, umujidike, bua angenzele biende mudimu wa buakuidi.’ (Ekes. 40:12, 13) Mbimueneke ne: Yehowa uvua mufuile Alona luse. Mu muoyo wa Alona, uvua mulamate bikole ku ntendelelu mulelela, kadi ki nku buntomboji bua ditendelela dia mpingu to.