Nushale anu bakole mu ditabuja panudi nutshiunga wenu udi usama

PAKAMONABU kadipondo kavua kajuke Kim (Ntemu wa Yehowa) pabuipi ne mufuba wa muongo, bakamukuata disama dia kansere. * Bayende udi wamba ne: “Diakamue pavuabu bapande Kim bamumbushe kadipondo aku, bakabanga kumondopa ne biamu bia mîdima ne manga a kansere. Luondapu alu luvua lumushiya mutekete yonso. Katshivua kabidi ukokesha nansha mua kutambakana bipepele to.”

Tetabi kufuanyikija muvua Steve mua kukengakana ne muoyo pavuaye umona munanga wende utata ne bubedi bukole bua mushindu au! Pamuapa mu dîku dienu nudi mua kuikala penu ne wenu udi disama diende dienda anu dikola anyi udi bukulakaje butatshisha. (Buak. 12:1-7) Bikalabi nanku, udi mumanye ne: bua wewe kutshiunga wenu au bimpe menemene, mbimpe wewe muine kuanji kudivuluka pebe. Wewe mutekete mu ditabuja, meji ebe ne mubidi webe mbifuane pabi kubanga kusama, walua kupangila ne mua kukuatshisha ba mu dîku dienu ne bidibu nabi dijinga. Mmushindu kayi uudi mua kushala anu ne bukole mu nyuma panudi nutshiunga mubedi anyi mukulakaje wenu? Kudiku tshintu tshidi bena Kristo bakuabu badi mu tshisumbu mua kuenza bua kuleja mudibu baditatshisha bua babedi ba nunku anyi?

Mua kushala bakole mu ditabuja mmunyi?

Bua kushala ne ditabuja dikole ne makanda a mubidi paudi utshiunga mubedi wa mu dîku dienu, udi ne bua kumanya mua kuya mudi nsombelu uya ne mua kuenza malu ne dîba diebe ne bukole buebe bimpe. Nsumuinu 11:2 udi wamba ne: ‘Meji adi kudi bantu bapuekele.’ Mu mvese eu, muaku ‘bapuekele’ udi umvuija ne: badi bapuekele mbamanye bukole buabu ne butekete buabu. Bua kubenga kudisunsula ne malu adi makupite tshipidi, udi pamuapa mua kukonkonona tshidi programe webe ne midimu yudi nayi.

 Steve wakadileja muikale ne lungenyi ne bupuekele pakatangilululaye bungi bua midimu ivuaye nayi. Pa kumusha mudimu wende wa bianza, uvua kabidi mutangidi wa malu a kasumbu ka bakulu ne mutangidi wa mudimu mu tshisumbu tshia Bantemu ba Yehowa tshia muaba uvuabu mu ditunga dia Irlande. Uvua kabidi umue wa mu Komite wa Diumvuangana ne Mpitadi wa muabu uvuaye musombele. Steve udi wamba ne: “Kim kavuaku muanji kudilakana ne: mvua mmulenglule, ntamba kudifila anu ku midimu ayi to. Kadi mvua mudimanye ne: mvua ndisunsula ne midimu ivua mimpite tshipimu.” Kadi Steve wakajikija lutatu elu mushindu kayi? Udi wamba ne: “Pangakasambila e kuela meji bimpe, ngakalekela mudimu wa butangidi bua malu a kasumbu ka bakulu. Meme kushala anu mukulu, kadi pangakafila imue ya ku midimu yanyi ya mu tshisumbu kudi bakuabu, ngakapete dîba dia kusomba ne Kim ne mushindu wa kumutangila.”

Panyima pa matuku, Kim wakumvua bimpe. Steve ne Kim bakatangilulula nsombelu wabu, ke Steve kuangatulula midimu yende ivuaye nayi kumpala mu tshisumbu anu bua mushindu uvua mukajende umutua mpanda. Steve udi wamba ne: “Bubidi buetu tudi balonge mua kuenza malu bilondeshile mpunga udi masama atushila. Ndi ngela Yehowa tuasakidila wa bungi bua dituambuluisha diende, ngela ne mukajanyi bua muvuaye unkuatshisha kayi udilakana nansha muvuaye usama.”

 Tuangate kabidi tshilejilu tshia mutangidi wa tshijengu mukuabu, diende Jerry, ne mukajende Maria. Bavua ne bua kushintulula bipatshila biabu bua kupetabu mushindu wa kulama baledi babu bakulakaje. Maria udi wamba ne: “Bubidi buetu tuvua ne tshipatshila tshia kuya mu bumisionere mu ditunga dikuabu. Kadi Jerry uvua mulela nkaya kuabu, ne baledi bende bavua dijinga ne diambuluisha. Ke tuetu kuangata dipangadika dia kushala anu mu Irlande bua kubalama. Patuvua benze nanku, tuakapeta mushindu wa kulama tatuende wa Jerry kumpala kua kufuaye pavuaye mu lupitadi. Mpindieu tutu anu tuyikila ne mamuende wa Jerry dituku dionso, ne padibi bikengela kumuambuluisha, katutu kule to. Tshisumbu tshidi mamuende wa Jerry tshitu tshimuambuluisha bikole, abi bidi bituambuluisha petu bua kutungunuka ne mudimu wetu wa batangidi bena ngendu.”

Mudi bakuabu mua kuambuluisha

Pavua mupostolo Paulo wakula bua diambuluisha dia bakaji bakamba bavua mu tshisumbu, wakamba ne: ‘Bikala muntu kayi usubula badi bende ne ba mu nzubu muende mene, yeye wakadiula ditabuja diende ne udi mutambe muntu udi upidia kuitabuja bubi.’ Paulo wakavuluija bena Kristo nende ne: badi ne bua kuambuluisha baledi babu bakulakaje ne bakakuabu ne bidibu nabi dijinga bua ‘Nzambi kuitabuja’ bienzedi biabu. (1 Tim. 5:4, 8) Kadi bantu bakuabu pabu mu tshisumbu badi mua kufila diambuluisha ne badi ne tshia bua kuenza nanku.

Tuangate tshilejilu tshia tatu Hakan ne mukajende Inger, bakulakaje badi basombele mu ditunga dia Suède. Hakan udi wamba ne: “Pavuabu bakuate mukajanyi disama dia kansere, bivua bitutonde bonso bikole. Kuonso eku Inger uvua anu bimpe ne makanda onso. Katupa aka, tuetu kubanga kuya dituku dionso mu lupitadi bua kulonda buanga, eku manga mine au amutekesha kabidi bikole. Inger ukavua ushala anu kumbelu dîba adi, nunku nkamvua nshala nende bua kumubeja.” Ntshinyi tshivua ba mu tshisumbu tshia ba Hakan ne Inger benze bua kubambuluisha?

Bakulu ba mu tshisumbu atshi bakalongolola bua Hakan ne Inger kuikalabu balondela bisangilu bia bena Kristo ku telefone. Kabidi, bana betu bavua anu bapetangana nabu pavuabu baya kubakumbula ne pavuabu bababikila ku telefone. Bavua babafundila kabidi mikanda anyi mêyi makese pa tuarte. Hakan udi wamba ne: “Tuakadimuena diambuluisha dia bana betu ne dia Yehowa. Dituvuluka edi diakatuambuluisha bushuwa bua kushala bakole mu nyuma. Diakalenga, Inger kumvua bimpe, tuetu kumona mpindieu mua kutuadijilula kabidi kuya mu bisangilu ku Nzubu wa Bukalenge.” Padi badi mu tshisumbu benza muabu muonso bua kuambuluisha badi basama ne banunu badi munkatshi muabu, badi baleja mudibu ‘balunda balelela batu bananga mu bikondo bionso, ne mudibu bana betu batu baleja bulela mu tshikondo tshia dikenga.’​—Nsu. 17:17.

Yehowa udi wanyisha biudi wenza

Kutshiunga mulela wetu udi usama kudi mua kutshiokesha. Kadi mukalenge Davidi wakafunda ne: “Disanka didi kudi muntu udi wela meji a luse bua muntu udi ne mubidi mutekete” anu mutu muntu udi dijinga ne diambuluisha bua disama.​—Mus. 41:1.

Mmushindu kayi udi bantu badi babeja mubedi mua kuikala ne disanka? Nsumuinu 19:17 udi wamba ne: ‘Udi ufuila mupele luse udi usombesha Yehowa bintu; yeye neamuenzele bimpe ku buimpe buakumuenzeleye.’ Nzambi mulelela utu utabalela nangananga bantu badi bamuenzela mudimu ne lulamatu badi bakenga ne disama, ne udi ubenesha bantu badi babenzela malu mimpe. Davidi wakimba wamba ne: ‘Yehowa neakoleshe [muntu wa nunku] padiye ulala pa bulalu bua butekete bua mubidi wende; wewe wakukudimuna bulalu buende bua disama buonso bua yeye asangale.’ (Mus. 41:3) Tuikale bamanye ne: muntu utu uvuluka bakuabu ne dinanga yeye mupete pende nsombelu mikole anyi ntatu, Yehowa udi umuambuluishe pende.

Mbimpe bitambe bua kumanya ne: Yehowa Nzambi udi umona bitudi tuenza bua kutshiunga babedi ba mu mêku etu, ubianyisha! Nansha mudi kuenza bualu ebu kufuana kutulomba bia bungi, Bible udi utujadikila ne: “Nzambi udi usanka ne milambu ya nunku.”​—Eb. 13:16.

[Mêyi adi kuinshi]

[Bimfuanyi mu dibeji 18]

Nushale bakole mu ditabuja, nuitabe diambuluisha dia bakuabu