Tungunuka ne kuibidija meji ebe bimpe

KUBANDILA bantu bu mudi bedi ba tutungu padibu batuela kutu kuenza disanka bua kumona mutubu badikupa bapepele bikole. Bible udi ukolesha bena Kristo bua kuibidija meji abu anu mutu bedi ba tutungu badibidija bikole.

Mupostolo Paulo wakafundila bena Ebelu ne: ‘Biakudia bikole bidi bua bantu bakole, bia bobu mene badi ne meji abu mibidile a kujingulula nawu tshidi tshimpe ne tshidi tshibi, bualu bua bakalonda malu makane.’ (Eb. 5:14) Bua tshinyi Paulo wakakolesha bena Kristo bena Ebelu bua kuibidija meji abu anyi ngelelu wabu wa meji anu bu mutu muedi wa tutungu wibidija mubidi amu? Mmunshindu kayi utudi mua kuibidija meji etu?

‘Nuakadi kuikala bayishi’

Pavua Paulo ufunda bua kumvuija mudimu wa Yezu bu “muakuidi munene wa ku mulongo wa Melekisedeke,” wakafunda ne: ‘Bua bualu buende tudi ne malu a bungi a kuamba ne malu makole pa kunujinguluila, bualu bua nuenu nuakulua ne mapapa. Bualu bua musangu wakumana kulepa unuakadi kuikala bayishi, kadi nudi ne bualu kabidi bua bakuabu banuyishe nuenu mayisha a kumudilu a tshibangidilu tshia mêyi mamba kudi Nzambi; ne nuakulua bu badi ne mabele bualu, kanuena bu badi ne biakudia bikole bualu.’​—Eb. 5:10-12.

Mbimueneke ne: bamue bena Kristo ba bena Yuda ba mu bidimu lukama bia kumpala kabavua banji kukola mu ngumvuilu wabu wa malu anyi batante mu nyuma nansha. Tshilejilu, bivua bibakolela bua kuitaba butoke buvule buvuabu bapete pa bidi bitangila mikenji ya Mose ne ditengudibua. (Bien. 15:1, 2, 27-29; Gal. 2:11-14; 6:12, 13) Bivua bikolele bakuabu bua kulekela bilele bia bankambua babu bia malu a Nsabatu wa ku lumingu ne Dituku dia dibuikidila bantu mibi dia ku tshidimu. (Kolos. 2:16, 17; Eb. 9:1-14) Ke bualu kayi Paulo wakabakankamija bua kuibidija meji abu bua kumanyawu mua kusunguluja tshivua tshimpe ne tshivua tshibi, e kubambilaye bua kukola ‘kuya too ne ku buakane bua tshishiki.’ (Eb. 6:1, 2) Didimuija diende edi divua ne bua kuikala disake bakuabu ku diela meji a mushindu uvuabu bobu bela meji, ne pamuapa dibambuluishe bua kukola mu nyuma. Kadi tuambe tshinyi buetu tuetu?

Longesha meji ebe

Mmushindu kayi utudi mua kulongesha meji etu bua tuetu kulua bena Kristo bakole? Paulo wakamba ne: Mpa ‘kuibidija’ meji etu aa. Anu bu bedi ba tutungu batu bibidija mubidi wabu ne miskle yawu bua kudikupa bimpe bitambe mu mishindu idi kayiyi mipepele, tudi petu ne bua kulongesha meji etu mua kusunguluja tshidi tshimpe ne tshidi tshibi.

Mumanyi mukuabu wa malu a bikadilu bia bantu wa mu tshilongelu tshia malu a luondapu tshia ku Harvard, diende John Ratey, udi wamba ne: “Dilongesha ke bualu bumuepele budi butambe buimpe bua buongo buebe.” Mulombodi wa kasumbu kakuabu ka malu a dikulakaja, a makanda a mubidi ne a bukua bantu mu iniversite wa George Washington, diende Gene Cohen, udi wamba ne: “Patudi tuela meji a malu adi makole, buongo buetu budi busasa bupatula tutupa tukuabu tua bungi, biobi abi bilengeja kabidi mudimu wa bitupa bia mubidi.”

Nanku, patudi tulongesha meji etu ne tuvudija dimanya dietu dia Dîyi dia Nzambi, tudi tulua bena meji. Tuetu tuenza nanku, netushale badipaye bimpe bitambe bua kuenza ‘disua dia Nzambi didi diakane tshishiki.’​—Lomo 12:1, 2.

 Dijula dijinga dia kudia ‘biakudia bikole’

Tuetu basue bua ‘kuya too ne ku buakane bua tshishiki,’ mbimpe tudiele nkonko eyi: ‘Diumvua dianyi dia bulelela bua mu Bible didiku dienda dikola anyi? Bakuabu batuku bangangata bu muena Kristo ukadi mukole anyi?’ Mamu utu ne disanka dia kuamuisha muanende ne kumudisha patshidiye muana. Kadi elabi meji mudibi mua kumunyingalaja yeye mumone bidimu bipita, kadi muanende kayi anu witaba bua kudia biakudia bikole! Bia muomumue, tutu ne disanka patudi tumona muntu utudi tulonga nende Bible utanta ufika too ne ku didilambula ne ku batismo. Kadi muntu au yeye kayi mufike ku ditanta muye kumpala mu nyuma? Kabienaku mua kututekesha anyi? (1 Kol. 3:1-4) Mulongeshi utu anu utekemena ne: pakumbana tshikondo, mulongi wende mupiamupia nealue pende mulongeshi.

Kukuata mudimu ne meji etu bua kuelela malu kampanda lungenyi kudi kulomba kuelangana meji, abi bidi kabidi bilomba kudienzeja. (Mus. 1:1-3) Katuena ne bua kulekela malu adi afila ditanaji (bu mudi dimona TV anyi manaya adi kaayi alomba dinana dia lungenyi) atupangisha bua kuelela malu a mushinga meji nansha. Bua kufika ku dikala tuela meji bimpe, bidi bikengela tuetu kudijula dijinga dia kulonga Bible ne mikanda ya ‘mupika wa lulamatu ne wa budimu’ ne kudijikija. (Mat. 24:45-47, NW) Pa kumusha dikala ne programe wa kudibadila Bible misangu yonso, mbimpe tuetu kuditekela dîba dia kutendelela mu dîku ne kulonga amue malu a mu Bible mu bule ne mu butshiama buawu.

Muanetu Jerónimo udi mutangidi muena ngendu mu Mexique udi wamba ne: utu ulonga tshibejibeji tshionso tshia Tshibumba tshia Nsentedi diakamue anu padiye utshipeta. Utu kabidi muditekele dîba dia kulongabu bonso ne mukajende. Jerónimo udi wamba ne: “Meme ne mukajanyi tutu ne tshibidilu tshia kubala Bible pamue dituku dionso, ne tutu ne broshire wa ‘Bon pays’ bua kufika ku diumvua bimpe.” Ntemu mukuabu wa Yehowa, diende Ronald, udi wamba mutuye anu ulonda programe wa dibala dia Bible wa tshisumbu. Utu kabidi ne programe wa dilonga mukanda umue anyi ibidi. Ronald udi wamba ne: “Programe wanyi eu utu unsaka bua kuindila dîba dikuabu dia kulonga ne muoyo kulukulu.”

Tuambe bishi buetu tuetu? Tutuku tuangata dîba dikumbane bua kulonga Bible ne kuelangana meji bua malu adimu anyi? Tutuku tulongesha meji etu bua kupeta dimanya dia mua kuangata mapangadika adi umvuangana ne mêyi a mu Bible anyi? (Nsu. 2:1-7) Nanku tudifundilayi tshipatshila tshia kulua bena Kristo bakole mu nyuma badi ne dimanya ne meji bidibu nabi kudi bantu badi meji abu mibidija bua kusunguluja tshidi tshimpe ne tshidi tshibi!

[Tshimfuanyi mu dibeji 23]

Tudi tulongesha meji etu pa ‘kuibidija’